1-2. (a) Susun nge uw rogon u wan’dad e pi walagdad ni kar pilibthirgad nrogon ni bay ko Proverbs 16:31? (b) Mang deer e gad ra weliy e fulweg riy ko re article ney?

BAY bangi park u Arkansas u Meriken nrayog ni ngan pirieg e diamond riy ni yu gub wer u but’. Machane pi diamond ney e dawor ni ngongliy ni nge mang churuwo’. Ere boor e girdi’ ni yad ra yan u tooben ma dab ra nanged ni bogi malang nib tolang puluwon.

² Pi walagdad ni kar pilibthirgad e ku yad bod e pi diamond nem nrib ga’ farad. Ke taarebrogonnag e Thin rok Got e manna’ u piyan lolugrad ngab teeliyaw. (Mu beeg e Proverbs 16:31; 20:29) Yugu aram rogon mab mom ni ngan pag tilrad. Ra nang e piin kab gel fithik’ i dowrad nib ga’ fan e pi walag ney, ma ra yag ban’en riy ngorad ni kab gel e fel’ riy ko pi flaab nu fayleng. Gad ra weliy e fulweg ko re dalip i deer ni baaray ko re article ney ni be gaar: Mang fan ni pi pilibthir ni yad ba yul’yul’ e rib ga’ farad u wan’ Jehovah? Mang nib ga’ farad u lan e ulung rok Jehovah? Ma uw rogon nrayog ni ngad filed ban’en rorad?

3. Mang nib ga’ fan e pi pilibthir ni yad ba yul’yul’ u wan’ Jehovah nrogon ni bay ko Psalm 92:12-15?

³ Pi pilibthir ni yad ba yul’yul’ e rib ga’ farad u wan’ Jehovah Got. Manang rarogorad ma rib ga’ fan pi fel’ngirad u wan’. Ma felfelan’ u nap’an nra guy ni yad be weliy ngak e piin kab gel fithik’ i dowrad e pi n’en kar filed u lan e pi duw ni kar pigpiggad riy. (Job 12:12; Prov. 1:1-4) Kub ga’ fan u wan’ e athamgil ni yad be tay. (Mal. 3:16) Yugu aram rogon ni boor e magawon ni yad be mada’nag, machane ku yad be par nib gel e michan’ rorad ngak Jehovah. Athap rorad boch nga m’on e kari mudugil u lanin’rad ni ke thil ko ngiyal’ ni kafin ra nanged e tin riyul’. Ma yad ba t’uf rok Jehovah ni bochan e ku yad be ulul ni ngar  weliyed murung’agen fithingan ni yugu aram rogon ni ‘kar pilibthirgad.’​—Mu beeg e Psalm 92:12-15.

4. Mang e rayog ni nge pi’ e athamgil nga laniyan’ e pi walag ni kar pilibthirgad?

⁴ Faanra ga be pilibthir i yan ma nge pagan’um ngay ndawori pagtalin Jehovah e pi n’en um rin’ kafram. (Heb. 6:10) Be felfelan’ ni bochan e kam pi’ e ayuw ko fare maruwel ni machib u fithik’ e pasig. Kam athamgil u fithik’ e pi magawon ni ke yib ngom ni kub muun ngay e tin kari kirebnag lanin’um. Kam fol ko pi motochiyel u Bible, ma kam rin’ urngin e maruwel ni ke pi’ e ulung rok Jehovah ngom u fithik’ e yul’yul’, ma kag be skulnag yugu boch e girdi’. Kum athamgil ni ngam fol ko pi n’en yibe thilyeg u lan e ulung rok Jehovah. Kub ga’ e ayuw ni kam pi’ ngak e piin yad be nameg ni ngar machibgad u polo’ e tayim rorad. Ri gab t’uf rok Jehovah Got ni bochan e ga be par ni gab yul’yul’. Ke micheg ndabi “pag e piin ni yad ba yul’yul’ ngak”! (Ps. 37:28) Ku be micheg ngom ni be gaar: ‘Bay ug ayuwegem nge mada’ ko ngiyal’ ni kam pilibthir ni ke manna’ piyan lolugem.’ (Isa. 46:4) Ere dab mu lemnag ndakuriy fam u lan e ulung rok Jehovah ni bochan e kam pilibthir. Ya bin riyul’ riy e rib ga’ fam!

