1. Mang e bayi rin’ Jesus ndab ki n’uw nap’an?

 GAD be par u ba ngiyal’ ni boor ban’en ni bayi thil riy! Dabki n’uw nap’an ma bayi pufthinnag Jesus urngin e girdi’ u fayleng. I weliy Jesus ngak pi gachalpen murung’agen e “pow” ko ngiyal’ ni bay nge “ngiyal’ ni ke chugur nga tungun e re m’ag ney” ni nge tamilangnag e n’en nra buch u m’on ni nge pufthinnag e girdi’ u fayleng. (Matt. 24:​3, NW) Bay murung’agen e re yiiy ney ko Matthew ko guruy ni 24 nge 25, nge Mark ko guruy ni 13, nge Luke ko guruy ni 21.

2. Mang e gad ra weliy, ma mang fan nra ayuwegdad e re n’ey?

² I ginangey Jesus u daken dalip e fanathin ni weliy. Pi fanathin ney e aram fare fanathin ni murung’agen fapi saf nge kaming, nge fapi rugod ni yad ba gonop nge fapi rugod ni yad bbalyang, nge fapi salpiy. Ra reb e pi fanathin ney ma be ayuwegdad ni ngad nanged rogon ni yira pufthinnag be’ ni be yan u rogon e ngongol rok. Nap’an ni gad be weliy e pi fanathin ney ma gad ra guy boch ban’en nrayog ni ngad filed riy nge rogon nrayog ni ngad folgad riy. Bin som’on ni gad ra weliy e murung’agen fapi saf nge kaming.

FAPI SAF NGE KAMING

3. Mingiyal’ e ra pufthinnag Jesus e girdi’?

³ I weliy Jesus u lan fare fanathin ni murung’agen fapi saf nge kaming nra pufthinnag e girdi’ ni be yan u rogon ni ur folgad ko fare thin nib fel’ nge rogon ni ur ayuweged pi walagen ni kan dugliyrad. (Matt. 25:​31-46) Nap’an fare “gafgow” nib ga’ ma ra dugliy ko mini’ e piin yad bod e saf ara kaming u m’on ni nge tabab e Armageddon. (Matt. 24:21) Piin yad ma ayuweg pi gachalpen Jesus ni kan dugliyrad u fithik’ e yul’yul’ e ra chuwegrad Jesus u fithik’ e piin ndarur ayuweged yad, ni bod be’ ni ma gafaliy e saf ni ke fek e saf ke chuwegrad u fithik’ e kaming.

4. Mang fan nrayog ni nge pagan’dad ngay nib mat’aw rogon nra pufthinnag Jesus e girdi’ nrogon ni be yog e Isaiah 11:​3, 4? (Kum guy e sasing.)

 ⁴ Be tamilangnag e yiiy u Bible ni bochan ni Jehovah e ke mel’eg Jesus ni nge Pufthinnag e girdi’, ma aram fan nib mat’aw rogon e pufthin nra tay. (Mu beeg e Isaiah 11:​3, 4.) Ra yaliy e ngongol, nge lem, nge thin ko girdi’ nib muun ngay rogon e ngongol rorad ngak pi walagen ni kan dugliyrad. (Matt. 12:​36, 37; 25:40) Ra nang Jesus e piin ur ayuweged pi walagen ni kan dugliyrad nge maruwel ni ur rin’ed. a Reb e kanawo’ nib ga’ fan ni ma ayuweg be’ pi walagen Kristus riy e aram e nge ayuwegrad ko fare maruwel ni machib. Piin yad ra rin’ e re n’ey e yira dugliy ni yad e “piin ni yad mmat’aw” ma bay e athap rorad ko “yafos ndariy n’umngin nap’an” u fayleng. (Matt. 25:46; Rev. 7:​16, 17) Rib manigil e biney e tow’ath nra yag ngak e piin yad ra par ni yad ba yul’yul’! Faan yad ra par ni yad ba yul’yul’ u nap’an fare gafgow nib ga’ ngu tomuren e re ngiyal’ i n’em, ma aram e ra par fithingrad u lan “fare ke babyoren e yafos.”​—Rev. 20:​15, NW.

