ARTICLE NI NGAN FIL 40
“Ur Filed Ngak Boor e Girdi’ ni Nguur Rin’ed e Tin nib Mat’aw”
“Piin ni ur filed ngak boor e girdi’ ni nguur rin’ed e tin nib mat’aw e bay ur pired ni be gal ramaerad ni dariy n’umngin nap’an ni bod rogon e pi t’uf.”—DAN. 12:3.
TANG 151 Bayi Pong
TIN YIRA WELIY *
1. Mang boch ban’en nra buch u nap’an fare Biyu’ i Duw Nra Gagiyeg Kristus riy nrib gel e felfelan’ ni yira tay riy?
NAP’AN ni yira tabab i faseg e piin kar m’ad u roy u fayleng u nap’an fare Biyu’ i Duw Nra Gagiyeg Kristus riy, ma rib gel e felfelan’ ni yira tay! Urngin e piin ke yim’ be’ nib t’uf rorad e ri yad baadag ni ngar guyed e pi cha’nem bayay. Ku aram e n’en baadag Jehovah. (Job 14:15) Am lemnag gelngin e felfelan’ nra tay e girdi’ u fayleng u nap’an ni yira faseg e piin nib t’uf rorad ko yam’. Kad filed ko fa binem e article ni “piin nib mat’aw” ni kan yoloy fithingrad nga lan fare ke babyoren e yafos e yira fasegrad “mu ur pired ni yad ba fos.” (Acts 24:15, NW; John 5:29) Sana boor e piin nib t’uf rodad ni yad boch e piin som’on ni yira fasegrad u roy u fayleng. * Maku reb e, “piin nde mat’aw” ni bod e piin nde yag ni nge mab e kanawo’ ngorad nib fel’ rogon ni ngar nanged Jehovah ara ra pigpiggad ngak u fithik’ e yul’yul’ u m’on nra m’ad e yira fasegrad “mi ni gechignagrad [“min pufthinnagrad,” NW].”
2-3. (a) Mang e bin th’abi ga’ e maruwel ni yira rin’ u roy u fayleng nrogon ni be yog e Isaiah 11:9, 10? (b) Mang e gad ra weliy ko re article ney?
2 Urngin e piin yira fasegrad e ba t’uf ni ngan skulnagrad. (Isa. 26:9; 61:11) Ere ra t’uf ni ngan rin’ e bin th’abi ga’ e maruwel ni yira rin’ u roy u fayleng, ni aram e ngan skulnag e pi girdi’ ney. (Mu beeg e Isaiah 11:9, 10.) Mang fan? Ya piin nde mat’aw ni yira fasegrad e ba t’uf ni ngar filed murung’agen Jesus Kristus, nge Gil’ilungun Got, nge fare biyul, nge feni ga’ fan fithingan Jehovah, nge fan ni yigoo ir e bay mat’awun ni nge gagiyeg. Mus ngak e piin nib mat’aw nib t’uf ni ngar filed murung’agen e n’en ka i fil Jehovah ko girdi’ rok ni buchuuw ma buchuuw u murung’agen e n’en nib m’agan’ ngay ni fan ko fayleng. Bay boch e pi cha’ney ni yad ba yul’yul’ nra m’ad u m’on ni nge m’ay e Bible ni ga’ngin. Ere boor ban’en nib t’uf ni nge fil e piin nde mat’aw nge piin nib mat’aw.
3 U lan e re article ney e gad ra weliy riy e fulweg ko gal deer ni baaray ni be gaar: Uw rogon ni yira rin’ e re maruwel ney ni ngan skulnag e pi girdi’ ney? Mang e ra rin’ e re skul ney nga rogon ni yira dugliy ko yira yoloy ara dab ni yoloy fithingan e pi girdi’ ney nga lan fare ke babyoren e yafos ndab ki chuw? Ba ga’ fan e fulweg ko gal deer ney ngodad e ngiyal’ ney. Bay boch e yiiy nib manigil ni kan weliy murung’agen ko fare babyor rok Daniel nge Revelation nra ayuwegdad ni nge tamilang u wan’dad e n’en nra buch u nap’an ni yira faseg e piin kar m’ad. Machane som’on e ngad weliyed boch ban’en nra buch nni yiiynag ko Daniel 12:1, 2.
‘PIIN NI KAR M’AD E BAY RA FOSGAD KO YAM’’
4-5. Mang e be weliy e Daniel 12:1 u murung’agen e tin tomuren e rran?
