1-2. Uw rogon nrayog ni ngan rin’ boch ban’en nde mat’aw ngodad?

 I WELIY Jesus ba fanathin ni murung’agen be’ nib pin ni ke yim’ figirngin ni yigi i sul ngak ba tapuf oloboch nga i wenignag mat’awun ngak. Dariy e maruwar riy ni boor i gachalpen Jesus e rayog ni ngar nanged rogon laniyan’ e re ppin ney ni kan weliy murung’agen ko re fanathin ney ni bochan e boor e girdi’ e ngiyal’ nem ni yima rin’ boch e ngongol nde mat’aw ngorad. (Luke 18:​1-5) Ku rayog ni ngad nanged rogon laniyan’ e re ppin ney ni bochan e gad gubin ni bay ba ngiyal’ ni kan rin’ ban’en nde mat’aw ngodad.

² Darud gingad ngay ni yima rin’ boch ban’en ngodad nde mat’aw ni bochan e boor e girdi’ e ngiyal’ ney ni yad ba laniyan’, ma de taareb rogon e girdi’ u wan’rad, maku yad ma gafgownag e girdi’. (Ekl. 5:8) Machane rayog ndarud lemnaged nra rin’ reb e walag ban’en ngodad nde mat’aw. Yugu aram rogon ma rayog ni nge buch e re n’ey. Riyul’ ni pi walagdad e gathi yad e piin ma togopuluw ko tin riyul’. Kemus ndawor ra flontgad. Boor ban’en nrayog ni ngad filed ko n’en ni rin’ Jesus u nap’an ni i rin’ e pi tatogopuluw boch ban’en nde mat’aw ngak. Ere faanra rayog ni ngad gum’an’gad u puluwon e pi tatogopuluw ni yad ma rin’ boch ban’en nde mat’aw ngodad, me ere ku rayog ni ngad gum’an’gad u puluwon e pi walagdad! Nap’an nra rin’ e girdi’ u wuru’ e ulung ara lan e ulung boch ban’en nde mat’aw ngodad, ma uw rogon e re n’ey u wan’ Jehovah? Gur, ma lemnag, fa?

3. Uw rogon ni kad nanged nib ga’ fan u wan’ Jehovah rogon e ngongol ni yima dag ngodad?

³ Rib ga’ fan u wan’ Jehovah rogon e ngongol ni yima dag ngodad. “Ba t’uf rok e tin nib mat’aw.” (Ps. 37:28) Ke micheg Jesus ngodad nra “turguy Got e tin ni ir e mmat’aw . . . me rin’ ni papey” ko ngiyal’ nib puluw ni nge rin’ riy. (Luke 18:​7, 8) Ma dabki n’uw  nap’an ma ra chuwegdad u fithik’ e gafgow miki chuweg urngin mit e ngongol nde mat’aw.​—Ps. 72:​1, 2.

4. Uw rogon ni ma ayuwegdad Jehovah e ngiyal’ ney?

⁴ Nap’an ni gad be sonnag e ngiyal’ nra chuweg Jehovah gubin e magawon, ma ma ayuwegdad ni ngad athamgilgad u fithik’ e ngongol nde mat’aw ni yima rin’ ngodad. (2 Pet. 3:13) Ma fil ngodad rogon ndab da rin’ ban’en nib kireb u nap’an ni yibe rin’ boch ban’en nde mat’aw ngodad. Ke dag e bin th’abi fel’ e kanawo’ ngodad u rogon nrayog ni ngad athamgilgad u fithik’ e ngongol nde mat’aw u daken Fak. Ku ma pi’ boch e fonow nrayog ni ngad folgad riy u nap’an ni ke buch e re n’ey rodad.

