1. Uw rogon ni i pi’ Got gelngin e pi tapigpig rok ni yad ba yul’yul’ kakrom?

 BA GA’ ni ma yog e Thin rok Got ni pi pumoon ni yad ba yul’yul’ e yad ba gel. Machane gathi gubin ngiyal’ ni ur lemnaged ni yad ba gel. Bod ni bay yu ngiyal’ ni i lemnag David ni Pilung nib gel gelngin ni “bod bburey,” ma yu ngiyal’ e i “rus.” (Ps. 30:​7, BT) Yugu aram rogon ni pi’ gelngin Got nib thothup gelngin Samson nge gel, machane manang nra dabi pi’ Got gelngin ma ra ‘par ni ke meewar ni bod e yug girdi’.’ (Judg. 14:​5, 6; 16:17) Pi pumoon ney ni yad ba yul’yul’ e yad ba gel ni bochan e i pi’ Jehovah gelngirad.

2. Mang fan ni yog apostal Paul nib gel gelngin ko ngiyal’ nib meewar? (2 Korinth 12:​9, 10)

² I yog apostal Paul ni mus ngak mab t’uf ni nge pi’ Jehovah gelngin. (Mu beeg e 2 Korinth 12:​9, 10.) I yib e m’ar ngak ni ka bod e n’en ma buch rok boor i gadad. (Gal. 4:​13, 14) Ku immoy yu ngiyal’ ni i mo’maw’ ngak ni nge rin’ e tin nib fel’. (Rom. 7:​18, 19) Ma yu ngiyal’ e i magafan’ nib pag rogon ma be magar ko n’en nrayog ni nge buch rok. (2 Kor. 1:​8, 9) Yugu aram rogon mab gel gelngin ko ngiyal’ nib meewar. Ni uw rogon? I pi’ Jehovah gelngin ni nge athamgil u fithik’ e pi magawon rok.

3. Mang deer e gad ra weliy e fulweg riy ko re article ney?

³ Ku be micheg Jehovah nra pi’ gelngidad. (1 Pet. 5:10) Machane dabiyog ni nge pi’ e re gelngin nem ngodad ni faanra dariy ban’en ni gad be rin’. Rayog ni ngan susunnag ko masin ko karrow ni aram e n’en ma pi’ gelngin ni nge mithmith. Machane ra nge mithmith fare karrow mab t’uf ni nge dun’uf faen be yannag e gas riy. Ku arrogon Jehovah nib m’agan’ ngay ni nge pi’ gelngidad ko ngiyal’ nib t’uf rodad, machane bay boch ban’en nthingar da rin’ed ya nge yag ni yib angin ngodad. Ere mang e ke pi’ Jehovah nra pi’ gelngidad? Ma mang e ba t’uf ni ngad rin’ed ya nge yag e re gelngin nem ngodad? Faan gad ra weliy rogon ni pi’ Jehovah gelngin dalip e girdi’ ni bay murung’agrad u  Bible ni aram Jonah ni profet, nge Maria ni chitiningin Jesus, nge apostal Paul, ma aram e gad ra nang e fulweg ko gal deer ney. Ku gad ra weliy rogon ni ka be ulul Jehovah e ngiyal’ ney ni nge pi’ gelngin e pi tapigpig rok u boch e kanawo’ ni aray rogon.

4. Uw rogon nrayog ni nge pi’ Jehovah gelngidad?

⁴ Reb e kanawo’ nrayog ni nge pi’ Jehovah gelngidad riy e aram e ngaud meybilgad ngak. Ra fulweg taban e meybil rodad ni aram e nge pi’ fare gelngin ngodad “ni ir e ba th’abi gel.” (2 Kor. 4:7) Ku rayog ni nge yib gelngidad u nap’an ni gad ra beeg e Thin rok ma gad be fal’eg i lemnag. (Ps. 86:11) Thin ni ke pi’ Jehovah ni fan ngodad u lan e Bible e “ba’ gelngin ni ma maruwel.” (Heb. 4:12) Nap’an ni ga ra meybil ngak Jehovah mag beeg e Thin rok, ma aram e ra yib gelngim ni ngam athamgil, ara ngam par ni gab felfelan’, ara ngam rin’ reb e maruwel nib mo’maw’ ni kan pi’ ngom. Mu tay fanam i yan u rogon ni pi’ Jehovah gelngin Jonah ni profet.

