1. Uw rogon u wan’ Jehovah e pi tapigpig rok?

 MANG e ma guy Jehovah u nap’an nra sap ko pi tapigpig rok u fayleng? Ma guy rogon e felfelan’ nge kireban’ ni gad ma tay. (Ps. 37:18) Ri ma felfelan’ u nap’an nra guy ni gad be athamgil u rogon nrayog rodad ni ngad pigpiggad ngak ni yugu aram rogon ni bay boch ban’en nri be kirebnag lanin’dad! Maku reb e, ri baadag ni nge ayuwegdad me fal’eg lanin’dad.

2. Mang e ma rin’ Jehovah ni fan ko piin ke kireban’rad? Uw rogon nrayog ni nge yib angin e ayuw rok ngodad?

² Be yog e Psalm 147:3 ni ma ‘taflaynag Jehovah e maad’ad’ rok e piin ke kireban’rad. Re thin nu Bible ney e be weliy rogon ni ma ayuweg Jehovah e piin ke maad’ad lanin’rad. Ere mang e thingar da rin’ed ya nge yag ni yib angin e ayuw rok ngodad? Am lemnag rogon nrayog ni ngan susunnag. Reb e togta nib salap e boor ban’en nrayog ni nge rin’ ni nge ayuweg be’ ni ke maad’ad ni nge gol e maad’ad rok. Machane faanra nge gol e maad’ad rok facha’, ma thingari fol ko n’en ke yog fare togta ngak. Ere gad ra weliy ko re article ney e n’en ke yog Jehovah u lan e Thin rok ni fan ko piin be gafgow lanin’rad nge rogon ni ngad folgad ko pi fonow ni ma pi’ ngodad u fithik’ e t’ufeg.

BE PUGURAN JEHOVAH NGODAD NIB GA’ FADAD U WAN’

3. Mang fan ni bay boch e girdi’ ni yad ma lemnag ndariy farad?

³ Gad be par u ba fayleng ndakuriy e t’ufeg riy. Bochan e re n’ey, ma boor e girdi’ ni yima gafgownagrad min k’aringrad ni ngar lemnaged ndariy farad. I yog reb e walag nib pin ni ka nog Helen a ngak ni gaar: “Gu ilal u reb e tabinaw ndanir ma dag e t’ufeg riy. Chitamag e be’ nib ta cham ma gubin e rran ni ma yog ngog ndariy  fag.” Sana taareb rogom ngak Helen ni ka un gafgownagem, ara gubin ngiyal’ ni yima gathibthibnagem, ara yima k’aringem ni ngam lemnag ndariy fam. Faanra arrogon, ma sana rayog nib mo’maw’ ni nge mich u wan’um ni bay be’ nri gab t’uf rok.

4. Mang e ke micheg Jehovah ngodad nrogon ni be yog e Psalm 34:18?

⁴ Mus ni faanra ka i gafgownagem yugu boch e girdi’, machane rayog ni nge pagan’um ngay ni gab t’uf rok Jehovah mab ga’ fam u wan’. “Ba chugur ngak e piin ke mulan’rad.” (Mu beeg e Psalm 34:​18, BT.) Faanra ‘dakuriy ban’en ni be l’agan’um ngay,’ ma dab mu pagtalin ni bay boch ban’en nib manigil ni guy Jehovah rom ma aram me pow’iyem ngak. (John 6:44) Gubin ngiyal’ ni ke fal’eg rogon ni nge ayuwegem ya ri gab t’uf rok.

5. Mang e rayog ni ngad filed u rogon e ngongol rok Jesus ngak e piin un darifannagrad?

⁵ Rayog ni ngad nanged rogon laniyan’ Jehovah ni faan gad ra lemnag e n’en ni i rin’ Jesus. Nap’an e machib ni i tay u fayleng, ma i dag ni be lemnag e piin ma darifannagrad yugu boch e girdi’, ma i dag e runguy ngorad. (Matt. 9:​9-12) Nap’an ni math be’ nib pin ko mad rok ni be athapeg ni manga yigi gol u ba mit e m’ar ni bay rok nrib gel e kireb riy, ma aram me fal’eg laniyan’ miki yog ngak nib fel’ e n’en ke rin’ u daken e michan’ rok. (Mark 5:​25-34) Rib fel’ rogon ni i m’ug rarogon e Chitamangin Jesus rok. (John 14:9) Ere rayog ni nge pagan’um ngay nib ga’ fam u wan’ Jehovah ma ma guy fel’ngim, nib muun ngay e michan’ nge t’ufeg rom ngak.