MU KOL AYUW U ROGON NI GA MA LEM U NAP’AN NRA BUCH BAN’EN NDE MAT’AW

5. Mang fan nsusun e ngad kol ayuwgad u rogon ni gad ma lem u nap’an nra buch ban’en nde mat’aw?

⁵ Sana rayog nri be amith lanin’dad ni bochan e ngongol nde mat’aw ni yibe rin’. (Ps. 42:9) Bay boch e tapigpig ni yad ba yul’yul’ ni bod Job nge Habakkuk ni ur lemgad ni aray rogon. (Job 6:​2, 3; Hab. 1:​1-3) Yugu aram rogon ni gad gubin ni gad ma lem ni aray rogon, machane ba t’uf ni ngad kol ayuwgad ya ri chey ma gad rin’ ban’en nde puluw.

6. Mang e gad be fil ko n’en ni rin’ Absalom? (Kum guy e sasing.)

⁶ Nap’an nra rin’ be’ ban’en nde mat’aw ngodad ara be’ nib t’uf rodad, ma sana rayog ni ngad adaged ni ngad sulweged taban ngak. Machane faan gad ra rin’ e re n’ey, ma rayog ni nge gel e ubchiya’ ko fare magawon. Am lemnag e n’en ni rin’ Absalom ni fak David ni Pilung. Ri damumuw u nap’an ni kol Amnon Tamar ni walagen nib pin u gelngin. Rogon ni be yog e Motochiyel rok Moses e thingar ni thang e fan rok Amnon ni bochan e n’en ke rin’. (Lev. 20:17) Yugu aram rogon ni bay rogon ni nge damumuw Absalom, machane dariy mat’awun ni nge thang e fan rok Amnon.​—2 Sam. 13:​20-23, 28, 29.

7. Mang e rin’ faen ni yoloy e Psalm ko som’on u nap’an ni guy boch ban’en ni yibe rin’ nde mat’aw?

⁷ Faanra gad be guy ndanir gechignag e piin yad be rin’ e tin nde mat’aw, ma rayog ni nge maruwar u wan’dad ko kab puluw ni ngad rin’ed e tin nib mat’aw fa danga’. Am lemnag e n’en ni buch rok faen ni yoloy e Psalm ni guy ni piin yad be gafgownag e piin nib mat’aw e ba fel’ rogon e par rorad. I gaar: “Ereray rogon e piin ni yad ba kireb! Pire’ ban’en rorad.” (Ps. 73:12) Ri kireban’ ni bochan e tin nde mat’aw ni guy ni be buch me maruwar u wan’ ko ka bay rogon ni nge pigpig ngak Jehovah fa danga’. I yog ni gaar: “Kar gu athamgiliy ni nggu nang fan e re n’ey, ni  yugu aram rogon feni mo’maw’ ngog.” (Ps. 73:​14, 16) Bin riyul’ riy e yog ni gaar: “I chugur ni nggu dol’; rifrif rog e chugur ni nge sirgig.” (Ps. 73:2) Ku bay ban’en ni buch rok reb e walag ni pumoon ni ka nog Alberto a ngak ni aray rogon.

8. Mang e buch rok reb e walag ni pumoon ni bochan ban’en nde mat’aw nrin’ ngak?

⁸ Nni t’ar e thin nga daken Alberto mi nog ni ke iring e salpiy ko ulung. Bochan e re n’ey, ma aram me mul e tow’ath rok u pa’ maku boor e girdi’ u lan e ulung nra nanged murung’agen e re n’ey nda kur ted fan. I yog ni gaar, “Gu damumuw me kireban’ug.” I pag e re n’ey ni nge magawonnag ko tirok Got ban’en miki tal ndaki un ko muulung nge machib u lan lal e duw. Re n’ey e be dag e n’en nrayog ni nge buch rodad ni faanra dab da gagiyegnaged e damumuw rodad u nap’an ni kan rin’ ban’en nde mat’aw ngodad.

