De n’uw nap’an nga tomuren e duw ni 1940, me tabab e gallabthir rog ni ngaur filed e Pi Mich Rok Jehovah e Bible. Yugu aram rogon nra talgow ko fol Bible, machane ka ma yib fare Wulyang ko Damit nge Awake! ngak e chitinag. Nap’an e duw ni 1950, min tay reb e international convention u New York City, mug uned chon e tabinaw rog ngay.

De n’uw nap’an nga tomuren, me tabab Brother Lawrence Jeffries ni nga i yib i guymad. I guy rogon ni nge ayuwegeg ni nggu nang e tin riyul’. Som’on e ug lemnag nsusun e nge un e Pi Mich Rok Jehovah nga ngongolen e am nge salthaw ko bin ngar pared u mathilin. Gog ngak ni faanra gubin e girdi’ nu Meriken nra siyeged ni ngar uned ko mahl, ma ra yib e pi toogor ra suweyed e nam nu Meriken. Ere gaar Brother Jeffries ngog: “Mang e ga be lemnag nra rin’ Jehovah Got ni faanra gubin e girdi’ u Meriken ni yad ma pigpig ngak me yib e pi toogor ra chamgad ngorad?” N’en ni yog u murung’agen e re n’ey nge ku boch ban’en e ayuwegeg ni nggu nang nde puluw e n’en nug be lemnag. Re n’ey e k’aringeg ni nggu adag ni nggu fil boch ban’en u Bible.

Boor e awa nug ma par ngaug beeg yu ken e Wulyang ko Damit nge Awake! ni ke yan i tay e chitinag nga lan reb e singgil ko naun romad. Munmun mug nang nib riyul’ e tin nug be fil. Ere m’agan’ug ngay ni nggu filew Brother Jeffries e Bible, mu kug tabab ni nggu un ko muulung ni gubin ngiyal’. Rug baadag e n’en nug be fil, ma aram mug tabab ni nggu un ko machib. Nap’an ni tamilang u wan’ug ni “be chugur” e rran rok Jehovah, ma aram mug thilyeg e n’en nug be nameg. (Zef. 1:14, BT) Gu adag ni nggu ayuweg e girdi’ ni ngar nanged e tin riyul’ u Bible ko bin nggu nameg ni nggu un ko skul nib tolang.

Gu chuw u skul ko June 13, 1956, ma dalip e rran nga tomuren min taufenageg u reb e circuit assembly. Dagnang ni boor e tow’ath nra pi’ Jehovah ngog ni bochan e kug mel’eg ni nggu fanay e yafos rog ni nggu fil murung’agen mug weliy ko girdi’.

Nel’ e pul nga tomuren nug un ko taufe, ma aram mug mang reb e regular pioneer. Immoy ba article u lan fare Kingdom Ministry ko December 1956 ni thin ni Meriken ni kenggin e “Rayog ni Ngam Pigpig ko Gin nib T’uf e Ayuw Riy, Fa?” Me gag bagayad e piin nrayog ni nge rin’ e re n’ey. Gu baadag ni nggu pi’ e ayuw u bang ni buchuuw e piin yad be machibnag fare thin nib fel’ riy.​—Matt. 24:14.

Ere gu chuw nggu wan gu par nga Edgefield ni bay u South Carolina. Kemus ni aningeg e walag ni bay ko ulung u rom. Nap’an nug wan ngaram ma gamad gaman lal u gubin. Gamad ma muulung u lan reb e singgil u tafen reb e walag ni pumoon. Ra reb e pul ma 100 e awa ni kug machib riy. Boor pa’ u puluwog ni bochan e gag e gu ma yarmiy e machib ma gu be pi’ e welthin u nap’an e muulung. Machane gguy ni faanra be yoor ban’en nug be rin’ u lan e ulung, mfin aram e be yoor ban’en nug be nang u murung’agen Jehovah.

Bay be’ nib pin ni ug fil e Bible ngak ni bay e naun rok u Johnston ni yima tayam’ riy nreb e binaw ni in e mayel palogin ko gin nug ma par riy. I pi’ reb e maruwel ngog ni gathi ba polo’ e tayim, ngemu’ miki pagmad ni ngaug muulunggad u lan bochi naun rok.

Immoy ba pagel ni ka nog Brother Jolly Jeffries ngak ni fak fare walag ni pumoon ni fil e Bible ngog ni chuw u Brooklyn u New York nge yib i par ngaram, ma aram mu ug pioneergow u taabang. Ug parew u lan bochi naun nrayog ni ngan fek u bang nga bang ni ke pi’ reb e walag ni pumoon ngomow.