4 Mu beeg e Daniel 12:1. Fare babyor rok Daniel e be weliy murung’agen e ngiyal’ nra buch reb e ban’en riy nge reb u nap’an e tin tomuren e rran. Bod ni Daniel 12:1 e be tamilangnag ni Mikael ni aram Jesus Kristus e be “matanagiy e girdi’ [rok Got].” I tabab ni nge lebug e giney ko re yiiy ney ko duw ni 1914 u nap’an nni dugliy Jesus ni nge mang Pilung u Gil’ilungun Got u tharmiy.
5 Ku nog ngak Daniel nra “yib i m’ug” Jesus u “ba ngiyal’ ni nge gafgow e girdi’, ni aram e bin th’abi ga’ e gafgow ni ka nap’an ni sum e pi nam.” Re ngiyal’ i n’ey nra “gafgow e girdi’” riy e aram fare “gafgow” nib ga’ ni kan weliy murung’agen ko Matthew 24:21. Ra yib i m’ug Jesus ara ayuweg e girdi’ rok Got u tungun e re gafgow nib ga’ ney, ni aram e nap’an e Armageddon. Fare babyor ni Revelation e be yog ni pi girdi’ ney e yad fare ulung nib ga’ ni yad ra thap nga barba’ “fare gafgow ni ba ga’.”—Rev. 7:9, 14.
6. Mang e ra buch u tomuren ni ke thap fare ulung nib ga’ nga barba’ fare gafgow nib ga’? Mu tamilangnag. (Kum guy e “Deer ko Piin Ma Beeg” ni bay ko re ke babyor ney ni be weliy murung’agen e fos ko yam’ ni yira tay u roy u fayleng.)
6 Mu beeg e Daniel 12:2. Mang e ra buch u tomuren ni ke thap fare ulung nib ga’ nga barba’ fare gafgow nib ga’? Re yiiy ney e gathi be weliy murung’agen e fos ko yam’ nra tay e piin nga ranod nga tharmiy ara rogon ni mon’og fare maruwel ni machib u tomuren e ngiyal’ ni chugur ni nge taleg e pi tatogopuluw e re maruwel ney u nap’an e duw ni 1918 ni bod ni u dogned kafram. * Ya be weliy murung’agen e fos ko yam’ nra buch u lan e bin nib beech e fayleng. Mang fan nrayog ni nga dogned e re n’ey? Som’on nni yoloy e Bible min fanay fare bugithin ni “fiyath” u lan fa gal thin nu Bible ko Job 17:16 nge Daniel 12:2. Aram fan nrayog ni nga dogned ni Daniel 12:2 e be weliy murung’agen e fos ko yam’ nra buch u tomuren ni ke mus e tin tomuren e rran ngu tomuren fare mahl ni Armageddon.
7. (a) Uw rogon ni yira faseg boch e girdi’ mu ur pared ni yad ba “fos ndariy n’umngin nap’an”? (b) Uw rogon ni “kab fel’” e biney e fos ko yam’?
7 Ere mang e be yip’ fan e Daniel 12:2 u nap’an ni yog ni bay boch e girdi’ ni yira fasegrad mu ur pared ni yad ba “fos ndariy n’umngin nap’an”? Re n’ey e be yip’ fan ni piin yira fasegrad mar guyed rogon ni ngar nanged ara ra ululgad i guy rogon ni ngar nanged Jehovah nge Jesus mar folgad rorow u lan fare 1,000 i duw e ra yan i tomur me yag e yafos ni manemus ngorad. (John 17:3) “Kab fel’” e biney e fos ko yam’ ko fos ko yam’ ni tay boch e girdi’ kakrom. (Heb. 11:35) Mang fan? Ya pi girdi’ nem nni fasegrad kakrom e munmun mu kur m’ad.
