1-2. Mang fan nib felfelan’ e pi tapigpig rok Got? (James 1:​22-25)

 BAADAG Jehovah nge Fak ni ngad felfelan’gad. I yog e en ni yoloy e Psalm 119:2 (BT) ni gaar: “Nge felan’ e piin yad ma folwok ko tin ke yog, ni piin yad ma fol rok u polo’ i lanin’rad.” Ki gaar Jesus: “Ri kab felan’ e piin ni kar rung’aged e thin rok Got ma kar pired ni yad be fol riy!”​—Luke 11:28.

² Gadad e pi tapigpig rok Jehovah e gad ba felfelan’. Mang fan? Boor fan, machane reb i fan e bochan ni gad ma beeg e Thin rok Got ni gubin e rran ma gad ma guy rogon ni ngad folgad ko n’en kad filed.​—Mu beeg e James 1:​22-25.

3. Nap’an ni gad ra fol ko n’en gad ma beeg u lan e Thin rok Got, ma mang angin nra yib ngodad?

³ Nap’an ni gad ra ‘maruwel’ ko thin rok Got, ma bay in e kanawo’ nra yib angin riy ngodad. Reb riy e gad manang ni ireray reb e kanawo’ ni gad ma felfelan’nag Jehovah riy. Re n’ey e ma yibnag e felfelan’ ngodad. (Ekl. 12:13) Gad ra fol ko n’en gad ma beeg u lan e Thin rok Got ni kan thagthagnag, ma aram e ra fel’ e par u lan e tabinaw rodad me chugur e tha’ u thildad e pi walag. Dabisiy ni kam guy nib riyul’ e re n’ey. Maku reb e gad ra siyeg boor e magawon ni ma yib ngak e piin ndarur folgad ko pi motochiyel rok Jehovah. Ba puluw u wan’dad e n’en ni yog David ni Pilung. Tomuren ni tangnag murung’agen e pi motochiyel rok Jehovah, nge tin ma yog, nge tin ma turguy, me yog ni gaar: “Fol ni gu be tay riy e be yib puluwon ngog.”​—Ps. 19:​7-11.

4. Mang fan nib mo’maw’ ni ngad maruwelgad ko Thin rok Got?

⁴ Bin riyul’ riy e gathi gubin ngiyal’ nib mom ni ngad maruwelgad ko Thin rok Got. Yugu aram rogon ni boor pa’ u puluwdad, machane ba t’uf ni ngad ted ba ngiyal’ ni ngad beeged ma gad fil e Bible rodad ya nge yag nda nanged e n’en baadag Jehovah ni ngad rin’ed. Ere ngad weliyed boch ban’en nrayog ni nge ayuwegdad ni ngaud beeged e Bible rodad ni gubin e rran.  Ku gad ra weliy e n’en nra ayuwegdad ni ngad lemnaged e n’en kad beeged, mu kud guyed boch e kanawo’ nrayog ni ngad folgad ko n’en kad filed.

MU TAY E TAYIM NI NGAUM BEEG E THIN ROK GOT

5. Mang boch ban’en ni gad ma rin’ ni ma fek e tayim rodad?

⁵ Yooren e girdi’ rok Jehovah e boor pa’ u puluwrad. Boor e tayim ni gad ma fanay ni ngad rin’ed e n’en be yog e Bible nib milfan ngodad. Bod ni yooren i gadad e ma un ko maruwel ya nge yag ni yognag e tin nib t’uf rok nge tabinaw rok. (1 Tim. 5:8) Boor e Kristiano ni yad ma ayuweg e girdi’ rorad ni ke m’ar ara kar pilibthirgad. Ma gad gubin nib t’uf ni ngad rin’ed boch ban’en ni ngad ayuweged fithik’ i dowdad, ni ban’en nib t’uf e tayim ni ngad ted ni fan ngay. Maku reb e, ku bay e maruwel ni gad ma rin’ u lan e ulung. Ku reb e ban’en nib milfan ngodad e aram e ngad rin’ed fare maruwel ni machib u fithik’ e pasig. Ere bochan ni boor ban’en nib milfan ngom ni ngam rin’, ma uw rogon nrayog ni ngam pirieg e tayim ni ngaum beeg e Bible ni gubin e rran, ma ga be fal’eg i lemnag, ma ga be fol riy?

