1. Mang e rayog ni ngad pininged ngak Jehovah?

JESUS ni ir e ‘ba m’on’ u fithik’ urngin e tin nni sunmiy nge pi engel e yad bang ko tabinaw rok Jehovah. (Kol. 1:15; Ps. 103:20) Nap’an ni immoy Jesus u fayleng, me tamilangnag nrayog ko girdi’ ni yad ba yul’yul’ ni ngar ted Jehovah ni ir e Chitamangirad. Nap’an ni be non ngak pi gachalpen me gaar ngorad, Jehovah e “ir e Chitamag me ir e Chitamangimed.” (John 20:17) Ma nap’an ni gad ra ognaged gadad ngak Jehovah ngad uned ko taufe, ma aram ma gad mang bang ko tabinaw rok.​—Mark 10:29, 30.

2. Mang e gad ra weliy ko re article ney?

² Bay boch e girdi’ nib mo’maw’ ngorad ni ngar ted Jehovah ni ir e Chitamangirad. Ma boch e girdi’ e dar nanged rogon ni ngar t’ufeged pi walagrad. Re article ney e gad ra weliy riy rogon ni ke ayuwegdad Jesus ni ngad ted Jehovah ni ir e Chitamangidad nrayog ni nge chugur thildad. Ku gad ra weliy boch e kanawo’ nrayog ni ngad folwokgad rok Jehovah riy u rogon ni gad ma ngongol ngak pi walagdad.

3. Uw rogon ni fare kenggin e meybil ni fil Jesus e be chugurnagdad ngak Jehovah?

³ Jehovah e ir e Chitamangidad ni gad ba t’uf rok. Baadag Jesus ni ngaud lemnaged Jehovah ni bod rogon ni ma lemnag, ni aram e bod reb e gallabthir nib gol ma ma t’ufegey ndemtrug e ngiyal’ nrayog ni ngad nonad ngak, ma gathi ir be’ nib kireb ni kemus ni ma yog e n’en ngad rin’ed. Gad ra guy e re n’ey u rogon e n’en ni yog ngak pi gachalpen ni ngaur yibilayed. I yog u tabolngin fare kenggin e meybil ni gaar: “Chitamangimad.” (Matt. 6:9) Rayog ni nge yog Jesus ngodad ni ngad pininged Jehovah ni “Gubin ma Rayog Rok,” ara en ni ‘Ir e Sunumiy’ urngin ban’en, ara “fare Pilung ni bay i par ndariy n’umngin nap’an.” De kireb ni ngad rin’ed e re n’ey ni bochan e be fanay e Bible e pi liw ney u nap’an  ni be weliy murung’agen Jehovah. (Gen. 49:25; Isa. 40:28; 1 Tim. 1:17) Machane i yog Jesus ngodad ni ngad pininged Jehovah ni ‘Chitamangidad.’

4. Uw rogon ni kad nanged ni baadag Jehovah ni ngad chugurgad ngak?

⁴ Ba mo’maw’ ngom ni ngam tay Jehovah ni ir e Chitamam, fa? Boch i gadad e ba mo’maw’ ngak. Faanra da i t’ufegdad e chitamangidad, ma sana ra mo’maw’ ni ngad lemnaged ni bay reb e matam nrayog ni nga i t’ufegdad. Machane rayog ni ngad felfelan’gad ni bochan e Jehovah e manang rogon lanin’dad nge fan ni gad ma lem ni aram rogon! Baadag ni nge chugur ngodad. Aram fan ni be pi’ e Thin rok e athamgil nga lanin’dad ni be gaar: “Mu chugurgad ngak Got, me chugur ngomed.” (Jas. 4:8) Gad ba t’uf rok Jehovah ma ke yog nra mang e bin th’abi fel’ e Matam nra yag ngodad.

