ARTICLE NI NGAN FIL 46
Rogon ni Ma Ayuwegdad Jehovah ni Ngad Athamgilgad u Fithik’ e Magawon Ndabi Chuw e Felfelan’ Rodad
“Jehovah e be gum’an’nag ir be sonnagmed ni ngam sulod ngak me ayuwegmed. Ra rin’ e n’en nib t’uf ni nge rin’ ni nge dag e runguy ngomed.”—ISA. 30:18, NW.
TANG 3 Gelngimad, nge Athap, nge Pagan’ Romad
TIN YIRA WELIY a
1-2. (a) Mang deer e gad ra weliy e fulweg riy? (b) Mang e be dag nri baadag Jehovah ni nge ayuwegdad?
RAYOG ni nge ayuwegdad Jehovah ni ngad athamgilgad u fithik’ e pi magawon ni gad ma mada’nag ma gad pigpig ngak u fithik’ e felfelan’. Uw rogon ni ma ayuwegdad? Ma uw rogon nrayog ni ngari yib angin e ayuw ni ma pi’ Jehovah ngodad? Gad ra weliy e fulweg ko gal deer ney ko re article ney. Machane som’on e ngad weliyed e fulweg ko re deer ni baaray ni be gaar: Rib m’agan’ Jehovah ngay ni nge ayuwegdad, fa?
2 Bay ba thin ni fanay apostal Paul u lan fagi babyor ni yoloy ngak e pi Hebrew nrayog ni nge ayuwegdad ni ngad nanged e fulweg riy. I yoloy ni gaar: “Somol e ir e be ayuwegeg, ere dab gu tamdag! Mang e rayog ni nge rin’ e girdi’ ngog?” (Heb. 13:6) I yog reb e babyor ni be weliy murung’agen e Bible ni fare thin ni “ir e be ayuwegeg” ni kan fanay u roy e be yip’ fan be’ ni ke mil i yan ngak be’ ni be man ayuw. Mu susunnag Jehovah ni be mil i yan ngak be’ ni ke t’uf e ayuw rok. Ba mudugil nra m’agan’um ngay nre n’ey e be dag nri baadag Jehovah ni nge ayuwegdad. Faanra ayuwegdad Jehovah, ma rayog ni ngad athamgilgad u fithik’ e pi magawon ni gad be mada’nag ndabi chuw e felfelan’ rodad.
3. Mang dalip e kanawo’ ni ma ayuwegdad Jehovah riy ni ngad athamgilgad u fithik’ e pi magawon ni gad be mada’nag ndabi chuw e felfelan’ rodad?
3 Mang boch e kanawo’ ni ma ayuwegdad Jehovah riy ni ngad athamgilgad u fithik’ e pi magawon ni gad be mada’nag ndabi chuw e felfelan’ rodad? Ra ngad nanged e fulweg riy ma ngad guyed bang ko fare babyor rok Isaiah. Mang fan? Boor e yiiy nni thagthagnag nga laniyan’ Isaiah ni nge yoloy ni ku bay rogon ko pi tapigpig rok Got e ngiyal’ ney. Maku reb e, ba ga’ ni ma weliy Isaiah murung’agen Jehovah ni be fanay boch e thin nib mom ni ngan nang fan. Bay boch e pi thin ney ko Isaiah ko guruy ni 30. I fanay Isaiah boch e fanathin nib manigil u lan e re guruy nem ni nge weliy rogon ni ma ayuweg Jehovah e girdi’ rok. I yoloy nrogon ni ma ayuwegdad Jehovah e aram e (1) ma fal’eg e motoyil ngodad me fulweg taban e meybil rodad, (2) ma be pow’iydad, (3) ma be tow’athnagdad e chiney nge boch nga m’on. Ere chiney e ngad weliyed e re dalip i kanawo’ ney ni ma ayuwegdad Jehovah riy.
