1. Mang fan ni boor e girdi’ ni ke maathuk lanin’rad?

BOOR e teliw e ngiyal’ ney ni yad ma yog ni yad e Kristiano, mab m’agan’ Got ko liyor ni yad ma tay. Aram fan ni boor e girdi’ ni ke maathuk lanin’rad! Yad ma fith ni ma lungurad, “Kemus ni taa barba’ e teliw nib riyul’, fa urngin e teliw nib m’agan’ Got ngay?” Rib mich u wan’dad nib riyul’ e n’en gad be fil ko girdi’ mab m’agan’ Jehovah ko liyor ni gad be tay ngak, fa? Ma gur, rayog ni nge mich e re n’ey u wan’dad, fa? Ngad weliyed e n’en be micheg nriyul’ e re n’ey.

2. Mang fan nib mich u wan’ apostal Paul nib riyul’ e pi n’en ke mich u wan’ nrogon nib puluw ko 1 Thessalonika 1:5?

² Ba mich u wan’ apostal Paul nib riyul’ e pi n’en ke mich u wan’. (Mu beeg e 1 Thessalonika 1:5.) Gathi fan nib mich e tin riyul’ u wan’ e bochan ni ma yibnag e felfelan’ ngak, ya bochan ni ir be’ ni ma fal’eg i fil e Thin rok Got. Ba mich u wan’ ni “urngin e thin ni bay u lan e babyor nib thothup e Got e yib i pi’ nga laniyan’ e girdi’ ngar yoloyed.” (2 Tim. 3:16) Mang e fil ko re n’ey? I pirieg e mich riy u lan fare Babyor nib Thothup ni Jesus e ir fare Messiah ni kan micheg, ma aram ban’en ni mel’eg e pi tayugang’ ko teliw rok e pi Jew ndabi mich u wan’rad. Yad ma yog ni yad be fil ko girdi’ e tin riyul’ u murung’agen Got, machane yad be rin’ boch e ngongol nib fanenikan Got. (Titus 1:16) Machane Paul e ba thil ko pi pumoon nem ni bochan e da i mel’eg ko gin ngan ko Thin rok Got e nge mich u wan’, ma gin ngan e dabi mich u wan’. Ya i fil ma be fol ko ‘tin ni ke m’ay i lemnag rok Got ni fan ngodad.’​—Acts 20:27.

3. Ra ngari mich u wan’dad ni kad pirieged e tin riyul’, ma gur, ba t’uf ni ngad nanged e fulweg u gubin e deer rodad, fa? (Kum guy fare kahol ni “ Pi N’en Ma Rin’ Jehovah nge Tin Ma Lemnag e ‘Kayigi Pire’’ Ndabiyog ni Ngan Nang ni Gubin.”)

³ Bay boch e girdi’ ni yad ma lemnag ni baan riyul’ e teliw e  susun e rayog ni nge pi’ e fulweg u gubin e deer ni yima fith nib muun ngay e tin dariy e fulweg riy u lan e Bible. Ba puluw e re n’ey, fa? Am lemnag e n’en ni rin’ Paul. I yog ko piin taareb e michan’ rorad ni ngar “sikengniged urngin ban’en,” machane ki yog ni boor ban’en ndawori tamilang u wan’. (1 Thess. 5:21) Ki yoloy ni gaar: “Llowan’ rodad . . . e ke mus ni bochi yang ko n’en ni bay ni pi’ ngodad. . . . N’en ni gadad be guy e chiney e bod ban’en ni gadad be guy nga thirek ni kab mathmath yaan.” (1 Kor. 13:9, 12) Gathi gubin ban’en ni ke tamilang u wan’ Paul, maku arrogodad. Machane ke tamilang u wan’ e tin nib ga’ fan ni nge nang u murung’agen Jehovah. Tin ke nang e ba gaman nrayog ni nge micheg nga laniyan’ ni ke pirieg e tin riyul’!

4. Uw rogon ni ngari mich u wan’dad ni kad pirieged e tin riyul’, ma mang e gad ra weliy u murung’agen e tin riyul’ e Kristiano?

