1-2. Mang angin nra yib ngodad ni bochan e kan sunmiydad nrayog ni nge gel e felfelan’ rodad u nap’an ni kad pied ban’en ngak be’ ko felfelan’ ni ma yib ngodad u nap’an ni kan pi’ ban’en ngodad?

 NAP’AN ni sunmiy Jehovah e girdi’, me tayrad nib gel e felfelan’ ni ma yib ngorad u nap’an ni yad ra pi’ ban’en ngak be’ ko felfelan’ ni ma yib ngorad u nap’an ni kan pi’ ban’en ngorad. (Acts 20:35) Ere gur, re n’ey e be yip’ fan ndarud felfelan’gad u nap’an ni yira pi’ ban’en ngodad? Danga’, ya gad gubin ni gad ma felfelan’ u nap’an ni yira pi’ reb e tow’ath ngodad. Yugu aram rogon, ma kab gel e felfelan’ ni gad ma tay u nap’an ni gad ra pi’ ban’en ngak be’. Bin riyul’ riy e, ba fel’ ni ke sunmiydad Jehovah ni aray rogon. Mang fan?

² Bochan ni ke sunmiydad Jehovah ni aray rogon, ma rayog ni ngad gelnaged e felfelan’ rodad. Rayog ni ngad gelnaged e felfelan’ rodad u nap’an ni gad ra gay boch e kanawo’ ni ngad pied ban’en riy ngak be’. Rib manigil ni ke sunmiydad Jehovah ni aray rogon.​—Ps. 139:14.

3. Mang fan nrayog ni nga nog ni Jehovah e ir “fare Got nib felfelan’”?

³ Be micheg e Bible ngodad ni gad ma felfelan’ u nap’an ni gad ra pi’ ban’en. Ere aram fan ni ku be yog ni Jehovah e ir “fare Got nib felfelan’.” (1 Tim. 1:​11, NW) Ir e som’on ni gol ko girdi’ maku dariy be’ ni boor ban’en ni ma pi’ nge migid. Ir e ke pi’ e yafos ngodad, ma bochan ni be ayuwegdad ma aram fan ni gad be ‘mithmith ma gadad ba’.’ (Acts 17:28) Arrogon, “urngin e tin nib fel’ . . . nge urngin e tow’ath nrib manigil” ni Jehovah e ma yib rok.​—Jas. 1:17.

4. Mang e ra ayuwegdad ni nge gel boch e felfelan’ rodad?

⁴ Dabisiy ni gad gubin ni gad baadag ni nge yag fare felfelan’ ngodad ni ma yib ko ngan pi’ ban’en ngak be’. Ra yag e re felfelan’ ney ngodad ni faan gad ra folwok u rogon ni ma gol Jehovah. (Efe. 5:1) Nap’an ni gad be weliy e re n’ey, ma gad ra guy e n’en nrayog ni ngad rin’ed ni faanra gad be lemnag nde ga’ fan u wan’ e girdi’  rogon ni gad ma gol ngorad. Pi n’ey e ra ayuwegdad ni ngad pared ni gad ba felfelan’ ni bochan e gad ma pi’ ban’en ko girdi’ miki gel e felfelan’ rodad.

MU GOL NI BOD JEHOVAH

5. Mang boch ban’en nib t’uf rodad ni ma pi’ Jehovah?

⁵ Mang boch e kanawo’ ni ma gol Jehovah riy ngodad? Baaray in e kanawo’. Ma pi’ e tin nib t’uf ko par rodad. Sana gathi gubin ngiyal’ ni bay boch e chugum rodad nib manigil, machane ke magar Jehovah ya yooren i gadad e bay e tin nib t’uf ko par rok. Bod ni ma pi’ e ggan, nge mad rodad, nge bang ni ngad pared riy. (Ps. 4:8; Matt. 6:​31-33; 1 Tim. 6:​6-8) Gur, ma pi’ Jehovah e tin nib t’uf ko par rodad ni bochan e be lemnag ni ban’en nthingari rin’? Danga’! Ere mang fan ni ma rin’ e re n’ey?