5. Uw rogon nra ayuwegdad Jesus ni ngad chugurgad ngak Jehovah nrogon ni bay ko Luke 10:22?

⁵ Rayog ni nge ayuwegdad Jesus ni ngad chugurgad ngak Jehovah. Manang Jesus Jehovah nrib fel’ rogon, ma rib fel’ rogon ni i m’ug pi fel’ngin rok. Aram fan ni gaar: “Cha’ ni ke guyeg e ke guy e en ni Chitamangiy.” (John 14:9) Ke fil Jesus ngodad rogon ni ngad ted fan e Chitamangidad ma gad fol rok, nge rogon ni ngad felfelan’naged, nge rogon ni ngad fel’gad u wan’, ni bod walagdad ni pumoon nib ilal. Machane pi n’en ni i rin’ Jesus u fayleng e ri be dag ngodad rogon feni gol Jehovah ma ma t’ufegey. (Mu beeg e Luke 10:22.) Ere ngad weliyed boch e pi n’ey.

6. Mu weliy boch e kanawo’ ni motoyil Jehovah riy ngak Jesus.

⁶ Ma motoyil Jehovah ngak pi fak. Am lemnag rogon ni motoyil ngak e bin nganni’ i Fak. Ba mudugil ni boor e meybil ni i tay Fak u nap’an ni immoy u fayleng ni i motoyil ngay. (Luke 5:16) I rung’ag e meybil rok Jesus u nap’an ni t’uf ni nge dugliy boch ban’en nib ga’ fan ni bod u nap’an ni mel’eg fa 12 i apostal rok. (Luke 6:12, 13) Ki rung’ag e meybil ni tay Jesus u nap’an ni kari magafan’. De n’uw nap’an u m’on ni ngan yognag, me meybil ngak e Chitamangin nge weliy ngak murung’agen e skeng nra mada’nag nib mo’maw’. Gathi kemus ni motoyil Jehovah ko  meybil rok Jesus, ya kki l’og ba engel ni nge pi’ e athamgil nga laniyan’.​—Luke 22:41-44.

7. Uw rogon u wan’um ni kam nang ni ma motoyil Jehovah ko meybil ko pi tapigpig rok?

⁷ Ku ma motoyil Jehovah ko meybil ko pi tapigpig rok e ngiyal’ ney, ma ma fulweg taban ko ngiyal’ nge rogon nib puluw ni nge rin’ riy. (Ps. 116:1, 2) Am lemnag rogon ni guy reb e walag nib pin u India rogon ni ke fulweg Jehovah taban e meybil rok. Rib gel e magafan’ ni ma tay ma yugu ma meybil ngak Jehovah ni be weliy murung’agen e magawon rok. I yoloy ni gaar: “Fare JW Broadcasting^® ko May 2019 ni be weliy e n’en nrayog ni ngad rin’ed u nap’an ni be magafan’dad e aram e n’en nrib t’uf rog. Ku aram reb e kanawo’ nni fulweg taban e meybil rog riy.”

8. Mang boch e kanawo’ ni dag Jehovah riy nib t’uf Jesus rok?

⁸ Gad ba t’uf rok Jehovah ma ma lemnagdad, ni bod rogon nib t’uf Jesus rok mi i ayuweg u fithik’ e pi magawon ni i mada’nag u nap’an ni be rin’ e maruwel rok u fayleng. (John 5:20) I ayuweg Jesus ni nge par e michan’ rok nib gel, me pi’ e athamgil nga laniyan’ u nap’an ni be mochuch, miki pi’ e tin nib t’uf ko par rok. Ku ma yog ngak nib t’uf rok mab fel’ u wan’. (Matt. 3:16, 17) Bochan ni manang Jesus ni gubin ngiyal’ ni bay e Chitamangin rok ni be ayuweg, ma aram fan ndariy ba ngiyal’ ni lemnag ni yigoo ir.​—John 8:16.

9. Uw rogon ni kad nanged ni gad ba t’uf rok Jehovah?

⁹ Gad gubin ni boor e kanawo’ ni ke dag Jehovah riy ngodad ni gad ba t’uf rok ni bod Jesus. Ke pagdad Jehovah ni ngad manged fager rok, ma ke pi’ boor e walag ngodad ni yad ma yibnag e felfelan’ ngodad, maku yad ma pi’ e athamgil nga lanin’dad u nap’an ni gad be mochuch. (John 6:44) Ku ma pi’ e tin nib t’uf rodad ya nge yag ni par e michan’ rodad nib gel. Maku ma ayuwegdad ni nge yag e tin nib t’uf ko par rodad. (Matt. 6:31, 32) Ere faanra ud lemnaged rogon ni ma t’ufegdad Jehovah, ma aram e ra gel feni t’uf rodad.