6. Mang e rayog ni nge ayuweg be’ ni faanra ma lemnag ni ir be’ ndariy fan?

⁶ Mang e rayog ni ngam rin’ ni faanra ga ma lemnag ndariy fam? Mu beeg boch e thin nu Bible ni be micheg ngom nib ga’ fam u wan’ Jehovah mag fal’eg i lemnag. b (Ps. 94:19) Faanra de yag ni ngam rin’ ban’en ni ka um nameg ara  be mulan’um ni bochan e dabiyog ni ngam rin’ boch ban’en ni bod urngin e tin nrayog rok yugu boch e girdi’, ma dab mu lemnag ndariy ban’en ni gab fel’ ngay. Der ma lemnag Jehovah ni ngad rin’ed boch ban’en ndabiyog rodad. (Ps. 103:​13, 14) Faanra i gafgownagem be’ kafram, ma dab mu lemnag ni gur e ba kireb e rom! Dab mu pagtalin nra pufthinnag Jehovah e piin yad ma gafgownag yugu boch e girdi’, me ayuweg e piin un gafgownagrad. (1 Pet. 3:12) Sandra ni un gafgownag u nap’an ni kab bitir e yog ni gaar, “Gubin ngiyal’ nug ma wenig ngak Jehovah ni nge ayuwegeg ni ngguy e pi fel’ngin ni ma guy rog.”

7. Uw rogon nrayog ni ngad fanayed e pi n’en ni i buch rodad kafram ni fan ko pigpig rodad ngak Jehovah?

⁷ Dabi maruwar u wan’um nrayog rok Jehovah ni nge fanay yugu boch e girdi’ ni ngar ayuweged gur. Ke pi’ reb e tow’ath ngom ni aram e ngam maruwelgow u taabang ni fan ko fare maruwel ni machib. (1 Kor. 3:9) Pi n’en ke buch rom e dabisiy ni ke momnag ngom ni ngam nang rogon laniyan’ e piin yad be gafgow. Ere boor ban’en nrayog ni ngam rin’ ni ngam ayuwegrad. Helen ni faan kan weliy murung’agen e ni ayuweg, ma chiney e rayog ni ngki ayuweg yugu boch e girdi’. I yog ni gaar: “Kafram e gu ma lemnag ni gag be’ ndariy fag. Machane ke ayuwegeg Jehovah ni nggu nang ni gub t’uf rok, ma ma fanayeg ni nggu ayuweg yugu boch e girdi’.” Ba felfelan’ Helen ni ma pigpig ni ir reb e regular pioneer.

BAADAG JEHOVAH NI NGE M’AGAN’DAD NGAY NI KE N’AG FAN E KIREB RODAD

8. Mang e be micheg e Isaiah 1:18 ngodad?

⁸ Bay boch e tapigpig rok Jehovah nri ma magawon lanin’rad ni bochan boch e kireb ni ur rin’ed kafram, ndemtrug ko kireb ni ur rin’ed u m’on ni ngar uned ko taufe ara tomuren ni kar taufegad. Machane dab da paged talin ni pi’ Jehovah fare biyul ni bochan e ri gad ba t’uf rok. Mab mudugil ni baadag ni nge m’agan’dad ko re tow’ath ney. Ke micheg ngodad nu tomuren ni kad “puruy’gad” c ara kad weliyed e denen rodad ngak, ma ra n’ag fan ni gubin. (Mu beeg e Isaiah 1:18.) Rriyul’ ni gad ba t’uf rok Jehovah ma der ma tay u wan’ e denen ni ud rin’ed kafram! Maku reb e, der ma pagtalin e tin nib fel’ ni kad rin’ed.​—Ps. 103:​9, 12; Heb. 6:10.

9. Mang fan nsusun e ngad athamgilgad u rogon nrayog rodad ni ngad lemnaged e tin gad be rin’ e chiney nge tin nrayog ni ngad rin’ed boch nga m’on ko bin ngaud lemnaged e kireb ni ud rin’ed kafram?