Ba sobut’ puluwon e maruwel ko pi binaw ni bay ko Yimuch u Meriken. Ra reb e rran ni ke maruwel be’ riy ma l’agruw i yan ko dalip e dolla puluwon ni kan pi’. Bay borran nug chuw’iy e ggan ko gal salpiy ni ke magey rog nge m’ay, ma nap’an ni gub nga wen me yib be’ nib pumoon i gaar ngog: “Ga baadag ni ngam maruwel? Gu ra pi’ puluwom nreb e dolla reb e awa.” Ere fekeg ni nggu maruwel rok dalip e rran u reb e wik nug ma klinnag bangi ban’en ni yibe dimow naun riy. Ba tamilang ni be ayuwegeg Jehovah ya nge yag ni nggu par u Edgefield. Machane i yag ni nggu wan ko fare international convention nni tay u New York City ko duw ni 1958.

Nap’an e bin migid e rran ko re convention nem, ma bay ban’en ni buch nib manigil. Gu mada’nag Ruby Wadlington nreb e walag ni ma un ko regular pioneer u Gallatin ni bay u Tennessee. Bochan ni gamow baadag ni nggu mangew missionary, ma aram mug unew ngab muulung nni tay ko re convention nem ni fan ko piin yad baadag ni ngar uned ko fare skul u Gilead. Boch nga tomuren, ma aram mu ug yolgow ngomow. Ngemu’ mi nog ngog ni nggu wan nga Gallatin ni nggu pi’ reb e welthin ni fan ko yoor. Nap’an nug wan ngaram mug fith ngak ko rayog ni nggu mabgolgow fa dabiyog. Tomuren mug wan gu un ko ulung rok Ruby, ma gamow mabgol ko duw ni 1959.

Nap’an ni gaman 23 e duw rog, min mel’egeg ni nggu mang congregation servant (ni chiney e yima yog ni en ma yarmiy e piin piilal) u Gallatin. Ulung romad e aram e bin som’on e ulung ni lekag Charles Thompson. Yugu aram rogon ni boor ban’en ni manang, machane ma fith lanin’ug ko n’en nib t’uf ko pi walag nge rogon ni i ayuweg e tin baaram e walag ni ur lekaged e ulung e pi walag ko n’en nib t’uf rorad. Gu fil rok nib fel’  ni ngan fith boch ban’en mu kun nang urngin ban’en u murung’agen ban’en u m’on ni ngan dugliy boch ban’en.

Nap’an e May ko duw ni 1964, me taw e thin ngog ni nggu un ko fare Kingdom Ministry School ni ngan tay u South Lansing u New York nreb e pul n’umngin nap’an. Pi walag ni pumoon nra skulnaged gamad e ra ayuweged gag ni nggu adag ni ngkug fil boch ban’en u murung’agen Jehovah mu kug chugur ngak.

Nap’an e January ko duw ni 1965, me taw e thin ngomow Ruby ni ngaug lekagew e ulung. Ni pi’mow ni ngaug lekagew e pi ulung ni bay u Knoxville u Tennessee nge yan i mada’ ko pi ulung nib chugur nga Richmond u Virginia. Kub muun ngay e pi ulung ni bay u North Carolina, nge Kentucky, nge West Virginia. Kemus ni yigoo pi ulung ni ma un e pi walag ngay nib talumor dowrad e ug lekag ni bochan e bay e motochiyel ni kan ngongliy ko pi binaw ni bay ko yimuch u Meriken ni be yog ndabiyog ni nge muulung e girdi’ nib talumor dowrad nge girdi’ nib wechwech dowrad u taabang. Pi walag ko pi ulung ney e yad ba gafgow, ere gu filew rogon ni ngaug piew boch e tin bay romow ban’en ngak e piin nib t’uf e ayuw rorad. Bay reb e walag ni pumoon ni ke n’uw nap’an ni ma lekag e ulung ni fil ban’en ngog nrib ga’ fan. I gaar ngog: “Ngam dag ni gur reb i walagrad. Dab mman nga lan reb e ulung mag ngongol ni gowa gur e gab ga’ rorad. Faan yad ra lemnag ni gur reb i walagrad, ma aram e rayog ni ngam ayuwegrad.”