10. Mang e rayog ni ngad filed u rogon e ngongol rok Jehovah ngak pi walagdad?

¹⁰ Ba t’uf pi walagdad rok Jehovah. Machane gadad e gathi gubin ngiyal’ nib mom ni ngaud t’ufeged yad. Yu ngiyal’ e ba mo’maw’ e re n’ey ni bochan e ba thilthil e yalen rodad nge rogon nni chuguliydad. Ku gad gubin ni gad ma rin’ boch ban’en ni ma k’aring e kankanan’ nge kireban’ ngak yugu boch e girdi’. Yugu aram rogon, ma gad gubin nrayog ni ngad guyed rogon ni nge gel e t’ufeg u thildad pi walagdad. Ni uw rogon? Aram e ngad folwokgad rok e Chitamangidad ngaud t’ufeged pi walagdad. (Efe. 5:1, 2; 1 John 4:19) Ere chiney e ngad guyed e n’en nrayog ni ngad filed rok Jehovah.

11. Uw rogon ni folwok Jesus u rogon ni ma dag Jehovah e ‘runguy’?

¹¹ Jehovah e ma “runguydad ma mmunguy ngodad.” (Luke 1:78) Be’ ni ma runguy e girdi’ e ma kireban’ u nap’an nra guyrad ni yad be gafgow, ma ma guy rogon ni nge ayuwegrad me fal’eg lanin’rad. I m’ug u rogon ni i ngongol Jesus ko girdi’ ni be folwok rok Jehovah u rogon ni ma runguy e girdi’. (John 5:19) Bay bayay ni guy Jesus ba ulung i girdi’ “me taganan’ ngorad, ya kar pired ni ke magafan’rad ndar nanged e n’en ni ngar rin’ed, ya yad bod e saf nde moy rorad e en ni ma gafaliyrad.” (Matt. 9:36) Gathi kemus ni runguyrad Jesus, ya kki rin’ ban’en ni nge ayuwegrad. I golnag e piin nib m’ar, me ayuweg e piin ‘ke aw parowrad i fek e n’en nib tomal ni yad be fek.’​—Matt. 11:28-30; 14:14.

12. Uw rogon nrayog ni ngad daged e runguy ngak pi walagdad?

¹² Faanra ud lemnaged e magawon ni be mada’nag e pi walagdad, ma aram e rayog ni ngad runguyed yad. Bod nrayog ni bay reb e walag  nib pin ni ke yib ba mit e m’ar ngak nib ubchiya’. Yugu aram rogon nder ma weliy murung’agen e magawon rok, machane dabisiy nra felfelan’ ni faanra pi’ be’ e ayuw ngak. Gur, be yag ni nge pi’ e tin nib t’uf ko tabinaw rok? Rayog ni ngad lithed buchuuw e ggan nga darod da pied ngak ara da ayuweged ngan klinnag e naun rok, fa? Ku rayog nsana bay reb e walag ni pumoon ni kan n’ag ko maruwel rok. Ere sana rayog ni ngad pied buchuuw e salpiy ngak ni tow’ath rok ndab dogned ni gadad e ke yib rodad ni nga i chuway’ ngay nge mada’ ko ngiyal’ ni ke pirieg reb e maruwel.

13-14. Uw rogon ni ngad golgad ni bod Jehovah?

¹³ Jehovah e ir be’ nib gol. (Matt. 5:45) Ere susun e dab da sonnaged pi walagdad ni ngar ninged e ayuw ngodad mfin nda ayuweged yad. Rayog ni ngad rin’ed boch ban’en ni fan ngorad u m’on ni ngar ninged e ayuw ngodad ni bod Jehovah. Ma mateg ramaen e yal’ nga dakendad ni gubin e rran ni yugu aram rogon ndawor dogned ngak ni nge rin’! Gubin e girdi’ ni ma yib angin e re n’ey ngorad, ma gathi kemus ni yigoo piin yad ma pining e magar. Ma dag Jehovah ni gad ba t’uf rok ni bochan e ma pi’ e tin nib t’uf rodad. Rib t’uf rodad ni bochan e ir be’ nib gol!