5. Mang fan nib t’uf ni ngan pi’ gelngin Jonah ni profet?

⁵ Ba t’uf ni ngan pi’ gelngin Jonah ni profet. Ke mil ko maruwel nib mo’maw’ ni ke pi’ Jehovah ngak. Bochan e re n’ey me chugur ni nge yim’ u tan bangi lang nib gel, miki tay e yafos rok e piin yad nga barkow nga thatharen e riya’. Nap’an nnon’ nga maday me ful’ ba nig nib ga’ me yan i par nga bangi ban’en u lan yin e re nig nem nib gel e tamdag riy. Ga be lemnag ma uw rogon laniyan’ Jonah e ngiyal’ nem? Gur, i lemnag ni aram e gin nra yim’ riy? Fa gur, i lemnag ndaki fel’ u wan’ Jehovah? Ba mudugil nrib gel e magafan’ ni i tay Jonah.

6. Mang e pi’ gelngin Jonah u nap’an ni bay u lan yin fare nig nrogon nib puluw ko Jonah 2:​1, 2, 7?

⁶ Mang e rin’ Jonah ya nge yag nni pi’ gelngin u nap’an ni bay u rom ni yigoo ir? I meybil ngak Jehovah. (Mu beeg e Jonah 2:​1, 2, 7.) Yugu aram rogon nde fol rok Jehovah, machane ba pagan’ ngay nra motoyil Jehovah ko meybil ni ke tay ni bochan e ke sobut’nag laniyan’ ma kki kalngan’. Ki fal’eg i lemnag e thin ni bay u lan fare Babyor nib Thothup. Mang fan nrayog ni nga dogned e re n’ey? Meybil ni tay ni bay ko Jonah ko guruy ni 2 e boor e thin ni yog riy ni taareb rogon ko fapi thin ni bay ko Psalms. (Bod ni mu taarebrogonnag e Jonah 2:​2, 5 ko Psalm 69:1; 86:7.) Ba tamilang nri manang Jonah e n’en bay ko gal thin nu Bible ney. Ma bochan ni i fal’eg i lemnag e gal thin ney e ngiyal’ nem, ma aram fan nib pagan’ ngay nra ayuweg Jehovah. Boch nga tomuren me yib fare nig i thuwag nga daken e binaw, ma aram me m’agan’ ngay ni nge rin’ e maruwel ni ke pi’ Jehovah ngak.​—Jonah 2:10–3:4.

7-8. Uw rogon nni pi’ gelngin reb e walag ni pumoon u Taiwan u nap’an ni be mada’nag boch e magawon?

⁷ N’en ni buch rok Jonah e rayog ni nge ayuwegdad u nap’an ni gad be mada’nag boch e magawon. Zhiming b nreb e walag ni pumoon u Taiwan e yib boch e m’ar ngak nib ubchiya’. Maku reb e ba gel e gafgow ni ma tay chon e tabinaw rok ngak ni bochan e ba mich Jehovah u wan’. Machane ma pi’ Jehovah gelngin u daken e meybil nge fol Bible ni ma tay. I yog ni gaar, “Bay yu ngiyal’ nnap’an nra yib e magawon, mab gel e magafan’ nug ma tay ndabiyog ni nggu fil e Bible rog ni yigoo gag.” Yugu aram rogon ma der ma mulan’. I yog ni gaar: “Som’on e gu ma meybil ngak Jehovah. Ngemu’ mug tay e earphone nga telig nggu motoyil ko pi tang ni yima yon’ u nap’an e muulung. Ma yu ngiyal’ e gu ma yon’ e pi tang nem nib achig lamag nge mada’ ko ngiyal’ ni ke gapas lanin’ug. Ngemu’ mfin gu tabab ko fol Bible.”

⁸ Fol Bible ni ma tay Zhiming ni yigoo ir e ke  ayuweg u boor e kanawo’ nda i lemnag nra ayuweg riy. Bod ni bay bayay u tomuren nni sey nib gel e maad’ad nni tay ngak, me yog reb e kangof ngak nib t’uf ni ngan pi’ e racha’ ngak ya ke buchuuw e racha’ u fithik’ i dow. Machane re nep’ ni baaram u m’on ni ngan sey, me beeg murung’agen reb e walag nib pin ni kki un ko re miti tafalay nem. Re walag nem e gel e buchuuw ko racha’ u fithik’ i dow ngak Zhiming, machane de pag ni ngan pi’ e racha’ ngak miki fel’ rogon bayay. Re n’ey e pi’ gelngin Zhiming ni nge par nib yul’yul’.