6. Mang e gad be fil ko Matthew 6:​25, 26?

⁶ Ma pi’ Jehovah e tin nib t’uf ko par rodad ni bochan e gad ba t’uf rok. Am lemnag fapi thin ni yog Jesus ni bay ko Matthew 6:​25, 26. (Mu beeg.) I fanay e pi n’en kan sunmiy ni nge tamilangnag e re n’ey. Nap’an ni be weliy murung’agen e arche’, me gaar: “Darir yunged awochngin e woldug, fa ra kunuyed e woldug ni ke el ngar tiyed nga naun.” Machane mu tay fanam i yan ko n’en ni yog ni migid ni gaar: “Chitamangimed nu tharmiy e be ayuwegrad!” Ngemu’ me fith ni gaar: “Gathi ka ba ga’ famed ngak e arche’?” Mang e baadag ni nge fil ngodad? Kab ga’ fan u wan’ Jehovah e pi tapigpig rok ko gamanman ni sunmiy. Ma pi’ e tin nib t’uf ko gamanman, ere rayog ni nge pagan’dad ngay nra pi’ e tin nib t’uf rodad! Ma pi’ Jehovah e tin nib t’uf ko tabinaw rok ni bochan e yad ba t’uf rok ni bod ba matam ni ma ayuweg e tabinaw rok.​—Ps. 145:16; Matt. 6:32.

7. Mang reb e kanawo’ nrayog ni ngad golgad ko girdi’ riy ni bod Jehovah? (Kum guy e sasing.)

⁷ Ku arrogodad nrayog ni ngad ayuweged e girdi’ ko tin nib t’uf rorad ni bochan e yad ba t’uf rodad ni bod e n’en ma rin’ Jehovah. Bod ni bay reb e walag ni ga manang nib t’uf e ggan ara mad rok, fa? Rayog ni nge fanayem Jehovah ni ngam ayuweg ko tin nib t’uf rok. Ba ga’ ni yimanang e girdi’ rok Jehovah ni yad boch e girdi’ ni yad ma pi’ e ayuw u nap’an ni ke buch ban’en ni kan gafgow riy. Bod nnap’an fare m’ar ni COVID-19 ma i pi’ e pi walag e ggan, nge mad, nge boch e chugum ngak e piin nib t’uf e ayuw rorad. Ku boor i yad e i pi’ e salpiy ni ayuw ni fan ko fare maruwel ni yibe rin’ u ga’ngin yang e fayleng. Pi salpiy ney e pi’ e ayuw ko pi walag u ga’ngin yang e fayleng ni ke t’uf e ayuw rorad ni bochan ban’en ni ke buch ni kan gafgow riy. Kar folgad ko fapi thin ni  bay ko Hebrews 13:16 ni be gaar: “Dab mpaged talin ni ngam rin’ed e tin nib fel’ ma nge bigimed mi i ayuweg bigimed, ya ereray e pi maligach nib m’agan’ Got ngay.”

8. Mang boch e kanawo’ ni ma yib angin gelngin Jehovah riy ngodad? (Filippi 2:13)

⁸ Ma pi’ Jehovah gelngin ngodad. Ba felfelan’ Jehovah ngay ni nge pi’ gelngin ndariy e gin nra mus riy ko pi tapigpig rok ni yad ba yul’yul’. (Mu beeg e Filippi 2:13.) Bay ba ngiyal’ ni kam meybil ni ngan pi’ gelngim ni ngam siyeg e lumel ni ke yib ngom ara ngam athamgil u fithik’ reb e skeng nib mo’maw’, fa? Sana ku rayog ni kam meybil ni ngan pi’ gelngim ni ngam rin’ e pi n’en nib t’uf ni ngam rin’ u reb e rran ngu reb. Nap’an nni fulweg taban e meybil rom ngan pi’ gelngim, ma rayog ni ke puluw u wan’um fapi thin ni yoloy apostal Paul ni faani gaar: “Demtrug e mit i n’en ni gu ra mada’nag ma ba’ gelngig ni ke pi’ nrayog ni nggu par riy.”​—Fil. 4:​13, NW.

9. Uw rogon nrayog ni ngad folwokgad rok Jehovah u rogon ni ma fanay gelngin? (Kum guy e sasing.)

⁹ Yugu aram rogon ndawor da flontgad, ma rayog ni ngad folwokgad rok Jehovah u rogon ni ma fanay gelngin. Dabiyog ni ngad pied gelngin e girdi’ ni bod ni ma rin’ Jehovah. Machane rayog ni ngad fanayed gelngidad ni ngad ayuweged yad. Bod nrayog ni ngad rin’ed boch e maruwel ni fan ngak reb e Kristiano ni ke pilibthir ara ke m’ar, ara da rin’ed boch e maruwel u tabinaw rorad. Faanra rayog rodad, ma rayog ni ngad pied e ayuw ko klin u Tagil’ e Liyor ma gad be un i ngongliy e yungin ke kireb riy. Gad ra fanay gelngidad ni aray rogon, ma boor e kanawo’ nrayog ni ngad ayuweged e pi tapigpig rok Jehovah riy.