5. Mang e susun ndabi pagtalin e piin kar pilibthirgad?

⁵ Boor fel’ngin e piin kar pilibthirgad. Yugu aram rogon nsana kar meewargad, machane boor e salap ni ke yag ngorad u lan e pi duw ni kar pigpiggad riy. Ere boor e kanawo’ nrayog ni nge fanayrad Jehovah riy ni bod rogon e n’en ni gad ra fil u murung’agen boch e girdi’ kakrom nge chiney.

6-7. Mu weliy murung’agen boch e girdi’ u Bible ni kar pilibthirgad ni tow’athnagrad Jehovah ni bochan e yul’yul’ nra ted.

⁶ Rayog ni ngad pirieged murung’agen boch e girdi’ ni yad ba yul’yul’ u lan e Bible nra pigpiggad ngak Jehovah u fithik’ e pasig ngki mada’ ko ngiyal’ ni kar pilibthirgad. Moses e sogonap’an 80 e duw rok u nap’an ni tabab ni nge pigpig ni ir e profet rok Jehovah nge en ke mel’eg ni nge pow’iy fare nam nu Israel. Rayog ni ke pag 90 e duw rok Daniel ma ka be fanay Jehovah ni nge mang profet rok. Ma apostal John e ku rayog ni ke pag 90 e duw rok u  nap’an nni thagthagnag nga laniyan’ ni nge yoloy fare babyor ni Revelation.

⁷ Ka boor e girdi’ ni yad ba yul’yul’ nde yoor e girdi’ ni manangrad mab mom ni ngan pag tilrad. Yugu aram rogon ma de pag Jehovah tilrad miki tow’athnagrad ko yul’yul’ nra ted. Bod ni Simeon ni “ir be’ nib fel’ ni bay madgun Got u wan’” e de yoor ban’en ni ke weliy e Bible u murung’agen. Machane manang Jehovah rarogon, me tow’athnag ni aram e yag ni nge guy Jesus u nap’an ni kafin ni gargeleg, me yiiynag boch ban’en u murung’agen nge chitiningin. (Luke 2:22, 25-35) Kum lemnag Anna nreb e ppin nib profet ni ke yim’ e pumoon rok. Yugu aram rogon ni ke gaman 84 e duw rok, machane der “pag e tempel.” Bochan e re n’ey, ma aram me tow’athnag Jehovah me yag ni nge guy Jesus u nap’an kafin ni gargeleg. Rib ga’ fan Simeon nge Anna u wan’ Jehovah.​—Luke 2:36-38.

8-9. Mang e ka be yag ni nge rin’ e pi walag nib pin ni ke yim’ e pumoon rorad?

⁸ Boor e pilibthir ni yad ba yul’yul’ e ngiyal’ ney nrayog ni nge folwok e piin kab gel fithik’ i dowrad rorad. Am lemnag e n’en ni buch rok Sister Lois Didur. Nap’an ni gaman 21 e duw rok me tabab ko pigpig u Canada ni ir reb e special pioneer. Tomuren ma boor e duw ni ur lekagew John ni pumoon rok e ulung. Kub pag 20 e duw ni ur pigpiggow u Bethel u Canada. Nap’an ni gaman 58 e duw rok min pi’ reb e maruwel ngorow John u Ukraine. Ere mang e ngar rin’ew? Gur, ngar lemnagew ni ke pag e duw rorow ndabkiyog ni nga ranow ra pigpiggow u yugu reb e nam? Danga’, yab m’agan’row ngay ni ngar rin’ew e re maruwel nem, ma aram min mel’eg John ni nge mang reb i girdien e Branch Committee u rom. Medlip e duw nga tomuren, me yim’ John me dugliy Lois ni nge ulul ko maruwel rok. Chiney ni ke gaman 81 e duw rok e ka be pigpig ko Bethel u Ukraine ma rib t’uf ko pi walag u rom.

⁹ Pi walag nib pin ni ke yim’ e pumoon rorad ni bod Lois e rayog ni gathi ri ka boor ban’en ni yad be rin’ ni bod ko ngiyal’ ni kab fos e pumoon rorad. Machane yugu aram rogon ma ri kub ga’ farad. Pi walag nib pin ni boor e duw ni ur ayuweged e pumoon rorad, maku yad be ulul ni ngar pigpiggad ngak Jehovah u fithik’ e yul’yul’ e rib ga’ farad u wan’. (1 Tim. 5:3) Ku yad ma pi’ e athamgil nga laniyan’ e piin kab gel fithik’ i dowrad.