MA MOTOYIL JEHOVAH NGODAD
4. (a) Mang e yog Jehovah u murung’agen e pi Jew u nap’an Isaiah, ma mang e pag ni nge buch rorad? (b) Mang e yog Jehovah ngak e pi Jew ni yad ba yul’yul’ nra pi’ e l’agan’ ngorad? (Isaiah 30:18, 19)
4 U tabolngin e Isaiah ko guruy ni 30 e yog Jehovah riy ni pi Jew e ‘yad be togopluw ngak’ ara yad ba gelan’, ma yad be “yin’ daken e denen ni yad be rin’.” Ki ulul ngay ni gaar: “Yad be togopluw ngak Got, . . . ndaburad ni ngar motoyilgad ko fonow rok Got ngorad.” (Isa. 30:1, 9) Bochan ndubrad ni ngar motoyilgad ma aram fan ni yiiynag Isaiah nra pagrad Jehovah ni ngar gafgowgad. (Isa. 30:5, 17; Jer. 25:8-11) Ma aram e n’en ni buch u nap’an nni fekrad nga Babylon ni yad ba kalbus. Machane bay boch e pi Jew nem nra pared ni yad ba yul’yul’, ma bay ban’en ni yog Isaiah ni pi’ e l’agan’ ngorad. I yog ngorad nra taw nga ba ngiyal’ ma ra sulwegrad Jehovah nga Jerusalem. (Mu beeg e Isaiah 30:18, 19, NW. b) Ma aram e n’en ni buch, ya chuwegrad Jehovah u kalbus. Machane boor e duw nga tomuren mfin ni pagrad u kalbus. Fare thin ni “Jehovah e be gum’an’nag ir be sonnagmed ni ngam sulod ngak me ayuwegmed” e be dag ni bay n’umngin nap’an mfin ni chuweg e piin yad ba yul’yul’ u kalbus. Bin riyul’ riy e 70 e duw ni par piyu Israel u Babylon ni yad ba kalbus u m’on nni pag boch i yad ni ngar sulod nga Jerusalem. (Isa. 10:21; Jer. 29:10) Nap’an ni ur moyed u Babylon ma ur yorgad ni bochan e kari kireban’rad, machane nap’an nra sulod nga taferad mar yorgad nga gelngin ni kar ra felfelan’gad.
5. Mang e be micheg fare thin ko Isaiah 30:19 ngodad?
5 Rayog ni nge fal’eg fapi thin lanin’dad ni be gaar: “Nap’an ni ga ra yornag e ayuw ngak ma ra ayuwegem.” (Isa. 30:19) Be micheg Isaiah ngodad nra fal’eg Jehovah e motoyil ngodad u nap’an ni gad ra yornag e ayuw ngak, ma ra fulweg taban e meybil rodad nib papey. Ki ulul ngay ni gaar: “Nap’an ni yug ra rung’ag e meybil rom me fulweg taban.” Be puguran e pi thin ney ngodad nri baadag e Chitamangidad ni bay u tharmiy ni nge ayuweg e piin yad be man ayuw ngak. Gad ra nang e re n’ey ma ra ayuwegdad ni ngad athamgilgad u fithik’ e pi magawon ni gad be mada’nag ndabi chuw e felfelan’ rodad.
6. Uw rogon ni be dag fapi thin ni yog Isaiah ni ma motoyil Jehovah ko meybil ni ma tay reb nge reb e tapigpig rok?
6 Mang e ku be fil e re thin ney ngodad u murung’agen e meybil rodad? Ma motoyil Jehovah ko meybil rodad ni be’ nge be’. Mang fan nrayog ni nga dogned e re n’ey? Gin som’on ko Isaiah ko guruy ni 30 e kan fanay fare bugithin riy ni “gimed” ni bochan e be non Jehovah ko girdi’ rok ni yad gubin. Machane verse 19 e be non riy ngorad ni be’ nge be’. I yoloy Isaiah ni gaar: “Bay mu par ndab kum yor”; “ra ayuwegem”; “ra rung’ag e meybil rom me fulweg taban.” Bochan ni Jehovah e ir reb e Matam ni ma t’ufegey, ma der ma gaar ngak reb i fak ni ke mulan’, “Susun e ngam bod walagem ni be par nib gel.” Ya ma lemnagdad ni be’ nge be’, ma ma motoyil ko meybil rodad.—Ps. 116:1; Isa. 57:15.
