1. Mang e gad manang nra buch, ma mang e rayog ni nge pagan’dad ngay?

 GAD manang nra ud mada’naged e togopuluw u nap’an e machib. Ma dabisiy nra boch ngaram ma ra gel boch e togopuluw nra ud mada’naged. (Dan. 11:44; 2 Tim. 3:12; Rev. 16:21) Yugu aram rogon, ma rayog ni nge pagan’dad ngay nra ayuwegdad Jehovah. Mang fan? Ya kab kafram i yib ni ma ayuweg Jehovah e pi tapigpig rok ni ngar rin’ed e maruwel ni ke pi’ ngorad ndemtrug feni mo’maw’. Ngad weliyed boch ban’en ni i buch rok Ezekiel ni profet u nap’an ni i machibnag e pi Jew ni ur moyed u Babylon ni yad ba kalbus ni be dag reb e kanawo’ ni rin’ Jehovah e re n’ey riy.

2. Uw rogon ni weliy Jehovah rarogon e girdi’ ni i machibnagrad Ezekiel? Mang e gad ra weliy ko re article ney? (Ezekiel 2:3-6)

² Uw rarogon e girdi’ ni i machibnagrad Ezekiel? I yog Jehovah ni yad ma ‘togopluw,’ ma “yad ba gelan’,” ma ‘dariy fan u wun’rad.’ Yad ba kireb ni bod e rachangal nge skorpion. Aram fan ni bay in yay ni gaar Jehovah ngak Ezekiel: “Dab mu rus”! (Mu beeg e Ezekiel 2:3-6.) I yag ni nge rin’ Ezekiel fare maruwel ni machib ni bochan e (1) Jehovah e ke l’og, (2) ma i pi’ gelngin Got nib thothup gelngin, ma (3) be pi’ e thin rok Got gelngin. Uw rogon ni ayuweg e re dalip i n’ey Ezekiel? Ma uw rogon ni ma ayuwegdad e ngiyal’ ney?

3. Mang thin e ba mudugil ni pi’ gelngin Ezekiel? Uw rogon ni micheg Jehovah ngak nra ayuweg?

³ I gaar Jehovah ngak Ezekiel: “Nggol’igem ngam man.” (Ezek. 2:3, 4) Ba mudugil ni pi’ e pi thin ney gelngin Ezekiel. Mang fan? Ya dabisiy ni yib ngan’ ni ku taa bogi thin e yog Jehovah ngak Moses nge Isaiah u nap’an ni mel’egrow ni ngar  mangew profet rok. (Ex. 3:10; Isa. 6:8) Ku manang rogon ni ayuweg Jehovah e gal profet ney ni ngar gelgow nga boch e magawon ni ur mada’nagew. Ere nap’an ni non Jehovah ngak Ezekiel ni l’agruw yay ni gaar: “Nggol’igem ngam man,” ma bay rogon ni nge pagan’ e re profet nem ngak Jehovah nra ayuweg. Ku bay in yay ni yoloy Ezekiel ni gaar: “Me non Somol ngog.” (Ezek. 3:16) Ere ba mudugil ni ke mich u wan’ Ezekiel ni Jehovah e ir e ke l’og. Chitamangin Ezekiel e ir reb e prist, ere dabisiy ni fil ngak ni gubin ngiyal’ ni ma yog Jehovah ngak e pi profet rok nra ayuwegrad. Ki non Jehovah ngak Isak, nge Jakob, nge Jeremiah u reb e kanawo’ ni be m’ug riy ni bay rorad.​—Gen. 26:24; 28:15; Jer. 1:8.

4. Mang boch e thin nnog ngak Ezekiel ni pi’ gelngin?

⁴ Mang e ra rin’ yooren e girdi’ u Israel u nap’an nra machibnagrad Ezekiel? I gaar Jehovah: “Dariy be’ u Israel nra m’agan’ ngay ni nge motoyil ngom; mus ngog ma dab ra motoyilgad ngog.” (Ezek. 3:7) Nap’an ni siyeg e pi girdi’ nem ni ngar motoyilgad ngak Ezekiel, ma aram e ku yad be siyeg ni ngar motoyilgad ngak Jehovah. Pi thin ney e micheg nga laniyan’ Ezekiel nre n’ey nde motoyil e girdi’ ngak e der yip’ fan nde yag ni nge rin’ e maruwel rok nib fel’ rogon ni ir reb e profet. Ki micheg Jehovah ngak nnap’an nra riyul’ e pi thin nem ni i machibnag, ma aram e ra nang e girdi’ ni “bay ba profet u fithik’rad.” (Ezek. 2:5; 33:33) Dariy e maruwar riy ni pi’ e pi thin ney gelngin Ezekiel ni nge ulul ko machib ni i tay.