MU FOLWOK U ROGON NI I ATHAMGIL JESUS U FITHIK’ E PI N’EN NDE MAT’AW NI UN RIN’ NGAK

9. Mang boch ban’en nde mat’aw ni i buch rok Jesus? (Kum guy e sasing.)

⁹ I dag Jesus e bin th’abi fel’ e kanawo’ u rogon ni ngan athamgil u fithik’ boch ban’en nde mat’aw ni ma buch. Am lemnag e pi n’en nde mat’aw ni i rin’ chon e tabinaw rok ngak nge yugu boch e girdi’. I yog e girdi’ rok ni ke sabalbalyang, ma pi tayugang’ ko teliw e rogned ni pi moonyan’ e  yad be pi’ gelngin, miki moningnag e pi salthaw nu Roma, mar toyed, me tomur riy mar lied nge yim’. (Mark 3:​21, 22; 14:55; 15:​16-20, 35-37) Yugu aram rogon me athamgil u fithik’ e pi n’ey nde mat’aw ni i buch rok maku de sulweg taban. Ere mang e rayog ni ngad filed ko n’en ni rin’?

10. Uw rogon ni i athamgil Jesus u fithik’ boch ban’en nde mat’aw ni un rin’ ngak? (1 Peter 2:​21-23)

¹⁰ Mu beeg e 1 Peter 2:​21-23. b I dag Jesus e bin th’abi fel’ e kanawo’ nrayog ni ngad folwokgad riy u nap’an ni yibe rin’ boch ban’en nde mat’aw ngodad. Manang e ngiyal’ ni nge th’ab gulungan nge ngiyal’ ni nge non. (Matt. 26:​62-64) Gathi gubin ban’en nde riyul’ nni weliy u murung’agen ni pi’ e fulweg riy. (Matt. 11:19) Ma nap’an nra non ma der ma yog e thin nib kireb ngak e piin yad be gafgownag ara guy rogon ni nge k’aring e marus ngorad. I t’ar laniyan’ ni bochan e ke “pag fan urngin ban’en ngak Got, ni ir fare Tapufthin nib mat’aw.” Manang Jesus nrogon laniyan’ Jehovah u boch ban’en e aram e n’en nth’abi ga’ fan. Manang nra yal’uweg Jehovah gubin ban’en nde mat’aw ni be buch ko ngiyal’ nib puluw ni nge rin’ riy.

11. Mang boch e kanawo’ nrayog ni ngad gagiyegnaged e thin rodad riy? (Kum guy e sasing.)

¹¹ Rayog ni ngad folwokgad rok Jesus ni aram e ngad gagiyegnaged e n’en nga dogned u nap’an ni yibe rin’ boch ban’en nde mat’aw ngodad. Bay boch ban’en ni yima rin’ ngodad nde mat’aw ni gathi rib gel e kireb riy nrayog ni ngad feked owchedad riy. Fa reb e rayog ni ngad th’abed gulungdad ya nge dab dogned ban’en nrayog ni nge gelnag e ubchiya’ ko fare magawon. (Ekl. 3:7; Jas. 1:​19, 20) Ma yu ngiyal’ e rayog nib t’uf ni nga dogned ban’en u nap’an ni kad guyed ni kan rin’ ban’en nde mat’aw ngak be’ ara gad be guy nib t’uf ni nga dogned e tin riyul’ u murung’agen e michan’ rodad. (Acts 6:​1, 2) Faanra ka  dogned ban’en ma susun e ngad guyed rogon ni ngad rin’ed u fithik’ e gapas nge tayfan.​—1 Pet. 3:​15, 16. c