5. Mang e yira fil ko fare fanathin ni murung’agen fapi saf nge kaming? Mini’ e rayog ni nge yib angin ngak?

⁵ Mu par ni gab yul’yul’. Fare fanathin rok Jesus ni murung’agen fapi saf nge kaming e ba ga’ ni fan ngak e piin yad be athapeg e par u fayleng. Yad ma dag ni bay e michan’ rorad ni aram e gathi kemus ni yad ma ayuweg pi walagen Kristus ko fare maruwel ni machib, ya ku yad ma fol u rogon ni ma pow’iyey fare tapigpig nib yul’yul’ mab gonop ni ke mel’eg Jesus. (Matt. 24:45) Machane piin yad be athapeg e yan nga tharmiy e kub t’uf ni ngar folgad ko ginang ni kan pi’ u lan e re fanathin ney. Mang fan? Ya ma yaliy Jesus rogon e ngongol, nge lem, nge thin rorad. Kub t’uf ni ngar pared ni yad ba yul’yul’. Bin riyul’ riy e ku bay l’agruw e fanathin ni weliy Jesus ni ku bay boch e ginang riy ni fan ko piin kan dugliyrad ko Matthew ko guruy ni 25. Ngad weliyed fa binem ni murung’agen fapi rugod ni yad ba gonop nge fapi rugod ni yad bbalyang.

FAPI RUGOD NI YAD BA GONOP NGE FAPI RUGOD NI YAD BBALYANG

6. Uw rogon ni dag lal ko fapi rugod ni yad ba gonop? (Matthew 25:​6-10)

⁶ I weliy Jesus murung’agen ragag i rugod nranod ni ngar mada’naged be’ nib moon ni nge mabgol. (Matt. 25:​1-4) Yad be athapeg ni ngar uned ko fare moon ko madnom ko mabgol rok. I yog Jesus ni lal i yad e “ba gonop” ma lal i yad e “bbalyang.” Fapi rugod ni yad ba gonop e kar fal’eged rogorad u m’on riy ma kar pared ni yad be tedan’rad. Kar fal’eged rogorad ni ngar sonnaged fare moon u n’umngin nap’an nib t’uf ni ngar sonnaged riy ni mus ni faanra taw ni ke n’uw e nep’. Ere ra feked e magal ni gapgep ni ngar guyed raen. Mu kur feked boch e gapgep ni talapen e magal rorad ya gomanga ke sagaal fare moon mab gaman e gapgep ko magal rorad. Ere kar fal’eged rogorad u m’on riy ya nge yag ni par ni be yik’ e magal rorad. (Mu beeg e Matthew 25:​6-10.) Nap’an ni taw fare moon me un fapi rugod ni yad ba gonop ngak ko fare madnom ko mabgol. Ku arrogon ni piin Kristiano ni kan dugliyrad ni kar pared ni yad be tedan’rad, ma yad ba yul’yul’ nge mada’ ko ngiyal’ nra yib Kristus riy e yad ra un ngak Jesus ni ir fare Moon ni Nge Mabgol nga Gil’ilungun u tharmiy. b (Rev. 7:​1-3) Machane uw rogon fa lal nem e rugod ni yad bbalyang?

7. Mang e buch ko fa lal i rugod ni yad bbalyang, ma mang fan?

⁷ Fa lal ni baaram e rugod ni yad bbalyang e  yad ba thil ko tin baaram ni yad ba gonop, ya nap’an ni taw fare moon ni nge mabgol ma dawor ra fal’eged rogorad. Be n’en ni nge math e magal rorad ma dar feked boch e gapgep ni talapen e magal rorad. Nap’an nra nanged ndab ki n’uw nap’an me taw fare moon, ma aram me t’uf ni nga ranod ra chuw’iyed boch e gapgep. Dawor ra sulod me taw fare moon. Ere “fa lal i ppin nra fal’eged rogorad kar pired e ra uned ngak nga ranod nga lan fare naun ni ngan ngongliy e madnom ko mabgol riy, min ning e mab.” (Matt. 25:10) Faani taaboch me taw fa tin baaram e rugod ni yad bbalyang ma yad baadag ni nga ranod nga naun, machane me gaar fare moon ngorad: “Da gu nangmed.” (Matt. 25:​11, 12) Pi rugod ney e dar fal’eged rogorad ni ngar sonnaged fare moon u n’umngin nap’an nib t’uf. Mang e ra fil e piin kan dugliyrad ko re n’ey?