6. Uw rogon nrayog ni ngam m’oneg u wan’um e beeg Bible ni ga ma tay? (Kum guy e sasing.)

⁶ Beeg Bible e aram reb e ban’en “nth’abi ga’ fan” ni gad ma rin’ e piin Kristiano, ere ba t’uf ni ngad m’oneged u wan’dad. (Fil. 1:​10, NW) Bin som’on e thin ko Psalm e be weliy murung’agen facha’ nib felfelan’ ni be gaar: “Ra beeg e motochiyel rok Somol ma ma yib e felfelan’ riy ngak, ma ku aram rogon ni ra beeg ni rran nge nep’ ni bochan e nge nang fan.” (Ps. 1:​1, 2) Re n’ey e be tamilangnag nib t’uf ni ngad ted ba ngiyal’ ni fan ko beeg Bible. Mingiyal’ e ba fel’ ni ngad beeged e Bible? Ra bagadad mab thilthil e ngiyal’ nrayog ni nge rin’ riy. Machane ba t’uf ni ngad mel’eged ba ngiyal’ nrayog ni ngaud beeged e Bible riy ni gubin e rran. I yog reb e walag ni pumoon ni ka nog Victor ngak ni gaar: “Gu baadag nug ma beeg e Bible rog ni kakadbul. Yugu aram rogon ndabug nug ma od nri kab kakadbul, machane aram e ngiyal’ ni gathi ri boor ban’en  nrayog ni nge magawonnageg. Aram e ngiyal’ ni kab tamilangan’ug mab mom ni nggu tiyan’ug ko n’en nug be beeg.” Sana ku arrogom. Ere mu fithem ni nge lungum, ‘Mingiyal’ e ba fel’ ni ngaug beeg e Bible?’

MU FAL’EG I LEMNAG E N’EN KAM BEEG

7-8. Mang e rayog ni nge talegdad ndabi yib angin ngodad e n’en gad be beeg? Mu susunnag.

⁷ Machane bin riyul’ riy e rayog ni gubin ngiyal’ ni boor ban’en ni gad be beeg, ma gathi ri be rich nga fithik’ i lanin’dad. Bay ba ngiyal’ ni kam beeg ban’en ma de n’uw nap’an nga tomuren mag pagtalin e n’en kam beeg, fa? Gad gubin ni ke buch e re n’ey rodad. Ku rayog ni nge buch e re n’ey rodad u nap’an ni gad be beeg e Bible. Sana rayog ni kad nameged ni ngad beeged in e guruy u Bible ni gubin e rran. Rib manigil e re n’ey. Ya susun e ngaud nameged boch ban’en ma gad guy rogon ni ngad rin’ed. (1 Kor. 9:26) Machane faanra gad baadag ni ngari yib angin ngodad e beeg Bible ni gad ma tay, ma bay boch ban’en nthingar da rin’ed ko bin ni kemus ni ngaud beeged.

⁸ Ra nge par e woldug nib fos mab t’uf e ran riy. Machane faanra aw e n’uw ni yugu ba pag rogon u lan ba ngiyal’ nde n’uw nap’an, ma rayog ni nge sug e ran u fithik’ e but’. Ma faanra ki ulul ni nge aw e n’uw, ma aram e dabki wanum nga fithik’ e but’ maku dabi yib angin ko woldug. Kab fel’ ni nge aw e n’uw nib fel’ ga’ngin ya nge yag ni yan e ran nga fithik’ e but’ nib fel’ rogon me ayuweg e woldug ni nge ga’. Ere ku arrogodad nsusun e dab ud beeged e Bible nib papey ma dariy e tayim ni ngad fal’eged i lemnag e n’en gad be beeg, me par u lanin’dad, ma gad maruwel ngay.​—Jas. 1:24.

9. Mang e susun ni ngad rin’ed ni faanra kad guyed ni gad ma beeg e Bible ni yu gub papey?

⁹ Bay yu ngiyal’ ni kam guy ni ga be beeg e Bible ni yu gub papey, fa? Ere mang e susun ni ngam rin’? Mu beeg nib sagaal. Mu guy rogon ni ngam fal’eg i lemnag e n’en kam beeg ara ka fin mu beeg. De mo’maw’ ni ngam rin’ e re n’ey. Rayog ni ngam dugliy ni ngam yoornag e tayim ni ngam fil e Bible rom riy ya nge yag nim fal’eg i lemnag e n’en ga be beeg. Maku  reb e rayog ni ngam mel’eg ni ngam beeg in e verse mag fanay e gin ka bay ko tayim rom ni ngam fal’eg i lemnag e n’en kam beeg. Victor ni faan kan weliy murung’agen e yog ni gaar: “Buchuuw ban’en nug ma beeg u Bible, nsana rayog ni kemus ni taareb e guruy e gu ma beeg. Bochan nug ma beeg e Bible ni kakadbul, ma aram fan nrayog ni ngaug lemnag e n’en kug beeg u lan e re rran nem.” Demtrug e n’en ga ma rin’, mab ga’ fan ni ngaum beeg e Bible rom u reb e kanawo’ nra ayuwegem ni ngari yib angin ngom e n’en kam beeg.​—Ps. 119:97; mu guy fare kahol ni kenggin e “ Deer ni Ngan Lemnag.”

