Ga baadag ni ngari yib angin ngom e fol Bible ni ga ma tay ni yigoo gur, fa? Baaray boch ban’en nrayog ni nge ayuwegem ni ngam tiyan’um ko fol Bible ni ga ma tay:

• Mmel’eg bang nib fel’. Faanra rayog mag gay bang nib beech ma bay e ramaen e tamilang riy. Rayog ni ngam par nga reb e tebel ara bang u wen nib fel’ e par riy.

• Mu par nga bang ni yigoo gur. I dugliy Jesus ni nge od ni “tanirran ni kab nep’” nge yan nga “bangi n’en ndariy e girdi’ riy” ni nge meybil. (Mark 1:35) Faanra dariy bang ni ngam par riy ni yigoo gur, ma rayog ni nga mog ngak chon e tabinaw rom ara piin gimed ma par u taabang e ngiyal’ ni kam dugliy ni ngam fil e Bible rom riy ma gog ngorad ndab ra magawonnaged gur ko re ngiyal’ i n’em.

• Dab mu pag ban’en ni nge magawonnagem. Faanra ga ma fanay e phone ara tablet rom ni ngam fil e Bible riy, ma rayog ni ngam achignag lingan ara mu tay ko airplane mode ya nge dabi magawonnagem. Faanra ke yib ban’en ngan’um nib t’uf ni ngam rin’, ma rayog ni ngam yoloy nga but’ ya nga tomuren ni kam mu’ mfin mu rin’ fare n’em. Ma faanra be mo’maw’ ngom ni ngam tiyan’um ko fol Bible ni ga be tay, ma rayog ni ngam tal u lan bochi ngiyal’ ngam sak’iy ngam man nga bang ara mu k’ik’iyag keruum.