8. Uw rogon ni yira faseg boch e girdi’ mu “ur pired ndariy n’umngin nap’an ni yad be tamra’ ma dakuriy farad”?
8 Machane gathi gubin e piin yira fasegrad ko yam’ nra m’agan’rad ngay ni nge skulnagrad Jehovah. I yiiynag Daniel ni bay boch e girdi’ ni yira fasegrad mu “ur pired ndariy n’umngin nap’an ni yad be tamra’ ma dakuriy farad.” Bochan e togopuluw ni yad ra tay, ma aram e dab ni yoloy fithingrad nga lan fare ke babyoren e yafos ma dabi yag e yafos ni manemus ngorad. Ya yad ra par ‘ndariy n’umngin nap’an ndakuriy farad’ ara yira thangrad. Ere fare thin ni bay ko Daniel 12:2 e be weliy murung’agen e n’en nra buch rok e piin kan fasegrad ko tomur ni be yan u rogon e n’en yad ra rin’ u tomuren ni kan fasegrad ko yam’. * (Rev. 20:12) Boch i yad e ra yag e yafos ni manemus ngorad, ma boch e danga’.
“UR FILED NGAK BOOR E GIRDI’ NI NGUUR RIN’ED E TIN NIB MAT’AW”
9-10. Ku mang e ra buch u tomuren fare gafgow nib ga’? Mini’ e piin “bayi gal ramaerad ni bod ramaen lan e lang”?
9 Mu beeg e Daniel 12:3. Ku mang e ra buch u tomuren e ngiyal’ nra “gafgow e girdi’” riy? Gathi kemus ni Daniel 12:2 e be weliy murung’agen e n’en nra buch u tomuren fare gafgow nib ga’, ya ku bay ban’en ni be yog e verse 3 u murung’agen e re n’ey.
10 Mini’ e piin “bayi gal ramaerad ni bod ramaen lan e lang”? Bay ban’en ni yog Jesus ko Matthew 13:43 nra ayuwegdad ni ngad nanged e fulweg riy ni be gaar: “Ma tirok Got e girdi’ e bayi gal ramaerad ni bod e yal’ ko gin ni Chitamangirad e be gagiyegnag.” Bay boch e thin ni yog Jesus u m’on riy ni be weliy murung’agen e “girdi’ ni Got e be gagiyegnagrad” ara pi walagen ni kan dugliyrad ni yad ra pigpig u taabang u Gil’ilungun Got u tharmiy. (Matt. 13:38) Ere ba mudugil ni fare thin ni bay ko Daniel 12:3 e be weliy murung’agen e piin kan dugliyrad nge maruwel ni yad ra rin’ u lan fare Biyu’ i Duw.
Ra maruwel fare 144,000 nge Jesus Kristus u taabang ni ngar pow’iyed rogon e skul ni yira tay u roy u fayleng u lan fare 1,000 i duw (Mu guy e paragraph 11)
11-12. Mang maruwel e ra rin’ fare 144,000 u lan fare 1,000 i duw?
11 Uw rogon nra fil e piin kan dugliyrad ngak “boor e girdi’ ni nguur rin’ed e tin nib mat’aw”? Yad ra maruwel Jesus Kristus u taabang ni ngar pow’iyed rogon e skul ni yira tay u roy u fayleng u lan fare 1,000 i duw. Gathi kemus nra gagiyeg fare 144,000 ni yad boch e pilung ya ku yad ra mang boch e prist. (Rev. 1:6; 20:6) Ere yad ra pi’ e ayuw u rogon ni ngan “chuweg e liliy rok e pi nam” mar ayuweged e girdi’ ni ngar flontgad i yan. (Rev. 22:1, 2; Ezek. 47:12) Rib gel e felfelan’ nra tay e piin kan dugliyrad ko re maruwel ney ni yad ra rin’!
12 Mini’ e piin nib muun ko fapi “girdi’” ni boor ni yira fil ngorad rogon ni ngar rin’ed e tin nib mat’aw? Ba muun ngay e piin yira fasegrad ko yam’, nge piin yad ra magey ni yad ba fos u tomuren e Armageddon, nge bitir ni gomanga yira gargelegrad u lan e bin nib beech e fayleng. Ra yan i taw nga tungun fare 1,000 i duw, ma gubin e girdi’ u fayleng ni kar flontgad. Ere mingiyal’ e yira yoloy fithingrad nga lan fare ke babyoren e yafos ndab ki chuw ni gowa kan yoloy ko pen ma gathi pencil?
BIN TOMUR E SKENG
13-14. Mang e ra t’uf ni nge rin’ urngin e girdi’ u fayleng ni yad ba flont u m’on ni nga fini yag e yafos ni manemus ngorad?