8-9. Mang e rayog ni nge fil e piin kan dugliyrad ko fare fanathin ni murung’agen fapi rugod? (Kum guy e sasing.)

⁸ Mu fal’eg rogom mag tiyan’um. Gathi be yog Jesus u m’on riy ni bay boch e piin kan dugliyrad ni kar fal’eged rogorad u m’on riy ni ngar songad nge mada’ nga tungun e re m’ag ney, ma boch e danga’. Ya be weliy e n’en nra buch ko piin kan dugliyrad ni faanra dab ra fal’eged rogorad ni ngar athamgilgad u fithik’ e yul’yul’ nge mada’ ko tomur. Faanra buch e re n’ey rorad ma dabi yag e tow’ath rorad ngorad. (John 14:​3, 4) Rib ga’ fan e re n’ey! Demtrug ko gad be athapeg e yan nga tharmiy ara par u fayleng, ma gad gubin nsusun e ngad tedan’dad ko ginang ni kan pi’ u lan fare fanathin ni murung’agen fapi rugod. Ra bagadad ma thingari par ni be tiyan’ ma ke fal’eg rogon ni nge athamgil nge mada’ ko tomur.​—Matt. 24:13.

⁹ Tomuren ni weliy Jesus fare fanathin ni murung’agen fapi rugod ni nge tamilangnag feni ga’ fan ni ngan fal’eg rogoy min par ni yibe tiyan’uy, ma aram me weliy fare fanathin ni murung’agen fapi salpiy. Re fanathin ney e be tamilangnag nib t’uf ni ngaun maruwel nib gel.

FAPI SALPIY

10. Uw rogon ni dag l’agruw e tapigpig ni yow ba yul’yul’? (Matthew 25:​19-23)

¹⁰ I weliy Jesus u lan fare fanathin ni murung’agen  fapi salpiy murung’agen l’agruw e tapigpig ni yow ba yul’yul’ ko masta rorow nge reb nde yul’yul’. (Matt. 25:​14-18) Fa gal nsom’on e tapigpig e ra dagew ni yow ba yul’yul’ ni bochan e ba gel e maruwel nra tew ni ngar yoornagew e salpiy ko masta rorow. U m’on ni nge yan fare masta ko milekag ma ra bagayad me pi’ boch e salpiy ngak. Fa gal tapigpig ni yow ba yul’yul’ e ba gel e maruwel nra tew, mab fel’ rogon nra maruwelgow ko salpiy rorow. Ere mang angin ni yib riy? Nap’an ni sul e masta rorow ma l’agruw yay e win ni ke mun ko salpiy nni pi’ ngorow. Ere yog nib fel’ e n’en kar rin’ew, ma aram mar ‘unew ngak ko felfelan’.’ (Mu beeg e Matthew 25:​19-23.) Machane uw rogon fa bin dalip e tapigpig? Mang e rin’ ko salpiy ni pi’ e masta rok ngak?

11. Mang e buch ko fare tapigpig nib “malmal,” ma mang fan?

¹¹ Fa bin dalip e tapigpig e ni pi’ taareb e biyu’ e dolla ngak, machane ba “malmal.” I lemnag e masta rok nib fel’ rogon nra maruwel ko salpiy ni pi’ ngak. Machane me yan i ker e low nge mithag fare salpiy ngay. Nap’an ni sul fare masta ma dariy e win ni ke yag ko fare salpiy ni nge pi’ ngak. Ku de puluw rogon e lem ni tay e re tapigpig nem, ya yog ni masta rok e ir ‘reb e girdi’ nder runguy be’’ ko bin nge wenig ngak nde yag ni nge yoornag e salpiy ni pi’ ngak. Ere de fel’ u wan’ e masta rok. Maku reb e kun fek fare salpiy rok, ngemu’ mi non’ nga wen.​—Matt. 25:​24, 26-30.