¹⁴ Pi walagdad e yad ma folwok rok Jehovah, ma yad ma gol ngak yugu boch e girdi’. Bod nnap’an e duw ni 2013, ma rib gel e magothgoth ni tay yu Manile’ ni bochan fare yoko’ ni Super Typhoon Haiyan. Boor e walag ni kireb e naun nge chugum rorad. Machane ka chingiyal’ nem me pi’ e pi walag u ga’ngin yang e fayleng e ayuw ngorad. Boor e walag nra pied e salpiy ni ayuw ara ra uned i toy boch e naun ni ke kireb. Bochan e re n’ey, ma de gaman reb e duw mab chugur ko 750 e naun nni ngongliy! Nap’an fare m’ar ni COVID-19, mab gel e maruwel ni tay e Pi Mich ni ngar ayuweged pi walagrad. Faan gad ra gur ngad ayuweged pi walagdad, ma aram e gad be dag ni yad ba t’uf rodad.

15-16. Mang e be yog e Luke 6:36 nsusun e ngad rin’ed ya nge yag nda folwokgad rok e Chitamangidad ni bay u tharmiy?

¹⁵ Jehovah e ir be’ ni ma runguyey ma ma n’ag fan e kireb. (Mu beeg e Luke 6:36.) Gubin e rran ni ma runguydad ma ma n’ag fan e kireb rodad. (Ps. 103:10-14) Yugu aram rogon nde flont pi gachalpen Jesus, machane i runguyrad ma be  n’ag fan e kireb rorad. I m’agan’ ngay ni nge pi’ e yafos rok nib maligach ya nge yag ni ngan n’ag fan e kireb rodad. (1 John 2:1, 2) Bochan ni ma runguydad Jehovah nge Jesus ma yow ma n’ag fan e kireb rodad, ma aram fan ni gad baadag ni ngad chugurgad ngorow.

¹⁶ Faanra ‘ud n’aged fan u wan’dad e tin nib kireb ni ke rin’ bagadad ngak bagadad,’ ma aram e ra gel e t’ufeg u thildad. (Efe. 4:32) Bin riyul’ riy e, yu ngiyal’ e ba mo’maw’ ni ngad rin’ed e re n’ey. Ere ba t’uf ni ngad guyed rogon ya nge yag ni ngad rin’ed. Bay reb e walag nib pin ni beeg reb e article ni bay ko Wulyang ko Damit ni kenggin e “Nge M’agan’um Ngay ni Ngam N’ag Fan e Kireb ni Ke Rin’ Be’ Ngom,” me ayuweg ni nge rin’ e re n’ey. * I yoloy ni gaar: “Re article ney e ke ayuwegeg ni nggu nang rogon angin nra yib ngog ni faanra ug n’ag fan e kireb ni kan rin’ ngog. Be yog e re article nem nra nge m’agan’um ngay ni ngam n’ag fan e kireb rok be’, ma gathi be yip’ fan ni kam adag e ngongol nib kireb fa ke fel’ u wan’um wenegan e kireb ni ke rin’. Faanra nge yag ni nge par e gapas u lanin’dad, ma be yip’ fan ndab da pared ma gad be lemnag e pi kireb ney.” Faanra ud n’aged fan e kireb ni ke rin’ pi walagdad, ma aram e gad be dag ni yad ba t’uf rodad ma gad be folwok rok Jehovah ni Chitamangidad.

17. Uw rogon ni ngad ted fan e Chitamangidad ni bay u tharmiy nrogon ni bay ko Matthew 5:16?

¹⁷ Ri gad ba tow’ath ni gad bang ko ba ulung i walag ni yad bay u ga’ngin yang e fayleng ni yad ma t’ufeged yad. Gad baadag ni nge un urngin e girdi’ nrayog ni nge un ngodad ngad liyorgad ngak e Got rodad. Ere dariy ba ngiyal’ ni ngad rin’ed ban’en nra kirebnag thin Jehovah ara girdi’ rok. Gad ma guy rogon ni ngad ngongolgad u reb e kanawo’ nra k’aring e girdi’ ni ngar adaged ni ngar motoyilgad ko fare thin nib fel’.​—Mu beeg e Matthew 5:16.