Nap’an ni gamow be lekag bochi ulung nib achig, me tabab Ruby i fil e Bible ngak ba rugod ni bay bochi tir nib pin ni fak ni taareb e duw rok. Nap’an ndariy be’ ko re ulung nem nrayog ni nge fil e Bible ngak, ma aram mi i fil Ruby e Bible ngak ni aram e ma yoloy e babyor nga i pi’ ngak. Nap’an e yay ni migid nug lekagew e re ulung nem, ma aram me yib nga gubin e muulung. Nap’an ni yib l’agruw e walag nib pin ni yow ba special pioneer ko re ulung nem, ma aram mar ululgow i fil e Bible ngak ma de n’uw nap’an nga tomuren me un ko taufe. Ma sogonap’an 30 e duw nga tomuren u nap’an e duw ni 1995, me yib reb e walag nib pin i non ngak Ruby u Bethel u Patterson. Re walag ney e fak fare pin ni i fil Ruby e Bible ngak, ma yow be un e pumoon rok ko bin 100 e class ko fare Skul u Gilead.

Gin migid nni pi’mow ngay ni ngaug lekagew e pi ulung riy e bay ko pi binaw u lukngun yu Florida. Ba t’uf e karrow romow, ere gu chuw’iyew reb nib sobut’ puluwon. Machane faani bin som’on e wik nug warow riy me kireb ban’en u fithik’ e masin riy. Ma dariy e salpiy romow ni nggu piew puluwon ni ngan fal’eg. Ere gu callnag reb e walag ni pumoon nug be lemnag nrayog ni nge ayuwegmow. Ere yog ngak reb i girdien e maruwel rok ni nge fal’eg e re karrow romow nem, me yog ngomow ndab gu piew puluwon. Kemus ni gaar ngomow, “Ke manigil.” Ki pi’ ba salpiy ngomow ni tow’ath romow! Ireray reb e kanawo’ nib manigil ni be m’ug riy rogon ni ma ayuweg Jehovah e pi tapigpig rok. Re n’ey e puguran ngomow ni ngaug golgow ko girdi’.

Nap’an ni gamow ra yan nga reb e ulung, ma gamow ma par u tafen e pi walag. Ere boor e fager nib manigil ni yag ngomow. Bay borran nug typenag boch e report rog u murung’agen e ulung ni gamow be lekag, mug digey u lan e typewriter mug wan nga bang. Faani blayal’ nug sul, mug guy ni ke yan bochi pagel ni fak e re tabinaw nem ni dalip e duw rok i typenag boch ban’en nga lan fagi babyor rog. Boor e duw ni ug k’ak’aring ko re n’ey.

Nap’an e duw ni 1971, me taw e babyor ngog ni be yog ni kan dugliy ni nggu mang district overseer u New York City. Rug gingow ko re n’ey! Nap’an nug warow gu parew ngaram ma ke gaman 34 e duw rog. I dag e pi walag ni kar felfelan’gad ni kug wan ngaram ni gag e bin som’on e district overseer rorad nib lumor dow.

Nap’an nug mang district overseer, ma gu baadag nug ma fil murung’agen Jehovah ko girdi’ u nap’an e pi circuit assembly ni yima tay u tungun e wik. Boor e walag ni pumoon ni yad ma lekag e ulung ni yad ba salap ngog. Bay bagayad ni ir e pi’ e welthin u nap’an nni taufenageg. Ku bay reb e pi walag nem ni ka nog Theodore Jaracz ngak ni yan i boch nga tomuren me mang reb i girdien fare Ulung ni Ma Pow’iyey. Ku boor e walag ni pumoon ni yad ba salap ni yad ma pigpig u Bethel u Brooklyn. Gub felfelan’ ngay ni i ayuwegeg e pi walag ni pumoon ni yad ma lekag e ulung nge tin yad ma pigpig u Bethel ni nggu rin’ e maruwel rog nib fel’ rogon ndab gu magagawon. Gguy ni yad boch e walag ni pumoon ni yad ma ayuweg e pi saf rok Got u fithik’ e t’ufeg ni yad ma taga’ ko Thin rok ma yad ma ayuweg e ulung u fithik’ e yul’yul’. Bochan nib sobut’an’rad, ma aram e n’en ni momnag ngog ni nggu pigpig ni gag reb e district overseer.

Nap’an e duw ni 1974, me dugliy fare Ulung ni Ma Pow’iyey yugu boch e walag ni yad ma lekag e ulung ni ngar manged district overseer, ma aram mu kun teg bayay ni ngaug lekag e ulung. Machane ni pieg nga South Carolina. Ngiyal’ nem e rayog ni nge muulung e pi walag nib wechwech dowrad nge pi walag nib talumor dowrad u taabang. Rib gel e felfelan’ ni tay e pi walag ko re n’ey.