Mang e be yip’ fan fapi thin ni yog Isaiah ni be gaar: “Thingar dab [mu] paged [Jehovah] nge toffan”? (Mu guy e paragraph 7)
7. Uw rogon ni tamilangnag Isaiah nge Jesus fan nib t’uf ni ngaud pared ni gad be meybil?
7 Nap’an ni gad ra meybil ngak Jehovah ni ngad weliyed ngak murung’agen ban’en ni be magawonnag lanin’dad, ma som’on e sana ra pi’ gelngidad ni ngad athamgilgad u fithik’ fare magawon. Ma faanra der chuw fare magawon, ma sana ba t’uf ni ngad meybilgad ngak ni boor yay ni nge pi’ gelngidad ni ngad athamgilgad u fithik’. Ma ireray e n’en baadag ni ngad rin’ed nrogon ni m’ug ko fapi thin ni yog Isaiah ni gaar: “Thingar dab [mu] paged [Jehovah] nge toffan.” (Isa. 62:7, BT) Mang e be yip’ fan e re n’ey? Susun e ngad pared ni gad be meybil ngak Jehovah ni gowa darud paged ni nge toffan. Pi thin ney ni yog Isaiah e be puguran ngodad fare fanathin ni weliy Jesus ni murung’agen e meybil ni bay ko Luke 11:8-10, 13. Be pi’ Jesus e athamgil nga lanin’dad u roy ni ngad ‘pared ngaud’ meybilgad ma gad be ‘ning’ gelngin Got nib thothup. Ku rayog ni ngad weniggad ngak Jehovah ni nge pow’iydad ya nge yag ni ngad dugliyed e n’en nib fel’ ni ngad rin’ed.
MA POW’IYDAD JEHOVAH
8. Uw rogon ni lebug fapi thin ni bay ko Isaiah 30:20, 21 kakrom?
8 Mu beeg e Isaiah 30:20, 21. Nap’an ni longobiy e pi salthaw nu Babylon yu Jerusalem nreb e duw nge baley, mi ri gafgow e girdi’ nge yan i taw nga reb e dodow ni gowa kar mechamgad ngay ni bod e flowa nge ran. Machane i micheg Jehovah ngak e pi Jew ko verse 20 nge 21 ni faanra ra kalgadngan’rad mar thilyeged e ngongol rorad, ma aram e ra ayuwegrad. I yog Isaiah ni Jehovah e ‘ir e be fonownagrad,’ me micheg ngorad nra fil Jehovah ngorad rogon ni ngar liyorgad ngak u reb e kanawo’ nib m’agan’ ngay. I lebug e pi thin nem u nap’an nni pag e pi Jew u kalbus. I dag Jehovah ngorad ni ir e En Be Fonownagrad, me pow’iyrad ni ngar sulweged e bin riyul’ e liyor nga rogon. Gad ba tow’ath ni Jehovah e ir e En Be Fonownagdad e ngiyal’ ney.
9. Mang reb e kanawo’ ni ma pow’iydad Jehovah riy e ngiyal’ ney?
9 I yog Isaiah ko gal verse ney ni gad bod e piin yibe skulnagrad ni l’agruw e kanawo’ ni be skulnagdad Jehovah riy. Som’on e gaar Isaiah: “Bay u rom ni bayi fonownagmed, ndakuriy rogon ni ngam gaweged i yan nga bang.” I yog Isaiah ko re fanathin ney ni gowa bay e En Be Fonownagey u p’eowchen e piin be skulnagrad. Ri gad ba tow’ath ni be skulnagdad Got e ngiyal’ ney. Ni uw rogon? Ma rin’ u daken e ulung rok. Ri gad ba felfelan’ ko fonow ni ma pi’ Jehovah ngodad u daken e ulung rok nib tamilang! Pi fonow ni yima pi’ ngodad u daken e pi muulung, nge convention, nge pi babyor rodad, nge pi broadcast, nge ku boch ban’en e ma ayuwegdad ni ngad athamgilgad u fithik’ e pi magawon ni gad be mada’nag ndabi chuw e felfelan’ rodad.
10. Uw rogon ni gad ma rung’ag ba ‘lam nga fiti keru’dad’?
10 I weliy Isaiah murung’agen e bin l’agruw e kanawo’ ni ma skulnagdad Jehovah riy ni gaar: “Gimed ra rung’ag lungun nga fiti keru’med.” I taarebrogonnag e re profet ney Jehovah ngak be’ ni be skulnagey ni bay u fiti keru’ e piin be skulnagrad ni be yog ngorad e gin ngar sorgad ngay. Ngiyal’ ney e gad ma rung’ag lungun Got nga fiti keru’dad. Ni uw rogon? Ke n’uw nap’an ni kan yoloy e thin rok Got ni kan thagthagnag nga lan e Bible. Ere nap’an ni gad ra beeg e Bible, ma gowa gad be rung’ag lungun Got ni be non nga fiti keru’dad.—Isa. 51:4.