10. Mang e kanawo’ nib manigil ni ke dag Tony nrayog ni ngan folwok riy?

¹⁰ Ri kub ga’ fan e pi walag ni yad ba yul’yul’ ni kar pilibthirgad ni yad ma par ko yungi n’en ni yima ayuweg e pilibthir riy. Bay reb e walag ni ka nog Tony ngak ni ma par u reb e pi naun ney ni yima ayuweg e pilibthir riy. Nni taufenag u Pennsylvania u Meriken ko August 1942 u nap’an ni ke gaman 20 e duw rok. De n’uw nap’an nga tomuren, mi nog ngak ni nge un ko salthaw. Machane me siyeg ma aram min kalbusnag u lan l’agruw nge baley e duw. L’agruw  e bitir rorow Hilda ni ppin rok, ma yow l’agruw nni chuguliyrow ko tin riyul’. Boor e duw ni i pigpig u dalip e ulung ni ir e presiding overseer (ni chiney e yima yog ni en ma yarmiy e piin piilal) miki pigpig ni ir e en ma yarmiy e n’en ni ngan rin’ u nap’an e circuit assembly. Bay ba kalbus nib ga’ ni ma yan ngay ni nga i pi’ e welthin maku be fil e Bible ngak boch e girdi’ u rom. Yugu aram rogon ni ke gaman 98 e duw rok Tony, machane ka be ulul ni nga i rin’ boch ban’en ni fan ngak Jehovah. Ka be pi’ e tin th’abi fel’ rok ni fan ko pigpig rok ngak Jehovah, maku yad be maruwel e pi walag ko ulung rok u taabang!

11. Uw rogon ni ngad daged nib ga’ fan u wan’dad e piin yad ma par ko yungi n’en ni yima ayuweg e pilibthir riy?

¹¹ Uw rogon ni ngad daged ni gad be tayfan e pi walag ni kar pilibthirgad ni yad ma par ko yungi n’en ni yima ayuweg e pilibthir riy? Rayog ni nge unegrad e piin piilal ko pi n’en yima rin’ u lan e ulung u rogon nrayog rorad. Rayog ni nga darod da guyed yad, ara ud callnaged yad u online ngaud nonad ko video. Ba t’uf ni ngad tedan’dad ko tin baaray e walag ni kar pilibthirgad ni yad ma par ko yungi n’en ni yima ayuweg e pilibthir riy nib palog ko re ulung ni ur uned ngay. Faanra dab da tedan’dad ngorad mab mom ni gad ra pag tilrad. Bay boch i yad nde mom ni ngaur weliyed boch ban’en u murung’agrad, ara yad ma lemnag nde puluw ni ngar rin’ed e re n’ey. Machane faan gad ra tay e tayim ni ngad fithed boch ban’en ngorad, ma gad be motoyil u nap’an ni yad be weliy boch ban’en ni ur rin’ed u lan e ulung rok Jehovah ni i yibnag e felfelan’ ngorad, ma rib ga’ angin nra yib ngodad.

12. Mang e rayog ni ngad pirieged u lan e ulung rodad?

¹² Sana gad ra gin u nap’an ni gad ra nang ni bay boch e walag ni kar pilibthirgad u lan e ulung rodad nrayog ni ngad folwokgad rorad. Bay reb e walag nib pin ni ka nog Harriette ngak ni boor e duw ni i pigpig ngak Jehovah u fithik’ e yul’yul’ ko re ulung ni immoy riy u New Jersey u Meriken. Ngemu’ me chuw nge yan i par ngak be’ nib pin ni fak. I guy e pi walag ko bin baaram e ulung ni ka fini yan ngay rogon ni ngar nanged boch ban’en u murung’agen, mar nanged ni ir be’ nib ga’ fan. Boor ban’en ni i weliy ngorad u murung’agen e machib ni un tay u nap’an ni ka fini nang e tin riyul’ u bang ko duw ni 1925 nri pi’ e athamgil nga lanin’rad. Ngiyal’ nem e nap’an nra yan ko machib, ma ma fek e toothbrush rok ni bochan e rayog ni ngan kol nga non’ nga kalbus me par u rom u lan in e rran. Bin riyul’ riy e l’agruw yay nni kalbusnag u lan reb e wik u nap’an e duw ni 1933. Nap’an yira yon’ nga kalbus, ma pumoon rok ni gathi ir reb e Pi Mich e ir e ma ayuweg dalip e bitir ni fakrow. Ere ri bay rogon ni ngan tayfan e pi walag ni yad ba yul’yul’ ni bod Harriette!