⁹ Faanra ka ma magawon lanin’um ni bochan e kireb ni um rin’ kafram, mag athamgil u rogon nrayog rom ni ngaum lemnag e tin ga be rin’ e chiney nge tin nrayog ni ngam rin’ boch nga m’on. Am lemnag e n’en ni rin’ apostal Paul. I kalngan’ ni bochan e gafgow nib gel ni i tay ko piin Kristiano kafram, machane manang ni ke n’ag Jehovah fan e kireb rok. (1 Tim. 1:​12-15) Ere gur, i par ni yugu be lemnag e denen ni i rin’ kafram? Dariy e maruwar riy nda i par ni be lemnag, ni ku bod rogon nda i par ni yugu be lemnag e pi n’en ni i rin’ ya nge yag ni mang reb e Farise ni yima tayfan. (Fil. 3:​4-8, 13-15) N’en ni rin’ Paul e aram e i rin’ e tin nrayog rok ni fan ko fare maruwel ni machib ma be lemnag e pi n’en ka bay nga m’on. Taareb rogom ngak Paul ndabiyog ni ngam thilyeg e pi n’en ni um rin’ kafram. Machane rayog ni ngam pining e sorok ngak Jehovah mag rin’ e tin nib m’agan’ ngay e chiney, mag lemnag e pi n’en nib manigil ni ke micheg ni fan ngom boch nga m’on.

10. Mang e rayog ni ngad rin’ed ni faanra kad kirebnaged laniyan’ yugu boch e girdi’ ni bochan e kireb ni ud rin’ed kafram?

¹⁰ Sana rayog ni nga i kireban’um ni bochan boch ban’en ni um rin’ kafram ni ke gafgownag yugu boch e girdi’. Ere mang e rayog ni nge ayuwegem? Mu rin’ e tin nrayog rom ni ngam yal’uweg  e kireb ni kam rin’, ni kub muun ngay ni ngam wenig ngak e en kam rin’ e kireb ngak. (2 Kor. 7:11) Kum wenig ngak Jehovah ni nge ayuweg e piin kam kirebnag lanin’rad. Rayog ni nge ayuwegem nge piin kam kirebnag lanin’rad ni ngam athamgilgad me gapas lanin’med.

11. Mang e rayog ni ngad filed ko n’en ni buch rok Jonah ni profet? (Kum guy e sasing.)

¹¹ Mu fil ban’en ko oloboch ni kam rin’, me m’agan’um ngay ni ngam pag Jehovah ni nge fanayem u rogon ni ke mel’eg ni nge rin’ riy. Mu tay fanam i yan ko n’en ni buch rok Jonah ni profet. I yog Got ngak ni nge milekag nga Nineveh, machane de rin’ ma aram me milekag nga bang nib palog ko gin ka nog ngak. Ere yal’uweg Jehovah Jonah, me fil ban’en ko oloboch ni rin’. (Jonah 1:​1-4, 15-17; 2:​7-10) Machane de mulan’ Jehovah u puluwon Jonah. Ki yog ngak bayay ni nge yan nga Nineveh, ma yanem e gur nge fol ko n’en nnog ngak. Yugu aram rogon ni kalngan’ ko oloboch ni rin’, machane de pag e re n’ey ni nge taleg nde rin’ e maruwel ni pi’ Jehovah ngak.​—Jonah 3:​1-3.

MA FAL’EG JEHOVAH LANIN’DAD U DAKEN GELNGIN NIB THOTHUP

12. Uw rogon ni ma pi’ Jehovah e gapas ngodad u nap’an nra buch ban’en nrib kireb rodad? (Filippi 4:​6, 7)

¹² Nap’an nra buch ban’en nrib kireb rodad ma ma fal’eg Jehovah lanin’dad u daken gelngin nib thothup. Am lemnag e n’en ni buch rok Ron nge Carol. Bay be’ nib pagel ni fakrow ni li’ ir nge yim’. I lungurow: “Bay boch e magawon nib mo’maw’ ni ug mada’nagew kafram, machane biney e th’abi gel e kireb riy. Boor e nep’ nder ma yag ni nggu molow, ere gamow ma meybil ngak Jehovah, ma rriyul’ ni ma yib fare gapas nga lanin’mow ni kan weliy murung’agen ko Filippi 4:​6, 7.” (Mu beeg.) Faanra kari kireban’um ni bochan ban’en nib kireb ni ke buch rom, ma rayog ni ngam weliy ngak Jehovah urngin ban’en ni bay u lanin’um ni urngin yay nge n’umngin nap’an ni ga baadag. (Ps. 86:3; 88:1) Um ning ngak Jehovah gelngin nib thothup, ya gubin ngiyal’ nra ayuwegem.​—Luke 11:​9-13.

