Nap’an ni gad ra fal’eg rogodad ni ngad filed e Bible ni yigoo gadad, ma rayog ni ngad fithed gadad ni nge lungudad, ‘Mang e gu be lemnag ni nggu fil?’ Machane ba t’uf ni ngad kol ayuwgad ndab da paged e pi n’en gad be lemnag ni ngad filed ni nge k’aringdad ndab da nanged e n’en be fil Jehovah ngodad. Uw rogon nrayog ni ngad motoyilgad ko n’en be guy Jehovah rogon ni nge fil ngodad?

Mu yibilay e gonop. Mu wenig ngak Jehovah ni nge ayuwegem ni ngam nang e n’en baadag ni ngam fil e chiney. (Jas. 1:5) Yugu dab mu taga’ ko tin kam fil kafram.​—Prov. 3:​5, 6.

Mu tayfan gelngin e thin nu Bible. “Thin rok Got e ba fos.” (Heb. 4:12) Ere gubin yay ni gad ra beeg e Bible ma bay ban’en nib beech nrayog ni ngad filed riy, ma kub thilthil e kanawo’ nrayog ni nge ayuwegdad riy. Machane ra buch e re n’ey ni faan gad ra nang nib t’uf ni ngad filed e n’en be fil Got ngodad.

Nge ga’ fan u wan’um urngin ban’en ni bay ko tebel rok Jehovah. Ggan ni fan ko tirok Got ban’en ni ma pi’ ngodad e bod “ba mur ni ggan . . . nth’abi fel’ e yira pi’ riy.” (Isa. 25:​6, BT) Ere dab mu siyeg ni ngam kay boch e “ggan” ni ga be lemnag ndab mu adag lamen. Ya gathi kemus nra yib angin ngom, ya ri ga ra adag e pi n’en ma pi’ Got ni fan ngodad!