5. Mang e ma pi’ gelngidad nrogon ni be yog e Isaiah 44:8?

⁵ Ku arrogodad ni ma yib gelngidad ni bochan e gad manang ni Jehovah e ir e ke l’ogdad ni nga darod ko machib. Ke dag ni be tay  fadad ni aram e ma yog ni gadad e pi “mich” rok. (Isa. 43:10) Ireray reb e tow’ath nrib manigil! I gaar Jehovah ngak Ezekiel: “Dab mu rus.” Ere ku be gaar ngodad: “Dab mu rusgad!” Mang fan ndariy rogon ni ngad rusgad ngak e piin be togopuluw ngodad? Ya Jehovah e ir e ke l’ogdad ni ngad machibnaged yad, ma ra ayuwegdad ni bod e n’en ni rin’ ngak Ezekiel.​—Mu beeg e Isaiah 44:8.

6. (a) Uw rogon ni ke micheg Jehovah nra ayuwegdad? (b) Mang e ma yibnag e athamgil nga lanin’dad?

⁶ Ke micheg Jehovah nra ayuwegdad. Bod nu m’on ni nge gaar: “Gimed e mich rog,” me yog ni gaar: “Ga ra yan u fithik’ e ran nib toar ma gu bay rom; gafgow ni bay i yib ngom e dabiyog ni nge gel ngom. Ga ra yan u fithik’ e nifiy ma dab mu gak’; ma pi n’en nib mo’maw’ ni bay i yib ngom e dariy ban’en nra rin’ ngom.” (Isa. 43:2) Nap’an ni gad be machib, ma bay yu ngiyal’ ni gad ma mada’nag boch e magawon nrayog ni ngan taarebrogonnag ko lul’ ni ke sugubur maku gad ma mada’nag boch e skeng nrayog ni ngan taarebrogonnag ko nifiy. Yugu aram rogon, maku ma ayuwegdad Jehovah ni ngad ululgad ko machib. (Isa. 41:13) Yooren e girdi’ e ngiyal’ ney e dubrad ni ngar motoyilgad ko n’en gad be machibnag ni bod e n’en ni i rin’ e girdi’ u nap’an Ezekiel. Machane dab da paged talin nre n’ey e der yip’ fan ndarud machibgad nib fel’ rogon. Ma yib e athamgil nga lanin’dad ni bochan e gad manang ni ma felfelan’ Jehovah u nap’an ni gad ra ulul ko machib u fithik’ e yul’yul’. I gaar apostal Paul: “Yi Got e bayi bagayow me pi’ puluwon u rogon e maruwel ni tay.” (1 Kor. 3:8; 4:1, 2) Bay reb e walag nib pin ni ke n’uw nap’an ni ma pioneer ni yog ni gaar: “Kug felfelan’ ni kug nang ni ma tow’athnagdad Jehovah ko athamgil ni gad ma tay.”

7. Mang e ma lemnag Ezekiel u nap’an nra yib ngan’ e n’en ni guy u nap’an nni pilyeg e changar rok? (Mu guy e sasing ni bay u wuru’ e re ke babyor ney.)

⁷ I guy Ezekiel feni gel gelngin Got nib thothup. Nap’an nni pilyeg e changar rok me guy rogon ni be maruwel gelngin Got nib thothup u daken e pi engel nib gel gelngirad nge rogon ni be mithmitheg fapi tayapyap ko fare karrow ni ma girngiy e os ni bay u tharmiy. (Ezek. 1:20, 21) Ere mang e rin’ Ezekiel? I yoloy murung’agen e n’en ni buch ni gaar: “Nap’an ni gguy e re n’ey, mug thig nga but’ ni gub palpal.” Bochan ni kari ngat Ezekiel ko n’en ke guy, ma aram fan ni aw nga but’. (Ezek. 1:28, BT) Tomuren ma nap’an nra lemnag e n’en ni guy u nap’an nni pilyeg e changar rok, mab mudugil ni ma micheg nga laniyan’ nra ayuweg gelngin Got nib thothup ni nge lebguy e maruwel ni kan pi’ ngak ni aram e nge machib.