11. Faanra ngad ululgad ko pigpig ni gad be tay u fithik’ e felfelan’ ni yugu aram rogon ni gad be mada’nag e magawon, ma mang e ba t’uf ni ngad rin’ed? Mang fan?
11 Uw rogon nrayog ni ngari yib angin e fonow ni ma pi’ Jehovah ngodad u daken e ulung rok nge Thin rok? Mu tay fanam i yan riy ni l’agruw ban’en ni yog Isaiah. Som’on e gaar, “baaray e wo’.” Bin migid me gaar, “mu leked.” (Isa. 30:21, BT) De gaman ni kemus ni ngad nanged e re pa’ i “wo’” nem, ya kub t’uf ni ngad “leked.” Gad ma nang e n’en nib m’agan’ Jehovah ngay ni ngad rin’ed u daken e Thin rok nge rogon ni ma weliy e ulung rok fan e thin rok ngodad. Ku gad ma fil rogon ni ngad folgad ko n’en gad be fil. Ere faanra ngad ululgad ko pigpig ni gad be tay ngak Jehovah u fithik’ e felfelan’ ni yugu aram rogon ni gad be mada’nag e magawon, mab t’uf ni ngad rin’ed e gali n’ey. Faan gad ra rin’ e re n’ey, ma aram e ra tow’athnagdad.
MA TOW’ATHNAGDAD JEHOVAH
12. Uw rogon ni tow’athnag Jehovah e girdi’ rok nrogon ni be yog e Isaiah 30:23-26?
12 Mu beeg e Isaiah 30:23-26. Uw rogon ni lebug e re yiiy ney ni fan ngak e pi Jew nra sulod nga Israel u tomuren nni pagrad u kalbus u Babylon? Boor ban’en ni pi’ Jehovah ngorad nra ayuwegrad ni ngar pared ni yad ba fos mar ululgad ko pigpig ni yad be tay ngak. Boor e ggan ni pi’ Jehovah ni ngar ked. Machane bin th’abi ga’ fan riy e pi’ urngin ban’en nib t’uf rorad ya nge yag nra chugurgad ngak mar liyorgad ngak bayay u rogon kanawoen nib puluw ni ngar rin’ed. Pi tow’ath ni pi’ Got ngorad e ngiyal’ nem e ka boor nde chugur ni nge taareb rogon nga urngin e tin ni i yag ngorad u m’on riy. Be dag e verse 26 ni ayuwegrad Jehovah ni ngari tamilang e Thin rok u wan’rad. (Isa. 60:2) Pi tow’ath ni pi’ Jehovah ngak e pi tapigpig rok e pi’ gelngirad me ayuwegrad ni ngar ululgad ko pigpig ni yad be tay ngak u fithik’ e “felfelan’.”—Isa. 65:14, BT.
13. Uw rogon ni ke lebug fare yiiy ni murung’agen e bin riyul’ e liyor ni yira sulweg nga rogon e ngiyal’ ney?
13 Gur, bay rogon fare yiiy ni murung’agen e bin riyul’ e liyor ni yira sulweg nga rogon ngodad e ngiyal’ ney, fa? Arrogon! Ni uw rogon? Ka nap’an e duw ni 1919 C.E., ma bokum milyon e girdi’ ni kar chuwgad ko fare Babylon nib Gilbuguwan ni be yip’ fan e pi yurba’ i teliw ni googsur u fayleng. Kan pow’iyrad nga bang ni kab fel’ ko fare Nam ni Kan Micheg nni pi’ ngak piyu Israel, ni aram fare paradis ni be yip’ fan ban’en. (Isa. 51:3; 66:8) Mang e re paradis nem ni be yip’ fan ban’en?
14. Mang fare paradis ni be yip’ fan ban’en, ma mini’ e be par riy e ngiyal’ ney? (Mu guy Fan Boch e Thin.)
14 Ka nap’an e duw ni 1919 C.E. ni be par e piin kan dugliyrad u lan e re paradis nem ni be yip’ fan ban’en. c Piin yad be athapeg e par u fayleng ara “yugu boch e saf” e kur uned nga lan e re nam nem ni be yip’ fan ban’en, maku boor e tow’ath ni ke pi’ Jehovah ngorad.—John 10:16; Isa. 25:6; 65:13.