10. Mu weliy rogon nrayog ni ngam fol ko n’en ga be fil. (1 Thessalonika 5:​17, 18)

¹⁰ Demtrug e ngiyal’ ni ga ma beeg e Bible rom nge n’umngin nap’an ni ga ma beeg e Bible riy, mab t’uf ni ngam guy rogon ni ngam fol ko n’en kam beeg. Nap’an ni ga be beeg bang ko Thin rok Got, mag fithem ni nge lungum, ‘Uw rogon nrayog ni nggu fol ko re n’ey e chiney ara boch nga m’on?’ Bod nsusun e kam beeg fare thin ni bay ko 1 Thessalonika 5:​17, 18. (Mu beeg.) Tomuren ni kam beeg e gal verse ney, ma rayog ni ngam tal ngam lemnag urngin yay ni ga ma meybil nge rogon e meybil ni ga ma tay. Ku rayog ni ngam lemnag boch ban’en ni ga be pining e magar riy. Sana ga ra dugliy ni dalip ban’en e ngam pining e magar riy ngak Jehovah. Ere mus ni faanra kemus ni in e minit ni kam fal’eg i lemnag e pi n’ey riy, ma ra ayuwegem ni ngam rung’ag e Thin rok Got mag maruwel ngay. Am lemnag angin nra yib ngom ni faanra um rin’ e re n’ey ni gubin e rran u nap’an ni ga be beeg yu yang ko Bible! Arrogon, ga ra mon’og u rogon ni ga be maruwel ko Thin rok Got. Machane uw rogon ni faanra ga be lemnag ni boor ban’en nib t’uf ni ngam maruweliy?

MU NAMEG BOCH BAN’EN NRAYOG NI NGAM RIN’

11. Mang fan nrayog ni nge mulan’um yu ngiyal’? Mu weliy ban’en nrayog ni nge buch.

¹¹ Bay yu ngiyal’ nrayog ni nge mulan’um u nap’an ni ga be beeg e Bible ma ga be guy rogon ni ngam fol ko thin riy. Susun e beeg Bible ni kam tay e daba’ e ba muun ngay e fonow u murung’agen e laniyan’. (Jas. 2:​1-8) Ere kam guy nib t’uf ni ngam thilyeg rogon e ngongol rom ko girdi’, ma kam dugliy ni ngam thilyeg boch ban’en u rarogom. Rib manigil e re n’ey! Machane me gabul mag beeg bang u Bible ni be tamilangnag feni ga’ fan ni ngam gagiyegnag rogon e thin ni ga ma yog. (Jas. 3:​1-12) Kam nang ni bay yu ngiyal’ ni ga ma yog e thin nib gel ko girdi’ ara thin nra muleg lanin’uy. Ere kam dugliy ni ngam guy rogon ni nga u mog e thin nra pi’ e athamgil nga lanin’uy. Faani bin migid e rran mag beeg u Bible nib t’uf ni ngam  guy rogon ndab mm’ag fager ko fayleng. (Jas. 4:​4-12) Ere kam nang nib t’uf ni ngam kol ayuw ko pi n’en ga ma chuweg e chalban rom ngay. Ra yan i af ko bin migid e rran ma sana rayog ni ngam lemnag ni kaygi pag urngin ban’en nib t’uf ni ngam thilyeg u rarogom.

12. Mang fan nsusun e dabi mulan’um ni faanra kam guy ko beeg Bible ni ga ma tay nib t’uf ni ngam thilyeg boch ban’en u rarogom? (Kum guy e footnote.)