9. Faanra be magafan’um ni bochan reb e magawon, ma mang e rayog ni ngam rin’? (Kum guy e sasing.)

⁹ Gur, bay yu ngiyal’ ni ma magafan’um nib pag rogon u nap’an ni ga be mada’nag reb e magawon ndabkiyog ni ngam weliy lanin’um nib fel’ rogon u daken e meybil? Ara dakuriy gelngim ni ngam fil e Bible, fa? Dab mu pagtalin nrib tamilangan’ Jehovah ko magawon rom. Ere mus ni faanra ka yugu mog bochi meybil nde n’uw nap’an, ma rayog ni nge pagan’um ngay nra pi’ ngom e n’en nib t’uf rom. (Efe. 3:20) Faanra dabiyog ni ngam beeg mag fil e Bible rom ni bochan e kam m’ar, ara ke aw parwom, ara be magafan’um nib pag rogon, ma rayog ni ngam motoyil nga boch e thin nu Bible ara thin u yu ken e babyor rodad ni kan recordnag. Ku rayog ni ngam motoyil nga reb e tang rodad ara mu yaliy reb e video ko jw.org. Faan ga ra meybil ngak Jehovah mag guy rogon ni be fulweg taban e meybil rom u daken e pi n’en ke pi’ ni fan ko tirok ban’en, ma aram e ga be pag ni nge pi’ gelngim.

10. Uw rogon ni ma pi’ e pi walagdad gelngidad?

¹⁰ Rayog ni nge fanay Jehovah e pi walagdad ni ngar pied gelngidad. Ra gad be mada’nag reb e magawon ara der yag ni ngad rin’ed reb e maruwel nib mo’maw’ ni kan pi’ ngodad, ma aram e rayog ni “ngar fal’eged lanin’dad.” (Kol. 4:​10, 11, NW) Ba ga’ nu nap’an ni gad be mada’nag e “gafgow” e aram e ngiyal’ nrib t’uf e pi fager rodad. (Prov. 17:​17, BT) Rayog ni nge ayuwegdad e pi walagdad ko tin nib t’uf rodad, mar fal’eged lanin’dad, mu kur ayuweged gadad ko tirok Got ban’en u nap’an ni kad meewargad. Am lemnag rogon nni pi’ e gel nga laniyan’ Maria ni chitiningin Jesus.

11. Mang fan nib t’uf ni ngan pi’ gelngin Maria?

 ¹¹ Ba t’uf ni ngan pi’ gelngin Maria. Am lemnag gelngin e magafan’ ni tay u tomuren ni pi’ Gabriel ni engel ba maruwel ngak ni nge rin’ nib mo’maw’. Nog ngak ni bayi diyen ni yugu aram rogon ndawori un ko mabgol. Ku nog ngak ni nge chuguliy bochi tir nib pagel ni ir e ra mang fare Messiah ni yugu aram rogon ndariy fak. Maku reb e uw rogon ni nge weliy urngin e pi n’ey ngak Josef ni ir e kan m’ag e mabgol rorow ni aram rogon ndawori nang e pumoon?​—Luke 1:​26-33.

12. Uw rogon nni pi’ gelngin Maria nrogon ni be yog e Luke 1:​39-45?

¹² Uw rogon nni pi’ gelngin Maria ni nge rin’ e biney e maruwel nni pi’ ngak ni yugu ba thil mab mo’maw’? I ning e ayuw. Bod ni yog ngak Gabriel ni ngki weliy ngak yugu boch ban’en u murung’agen e maruwel ni kan pi’ ngak. (Luke 1:34) De n’uw nap’an nga tomuren me milekag “nga bangi n’en ni yigoo burey” ni bay u lan yu Judah ni nge guy Elizabeth nreb e girdi’ rok. I yib angin e re milekag nem ni tay. I yog Elizabeth boch ban’en nib fel’ u murung’agen Maria me thagthagnag Jehovah nga laniyan’ ni nge weliy ba yiiy u murung’agen fare tir ni bay u yin Maria nra pi’ e athamgil nga laniyan’. (Mu beeg e Luke 1:​39-45.) I yog Maria ni ke rin’ Jehovah boch ban’en nga “pa’ nib gel.” (Luke 1:​46-51) I fanay Jehovah Gabriel nge Elizabeth ni nge pi’ gelngin Maria.