12. Mini’ e be yip’ fan fa gal tapigpig ni yow ba yul’yul’ e ngiyal’ ney?

¹² Fa gal nem e tapigpig ni yow ba yul’yul’ e be yip’ fan e pi Kristiano ni kan dugliyrad ni yad ba yul’yul’. Fare Masta ni aram Jesus e be piningrad ni ngar ‘uned ngak ko felfelan’!’ Ke yag ngorad e tow’ath rorad u tharmiy ni aram e bin som’on e fos ko yam’. (Matt. 25:​21, 23; Rev. 20:5b) Machane n’en ni rin’ fare tapigpig nib malmal e ba ginang ni fan ngak e piin kan dugliyrad. Ni uw rogon?

13-14. Mang e ra fil e piin kan dugliyrad ko fare fanathin ni murung’agen fapi salpiy? (Kum guy e sasing.)

¹³ Mmaruwel nib gel. Nap’an ni weliy Jesus fa gal fanathin ni murung’agen fapi salpiy nge fapi rugod, ma der yog nra malmal e piin kan dugliyrad. Ya be weliy e n’en nra buch ni faan yad ra malmal ko maruwel ni yad be tay. Dabi ‘yib  fan e pong ni ke tay Got ngorad, nge rogon ni ke mel’egrad,’ maku dabin pagrad ni ngar uned nga Gil’ilungun u tharmiy.​—2 Pet. 1:10.

¹⁴ Fa gal fanathin ni weliy Jesus ni murung’agen fapi rugod nge fapi salpiy e be tamilangnag ni gubin e pi Kristiano ni kan dugliyrad nthingar ra fal’eged rogorad mar tedan’rad, ma kur maruwelgad nib gel. Machane gur, ka bay ban’en ni ginang Jesus e piin kan dugliyrad riy, fa? Arrogon! Fapi thin ni yog ko Matthew 24:​40, 41 e ku bay rogon ko bin tomur e pufthin ni yira tay ko piin kan dugliyrad.

MINI’ E PIIN YIRA ‘FEKRAD’?

15-16. Uw rogon ni be tamilangnag e Matthew 24:​40, 41 feni ga’ fan ni nge par e piin kan dugliyrad ni yad ba od?

¹⁵ U m’on ni nge weliy Jesus e re dalip i fanathin ney, me weliy murung’agen e bin tomur e pufthin ni yira tay ko piin kan dugliyrad ni nge gagiyel riy e en nib fel’ u wan’. I weliy murung’agen l’agruw i pumoon ni yow be maruwel u milay’ nge l’agruw i ppin ni yow bay ko fen e bil flowa ni yow be bilig e flowa. Fa gal pumoon e bod ni taab maruwel e yow be rin’ maku arrogon fa gal ppin, machane i yog Jesus ni bay ni “fek bagayow nge yan, mi ni pag bagayow.” (Mu beeg e Matthew 24:​40, 41.) Ngemu’ me tay ir ngak pi gachalpen ni gaar: “Mu fal’eged rogomed ngam pired, ya da mu nanged e chirofen ni bay yib e Somol romed riy.” (Matt. 24:42) Ki weliy Jesus murung’agen ban’en ni taareb rogon ko re n’ey u tomuren ni weliy fare fanathin ni murung’agen fapi rugod. (Matt. 25:13) Ere bay rogon reb e pi thin ney nga reb, fa? Bod ni bay. Kemus ni yigoo piin nriyul’ ni kan dugliyrad ma yad ba yul’yul’ e ra ‘fekrad’ Jesus nga Gil’ilungun u tharmiy.​—John 14:3.

¹⁶ Mu par ni gab od. Faanra bay bagayad e piin kan dugliy ndabi par nib od ko tirok Got ban’en, ma aram e dabi un ngak e piin kan “mel’egrad.” (Matt. 24:31) Maku arrogon urngin e piin yad be athapeg e yafos ni manemus u fayleng nsusun e ngkur pared ni yad ba od ma yad ba yul’yul’.

17. Mang fan nsusun e dabi magafan’dad ko ngiyal’ ni ke mel’eg Jehovah ni nge dugliy boch e girdi’ nga gelngin nib thothup?