⁴ Reb e kanawo’ nrayog ni ngari mich u wan’dad ni kad pirieged e tin riyul’ e aram e ngad taareb rogonnaged kanawoen e liyor ni i tay Jesus ko n’en be rin’ e Pi Mich Rok Jehovah e ngiyal’ ney. Gad ra weliy ko re article ney ni tin riyul’ e Kristiano e (1) darur meybilgad ko liyos ara ra n’ufed be’ ni yugu ba pag rogon, (2) yad ma tayfan fithingan Jehovah, (3) ba t’uf e tin riyul’ rorad, nge (4) ri yad ma t’ufeged yad.

5. Mang e gad be fil rok Jesus u murung’agen e bin nib puluw e kanawo’ ni ngan liyor riy ngak Got? Uw rogon ni ngad folgad ko n’en ni fil?

⁵ Bochan nrib t’uf Jehovah rok Jesus, ma aram fan ni yigoo ir e i liyor ngak u nap’an ni bay u tharmiy ngu nap’an ni yib nga fayleng. (Luke 4:8) Ku aram e n’en ni fil ngak pi gachalpen ni ngar rin’ed. Da i fanay Jesus e liyos ni fan ko liyor ni i tay, maku arrogon pi  gachalpen ni yad ba yul’yul’ ngak. Bochan ndariy be’ ni ke guy Got, ma aram fan ndariy be’ nrayog ni nge ngongliy ban’en nri taareb rogon yaan ngak! (Isa. 46:5) Machane uw rogon e bin ngan ngongliy e liyos ara boch ban’en ni yaan e pi thothup ngaun meybil ngay? I yog Jehovah ko fa bin migid e motochiyel u lan fa Ragag i Motochiyel ni gaar: “Dab mu ngongliy ba liyos ara yaan ban’en ni bay u tharmiy, ara bay u fayleng, ara bay u fithik’ e ran u tan e but’ . . . Dab mu siro’ ko liyos ni ma meybil boch e girdi’ ngay.” (Ex. 20:4, 5) Ba tamilang e pi thin ney u wan’ e piin yad baadag ni ngar rin’ed e n’en nib m’agan’ Got ngay.

6. Uw rogon e liyor ni ma tay e Pi Mich Rok Jehovah e ngiyal’ ney?

⁶ Ke yog e piin yad ma fil chepin e girdi’ ni tin som’on e Kristiano e yigoo Got e ur liyorgad ngak. Bod ni be yog fare ke babyor ni History of the Christian Church ni pi Kristiano nem e “dubrad” ni ngar ted e liyos ara yaan boch ban’en ko gin yad ma liyor riy. Ngiyal’ ney e ku ma fol e Pi Mich Rok Jehovah ko n’en ur rin’ed. Darud meybilgad nga yaan e “pi thothup” ara pi engel ni kub muun Jesus ngay. Ku darud siro’gad ko flak ara da liyorgad nga boch ban’en ni kan tay ni pow ko nam. Demtrug e n’en nra buch rodad ma kad dugliyed u wan’dad ni ngad folgad ko fapi thin ni yog Jesus ni be gaar: “Mu ta’ fan Somol ni Got rom ma yigo ir e ngam pigpig ngak!”​—Matt. 4:10.