13. Uw rogon nrayog ni nge ayuwegdad gelngin Jehovah nib thothup ni ngad ululgad ko pigpig ngak u fithik’ e yul’yul’? (Efesus 3:16)

¹³ Gur, bay reb e magawon nrib mo’maw’ ni kam mada’nag, ma chiney e ga be lemnag ndakuriy gelngim ni ngam rin’ boch ban’en, fa? Rayog ni nge pi’ gelngin Jehovah nib thothup gelngim ni ngam ulul ko pigpig ngak u fithik’ e yul’yul’. (Mu beeg e Efesus 3:16.) Am lemnag e n’en ni buch rok reb e walag nib pin ni ka nog Flora ngak. Nap’an ni yow be pigpig figirngin ni yow l’agruw e missionary, ma aram e daki yul’yul’ figirngin ngak mar dargow. I yog ni gaar: “Ri kireban’ug ni bochan e de par nib yul’yul’ ngog, mu ug par ni yigoo aram e n’en ni yug gu be lemnag. Gu meybil ngak Jehovah ni nge pi’ gelngin nib thothup ngog ya nge yag nug athamgil. Ere pi’ Jehovah e n’en nib t’uf rog ya nge yag ni fel’ bayay lanin’ug, mug athamgil u fithik’ reb e magawon nug lemnag ko som’on ndabiyog ni nggu gel ngay.” Be lemnag Flora ni ke ayuweg Got ni nge gel e pagan’ rok ngak, maku ra ayuweg u fithik’ urngin e magawon rok. Ki ulul ngay ni gaar: “Fapi thin ko Psalm 119:32 (BT) e ri be tamilangnag rogon ni ke ayuwegeg Jehovah, ya be gaar: ‘Rug ra fol ko tin kam ta’ chilen nib pasigan’ug ngay, ni bochan e bay mu gelnag e tamilangan’ rog.’”

14. Uw rogon nrayog ni ngad paged gelngin Got nib thothup ni nge maruwel u dakendad?

¹⁴ Tomuren ni ka mog ngak Jehovah ni nge pi’ gelngin nib thothup ngom, ma mang e susun ni ngam rin’? Mu rin’ e pi n’en nra ayuwegem ni nge maruwel gelngin Got nib thothup u dakenam. Pi n’ey e ba muun ngay e muulung nge machib. Mu suguy e lem rok Jehovah nga lanin’um ni aram e ngaum beeg e Thin rok ni gubin e rran. (Fil. 4:​8, 9) Nap’an ni ga be beeg e Bible, mag tay fanam i yan u boch e girdi’ ni be weliy murung’agrad ni ur mada’naged boch e magawon mag fal’eg i lemnag rogon ni i ayuwegrad Jehovah  ni ngar athamgilgad. Sandra ni faan kan weliy murung’agen e ba gel e gafgow ni i tay ni bochan e boor e magawon ni i mada’nag. I yog ni gaar: “Fare thin nu Bible ni murung’agen Josef e ri pi’ e athamgil nga lanin’ug. De pag e magawon nge ngongol nde mat’aw ni un rin’ ngak ni nge kirebnag e tha’ u thilrow Jehovah.”​—Gen. 39:​21-23.

MA FAL’EG JEHOVAH LANIN’DAD U DAKEN E PI WALAG

15. Mini’ e piin nrayog ni ngar fal’eged lanin’dad, ma uw rogon nrayog ni ngar ayuweged gadad? (Kum guy e sasing.)

¹⁵ Pi walag e rayog ni “ngar ra fal’eged lanin’dad” u nap’an ni gad be gafgow. (Kol. 4:​11, NW) Pi walagdad e aram reb e kanawo’ ni ma dag Jehovah e t’ufeg riy ngodad. Rayog ni ngar fal’eged lanin’dad ni aram e ngar ted e tayim ni fan ngodad mar motoyilgad u nap’an ni gad be weliy lanin’dad. Rayog ni ngar beeged reb e thin nu Bible nra pi’ e athamgil nga lanin’dad ara da meybilgad u taabang. d (Rom. 15:4) Ku bay yu ngiyal’ nrayog ni nge puguran reb e walag ngodad rogon e lem rok Jehovah me ayuwegdad ni nge puluw rogon e lem ni gad be tay. Ku rayog ni ngar ayuweged gadad u boch ban’en ni bod ni ngar pied boch e ggan ni ngad ked u nap’an ni be kireban’dad.