¹⁷ Kad nanged Jehovah nib fel’ rogon, ere ba pagan’dad nib mat’aw urngin ban’en ni ma rin’. Ere der magafan’dad ni faanra ke mel’eg ni nge dugliy boch e girdi’ ni yad ba yul’yul’ e ngiyal’ ney ni gad bay riy. c Ka be yib ngan’dad e n’en ni yog Jesus u murung’agen e tin baaram e girdi’ ni fin nra uned ko maruwel u bang ko lal e kolok u lan fare fanathin rok ni murung’agen bangi grapes ni fiin be’. (Matt. 20:​1-16) Piin nni piningrad ni ngar maruwelgad ko gi milay’ nem ni tomur e ku taareb puluwrad ko piin nra tababgad ko maruwel nsom’on. Ku arrogon e piin kan dugliyrad ni faan yad ra par ni yad ba yul’yul’, ma ra yag ngorad e tow’ath rorad u tharmiy ndemtrug e ngiyal’ ni kan mel’egrad.

MU FOL KO GINANG NI YIBE PI’

18-19. Mang e kad filed ko pi fanathin ney?

¹⁸ Mang e kad filed? Fare fanathin ni murung’agen fapi saf nge kaming e be tamilangnag nib t’uf ni nge par e piin yad be athapeg e yafos ni manemus u fayleng ni yad ba yul’yul’ ngak Jehovah e chiney ngu nap’an fare gafgow nib ga’ ni bay yib. Ra taw ko ngiyal’ nem ma ra dugliy Jesus ni bay rogon ni nge yan e piin yad ba yul’yul’ “ko yafos ndariy n’umngin nap’an.”​—Matt. 25:46.

¹⁹ Kud weliyed l’agruw e fanathin ni bay boch e ginang riy ni fan ko piin kan dugliyrad. U lan fare fanathin rok Jesus ni murung’agen fapi rugod ni yad ba gonop nge fapi rugod ni yad bbalyang e yog riy ni lal i yad e dag nib gonop. Ra fal’eged rogorad u m’on riy mar pared ni yad be tedan’rad, mar fal’eged rogorad ni ngar sonnaged fare moon u n’umngin nap’an nib t’uf ni  ngar songad riy. Machane fapi rugod ni yad bbalyang e dar fal’eged rogorad u m’on riy. Ere de pagrad fare moon ni ngar uned ko madnom ko mabgol rok. Ku arrogodad nthingar da fal’eged rogodad ngad songad ni yugu demtrug n’umngin nap’an mfini thang Jesus e re m’ag ney. Kud weliyed ko fare fanathin rok Jesus ni murung’agen fapi salpiy murung’agen fa gal tapigpig ni yow ba yul’yul’ nib gel e maruwel ni ur tew. Ba gel e maruwel ni ur tew ni fan ko masta rorow mar fel’gow u wan’. Machane fare tapigpig nib malmal e de fel’ u wan’ e masta rok. Ere mang e gad be fil riy? Thingar da pared ni gad ba pasig ko pigpig rodad ngak Jehovah nge mada’ ko tomur. Ma bin tomur e kad weliyed rogon nthingari par e piin kan dugliyrad ni yad ba od ya nge yag ni ‘fekrad’ Jesus nga tharmiy ko gin bay e tow’ath rorad riy. Yad be athapeg e ngiyal’ ni ‘yira ulunguyrad’ ngak Jesus nga tharmiy. Tomuren fare mahl ni Armageddon, ma yad ra mang fare pin ni ngar mabgolgow Jesus ko mabgol rok fare Fak e Saf.​—2 Thess. 2:1; Rev. 19:9.

20. Mang e ra rin’ Jehovah ni fan ko piin yad ra fol ko pi ginang rok?

²⁰ Yugu aram rogon ni ke chugur ko ngiyal’ ni ngan pufthinnagey, machane dariy rogon ni ngad rusgad. Faan gad ra par ni gad ba yul’yul’, ma ra pi’ e Chitamangidad ni bay u tharmiy ‘fare gelngin ngodad ni ir e ba th’abi gel’ ya ‘nge yog ndarod . . . da sak’iygad nga p’eowchen e en ni Fak e Girdi’.’ (2 Kor. 4:7; Luke 21:36) Demtrug ko gad be athapeg e yan nga tharmiy ara par u fayleng, ma gad ra fel’ u wan’ e Chitamangidad ni faan gad ra fol ko ginang ni kan pi’ u lan fapi fanathin rok Jesus. Bochan e runguy rok Jehovah ngodad, ma aram e yira ‘yoloy fithingdad nga lan fare babyor’ ko yafos.​—Dan. 12:1; Rev. 3:5.