7. Mang e ba tamilang nib thil u thilin e Pi Mich Rok Jehovah nge yugu boch e teliw?

⁷ Ngiyal’ ney e boor e girdi’ ni yad baadag ni yad ma motoyil nga boch e tayugang’ ko teliw ni boor e girdi’ ni manangrad. Yad ma n’uf e pi girdi’ ney nge yan i taw nga reb e dodow ni bod ni yad be liyor ngorad. Boor e girdi’ ni yad ma un ko misa rorad, ma yad be chuw’iy e babyor rorad, ma yad be pi’ e salpiy ni boor ngorad ara ulung ni yad ba muun ngay. Bay boch e girdi’ nrib mich u wan’rad urngin ban’en ni ma yog e pi tayugang’ nem. Gelngin e felfelan’ ni ma tay e pi girdi’ ney u nap’an ni yad ra guy e pi tayugang’ nem e taareb rogon nga gelngin e felfelan’ ni yad ra tay ni faan gomanga yad ra guy Jesus! Machane tin riyul’ e tapigpig rok Jehovah e dariy e tayugang’ rorad. Yugu aram rogon ni gad ma tayfan e piin yad ma yog e thin rodad, machane gad ma fol ko n’en ni yog Jesus ni gaar: “Gimed gubin nra bigimed ma walagen bigimed.” (Matt. 23:8-10) Darud liyorgad ko girdi’ ndemtrug ko yad boch e tayugang’ ko teliw ara tayugang’ ko am. Ku darud pied e ayuw ko pi n’en yad be nameg ni fan ko teliw rorad ara am, ya gad ma par u mathilin ngongolen e am maku darud uned nga ngongolen e fayleng. Aray rogon ni gad ba thil ko tin ka bay e teliw ni yad ma yog ni yad e Kristiano.​—John 18:36.

8. Uw rogon ni kad nanged ni baadag Jehovah ni ngan tayfan fithingan mi nog ngak urngin e girdi’?

⁸ Bay bayay ni meybil Jesus ni gaar: “Ah Chitamag, mu ta’ fan fithingam!” I fulweg Jehovah taban e re meybil nem ni aram e non nib ga’ laman u tharmiy ni be micheg nra tayfan fithingan. (John 12:28) N’umngin nap’an ni i machib Jesus, ma i tayfan fithingan e Chitamangin. (John 17:26) Ere ku arrogon e tin riyul’ e Kristiano ni yad ba felfelan’ ngay ni ngaur fanayed fithingan Got, maku yad be yog ko girdi’.

9. Uw rogon ni micheg e pi Kristiano ko bin som’on e chibog ni yad be tayfan fithingan Got?

⁹ De n’uw nap’an nga tomuren ni sum e ulung ni Kristiano u nap’an e bin som’on e chibog, ma aram me dag Jehovah nib t’uf rok e piin gathi yad piyu Israel ni fan e “ke fek e girdi’ u fithik’rad ni ngar manged girdien [“ngaur  feked fithingan,” NW].” (Acts 15:14) Pi Kristiano nem e yad ba felfelan’ ngay ni ngar fanayed fithingan Got maku yad be weliy ko girdi’. Ur fanayed e re ngachal nem u nap’an ni yad be machib ngu nap’an ni yad be yoloy boch e babyor ko Bible. * Ra micheged ni kemus ni yigoo yad e yad be fek fithingan Got.​—Acts 2:14, 21.

10. Mang e be micheg ni Pi Mich Rok Jehovah e yad be fek fithingan Jehovah?

¹⁰ Gur, be fek e Pi Mich Rok Jehovah fithingan Jehovah, fa? Am lemnag boch ban’en ni be micheg e re n’ey. Ngiyal’ ney e boor e tayugang’ ko teliw ni kar guyed rogon ni ngar mithaged ni bay fithingan Got. Kar chuweged u lan e yu ke Bible ni kar pilyeged maku darur paged ni nga u nog fithingan Got u lan e galesiya rorad. * Ere ba tamilang ni kemus ni yigoo Pi Mich Rok Jehovah e yad be tayfan fithingan Got u rogon nsusun e ngan rin’. Kemus ni goo gadad u fithik’ urngin raba’ e teliw e gad be wereg fithingan Got! Gad ma athamgil u rogon nrayog rodad ni ngaud ngongolgad nib puluw nga rogon fithingdad ni yima yog ni aram e Pi Mich Rok Jehovah. (Isa. 43:10-12) Ke pag 240 milyon ken fare Bible ni New World Translation of the Holy Scriptures ni kad ngongliyed ni kan sulweg fithingan Jehovah kan tay ko gin ke chuweg boch e girdi’ riy ni ur pilyeged e Bible. Ku boor ken e babyor ni gad be  ngongliy ni bay fithingan Jehovah riy ni yibe pilyeg nga boor ko 1,000 mit e thin!