8-9. (a) Mang e buch rok Ezekiel u nap’an ni non Jehovah ngak? (b) Mang e ki yog Jehovah ngak Ezekiel ni nge pi’ gelngin ni nge machibnag e pi girdi’ nem nib gelan’rad ma yad ma togopuluw?

⁸ I gaar Jehovah ngak Ezekiel: “Fak e girdi’, mu sak’iy, ya nggu non ngom.” Pi thin ney nge gelngin Got nib thothup e pi’ gelngin ni nge sak’iy nga lang. I yoloy ni gaar: “Me yib gelngin Got ngog nge sak’iynigeg.” (Ezek. 2:1, 2) Boch nga tomuren nge ku n’umngin nap’an ni i machib, ma gelngin Got nib thothup e ir e i pow’iy. (Ezek. 3:22; 8:1; 33:22; 37:1; 40:1) Gelngin Got nib thothup e pi’ gelngin Ezekiel ni nge machibnag e pi girdi’ nem nib “gel lanin’rad ma yad ma togopluw.” (Ezek. 3:7) I gaar Jehovah ngak: “Bay gu gagiyegnigem nge gel lanin’um ma ga yargel ni bod farad yargel. Bay gu gagiyegnigem ngam gel ko war, ma ggel ni bod feni el bangi malang ni diamond; dab mu rus ko pi tatogopluw nem.” (Ezek. 3:8, 9)  Ere gowa be gaar Jehovah ngak: ‘Dab mu pag e pi girdi’ ney nib gelan’rad ni ngar muleged lanin’um, ya gu ra pi’ gelngim.’

⁹ Tomuren ma gelngin Got nib thothup e ir e i ayuweg Ezekiel ni nga i machib. I yoloy ni gaar: “Gu thamiy feni gel gelngin Somol.” Reb e wik ni fal’eg i fil e pi thin nem ni ka nog ngak ni nge machibnag me guy rogon ni nge nang fan, ya nge yag ni machibnag ko girdi’ u reb e kanawo’ nra mich u wan’rad. (Ezek. 3:14, 15) Tomuren me yog Jehovah ngak ni nge yan nga lan ba loway, me “yib gelngin Got i ying [ngak].” (Ezek. 3:23, 24) Fin aram e ngiyal’ ni yag ni nge tabab ko machib.

10. Mang e ba t’uf rodad ya nge yag nda rin’ed fare maruwel ni machib, ma mang fan?

¹⁰ Mang e ba t’uf rodad ya nge yag nda rin’ed fare maruwel ni machib? Ra ngad nanged e fulweg riy ma ngad lemnaged e n’en ni buch rok Ezekiel. U m’on ni nge tabab ko machib, me pi’ gelngin Got nib thothup gelngin. Ku arrogon e ngiyal’ ney ndabiyog ni ngad machibgad ni faanra der ayuwegdad gelngin Got nib thothup ni bod ni ayuweg Ezekiel. Mang fan? Ya be cham Satan ngodad ni be guy rogon ni nge taleg e machib ni gad be tay. (Rev. 12:17) Rogon u wan’ e girdi’ e dabiyog ni ngad gelgad ngak Satan. Machane be yag ni ngad gelgad ngak u daken e machib ni gad be tay! (Rev. 12:9-11) Ni uw rogon? Nap’an ni gad ra machib, ma aram e gad be dag ndarud rusgad ngak Satan. Ma gubin yay ni gad ra machib, ma aram e gad be gel ngak. Ere mang e ra tamilang u wan’dad u nap’an ni gad ra guy ni ka be yag ni ngad machibgad ni yugu aram rogon ni yibe togopuluw ngodad? Ra tamilang u wan’dad ni gelngin Got nib thothup e ir e be pi’ gelngidad, ma gad ba fel’ u wan’ Jehovah.​—Matt. 5:10-12; 1 Pet. 4:14.