10. Uw rogon nrayog ni ngad fanayed e thin ni gad ma yog ni ngad ayuweged yugu boch e girdi’?

¹⁰ Ku dab mu pagtalin ni bay gelngin e thin ni gad ma yog. Bay be’ ni ga be lemnag nra yib e athamgil nga laniyan’ ni faan ga ra yog ngak nib ga’ fan u wan’um e tin ma rin’, fa? Bay be’ ni ga manang nib t’uf ni ngan fal’eg laniyan’, fa? Faanra bay, ma mang ndab mu guy rogon ni nga mog ngak ni ga be lemnag? Rayog ni ngam man mu guy, ara mu callnag, ara mu yoloy bang e card ngam pi’ ngak, ara mu emailnag, ara mu textnag. De t’uf ni ngam weliy boor ban’en ngak. Rayog ni kemus ni in bug e thin ni keb u gum’irchaem e ba t’uf ni nge rung’ag walagem ya nge yag ni par nib yul’yul’ me fel’ boch laniyan’.​—Prov. 12:25; Efe. 4:29.

11. Uw rogon ni ma fanay Jehovah e gonop rok?

¹¹ Ma pi’ Jehovah e gonop. I yoloy James nreb i gachalpen Jesus ni gaar: “Faanra dariy e gonop rok bigimed, ma nge wenignag ngak Got, ya Got e ba gol ngak urngin e girdi’ ma dabi damumuw ngorad.” (Jas. 1:​5, NW; ftn.) Be tamilangnag e pi thin ney ni Jehovah e der ma tay e gonop rok nder pi’ ngak be’, ya ma pi’ ko girdi’. Mu tay fanam i yan riy nnap’an nra pi’ Jehovah e gonop  rok ngodad ma ‘der ma tamra’nagdad’ ara ‘damumuw ngodad.’ Dabun ni ngad dabuyed ni kad weniggad ngak ni nge pow’iydad. Ya bin riyul’ riy e baadag ni ngad rin’ed e re n’ey.​—Prov. 2:​1-6.

12. Uw rogon nrayog ni ngad pied e gonop rodad ngak yugu boch e girdi’?

¹² Uw rogodad? Rayog ni ngkud pied e gonop rodad ngak yugu boch e girdi’ ni bod Jehovah, fa? (Ps. 32:8) Boor e kanawo’ nrayog ni nge weliy e girdi’ rok Jehovah e pi n’en kar filed riy ngak yugu boch e girdi’. Bod nib ga’ ni gad ma skulnag e piin ka fin nra uned ko machib. Piin piilal e yad ma gum’an’naged yad ngar ayuweged e pi ministerial servant nge pi walag ni pumoon ni kar uned ko taufe ni ngar filed rogon ni ngar rin’ed e maruwel rorad u lan e ulung. Ma pi walag ni yad ba salap ko dimow naun nge rogon ni ngan fal’eg e yungin ke kireb riy e yad ma skulnag e piin gathi ri yad ba salap ya nge yag nra uned i ngongliy boch e naun rodad.

13. Uw rogon nrayog ni ngad folwokgad u rogon ni ma pi’ Jehovah e gonop rok ko girdi’ u nap’an ni gad be skulnag yugu boch e girdi’?

¹³ Piin yad be skulnag yugu boch e girdi’ e ba fel’ ni ngar folwokgad u rogon ni ma pi’ Jehovah e gonop rok ko girdi’. Dab mu pagtalin nib felfelan’ Jehovah ni nge pi’ e gonop rok ngodad. Ku arrogodad nsusun e ngad filed e tin gad manang ngak e piin yibe skulnagrad. Darud mithaged boch ban’en ni gad manang ndarud filed ngorad ni bochan e gad be magarnag nri chey me munmun mar feked e maruwel rodad. Ku der lungudad u wan’dad: ‘Dariy be’ ni skulnageg! Mu pag nge fil rok ni yigoo ir.’ Susun e dab i lem e girdi’ rok Jehovah ni aray rogon. Ya gad ba felfelan’ ngay ni ngad filed e tin gad manang ngak e piin gad be skulnagrad mu ‘kud pied gadad nga pa’rad.’ (1 Thess. 2:8) Gad be athapeg ni nge munmun ‘mi ki yag ni ngar’ skulnaged yugu boch e girdi’. (2 Tim. 2:​1, 2) Faan gad ra rin’ e re n’ey, ma aram e ra ga’ e gonop rodad miki gel boch e felfelan’ rodad maku arrogon yugu boch e girdi’.