18. Mang e ra ayuwegdad ni ngad machibgad ndab da rusgad?

¹⁸ Yu ngiyal’ e rayog ni nge gathibthibnagdad boch e girdi’ ara ra gafgownaged gadad ni bochan e gad be fol rok e Chitamangidad ni bay u tharmiy. Ere uw rogon ni faanra gad be rus ni  ngad weliyed e michan’ rodad ngak yugu boch e girdi’? Rayog ni nge pagan’dad nra ayuwegdad Jehovah nge Fak. I yog Jesus ngak pi gachalpen ndariy rogon ni nge magafan’rad nga rogon ni ngar nonad ara n’en ni nga rogned. Mang fan? I yog ni gaar: “Ra taw ko ngiyal’ nem, ma bay ni pi’ ngomed e n’en ni nga mogned. Ya thin ni bay mogned e gathi thin romed; ya thin ni bay yib rok e Kan ni Thothup rok e Chitamangimed, ni ir e be non u l’ugunmed.”​—Matt. 10:19, 20.

19. Mu weliy murung’agen be’ ni yag ni nge machib nde rus.

¹⁹ Am lemnag e n’en ni buch rok Robert. Nap’an ni ka fini tabab i fil e Bible ndawori yoor ban’en ni ke nang, ma thingari yan nga tagil’ e puf oloboch ni nge weliy fan ndabi un ko salthaw u South Africa. De rus ni nge yog ngorad ni fan ndabun ni nge un ko salthaw e bochan nib t’uf pi walagen ni Kristiano rok. Ba ga’ fan u wan’ ni ir bang ko tabinaw rok Jehovah! Ere gaar fare tapuf oloboch ngak, “Mini’ pi walagem?” De lemnag Robert ni yira fith e re deer nem ngak. Machane ka chingiyal’ nem me yib ngan’ e thin nu Bible ni fan ko re rran nem. Re thin nem e bay ko Matthew 12:50 ni be gaar: “En nra rin’ e tin nib m’agan’ e Chitamag nu tharmiy ngay e ir e walageg ni pumoon, ma walageg ni ppin, ma chitinag.” Yugu aram rogon ni ka fini tabab Robert ko fol Bible, machane i ayuweg gelngin Jehovah nib thothup ni nge pi’ e fulweg ko re deer nem nge ku yugu boch e deer nde lemnag ni yira fith ngak. Ba mudugil ni felfelan’ Jehovah ngak Robert! Maku ra felfelan’ ngodad u nap’an ni gad ra taga’ ngak ya nge dab da rusgad ni ngad weliyed e michan’ rodad ko ngiyal’ ni kad mada’nag boch e magawon nib mo’maw’.

20. Mang e susun ni ngad dugliyed u wan’dad ni ngad rin’ed? (John 17:11, 15)

²⁰ Ri gad ba felfelan’ ni gad bang u reb e tabinaw nib gel e t’ufeg riy. Bay e bin th’abi fel’ e Matam rodad nge walag ni boor ni gad ba t’uf rorad. Ere gubin ngiyal’ nthingar ud pininged e magar ni bochan e re n’ey. Ma guy Satan nge piin yad ba mang ngak rogon ni nge maruwar u wan’dad e t’ufeg rok e Chitamangidad ni bay u tharmiy ngodad mar kirebnaged e taareban’ ni bay u thildad e pi walag. Machane i pi’ Jesus e meybil ni fan ngodad ni be yog ngak e Chitamangidad ni nge ayuwegdad ya nge yag ni ngaud pared nib taareban’dad. (Mu beeg e John 17:11, 15.) Be pi’ Jehovah e fulweg ko re meybil nem. Ere manga yigi dabi maruwar u wan’dad rogon e t’ufeg nge ayuw ni be pi’ e Chitamangidad ni bay u tharmiy ngodad ni bod Jesus. Ma ngad dugliyed u wan’dad ni ngad guyed rogon ni ngad chugurgad ngak Jehovah nge pi walagdad.