13 Thingar dab da paged talin ni yugu aram rogon nib flont be’, ma gathi aram e be yip’ fan nra yag e yafos ni manemus ngak. Am lemnag e n’en ni buch rok Adam nge Efa. Yugu aram rogon ni yow ba flont, machane ba t’uf ni ngar dagew ni yow be fol rok Jehovah Got u m’on ni nga fini yag e yafos ni manemus ngorow. Mab gel e kireban’ riy, ya de yag ni ngar folgow rok.—Rom. 5:12.
14 Ra yan i taw nga tungun fare 1,000 i duw ma ke uw rarogon e piin yad bay u fayleng? Yad gubin ni kar flontgad. Ere gur, yad ra fol u rogon ni be gagiyegnagrad Jehovah ndariy n’umngin nap’an? Fa bay boch i yad nra rin’ e n’en ni rin’ Adam nge Efa ndar parew ni yow ba yul’yul’ ni yugu aram rogon ni yow ba flont? Ba t’uf ni ngan nang e fulweg ko gal deer ney. Machane uw rogon ni yira nang e fulweg riy?
15-16. (a) Mingiyal’ e ra mab e kanawo’ ngak urngin e girdi’ ni ngar daged ni yad ba yul’yul’ ngak Jehovah? (b) Mang e ra buch u tomuren e re ngiyal’ i n’em?
15 Yira kalbusnag Satan u lan 1,000 e duw. Ra taw ko ngiyal’ nem ma dakuriy be’ nrayog ni nge bannag. Machane ra yan i taw nga tungun fare 1,000 i duw ma yira pag u kalbus, ma aram me guy rogon ni nge bannag e girdi’ ni kar flontgad. Aram e ngiyal’ ni gubin e girdi’ u roy u fayleng ni yad ba flont nri yad ra dag ko yad be tayfan fithingan Got nge mat’awun e gagiyeg rok fa danga’. (Rev. 20:7-10) N’en yad ra rin’ e ngiyal’ nem e ra dugliy ko yira yoloy fithingrad nga lan fare ke babyoren e yafos ndab ki chuw fa danga’.
16 Bay boch e girdi’ ni yad ra rin’ e n’en ni rin’ Adam nge Efa, ni aram e dab ra folgad ko gagiyeg rok Jehovah. Ere mang e ra buch rorad? Be gaar e Revelation 20:15 (NW): “En nda immoy fithingan ni kan yoloy nga lan fare ke babyoren e yafos e nin’ nga lan fare lipath i nifiy.” Arrogon, pi girdi’ ney ndab ra folgad e yira thangrad ndariy n’umngin nap’an. Machane yooren e piin kar flontgad e yad ra par ni yad ba yul’yul’ u nap’an e bin tomur e skeng. Ere yira yoloy fithingrad nga lan fare ke babyoren e yafos ndab ki chuw.
NAP’AN E “TIN TOMUREN E RRAN”
17. Mang e nog ngak Daniel nra buch ko ngiyal’ ney ni gad bay riy? (Daniel 12:4, 8-10)
17 Gad ra lemnag e pi n’en nra buch boch nga m’on, ma ri gad be felfelan’ ngay! Machane ku bay boch ban’en nib ga’ fan ni yog reb e engel ngak Daniel ni ku bay rogon ko ngiyal’ ney ni gad bay riy, ara “tomren e fayleng [“tin tomuren e rran,” NW].” (Mu beeg e Daniel 12:4, 8-10; 2 Tim. 3:1-5) I gaar e re engel nem ngak Daniel: “Bay i ga’ e llowan’ i yan.” Arrogon, ra tamilang u wan’ e girdi’ rok Got fapi thin nni yiiynag u lan e re ke babyor rok ney. Ki yog e re engel nem nra taw ko ngiyal’ ney ma “girdi’ nib kireb e bay dab ra nanged fan, nguur pired ni yad be ngongliy e kireb.”
18. Mang e dabki n’uw nap’an me buch rok e piin nib kireb?
18 Ngiyal’ ney e piin nib kireb e rayog ni ngaur rin’ed e ngongol nib kireb ma dab ni gechignagrad. (Mal. 3:14, 15) Machane dabki n’uw nap’an ma bayi pufthinnag Jesus e piin yad bod e kaming me chuwegrad u fithik’ e piin yad bod e saf. (Matt. 25:31-33) Pi girdi’ ney ni yad ba kireb e dab ra mageygad ni yad ba fos u nap’an fare gafgow nib ga’, maku dab ni fasegrad u lan e bin nib beech e fayleng. Pi girdi’ ney e dariy fithingrad u lan fare ‘ke babyor ni kan yoloy murung’agen’ e girdi’ ngay ni kan weliy murung’agen ko Malaki 3:16.