11. Mang e ra ayuwegdad gelngin Got nib thothup riy? Uw rogon ni ngan pi’ e re gelngin nem ngodad ni gubin ngiyal’?

¹¹ Mang e ku gad ra fil u nap’an ni gad ra  lemnag rogon ni pi’ Jehovah gelngin Ezekiel ni nge machib? Rayog ni nge pi’ gelngin Got nib thothup gelngidad ni ngad gelgad ko pi magawon nrayog ni ngad mada’naged u nap’an e machib. (2 Kor. 4:7-9) Ere mang e rayog ni ngad rin’ed ya nge yag ni pi’ Got gelngin nib thothup ngodad? Ba t’uf ni ngad yibilayed e re gelngin nem ni gubin ngiyal’, me pagan’dad nra rung’ag Jehovah e meybil rodad. I fil Jesus ngak pi gachalpen ni gaar: “Mu ninged, . . . mu gayed, . . . mu tugtuguyed e mab.” Ma angin nra yib riy e aram e ra pi’ Jehovah gelngin nib thothup ngak e “piin ni yad ra ning ngak!”​—Luke 11:9, 13; Acts 1:14; 2:4.

12. Uw e yib fagi babyor riy ni kan bachiy, ma mang e bay riy nrogon nib puluw ko Ezekiel 2:9–3:3?

¹² Gathi kemus ni yigoo gelngin Got nib thothup e pi’ gelngin Ezekiel, ya ku arrogon e thin rok Got. Nap’an nni pilyeg e changar rok, me guy ba paef ni be kol bangi babyor ni kan bachiy. (Mu beeg e Ezekiel 2:9–3:3.) Uw e ke yib e gi babyor nem riy, ma mang e bay riy? Ma uw rogon ni pi’ gelngin Ezekiel? Re gi babyor nem e ke yib u tagil’ Got. Ere dabisiy ni ke fanay Jehovah reb ko fa aningeg i engel ni guy Ezekiel u m’on riy ni nge pi’ e gi babyor nem ngak. (Ezek. 1:8; 10:7, 20) Ma bay e thin riy ni yog Got ngak Ezekiel ni nge yan i weliy ngak fapi Jew ni yad be togopuluw. (Ezek. 2:7) Ruw raba’ e gi babyor nem ni kan yoloy e pi thin nem ngay.

13. Mang e yog Jehovah ngak Ezekiel ni nge rin’ ko fagi babyor ni kan bachiy, ma mang fan nib athib lamen?

¹³ I yog Jehovah ngak e re profet rok nem ni nge longuy e gi babyor nem nge “sugnag e yal [rok] ngay.” Ere longuy Ezekiel fagi babyor ni ga’ngin nge m’ay. Mang e be yip’ fan e re n’ey? Ba t’uf ni ngari tamilang u wan’ Ezekiel fapi thin ni nge yan i weliy ko girdi’. Kub t’uf ni nge mich e re thin nem u wan’ ya nge yag ni pi’ gelngin ni nge machib. Tomuren me buch ban’en ni gin ngay. I guy ni fagi babyor e “ba athib lamen ni bod lamen t’ay e ngul nib athib.” (Ezek. 3:3) Mang fan? Ya re n’em ni nge yan ni owchen Jehovah e ban’en nrib fel’ u wan’. (Ps. 19:8-11) Ba felfelan’ ni ke m’agan’ Jehovah ngay ni nge mang profet rok.

14. Mang e ayuweg Ezekiel ni nge tabab i rin’ e maruwel nni pi’ ngak?

¹⁴ Boch nga tomuren, me gaar Jehovah ngak Ezekiel: “Mu fal’eg e motoyil ngog ngam tay u wan’um urngin e tin gu be yog ngom.” (Ezek. 3:10, BT) I yog Jehovah ngak ni nge tay e thin ni bay u lan e gi babyor nem nga laniyan’ me fal’eg i lemnag. Nap’an ni rin’ e re n’ey, ma aram me yib gelngin. Maku reb e, bay e thin nib ga’ fan u lan e gi babyor nem nib t’uf ni nge yan i weliy ko girdi’. (Ezek. 3:11) Ere nap’an ni nang fan me mich u wan’ e pi thin rok Got nem, ma aram me yag ni nge tabab ko machib nge mada’ ko ngiyal’ ni lebguy e maruwel nni pi’ ngak.​—Mu taarebrogonnag ko Psalm 19:14.