FAANRA GAD BE LEMNAG NDANIR PINING E MAGAR NGODAD

14. Mang e ma rin’ yooren e girdi’ u nap’an ni gad ra gol ngorad?

¹⁴ Nap’an ni gad ra gol ko girdi’ ma yad ma pining e magar ngodad, nib ga’ ni pi walagdad e yad ma rin’ e re n’ey. Rayog ni ngar yoloyed boch yang i babyor ngodad ni yad be pining e magar ngodad ara ra pininged e magar ngodad u yugu reb e kanawo’. (Kol. 3:15) Re n’ey e ma gelnag e felfelan’ rodad.

15. Mang e susun ni ngad lemnaged ni faanra de yog boch e girdi’ e magar ngodad?

¹⁵ Machane bin riyul’ riy e sana bay boch e girdi’ ni gathi gubin ngiyal’ nra ur pininged e magar ngodad. Bay yu ngiyal’ nrayog ni ngad fanayed e tayim rodad, ara gelngidad, ara tin bay rodad ni fan ngak be’, me yan i boch nga tomuren mu ud lemnaged ko ba ga’ fan u wan’ e n’en kad rin’ed ni fan ngak fa danga’. Faanra buch e re n’ey, ma uw rogon ni nge dabi war e felfelan’ rodad ara kankanan’dad ngak? Ngam lemnag fare thin nu Bible ni kenggin e re article ney ni bay ko Acts 20:35. Felfelan’ ni gad ma tay u nap’an ni kad pied ban’en ngak be’ e gathi be yan u rogon e magar ni be pining e girdi’ ngodad. Ku rayog ni ngad dugliyed ni ngaud pied ban’en u fithik’ e felfelan’ ni yugu aram rogon nder pining e girdi’ e magar ngodad. Ni uw rogon? Baaray in e kanawo’.

16. Mang e susun ni ngad nameged u nap’an ni gad be pi’ ban’en ngak be’?

¹⁶ Mu nameg ni ngam folwok rok Jehovah. Ma pi’ boch ban’en nib fel’ ko girdi’ ni yugu demtrug ko yad ma pining e magar riy ngak fa danga’. (Matt. 5:​43-48) Ke micheg ni faan gad ra folwok rok ngaud pied ban’en ‘dab da lemniged ban’en ni ngan pi’ riy ngodad,’ ma ‘bay labgen ni ba ga’ nra fulweg ngodad.’ (Luke 6:35) “Ban’en” ni ngan pi’ ngodad e rayog nib muun ngay e magar ni ngan pining ngodad. Ere demtrug ko yira pining e magar ngodad fa danga’, ma gubin ngiyal’ nra tow’athnagdad Jehovah ni bochan e tin nib fel’ ni gad ma rin’ ni fan ngak yugu boch e  girdi’ nge bochan ni gad be “pi’ ban’en u fithik’ e felfelan’.”​—Prov. 19:17; 2 Kor. 9:7.

17. Uw rogon nrayog ni ngaud pared nib puluw e lem rodad? (Luke 14:​12-14)

¹⁷ Bay reb i kenggin e motochiyel nib ga’ fan ko Luke 14:​12-14 ni be weliy rogon ni ngaud pared nib puluw e lem rodad u nap’an ni gad be pi’ ban’en. (Mu beeg.) De kireb ni ngad golgad ara da rin’ed boch ban’en ni fan ngak e piin ni ku rayog ni ngar rin’ed e pi n’em ni fan ngodad. Machane uw rogon ni faanra kad nanged nib ga’ ni gad ma pi’ ban’en ni bochan e gad be athapeg ni ngkun pi’ ban’en ngodad? Rayog ni ngad guyed rogon ni ngad rin’ed e n’en ni yog Jesus. Rayog ni ngad golgad ngak be’ ni gad manang ndabiyog ni nge rin’ e n’en kad rin’ed ni fan ngak. Faan gad ra rin’ e re n’ey, ma gad ra felfelan’ ni bochan e gad be folwok rok Jehovah. Re n’ey e ku ra ayuwegdad ni ngad pared ni gad ba felfelan’ u nap’an nde pining yugu boch e girdi’ e magar ngodad.