¹² Faanra boor ban’en nib t’uf ni ngam thilyeg u rarogom, ma dabi mulan’um. Re n’ey e be dag nib sobut’an’um mab puluw fan ni ga ma beeg e Bible. Faanra gad ba sobut’an’, ma aram e ra ud beeged e Bible ma gad be gay boch e kanawo’ ni ngad mon’oggad riy. a Ku dab mu pagtalin nthingar da ululgad i guy rogon ni nga don’ed nga dakendad e ‘bin nib beech i gadad.’ (Kol. 3:10; mu taarebrogonnag ko fare study note ni “is being made new.”) Ere mang e ra ayuwegem ni ngaum maruwel ko Thin rok Got?

13. Uw rogon nrayog ni ngam nameg in ban’en nrayog ni ngam rin’? (Kum guy e sasing.)

¹³ Mu nameg in ban’en ni ngam rin’ ko bin ngam guy rogon ni ngam fol u gubin ban’en ni taab yay. (Prov. 11:2) Mu guy rogon ni ngam rin’ e re n’ey: Mu yoloy nga but’ boch ban’en nib t’uf ni ngam thilyeg u rarogom, ngemu’ mag mel’eg taareb ara l’agruw riy ni ngam maruweliy ko som’on, ma tin ke magey e rayog ni ngam maruweliy nga tomuren ni ke m’ay e gal ney. Ere bin ngan e ngam tabab riy nsom’on?

14. Mang e rayog ni ngam nameg nsom’on?

¹⁴ Rayog ni ngam dugliy ni ngam nameg ban’en nib mom ni ngam rin’. Fa reb e rayog ni ngam mel’eg ni ngam maruweliy ban’en ni ga be lemnag nrib t’uf ni ngam mon’og riy. Nap’an ni ga ra nang e n’en ngam nameg, mag  gay murung’agen u lan e pi babyor rodad ni bod fare Watch Tower Publications Index ara fare Research Guide for Jehovah’s Witnesses. Mu yibilay murung’agen e n’en ga be nameg, ma gog ngak Jehovah ni nge pingeg lanin’um ni ‘nge m’agan’um ngay ni ngam fol ko tin ni be finey.’ (Fil. 2:13) Ngemu’ mag fol ko n’en kam fil. Nap’an ni ga ra rin’ e n’en kam nameg nsom’on, ma dabisiy nra yib e athamgil nga lanin’um ni ngkum maruweliy yugu reb e ban’en. Bin riyul’ riy e nap’an ni ga ra mon’og u reb e ban’en, ma dabisiy nra mom ni ngkum mon’og u yugu boch.

MU PAG E THIN ROK GOT NI NGE ‘MARUWEL U FITHIK’AM’

15. Uw rogon nib thil e girdi’ rok Jehovah ngak boor e girdi’ ni ma beeg e Bible? (1 Thessalonika 2:13)

¹⁵ Bay boch e girdi’ ni yad ma yog ni boor yay ni kar beeged e Bible. Machane gur, riyul’ nib mich u wan’rad e n’en be yog e Bible, fa? Kar folgad riy ara kar paged ni nge thilyeg e ngongol rorad, fa? Ba ga’ ni danga’. Machane girdi’ rok Jehovah e ri yad ba thil! Ba mich u wan’dad ni Bible e “er e bin ni ir, ya ri ir e thin rok” Got ni bod nib mich u wan’ e pi Kristiano ko bin som’on e chibog. Maku reb e gad ma guy rogon ni nge m’ug ni gad be pag ni nge maruwel u lan e yafos rodad.​—Mu beeg e 1 Thessalonika 2:13.

16. Mang e rayog ni nge ayuwegdad ni ngad maruwelgad ko Thin rok Got?

¹⁶ Gathi gubin ngiyal’ nib mom ni ngad beeged e Thin rok Got ma gad fol riy. Rayog nib mo’maw’ ni ngad pirieged e tayim ni ngad beeged. Fa reb e rayog ni gad be beeg nib papey ma der yag ni ngad fal’eged i lemnag. Fa reb e rayog ni be mulan’dad ni bochan urngin ban’en nib t’uf ni ngad thilyeged u rarogodad. Demtrug e magawon ni ga be mada’nag ma gathi kaygi mo’maw’ ndabiyog ni ngam gel ngay. Ya rayog ni nge ayuwegem Jehovah. Ere manga yu gud dugliyed u wan’dad ni ngad paged ni nge ayuwegdad me yan i aw ni gathi kemus ni yug gad be motoyil ko Thin rok Got, ya ku gad be maruwel ngay. Dariy e maruwar riy ni faanra ud pared ni gad be beeg e Thin rok Got ma gad be fol riy, ma aram e ra gel e felfelan’ rodad.​—Jas. 1:25.