12. Uw rogon ni ngad paged fadad ngak “fare Tapufthin nib mat’aw”?

¹² Ku rayog ni ngad folwokgad rok Jesus ni aram e ngad paged fadad ngak “fare Tapufthin nib mat’aw.” Nap’an nra turguy e girdi’ boch ban’en u rarogodad nde puluw ara rrin’ed boch e ngongol nib kireb ngodad, mab pagan’dad ngay ni manang Jehovah e tin riyul’. Rayog ni nge ayuwegdad e re n’ey ni ngad athamgilgad u fithik’ boch ban’en ni kan rin’ ngodad nde mat’aw ni bochan e gad manang nra munmun ma ra yal’uweg Jehovah gubin ban’en. Gad ra pag fan gubin ban’en ngak Jehovah, ma aram e ra ayuwegdad ndab da pared ni gad ba damumuw ara da fanenikayed yugu boch e girdi’. Gad ra par ni gad ba damumuw ngak yugu boch e girdi’ ma rayog ni ngad rin’ed ban’en nib kireb, ma dab kud felfelan’gad, miki kireb e tha’ u thildad Jehovah.​—Ps. 37:8.

13. Mang e rayog ni nge ayuwegdad ni ngaud athamgilgad u fithik’ e pi n’en nde mat’aw ni yima rin’ ngodad?

¹³ Riyul’ ndabiyog ni ngad folwokgad rok Jesus nrib fel’ rogon. Bay yu ngiyal’ nrayog ni ngad rin’ed ara dogned boch ban’en me tomur riy mad kalgadngan’dad. (Jas. 3:2) Ku bay boch ban’en ni yima rin’ ngodad nde mat’aw nrayog ni nge par u lanin’dad miki par fathan u dowdad u n’umngin nap’an e yafos rodad u lan e re m’ag ney. Faanra ke buch e re n’ey rom, ma nge pagan’um ngay ni manang Jehovah e magawon ni ga be yan u fithik’. Ku arrogon Jesus ni un rin’ boch ban’en ngak nde mat’aw ni manang rogon lanin’um. (Heb. 4:​15, 16) Gathi kemus ni n’en ni rin’ Jesus nrayog ni ngan folwok riy e ke pi’ Jehovah ngodad, ya kki pi’ e fonow nib manigil nra ayuwegdad u nap’an ni yibe rin’ boch ban’en nde mat’aw ngodad. Ere chiney e ngad weliyed murung’agen l’agruw e thin nu Bible ni bay ko fare babyor ni Roma nrayog ni nge ayuwegdad.

MU “PAGED FAN KO DAMUMUW ROK GOT NGE MANG IR E RIN’”

14. Mang e be yip’ fan ni ngad “paged fan ko damumuw rok Got nge mang ir e rin’”? (Roma 12:19)

¹⁴ Mu beeg e Roma 12:19. I yog apostal Paul ngak e piin Kristiano ni ngar “paged fan ko damumuw rok Got nge mang ir e rin’.” Rogon ni ngad rin’ed e re n’ey e aram e ngad paged Jehovah ni nge yal’uweg gubin ban’en ko ngiyal’ nge rogon ni ke dugliy ni nge rin’ riy. Tomuren nrin’ boch ban’en nde mat’aw ngak reb e walag ni pumoon ni ka nog John ngak, me yog ni gaar: “Ba t’uf ni nggu gagiyegnag e damumuw rog ya nge dab gu rin’ ban’en nib kireb, machane de mom e re n’ey. Ere fare thin ni bay ko Roma 12:19 e ayuwegeg ni nggu sonnag Jehovah.”

15. Mang fan nib fel’ ni ngad sonnaged Jehovah ni nge yal’uweg reb e magawon?

¹⁵ Nap’an ni gad ra sonnag Jehovah ni nge yal’uweg reb e magawon, ma ra yib angin ngodad. Ya rayog ni nge dab da mochuchgad maku dabi kankanan’dad ni bochan e gad be guy rogon ni ngad pithiged reb e magawon ni yigoo gadad. Be ognag Jehovah e ayuw ngodad. Gowa be gaar, ‘Mu pag fan ngog, ya bay gu yal’uweg gubin ban’en.’ Faanra ba mich u wan’dad fapi thin ni ke yog Jehovah ni ke gaar, “Bay gu fulweg taban e kireb,” ma aram e dakuriy rogon ni ngad pared ni gad ba damumuw ya gad manang nra rin’ e tin nib mat’aw. Aram e n’en ni ayuweg John ni faan kan weliy murung’agen. I yog ni gaar, “Faan gu ra sonnag Jehovah, ma kab fel’ rogon nra pithig e magawon rog nga rogon nrayog ni nggu rin’.”