13. Mang e buch u nap’an ni ning reb e walag nib pin u Bolivia e ayuw ngak pi walagen?

¹³ Rayog ni ngki pi’ e pi walag gelngim ni bod e n’en ni buch rok Maria. Dasuri nreb e walag nib pin u Bolivia e t’uf ni ngan pi’ gelngin. Nap’an nni pirieg ba mit e m’ar rok e chitamangin ndab ki gol riy mi non’ nga aspital, ma aram me m’agan’ ngay ni nge par u rom nga i ayuweg. (1 Tim. 5:4) Gathi gubin ngiyal’ nib mom e re n’ey ngak. I yog ni gaar, “Boor yay ni ug lemnag ndabkiyog rog.” Ere gur, i ning e ayuw? Som’on e de ning e ayuw. I yog ni gaar: “Dabug ni nggu magawonnag e pi walag. I lungug u wan’ug, ‘Jehovah e ir e ra ayuwegeg.’ Machane gu wan gu nang ni faan gu ra palognageg ko pi walag, ma aram e gu be guy rogon ni nggu pithig e magawon rog ni yigoo gag.” (Prov. 18:1) Ere dugliy Dasuri ni nge yol ngak in e fager rok nge weliy salpen ngorad. I yog ni gaar: “Dabiyog ni nggu weliy ko thin gelngin e athamgil ni pi’ e pi walageg ngog. Ur bad ra pied e ggan ngog nga aspital, mu ur beeged boch e thin nu Bible nra fal’eg lanin’ug. Rib manigil e re n’ey ni gad manang ni gathi yigoo gadad ya gad bang ko tabinaw rok Jehovah ni boor girdien nib m’agan’rad ngay ni ngar ayuweged gadad, mar uned ngodad ko meyor, mar pied e athamgil nga lanin’dad ni ngad ululgad ko pigpig ni gad be tay ngak Jehovah u taabang.”

14. Mang fan nsusun e nge m’agan’dad ko ayuw ni ma pi’ e piin piilal ngodad?

¹⁴ Reb e kanawo’ ni ma pi’ Jehovah gelngidad riy e u daken e piin piilal. Yad boch e tow’ath ni ma fanayrad ni ngar pied gelngidad mar fal’eged lanin’dad. (Isa. 32:​1, 2) Ere mu weliy e magafan’ rom ngorad. Ma dab mu siyeg e ayuw ni yad ra ognag ngom. Ya rayog ni nge fanayrad Jehovah ni ngar pied gelngim.

15. Mang e athap rok urngin e Kristiano?

¹⁵ Pi n’en be l’agan’dad ngay ni bay u Bible e rayog ni nge pi’ gelngidad. (Rom. 4:​3, 18-20) Boch e Kristiano e yad be athapeg e yafos ni manemus u tharmiy, ma boch e yad be athapeg e yafos ni manemus u paradis u fayleng. Athap rodad e ma pi’ gelngidad ni ngad athamgilgad u fithik’ e pi magawon ni gad ma mada’nag, ma gad machibnag fare thin nib fel’, ma gad rin’ e  pi maruwel ni kan pi’ ngodad u lan e ulung. (1 Thess. 1:3) Ku aram e re athap ni pi’ gelngin apostal Paul.

16. Mang fan nib t’uf ni ngan pi’ gelngin apostal Paul?

¹⁶ Ba t’uf ni ngan pi’ gelngin Paul. Nap’an ni yol ngak piyu Korinth me taarebrogonnag ir nga ba rume’ ni but’ nib mom ni nge pil. Boor yay ni ‘ing e gafgow,’ ‘ma daki nang e n’en ni nge rin’,’ ma ‘yibe togopluw ngak,’ mab ‘gel e maad’ad ni yibe tay ngak.’ Mus ko yafos rok ma i par u thatharen e riya’. (2 Kor. 4:​8-10) I yoloy Paul e pi thin ney u nap’an e yay ni dalip e milekag ni tay ni be machib. Tomuren ni yoloy e pi thin ney maku boor e magawon nib mo’maw’ ni mada’nag. I yib ba ulung i girdi’ ni ngar chamgad ngak, mu kun kol ngan fek, me pil e barkow ngak, mu kun kalbusnag.