13. Mang e kad filed u murung’agen rogon feni ga’ fan e piin pilibthir u lan e ulung rok Jehovah?

¹³ Pi walagdad ni kar pilibthirgad e rib ga’ farad u lan e ulung rok Jehovah. Boor e kanawo’ ni kar guyed rogon ni ke tow’athnag Jehovah e ulung rok ni ku yad ba muun ngay. Boor ban’en ni kar filed ko oloboch rorad. Ere ngaum tay ni yad boch e girdi’ nib ga’ e “gonop” rorad mag fil ban’en ko tin i buch rorad. (Prov. 18:4, BT) Ga ra guy rogon ni ngam nang boch ban’en u rarogorad, ma ra gel e michan’ rom ma boor ban’en ni ga ra fil rorad!

14. Mang e be pi’ e Deuteronomy 32:7 e athamgil nga laniyan’ e piin kab gel fithik’ i dowrad ni ngar rin’ed?

¹⁴ Mu guy rogon ni ngam man mu non ko piin pilibthir. (Mu beeg e Deuteronomy 32:7.) Riyul’ nsana ke bu’gol e changar rorad, ma yad  ma yan nib sagaal, ma dabkiyog ni ngar nonad nib ga’ lamrad, machane ka yad baadag ni ngar rin’ed boch ban’en, mab fel’ ‘buguwrad’ ara thirad u wan’ Jehovah. (Ekl. 7:1) Dab mu pagtalin fan nib ga’ farad u wan’ Jehovah mag ulul ngaum tay farad. Mu folwok rok Elisha nde pag Elijah ko rofen tomur ni ur mew u taabang. Dalip yay ni gaar Elisha: “Dab gu pagem.”​—2 Ki. 2:2, 4, 6.

15. Mang boch e deer nrayog ni ngad fithed ngak e pi walag ni kar pilibthirgad?

¹⁵ Mu dag ni ga be lemnagrad ni aram e ngam fith boch e deer ngorad u fithik’ e sumunguy. (Prov. 1:5; 20:5; 1 Tim. 5:1, 2) Mu fithrad ni nge lungum: “Mang e micheg nga lanin’um ni kam pirieg e tin riyul’ u nap’an ni ka gab gel?” “Uw rogon ni ke ayuwegem e pi n’en ke buch rom ni nge chugur thilmew Jehovah?” “Mang e ke ayuwegem ni ngam par ni gab felfelan’ ko pigpig ni ga be tay ngak Jehovah?” (1 Tim. 6:6-8) Ma aram mag motoyil ko n’en yad ra weliy ngom.

16. Faanra sabethin reb e pilibthir nge be’ nib bitir ngak, ma mang angin nra yib ngorow?

¹⁶ Ra sabethin be’ nib pilibthir nge be’ nib bitir ngak, ma yow l’agruw nra yib angin ngorow. (Rom. 1:12) Gimed e piin kab gel fithik’ i dowmed e ra mich u wan’med ni ma ayuweg Jehovah e girdi’ rok, ma fare pilibthir e ra nang ni yibe t’ufeg. Ra felfelan’ ngay ni nge weliy ngomed rogon ni ke tow’athnag Jehovah.

17. Mang fan nrayog ni nga dogned ni pi walag ni kar pilibthirgad e ra n’uw nap’an i yan ma yad be fel’ u wan’ Jehovah?

¹⁷ Pichoay nge pidorang e ma m’ay u nap’an ni yira pilibthir. Machane piin yad ba yul’yul’ ngak Jehovah e ra n’uw nap’an i yan ma yad be fel’ u wan’. (1 Thess. 1:2, 3) Mang fan nib riyul’ e re n’ey? Bochan ni ke yoor e duw ni kar paged gelngin Got nib thothup ni nge yal’uwegrad me ayuwegrad ni ngar maruweliyed boch e fel’ngin nib manigil. Ra yoor ban’en nda nanged u rarogorad, ma gad be tay farad, ma gad be fil boch ban’en rorad, ma aram e ra ga’ farad u wan’dad!

18. Mang e gad ra weliy ko bin migid e article?

¹⁸ Gathi kemus nra par e ulung nib gel ni faanra tay e piin kab gel fithik’ i dowrad fan e pi walag ni kar pilibthirgad. Ya ku ra gel e ulung ni faanra i tay e pi walag ni kar pilibthirgad fan e piin kab gel fithik’ i dowrad. Bin migid e article e gad ra weliy riy rogon nrayog ni nge dag e pi walag ni kar pilibthirgad nib ga’ fan u wan’rad e piin kab gel fithik’ i dowrad u lan e ulung.