“NGAM NGONGLIY E NGONGOL NIB FEL’ NGAM GEL NGAK E KIREB”

16-17. Uw rogon nrayog ni nge ayuwegdad e meybil ni ‘ngad ngongliyed e ngongol nib fel’ ngad gelgad ngak e kireb’? (Roma 12:21)

¹⁶ Mu beeg e Roma 12:21. Ki yog Paul ngak e piin Kristiano ni ‘ngar ngongliyed e ngongol nib  fel’ ngar gelgad ngak e kireb.’ Nap’an fare Welthin ni Pi’ Jesus u Daken e Burey, me yog ni gaar: “Nge t’uf romed e pi toogor romed, mpied e meybil rok e piin ni yad be ngongliy e kireb ngomed.” (Matt. 5:44) Aram e n’en ni rin’. Dabisiy ni kad lemnaged gelngin e gafgow ni tay Jesus u nap’an ni richibiy e pi salthaw nu Roma ko fare ley i gek’iy. Rib gel e gafgow nni tay ngak, ma kub gel e amith ni yan u fithik’. Dabiyog ni ngari taw rogon e lem rodad ngay.

¹⁷ I par Jesus nib t’uf Jehovah rok mab yul’yul’ ngak ni yugu aram rogon gelngin e gafgow ni yan u fithik’. De yog ni ngan gechignag e pi salthaw nem, ya meybil ni gaar: “Chitamag, mu n’ag fan u wun’um e n’en ni yad be rin’! Ya dar nanged e n’en ni yad be rin’.” (Luke 23:34) Faan gad ra yibilay e piin yad be gafgownagdad, ma rayog ni nge war e damumuw rodad miki thil rogon ni gad be lemnagrad.

18. Uw rogon ni yag ni nge athamgil Alberto nge John u fithik’ e ngongol nde mat’aw nrin’ ngorow ni bochan e meybil ni ur tew?

¹⁸ Meybil e ayuweg fa gal walag ni pumoon ni kad weliyed murung’agrow ni ngar athamgilgow u fithik’ e ngongol nde mat’aw nrin’ ngorow. I yog Alberto ni gaar: “Gu yibilay e pi walag nde mat’aw e ngongol nrin’ed ngog. Bay in yay nug wenig ngak Jehovah ni nge ayuwegeg ndab kug lemnag e re n’ey.” Chiney e ke sul Alberto be pigpig ngak Jehovah u fithik’ e yul’yul’. I yog John ni gaar: “Boor yay ni ug yibilay fare walag ni kirebnag lanin’ug. Meybil ni ug tay e ayuwegeg ni nge puluw rogon ni nggu lemnag e re walag ney ma dab kug turguy boch ban’en u rarogon. Ki ayuwegeg ni nge gapas lanin’ug.”

19. Mang e thingar da rin’ed u n’umngin nap’an ni gad be par u lan e re m’ag ney? (1 Peter 3:​8, 9)

¹⁹ Dad nanged e re miti ngongol nde mat’aw nra un rin’ ngodad u m’on ni nge mus e re m’ag ney. Demtrug e n’en nra buch rodad, ma dab da talgad i ning e ayuw ngak Jehovah u daken e meybil. Kub t’uf ni ngad folwokgad ko n’en ni rin’ Jesus u nap’an ni yibe gafgownag ma gad ulul ni ngad folgad ko pi kenggin e motochiyel u Bible. Faan gad ra rin’ e re n’ey, ma rayog ni nge pagan’dad ngay nra tow’athnagdad Jehovah.​—Mu beeg e 1 Peter 3:​8, 9.