17. Mang e pi’ gelngin Paul ni nge athamgil u fithik’ e pi magawon rok nrogon nib puluw ko 2 Korinth 4:​16-18?

¹⁷ I yib gelngin Paul ni nge athamgil ni bochan e i par ni be lemnag e athap rok. (Mu beeg e 2 Korinth 4:​16-18.) I yog ngak piyu Korinth ni mus ni faanra ‘be meewar e dowef rok i yan,’ ma dabi pag e re n’em ni nge muleg laniyan’. I par ni be lemnag e pi n’en bay ni fan ngak boch nga m’on. Athap rok ko yafos ni manemus u tharmiy e ri “kab gel feni ga’” ko gafgow ni i mada’nag. Bochan ni i fal’eg Paul i lemnag e re athap nem, ma aram me thamiy ni “yibe beechnag u reb e rran ngu reb.”

18. Uw rogon ni yib gelngin Tihomir nge chon e tabinaw rok ni bochan e athap rorad?

¹⁸ Tihomir nreb e walag ni pumoon u Bulgaria e ki yib gelngin ni bochan e athap rok. In e duw ni ke yan me yim’ reb e pumoon ni walagen nib bitir ngak ni ka nog Zdravko ngak u nap’an ni chafin e karrow ni bay u langgin. Bochan e re n’ey, ma aram mi i par Tihomir nrib kireban’. Ere yad ma lemnag chon e tabinaw rok rarogon e ngiyal’ ni yira faseg e piin kar m’ad ni bochan e nge ayuwegrad ni ngar athamgilgad u fithik’ e kireban’ rorad. I yog ni gaar: “Gamad ma weliy murung’agen e gin gamad ra mada’nag Zdravko riy, nge re miti ggan ni gamad ra ngongliy ni nge kay, nge piin gamad ra pining ko bin som’on e abich ni gamad ra tay u nap’an ni yira faseg ko yam’, nge n’en ni gamad ra weliy ngak u murung’agen e tin tomuren  e rran.” I yog Tihomir ni bochan ni yad ma par chon e tabinaw rok ni yad ma lemnag e athap rorad, ma aram e n’en ke ayuwegrad ni ngaur athamgilgad ma yad be sonnag e ngiyal’ nra faseg Jehovah walagen.

19. Uw rogon nrayog ni ngari l’agan’um ko pi n’en ka bay nga m’on? (Kum guy e sasing.)

¹⁹ Uw rogon nrayog ni ngari l’agan’um ko pi n’en ka bay nga m’on? Bod ni faanra athap rom e ngam par u fayleng ndariy n’umngin nap’an, mag beeg e n’en be yog e Bible u murung’agen e Paradis mag fal’eg i lemnag. (Isa. 25:8; 32:​16-18) Mu lemnag rarogon e par u lan e bin nib beech e fayleng, mu kum susunnag ni ga bay u rom. Mini’ e ga be guy u rom? Mang e ga be rung’ag? Ma uw rogon e lem rom? Mu yaliy e sasing ni bay u lan e pi babyor rodad ni yaan e Paradis ara mu yaliy reb fapi music video ni kenggin e The New World to Come, ara Just Around the Corner, ara Imagine the Time ya nge yag ni ngaum lemnag rarogon e ngiyal’ nem. Faanra ud pared ni gad be lemnag e bin nib beech e fayleng ni gad be athapeg, ma aram e rayog ni ngaud lemnaged ni magawon ni gad be mada’nag e ba “achig ma dabi n’uw nap’an me m’ay.” (2 Kor. 4:17) Athap ni ke pi’ Jehovah ngom e rayog ni nge ayuwegem ni ngam athamgil u fithik’ e magawon rom.

20. Mus ni faanra kad meewargad, ma uw rogon nrayog ni nge yib gelngidad?

²⁰ Mus ni faanra kad meewargad, ma “ra bay Got u ba’ rodad ma gadad ra gel.” (Ps. 108:​13, BT) Ke pi’ Jehovah e n’en nib t’uf rom ya nge yag ni pi’ gelngim. Ere nap’an nra t’uf e ayuw rom ni ngam rin’ reb e maruwel ni kan pi’ ngom, ara ngam athamgil u fithik’ reb e magawon ni ga be mada’nag, ara ngam par ni gab felfelan’, mag meybil ngak mu kum pag ni nge pow’iyem u daken e fol Bible ni ga ma tay ni yigoo gur. Mu pag e pi walag ni ngar pied e athamgil nga lanin’um. Um par ni ga be lemnag e athap rom. Faan ga ra rin’ e re n’ey, ma aram e ra ‘gelnagem Got nga polo’ i gelngin ni ma yib u gelngin ndabi m’ay, nge yog ni mu athamgiliy urngin ban’en u fithik’ e gum’an’ . . . [nge] felfelan’.’​—Kol. 1:​11, 12.