11. Uw rogon ni dag e tin som’on e Kristiano nib t’uf e tin riyul’ rorad?

¹¹ Ba t’uf e tin riyul’ rok Jesus, ni aram e tin riyul’ u murung’agen Got nge pi n’en nib m’agan’ ngay. Pi n’en ni i rin’ Jesus e i m’ug riy nib mich e re n’ey u wan’, miki weliy ko girdi’. (John 18:37) Tin riyul’ i gachalpen Jesus e ri kub t’uf e tin riyul’ rorad. (John 4:23, 24) Bin riyul’ riy e, yog apostal Peter ni teliw ni Kristiano e aram “fare kanawo’ nib riyul’.” (2 Pet. 2:2) Bochan nib t’uf e tin riyul’ rok e tin som’on e Kristiano, ma aram fan ni ur siyeged boch e machib, nge yalen, nge lem nib togopuluw ko tin riyul’. (Kol. 2:8) Ku arrogon e ngiyal’ ney ni tin riyul’ e Kristiano e yad ma athamgil ni ngaur ‘folgad ko tin riyul’,’ ni aram e yad ma guy rogon ni nge puluw e michan’ rorad nge ngongol rorad ko Thin rok Jehovah.​—3 John 3, 4.

12. Mang e ma rin’ e piin yad ma yog e thin rodad u nap’an ni yad ra nang nib t’uf ni ngar thilyeged rogon ni ke tamilang reb e machib u wan’dad ara rogon ni gad be rin’ ban’en, ma mang fan?

¹² Girdi’ rok Got e ngiyal’ ney e daru rogned ni gubin ban’en u Bible ni kari tamilang u wan’rad. Bay yu ngiyal’ ni kar olobochgad u rogon ni kar weliyed reb e machib u Bible ara rogon ni kar yarmiyed e ulung rorad. Susun e dab da gingad ko re n’ey, ya be tamilangnag e Bible ni girdi’ rok Got e ra i tamilang e tin riyul’ u wan’rad ni buchuuw ma buchuuw. (Kol. 1:9, 10) Ma tamilangnag Jehovah e tin riyul’ ni buchuuw ma buchuuw. Ere thingari m’agan’dad ngay ni ngad songad nge mada’ ko ngiyal’ nrayog ni ngad nanged fan e tin riyul’ nda i tamilang u wan’dad kafram. (Prov. 4:18) Nap’an nra nang e piin yad ma yog e thin rodad nib t’uf ni ngad thilyeged rogon ni ke tamilang reb e machib u wan’dad ara rogon ni gad be rin’ ban’en, ma aram mar thilyeged ni ka chingiyal’ nem. Boor raba’ e teliw e ngiyal’ ney ni yad ma thilyeg e machib rorad ni bochan e yad baadag ni ngar fel’gad u wan’ girdien e teliw rorad ara nge adag e girdi’ nu fayleng dakenrad. Machane Pi Mich Rok Jehovah e yad ma thilyeg boch ban’en ko machib rorad ya yad baadag ni ngar chugurgad ngak Got mar liyorgad ngak ni bod rogon ni i rin’ Jesus. (Jas. 4:4) Fan ni gad ma thilyeg boch ban’en e gathi bochan ni ke thil rogon ni be lemnag e girdi’ nu fayleng boch ban’en, ya bochan ni ke tamilang u wan’dad boch ban’en ni bay u Bible. Ba t’uf e tin riyul’ rodad!​—1 Thess. 2:3, 4.

13. Mang e bin th’abi ga’ fan e fel’ngin ni ma dag e tin riyul’ e Kristiano? Uw rogon ni ma dag e Pi Mich Rok Jehovah e re fel’ngin ney e ngiyal’ ney?