19. Mang e ba t’uf ni ngad rin’ed e chiney, ma mang fan? (Malaki 3:16-18)
19 Ireray e ngiyal’ ni ngad daged ko ngongol rodad ni gathi gadad boch e girdi’ nib kireb. (Mu beeg e Malaki 3:16-18.) Be kunuy Jehovah e piin nib ‘mil suwrad ngak,’ ni aram e piin nib ga’ farad u wan’. Ere ba mudugil ni gad baadag ni ngad manged boch e pi girdi’ ney.
Rib gel e felfelan’ ni gad ra tay u nap’an ni gad ra guy Daniel, nge piin nib t’uf rodad, nge ku boor e girdi’ ni yira ‘fasegrad ko yam’’ min tow’athnagrad u lan e bin nib beech e fayleng! (Mu guy e paragraph 20)
20. Mang e ni micheg ngak Daniel ko tomur? Mang fan ni ga be athapeg ni nge lebug e re n’ey?
20 Riyul’ ni gad be par u ba ngiyal’ ni boor ban’en ni be buch riy. Machane dabki n’uw nap’an ma bay boch ban’en nra buch ni kab gel boch e fel’ riy. Dabki n’uw nap’an ma gad guy e piin nib kireb ni kan thangrad. Ma nga tomuren ma gad ra guy ni ke lebug e n’en ni micheg Jehovah ngak Daniel ni gaar: “Bayi taw ko tungun ma ga fos ko yam’ mi ni pi’ puluwom ngom.” (Dan. 12:13) Ga be athapeg e ngiyal’ ni ngan ‘faseg Daniel ko yam’’ nib muun e piin nib t’uf rom ngay, fa? Faanra aray rogon, mag athamgil u rogon nrayog rom e ngiyal’ ney ni ngam par ni gab yul’yul’. Faan ga ra rin’ e re n’ey, ma aram e rayog ni nge pagan’um ngay nra par fithingam u lan fare ke babyoren e yafos rok Jehovah.
TANG 80 “Mu Gay Ngam Pirieg Feni Manigil” Jehovah
^ Re article ney e be weliy ban’en ni kan thilyeg u rogon ni gad be weliy murung’agen reb e maruwel nib ga’ ni yira rin’ u roy u fayleng, ni aram e ngan skulnag e piin yira fasegrad nrogon ni be weliy e Daniel 12:2, 3. Gad ra weliy murung’agen e ngiyal’ nra buch e re n’ey riy, nge piin yad ba muun ko re n’ey. Ku gad ra guy rogon nra ayuweg e re skul ney e piin yad bay u fayleng ni ngar fal’eged rogorad ni fan ko bin tomur e skeng ni yira tay ko girdi’ u tungun fare Biyu’ i Duw Nra Gagiyeg Kristus riy.
^ Sana som’on e yira tabab i faseg e piin nra m’ad ni yad ba yul’yul’ u nap’an e tin tomuren e rran, mfini migid e piin nra m’ad u m’on ko pi cha’ney ni yibe yan u reb e mfen nga reb. Faanra aray rogon e n’en nra buch, ma aram e girdi’ u reb e mfen ngu reb ni yira fasegrad e rayog ni ngar mada’naged e piin yad manangrad ni ku yira fasegrad. Demtrug rogon, ma be yog e Bible nib “yaram” e fos ko yam’ nra tay e piin yad ra yan nga tharmiy, ere ku rayog ni ngad lemnaged nib yaram rogon e fos ko yam’ nra buch u fayleng.—1 Kor. 14:33; 15:23.
^ Re n’ey ni kan weliy u roy e aram reb e ban’en ni kan thilyeg u rogon e n’en kan weliy ko fare ke babyor ni Pay Attention to Daniel’s Prophecy! ko guruy ni 17, nge The Watchtower ko July 1, 1987 ko page 21-25.
^ Fapi thin ni “piin nib mat’aw” nge “piin nde mat’aw” ni bay ko Acts 24:15 (NW) nge fapi thin ni “piin nib fel’ e tin ni ur ngongliyed” nge “piin nib kireb e n’en ni ur rin’ed” ni bay ko John 5:29 e be weliy murung’agen e ngongol rok e pi girdi’ ney u m’on ni ngar m’ad.