15. Mang e ba t’uf ni ngad ‘ted u wan’dad’ ya nge yag nda ululgad ko machib?

¹⁵ Ku arrogodad nib t’uf ni ngad ululgad ni ngad paged e thin rok Got ni nge pi’ gelngidad, ya nge yag nda ululgad ko machib. Ba t’uf ni ngad ‘ted u wan’dad’ urngin ban’en ni be yog Jehovah ngodad. Ma non Jehovah ngodad e ngiyal’ ney u daken e Thin rok u Bible. Ere uw rogon ni ngad ululgad ngad paged e Thin rok ni nge pow’iy lanin’dad nge fan ni gad ma rin’ ban’en?

16. Uw rogon ni nge tamilang e Thin rok Got u wan’dad?

¹⁶ Nap’an ni gad ra fil e Thin rok Got ma gad fal’eg i lemnag, ma ma pi’ gelngidad ni bod rogon  e ggan nnap’an ni gad ra kay nge yan nga lan e yal rodad me pi’ gelngidad. Ku dab da paged talin e n’en gad ra fil ko fagi babyor ni kan bachiy. Baadag Jehovah ni ngad ‘sugnaged e yal rodad’ ko Thin rok ni aram e be yip’ fan ni ngari tamilang u wan’dad. Rayog ni ngad rin’ed e re n’ey u daken e meybil, nge beeg Bible, ma gad be fal’eg i lemnag. Som’on e gad ma meybil ya nge mom ni ngad nanged rogon e lem rok Got. Ngemu’ ma gad beeg bang u Bible. Tomuren ma gad tal ngad fal’eged i lemnag e n’en kad beeged. Mang angin nra yib riy? Faanra ud fal’eged i lemnag e n’en gad be fil, ma aram e ra yoor ban’en ko Thin rok Got ni gad ra nang fan, me gelnag e michan’ rodad.

17. Mang nib ga’ fan ni ngaud fal’eged i lemnag e n’en gad ma beeg u Bible?

¹⁷ Mang nib ga’ fan ni ngad beeged e Bible ma gad be fal’eg i lemnag? Gad ra rin’ e re n’ey ma ra pi’ gelngidad ni ngad machibnaged murung’agen Gil’ilungun Got e chiney, mu kud machibnaged fare thin ni murung’agen e pufthin ni yira tay ko girdi’ boch nga m’on. Maku reb e, nap’an ni gad ra fal’eg i lemnag pi fel’ngin Jehovah nrib manigil, ma aram e ra gel e chugur ko tha’ u thildad. Angin nra yib riy e aram e ra yag ban’en ngodad nrib manigil, ni aram e gapas laniyan’ nge felfelan’.​—Ps. 119:103.

18. Mang e ra t’uf ni nge nang e girdi’ ko gin gad ma machib riy, ma mang fan?

¹⁸ Gathi gadad boch e profet ni bod Ezekiel. Machane kad dugliyed u wan’dad ni ngad ululgad i machibnag fare thin ni ke tay Jehovah nga lan e Bible ni ngan machibnag nge mada’ ko ngiyal’ ni ke yog ni ke mus e re maruwel ney. Nap’an nra taw ko ngiyal’ ni ngan pufthin riy, ma dabiyog ni nge yog e girdi’ ko gin gad ma machib riy ndan ginangrad ara de tiyan’ Got ngorad. (Ezek. 3:19; 18:23) Ya ra taw ko ngiyal’ nem, ma thingar ra nanged ni fare thin ni ud machibnaged e yib rok Got.

19. Mang e ra pi’ gelngidad ni ngad ululgad ko machib ni gad be tay?

¹⁹ Mang e ra pi’ gelngidad ni ngad ululgad ko machib ni gad be tay? Fare dalip i n’en ni pi’ gelngin Ezekiel e ku aram e n’en nra pi’ gelngidad. Gad ma ulul ko machib ni bochan e Jehovah e ke l’ogdad, ma gelngin Got nib thothup nge Thin rok e be pi’ gelngidad. Gad baadag ni ngad ululgad ko machib ni gad be tay ma gad athamgil “nge mada’ ko tomur” ni bochan e ra ayuwegdad Jehovah.​—Matt. 24:13.