¹³ Bin th’abi ga’ fan e fel’ngin ni immoy ko tin som’on e Kristiano e aram e t’ufeg. I gaar Jesus: “Faanra um pired nib t’uf bigimed rok bigimed, ma aram e urngin e girdi’ ni yad ra nang ni gimed pi gachalpeg.” (John 13:34, 35) Pi Mich Rok Jehovah u ga’ngin yang e fayleng e ngiyal’ ney e bay e bin riyul’ e t’ufeg nge taareban’ u thilrad. Gad ba thil nga urngin raba’ e teliw ni bochan e yugu aram rogon nib thilthil e nam nge yalen rodad, ma gad bod reb e tabinaw. Gad ma guy e re t’ufeg ney u nap’an e muulung, nge assembly, nge convention rodad. Re n’ey e be ayuwegdad ni ngari mich u wan’dad nib m’agan’ Jehovah ko liyor ni gad be tay ngak.

14. Mang reb e kanawo’ nrayog ni ngar da t’ufeged gadad riy nrogon ni bay ko Kolose 3:12-14?

¹⁴ Be pi’ e Bible e athamgil nga lanin’dad ni ‘ngari bagadad me t’uf rok bagadad.’ (1 Pet. 4:8) Reb e kanawo’ ni gad ma dag e re t’ufeg  ney riy e aram e gad ma n’ag fan e kireb rodad ma gad be fek owchedad ko meewar rok boch i gadad. Ku gad ma gay boch e kanawo’ ni ngad golgad riy ngak urngin e girdi’ u lan e ulung ni kub muun ngay e piin kar rin’ed ban’en ni ke kirebnag lanin’dad. (Mu beeg e Kolose 3:12-14.) Nap’an ni gad ra dag e t’ufeg ni aray rogon, ma aram e gad be micheg ni gadad e tin riyul’ e Kristiano.

15. Ku mang boch e kanawo’ ni gad ma fol u rogon kanawoen e liyor ni i tay e ulung ni Kristiano ko bin som’on e chibog?

¹⁵ Ku bay boch e kanawo’ ni gad ma fol u rogon kanawoen e liyor ni i tay e ulung ni Kristiano ko bin som’on e chibog. Bod ni kan yarmiydad ni bod rogon e pi Kristiano nem. Bay boch e walag ni ma lekag e ulung rodad, nge piin piilal, nge pi ministerial servant ni bod ni immoy e ngiyal’ nem. (Fil. 1:1; Titus 1:5) Ku gad ma fol ko pi motochiyel rok Jehovah u murung’agen e par ko pumoon nge ppin nge mabgol, nge n’en be yog Got u murung’agen e racha’, maku gad ma ayuweg e ulung rodad rok e piin dubrad ni ngar folgad ko pi motochiyel rok Got ni bod ni ur rin’ed.​—Acts 15:28, 29; 1 Kor. 5:11-13; 6:9, 10; Heb. 13:4.

16. Mang e gad be fil ko fare thin ni bay ko Efesus 4:4-6?

¹⁶ I yog Jesus ni boor e girdi’ ni yad ra yog ni yad pi gachalpen, machane gathi yad gubin nriyul’ ni yad pi gachalpen. (Matt. 7:21-23) Ku be yog e Bible nra taw ko tin tomuren e rran, ma boor e girdi’ nra “ur dake yad be liyor ngak Got.” (2 Tim. 3:1, 5) Machane be yog e Bible ni kemus ni “taareb e michan’” nib m’agan’ Got ngay.​—Mu beeg e Efesus 4:4-6, NW. *

17. Mini’ e piin yad be folwok rok Jesus e ngiyal’ ney ma yad be yan u kanawoen e bin riyul’ e michan’?

¹⁷ Mini’ e piin yad be yan u kanawoen e bin riyul’ e michan’ e ngiyal’ ney? Kad weliyed e mich riy. Kad weliyed rogon kanawoen e liyor ni fil Jesus ko girdi’ ma i rin’ e piin Kristiano ko bin som’on e chibog. Kemus ni yigoo Pi Mich Rok Jehovah e yad be rin’ e re n’ey. Ri gad ba tow’ath ni gad boch e girdi’ rok Jehovah ni kad nanged e tin riyul’ u murung’agen nge pi n’en nib m’agan’ ngay! Ere manga yigi mich u wan’dad ni kad pirieged e tin riyul’.