18. Mang e ra ayuwegdad ndab da lemnaged boch ban’en nde puluw u rarogon yugu boch e girdi’?

¹⁸ Dab mu lemnag nde ga’ fan u wan’ yugu boch e girdi’ e n’en kam rin’ ni fan ngorad. (1 Kor. 13:7) Faanra de pining yugu boch e girdi’ e magar ngodad, ma rayog ni ngad fithed gadad ni nge lungudad: ‘Riyul’ nde ga’ fan u wan’rad e n’en kug rin’, fa kemus ni kar paged talin ni nga rogned e magar?’ Sana rayog ni ku bay boch i fan ndar pininged e magar ngodad ni bod rogon ni gad be lemnag. Sana bay boch e girdi’ ni yad be pining e magar u lanin’rad machane ba mo’maw’ ni nga rogned ko thin. Sana rayog ni yad be tamra’ ni ngan ayuwegrad, nib ga’ ni faanra yad e ur ayuweged yugu boch e girdi’ kafram. Demtrug rogon, ma t’ufeg ni ma dag e piin Kristiano e ra k’aringdad ndab da lemnaged boch ban’en nde puluw u rarogorad ma gad ulul i pi’ ban’en u fithik’ e felfelan’.​—Efe. 4:2.

19-20. Mang fan nib t’uf ni ngad gum’an’naged gadad u nap’an ni gad be pi’ ban’en ko girdi’? (Kum guy e sasing.)

¹⁹ Mu gum’an’nagem. Solomon ni Pilung ni ir be’ nib gonop e yoloy ni gaar: “Mu wereg e flowa rom nga daken e ran, ya tomuren boor e rran ma ka ga ra pirieg bayay.” (Ekl. 11:​1, NW) Ba tamilang ko pi thin ney nrayog ni bay boch e girdi’ nib n’uw nap’an nga tomuren mfin nra pininged e magar. Ireray e n’en ni buch rok reb e walag nib pin.

²⁰ Boor e duw ni ke yan me yoloy leengin reb e  walag ni pumoon ni ma lekag e ulung bangi babyor ngak reb e walag nib pin ni ka fini un ko taufe ni be pi’ e athamgil nga laniyan’ ni nge par nib yul’yul’. Sogonap’an meruk e duw nga tomuren, me yol fare walag nib pin ngak ni gaar: “Kug lemnag ni nggu yol nggu weliy ngom gelngin e ayuw ni kam pi’ ngog u lan e pi duw ni ke yan ndam nang.” Ki ulul ngay ni gaar: “Rib manigil e thin nim yoloy [ko gi babyor nem] ngam pi’ ngog, ma dag pagtalin fare thin nu Bible nim yoloy ngay.” a Tomuren ni weliy murung’agen boch e magawon ni ka i mada’nag, miki ulul ngay ni gaar: “Yu ngiyal’ e gu baadag ni nggu pag gubin ban’en mug tal ko pigpig nug be tay. Machane nap’an nug ra lem ni aray rogon ma ma yib ngan’ug e re thin nu Bible nem nim pi’ ngog, ma aram e n’en ma ayuwegeg ndabi mulan’ug.” Ki gaar: “Dariy ban’en ni ke ayuwegeg u lan e re meruk i duw ney ni bod gelngin ni ke ayuwegeg e gi babyor ney nge re thin nu Bible ney.” Am lemnag gelngin e felfelan’ ni tay leengin fare walag ni pumoon ni ma lekag e ulung u nap’an ni taw e gi babyor ney ngak u “tomuren boor e rran”! Ku arrogodad nrayog nib n’uw nap’an nga tomuren ni kad rin’ed ban’en ni fan ngak be’ mfini pining e magar riy ngodad.

21. Mang fan ni kam dugliy u wan’um ni ngaum folwok u rogon ni ma gol Jehovah ko girdi’?

²¹ Kad weliyed faram ni sunmiydad Jehovah ni bay ban’en nib manigil nrayog ni ngad rin’ed. Yugu aram rogon ni gad ma felfelan’ u nap’an ni yira pi’ ban’en ngodad, machane kab gel e felfelan’ ni gad ma tay u nap’an ni gad ra pi’ ban’en ngak yugu boch e girdi’. Gad ma felfelan’ u nap’an ni gad ra ayuweg pi walagdad. Ku gad ma felfelan’ u nap’an ni yad ra pining e magar ngodad. Yugu aram rogon, ma demtrug ko ke pining be’ e magar ngodad fa danga’ ma rayog ni ngad felfelan’gad ni kad rin’ed ban’en nib manigil. Dab mu pagtalin ndemtrug e n’en ga ra pi’ ngak Jehovah, ma “rayog rok ni nge pi’ boch ngom ni kab yoor!” (2 Kron. 25:​9, BT) Dabiyog ni nge yoor e tin gad ra pi’ ko tin nra pi’ Jehovah ngodad! Ma tow’ath nra pi’ Jehovah ngodad e aram e bin th’abi fel’ e tow’ath nra yag ngodad. Ere ngad dugliyed u wan’dad ni ngaud folwokgad ko Chitamangidad ni bay u tharmiy ni ir be’ nib gol.