15. Uw e bay fare paradis riy ni be yip’ fan ban’en?
15 Uw e bay fare paradis riy ni be yip’ fan ban’en e ngiyal’ ney? Gubin yang u fayleng ni bay e pi tapigpig rok Jehovah riy. Ere re paradis ney ni be yip’ fan ban’en e ku ga’ngin yang e fayleng ni bay riy. Ngiyal’ ney e rayog ni ngad uned nga lan e re paradis ney ni faanra gad be un i ayuweg e bin riyul’ e liyor ndemtrug e gin gad be par riy u fayleng.
Uw rogon nrayog ni nge bagadad me un i ngongliy fare paradis ni be yip’ fan ban’en ni nge yan i par ni kari gamog? (Mu guy e paragraph 16-17)
16. Uw rogon ni ngad ululgad i yaliy fel’ngin fare paradis ni be yip’ fan ban’en?
16 Ra ngad pared u lan e re paradis ney ni be yip’ fan ban’en, ma bay boch ban’en nthingar da rin’ed nib muun ngay ni nga i par nib ga’ fan u wan’dad e ulung ni Kristiano ni bay u ga’ngin yang e fayleng. Uw rogon ni ngad rin’ed e re n’ey? Aram e ngaud sapgad nga fel’ngin pi walagdad ma gathi thibngirad. (John 17:20, 21) Mang nrib ga’ fan e re n’ey? Am lemnag e re n’ey. Gad ra yan nga lan reb e milay’ nib fel’ yaan ma boor ken e gek’iy ni gad ra guy riy nib thilthil. Ere ku arrogon e ulung rodad e ngiyal’ ney nib thilthil e girdi’ riy ni bod fa yu ke gek’iy. (Isa. 44:4; 61:3) Ba t’uf ni ngad ululgad i yaliy fel’ngin fa “yu ke gek’iy ni gubin ni bay u taabang,” ma gathi ngad yaliyed thibngin e “yu ken” ni bay nib chugur ngodad. Ere dab da paged thibngidad ara thibngin yugu boch e girdi’ u lan e ulung ni nge k’aringdad ndab kud sapgad nga fel’ngin e ulung ni Kristiano ni bay u ga’ngin yang e fayleng nib taareban’ e girdi’ riy.
17. Mang e rayog ni ngad rin’ed ni be’ nge be’ ya nge yag ni par e ulung rodad ni bay e taareban’ riy?
17 Mang e rayog ni ngad rin’ed ni be’ nge be’ ya nge yag ni par e ulung rodad ni bay e taareban’ riy? Aram e ngaud guyed rogon ni ngaud pared ni bay e gapas u thildad. (Matt. 5:9; Rom. 12:18) Urngin yay ni gad ra guy rogon ni nga i par ni bay e gapas u thildad e girdi’ u lan e ulung, ma aram e gad be un i ngongliy fare paradis ni be yip’ fan ban’en ni nge yan i par ni kari gamog. Dab da paged talin ni gad gubin ni gad bay u lan e re paradis ney, ma Jehovah e ir e ke pow’iydad ko bin riyul’ e liyor. (John 6:44) Am lemnag gelngin e felfelan’ ni ma tay Jehovah u nap’an nra guy ni gad be maruwel nib gel ni ngad mon’ognaged e gapas nge taareban’ ni bay u thilin e pi tapigpig rok nrib ga’ farad u wan’!—Isa. 26:3; Hag. 2:7.
18. Mang e susun ni ngaud pared ni gad be fal’eg i lemnag, ma mang fan?
18 Uw rogon nrayog ni ngari yib angin ngodad e pi tow’ath ni be pi’ Got ko pi tapigpig rok? Rayog ni ngad fal’eged i lemnag e pi n’en gad ma fil u lan e Thin rok Got nge pi babyor rodad nib puluw e thin riy ko Bible. Ra ud rin’ed e re n’ey ma ra ayuwegdad ni ngad maruweliyed e pi fel’ngin e Kristiano nra k’aringdad ni ngaud guyed rogon ni ‘nge bagadad me t’uf bagadad rok’ u lan e ulung. (Rom. 12:10) Ra ud fal’eged i lemnag e pi tow’ath ni be yag ngodad e chiney, ma aram e gad be gelnag e tha’ u thildad Jehovah. Ku gad ra fal’eg i lemnag e pi tow’ath nra pi’ Jehovah ngodad boch nga m’on, ma aram e rayog ni ngaud pared ni gad be athapeg e ngiyal’ nrayog ni ngad pigpiggad riy ngak ndariy n’umngin nap’an. Gubin e pi n’ey nra ayuwegdad ni nge gel e felfelan’ rodad ko pigpig ni gad be tay ngak Jehovah e chiney.