Tungun e duw ni 1976, min dugliy ni ngaug lekag e pi ulung ni bay u thilin yu Atlanta nge Columbus ni bay u Georgia. Ka be yib ngan’ug ba welthin nug pi’ ni fan ngak lal i bitir ni fak l’agruw ni’ nib talumor dowrow nra m’ad u nap’an nni urfiy e naun rorad. Chitiningrad e nin’ nga aspital ni bochan e ke maad’ad. Boor e Pi Mich Rok Jehovah ni boch i yad e ba talumor dowrad ma boch i yad e ba wechwech dowrad ni u ranod ko re aspital nem ni ngar fal’eged laniyan’ e gal labthir nem. Rug guy rogon e t’ufeg ni i dag e pi walag ney. T’ufeg ni aray rogon e rayog ni nge ayuweg e pi tapigpig rok Got ni ngar athamgilgad u fithik’ e tin th’abi mo’maw’ e magawon.

Nap’an e duw ni 1977, mi nog ngomow ni nggu bow nga Bethel u Brooklyn ni nggu piew e ayuw u reb e maruwel ni ngan rin’ u lan in e pul. Nap’an ni chugur ni nge m’ay e re maruwel nem, ma gamad mada’ l’agruw e walag ni yow girdien fare Ulung ni Ma Pow’iyey, ma aram mar fithew ngomow ko ra m’agan’mow ngay ni nggu pigpiggow u Bethel fa danga’, ma aram me m’agan’mow ngay.

Reliw’ nge aningeg e duw nug maruwel ko Service Department. Pi walag ni pumoon ni yad ma maruwel u rom e ba ga’ ni yad ma pi’ e ayuw u rogon ni ngan pirieg e fulweg u boch e deer nib mo’maw’. Kab kafram i yib ni ma pi’ fare Ulung ni Ma Pow’iyey boch e fonow ko pi walag u rom nib puluw ko pi kenggin e motochiyel u Bible. Ireray e pi fonow ni yima fanay ni ngan pi’ e fulweg ko pi deer ni ma sum, maku yibe fanay ni ngan skulnag e pi walag ni pumoon ni yad ma lekag e ulung, nge piin piilal, nge pi pioneer. Re n’ey e ke ayuweg boor e walag ni ngar ilalgad ko tirok Got ban’en, miki ayuweg e ulung rok Jehovah ni nge par nib gel.

Nap’an e duw ni 1995 nge mada’ ko 2018, mu un pieg ni nggu wan gu lekag boch e branch ofis ni owchen e tochuch rodad. Gamad ma mada’ girdien e Branch Committee, nge pi walag ni yad ma pigpig u Bethel, nge pi missionary ni nggu pi’ e athamgil nga lanin’rad mug ayuwegrad ko pi magawon rorad. Pi walag ni yad ma weliy boch ban’en ni ke buch rorad e rib gel e athamgil ni yad ma pi’ nga lanin’mow Ruby. Bod nnap’an e duw ni 2000 ma gamow yan nga Rwanda. Rib gel e athamgil ni yib nga lanin’mow u nap’an nug rung’agew murung’agen e n’en ni i rin’ e pi walag nge piin yad ma pigpig u Bethel ya nge yag ndab ra m’ad u nap’an fare cham nni tay u rom ni boor e girdi’ ni yim’ riy ko duw ni 1994. Boor e walag ni yim’ e piin nib t’uf rorad. Machane yugu aram rogon, mar daged ni bay e michan’ rorad, ma be l’agan’rad ko tin bay nga m’on, ma yad ba felfelan’.

Chiney e ke pag 80 e duw romow. Ke gaman 20 e duw nug be pigpig ni gag reb i girdien e Branch Committee u Meriken. Yugu aram rogon ndag un ko skul nib tolang, machane rib manigil rogon e skul ni ke tay Jehovah nge ulung rok ngog. Re n’ey e ke ayuwegeg u rogon ni nggu fil e tin riyul’ u Bible ko girdi’ nrayog ni nge yib angin ngorad ndariy n’umngin nap’an. (2 Kor. 3:5; 2 Tim. 2:2) Kug guy rogon ni ke ayuweg e thin nu Bible e girdi’ ni ngar thilyeged rogon e par rorad me fel’ e tha’ u thilrad e En Ke Sunmiyrad. (Jas. 4:8) Gamow ma ulul Ruby ni nggu piew e athamgil nga laniyan’ e pi walag ni nge ga’ fan u wan’rad e tow’ath ni bay rorad ni ke yag ni ngar filed murung’agen Jehovah mu kur filed e tin riyul’ u Bible ko girdi’ ko ngiyal’ nrayog romow. Ireray e bin th’abi fel’ e tow’ath nrayog ni nge yag ngak reb e tapigpig rok Jehovah!