16. Mang e rayog nib t’uf ni ngad rin’ed ya nge yag ni ayuwegdad yugu boch e girdi’?

¹⁶ Bay yu ngiyal’ nrayog nib t’uf ni ngad ninged e ayuw ngak yugu boch e girdi’. Gad ba t’uf rok pi walagdad ma yad baadag ni ngar ayuweged  gadad. (Prov. 17:17) Machane sana rayog ndar nanged rogon lanin’dad ara n’en nib t’uf rodad. (Prov. 14:10) Faanra bay ban’en ni kari kirebnag lanin’um, mag weliy lanin’um ngak e pi fager rom ni kar ilalgad ko tirok Got ban’en. Mog ngorad e n’en nra ayuwegem. Ku rayog ni ngam mel’eg taareb ara l’agruw e piilal ni gab pufpuf ngorow ni ngam weliy lanin’um ngorow. Bay boch e walag nib pin ni kar guyed ni ma fel’ lanin’rad u nap’an ni yad ra non ngak yugu reb e walag nib pin ni ke ilal ko tirok Got ban’en.

17. Mang boch e magawon nrayog ni nge talegdad ndabin pi’ e athamgil nga lanin’dad? Uw rogon nrayog ni ngad gelgad ko pi magawon ney?

¹⁷ Yugu dabi pag n’umngin nap’an ni ngam palognagem ko girdi’. Sana rayog ni ngam adag ni ngaum par rom ni bochan e ri be kireban’um. Ma bay yu ngiyal’ nrayog ndabi nang e pi walag fan lanin’um nib fel’ rogon ara rogned boch e thin ngom nde puluw. (Jas. 3:2) Dab mu pag boch ban’en ni aray rogon ni nge talegem ndabin pi’ e athamgil nga lanin’um. Bay reb e walag ni pumoon ni ka nog Gavin ngak ni ma kireban’ nib pag rogon ni yog ni gaar: “Boor yay ndabug ni nggu non ara gu chag ko pi fager rog.” Machane ma athamgil Gavin ni nge chag ko pi walag, mab ga’ ni ma fel’ boch laniyan’ u nap’an nra rin’ e re n’ey. Ku bay reb e walag nib pin ni ka nog Amy ngak ni gaar: “Ba mo’maw’ ni nge pagan’ug ko girdi’ ni bochan e n’en ni buch rog kafram. Machane gu be fil rogon ni nggu t’ufeg e pi walageg me pagan’ug ngorad ni bod ni ma rin’ Jehovah. Gu manang nre n’ey e ma felfelan’nag Jehovah, maku arrogog ni ma yibnag e felfelan’ ngog.”

PI N’EN KE MICHEG JEHOVAH NI FAN NGODAD BOCH NGA M’ON E RA FAL’EG LANIN’DAD

18. Mang e rayog ni ngad athapeged ni ka bay boch nga m’on, ma mang e rayog ni ngad rin’ed e chiney?

¹⁸ Rayog ni nge pagan’dad ko pi n’en bay nga m’on, ya gad manang ndab ki n’uw nap’an ma ra chuweg Jehovah urngin ban’en ni ma k’aring e kireban’ nge amith ngodad. (Rev. 21:​3, 4) Ra taw ko ngiyal’ nem ma gubin ban’en ni ke buch rodad ni ke amithnag lanin’dad e goo ‘ri bay da paged talin.’ (Isa. 65:17) Machane kad guyed ni mus ko chiney e ma ra ‘taflaynag Jehovah e maad’ad rorad’ ara ayuwegdad u nap’an ni gad be gafgow. Ere mu fanay e pi n’en ke pi’ ni nge fal’eg lanin’um me ayuwegem. Ma dariy ba ngiyal’ ni nge maruwar u wan’um ko ‘be lemnagem’ fa danga’.​—1 Pet. 5:7.