KAD DUGLIYED U WAN’DAD NI NGAD ATHAMGILGAD
19. (a) Mang e rayog ni nge pagan’dad ngay nrogon ni be yog e Isaiah 30:18? (b) Mang e ra ayuwegdad ni ngad pigpiggad u fithik’ e felfelan’ ni yugu aram rogon ni gad be mada’nag e magawon?
19 Ra rin’ Jehovah e “n’en nib t’uf ni nge rin’” ni fan ngodad u nap’an nra thang e re fayleng nib kireb ney. (Isa. 30:18) Gad manang ni Jehovah e “ir e Got ko tin nib mat’aw,” ma dabi pag e re fayleng rok Satan ney ni nge par nge pag n’umngin nap’an e ngiyal’ ni ngan thang riy. (Isa. 25:9) Ere gad be gum’an’naged gadad gad be sonnag e ngiyal’ ni yira chuwegdad u fithik’ e gafgow ni ku bod e n’en be rin’ Jehovah. Machane chiney ni gad be sonnag e re ngiyal’ i n’em e kad dugliyed u wan’dad ni ngaud pared nib ga’ fan e meybil u wan’dad, ma gad be fil e Thin rok Got ma gad be fal’eg i lemnag, ma gad be fal’eg i lemnag e pi tow’ath rodad. Gad ra rin’ e re n’ey, ma ra ayuwegdad Jehovah ni ngad pigpiggad ngak u fithik’ e felfelan’ ni yugu aram rogon ni gad be mada’nag e magawon.
TANG 142 Ngad Chichiiyed Pa’dad ko Athap Rodad
a Re article ney e be weliy dalip e kanawo’ ni ma ayuwegdad Jehovah riy ni ngad athamgilgad u fithik’ e pi magawon ni gad be mada’nag ndabi chuw e felfelan’ rodad. Gad ra fil murung’agen e pi ayuw ney ni ma pi’ ngodad nrogon ni bay ko Isaiah ko guruy ni 30. Nap’an ni gad be fil e n’en bay ko re guruy ney, ma ra puguran ngodad feni ga’ fan ni ngaud meybilgad ngak Jehovah, ma gad be fil e Thin rok, ma gad be fal’eg i lemnag e pi tow’ath ni bay rodad e chiney nge tin nra yag ngodad boch nga m’on.
b Isaiah 30:18, 19 (NW): “Machane Jehovah e be gum’an’nag ir be sonnagmed ni ngam sulod ngak me ayuwegmed. Ra rin’ e n’en nib t’uf ni nge rin’ ni nge dag e runguy ngomed. Ya Jehovah e ir e Got ko tin nib mat’aw. Ba felfelan’ e piin yad be sonnag. Nap’an nra yib e girdi’ ra pared nga Zion u Jerusalem, ma bay mu par ndab kum yor. Nap’an ni ga ra yornag e ayuw ngak ma ra ayuwegem; nap’an ni yug ra rung’ag e meybil rom me fulweg taban.”
c FAN BOCH E THIN: Nap’an ni gad ra liyor ngak Jehovah nib taareban’dad ma aram e gad bay u lan fare “paradis ni be yip’ fan ban’en.” Ireray e gin be fil Jehovah riy ngodad urngin ban’en nib t’uf ni ngad nanged ya nge yag nda pigpiggad ngak ni kad paloggad ko pi ban ko pi yurba’ i teliw, maku boor e maruwel ni bay riy ni ngad rin’ed ni fan ko fare thin nib fel’ ni murung’agen Gil’ilungun Got ni ngan machibnag. Ba chugur thildad Jehovah, mab gapas thildad pi walagdad, ma yad ma ayuwegdad ni ngad athamgilgad u fithik’ e pi magawon ni gad be mada’nag ndabi chuw e felfelan’ rodad. Nap’an ni gad ra tabab ni ngad liyorgad ngak Jehovah u rogon kanawoen nib puluw ni ngad rin’ed riy ma gad athamgil u rogon nrayog rodad ni ngad folwokgad rok, ma aram e ngiyal’ ni ka darod nga lan fare paradis ni be yip’ fan ban’en.