1. Mang reb e tow’ath ni bay rodad?

RI GAD ba tow’ath ni gad bang ko ulung rok Jehovah! Gad ba felfelan’ ko gapas nge felfelan’ ni bay rodad ni bochan e gad be liyor pi walagdad u lan e ulung ngak Jehovah u taabang. Ere mang e maruwel rom u lan e ulung?

2. Mang fanathin e fanay apostal Paul u lan yu yang e babyor ni yoloy ni bay u Bible?

² Boor ban’en nrayog ni ngad filed u murung’agen e maruwel nib milfan ngodad u lan e ulung u ba fanathin ni fanay apostal Paul u nap’an ni be yoloy yu yang e babyor rok ni bay u Bible. U lan e yungi babyor nem ni yoloy Paul e taarebrogonnag e ulung riy nga ba dowef. Ki taarebrogonnag e girdi’ u lan e ulung nga yu yang u ba dowef.​—Rom. 12:4-8; 1 Kor. 12:12-27; Efe. 4:16.

3. Mang dalip ban’en ni gad ra fil u lan e re article ney?

³ U lan e re article ney e gad ra weliy riy dalip ban’en nrayog ni ngad filed ko fare fanathin ni weliy Paul. Bin som’on e, gad ra weliy ni gad gubin ni bay e maruwel nib milfan ngodad * u lan e ulung rok Jehovah. Bin l’agruw e, gad ra weliy murung’agen e n’en nrayog ni ngad rin’ed ni faanra gad be guy nib mo’maw’ ni ngad nanged e n’en nib milfan ngodad u lan e ulung. Ma bin dalip e, gad ra weliy fan nib t’uf ni nge bagadad me tiyan’ nge rin’ e maruwel rok ni ke pi’ Jehovah ngak u lan e ulung.

4. Mang e be fil e Roma 12:4, 5 ngodad?

⁴ N’en som’on nrayog ni ngad filed ko fare fanathin rok Paul e aram e ra bagadad ma bay reb e maruwel nib ga’ fan nib milfan ngak u lan e ulung rok Jehovah. U tabolngin e re fanathin rok Paul nem,  me yog ni gaar: “Boor yang i dowdad ni kan chadguy ke yog dowdad riy, ma urngin e yungi n’em ndowdad e ra bang ma bay e maruwel rok. Me ere ku er rogon ni yig gadad pire’, machane taareb dowdad ni kan puthuy ngak Kristus, ma yigoo kad chagilgad ngodad, ni gadad yu yang i downgin taab dowef.” (Rom. 12:4, 5) Mang e be yip’ Paul fan? Be yip’ fan nib thilthil e maruwel nib milfan ngodad u lan e ulung, machane gad gubin nib ga’ fadad.

5. Mang boch e “tow’ath” ni ke pi’ Jehovah ni fan ko ulung rok?

⁵ Nap’an ni ga ra lemnag e piin bay e maruwel nib milfan ngorad u lan e ulung, ma sana piin yad ma yog e thin u lan e ulung e ir e ra yib ngan’um ko som’on. (1 Thess. 5:12; Heb. 13:17) Riyul’ ni ke pi’ Jehovah boch e “pumoon ni tow’ath” ni fan ko ulung rok u daken Kristus. (Efe. 4:8, NW) Pi pumoon ney ni yad boch e “tow’ath” e ba muun ngay girdien fare Ulung ni Ma Pow’iyey, nge pi walag ni pumoon ni yad ma ayuweg fare Ulung ni Ma Pow’iyey, nge girdien e Branch Committee, nge pi walag ni pumoon ni yad ma lekag e ulung, nge pi walag ni pumoon ni yad ma pi’ boch e skul, nge piin piilal, nge pi ministerial servant. Gubin e pi walag ney ni kan dugliyrad u daken gelngin Got nib thothup ni ngar ayuweged e pi saf rok Jehovah mar ayuweged e ulung ni nga i par nib gel.​—1 Pet. 5:2, 3.

6. Mang e ma athamgil e pi walag ni pumoon ni kan dugliyrad nga gelngin Got nib thothup ni ngar rin’ed nrogon ni bay ko 1 Thessalonika 2:6-8?

⁶ Kan dugliy boch e walag ni pumoon nga gelngin Got nib thothup ni ngar rin’ed boch e maruwel nib thilthil. Pi walag ni pumoon ney ni kan dugliyrad nga gelngin Got nib thothup e ba gel e maruwel ni yad ma tay ni ma yib angin ko ulung ni ga’ngin. Re n’ey e taareb rogon nga yu yang u ba dowef nib thilthil ni bod rogon e paef nge rifrifen ey ni ma maruwel ya nge yag ni yib angin ko fare dowef ni ga’ngin. Pi walag ney e gathi yad be guy rogon ni nge pining e girdi’ e sorok ngorad. Ya yad be guy rogon ni ngar pied e athamgil nga laniyan’ pi walagrad mar gelnaged yad. (Mu beeg e 1 Thessalonika 2:6-8.) Gad be pining e magar ngak Jehovah ko pi walag ni pumoon ney ni yad ma m’oneg e tin nib t’uf rok e pi walag mfin ra migidgad!

7. Mang boch e tow’ath ni bay rok e pi walag ni yad ma pigpig u polo’ e tayim rorad?

⁷ Sana bay boch e walag u lan e ulung ni kan dugliyrad ni ngar manged boch e missionary, ara special pioneer, ara regular pioneer. Bin riyul’ riy e, boor e walag u ga’ngin yang e fayleng ni kar dugliyed ni ngaur machibgad ma yad be ayuweg e girdi’ ni ngar manged boch i gachalpen Jesus u polo’ e tayim rorad. Bochan ni kar dugliyed ni ngar rin’ed e re n’ey, ma ke yag ni ngar ayuweged boor e girdi’ ni ngar manged boch i gachalpen Kristus Jesus. Yugu aram rogon ni yooren e pi walag ney e buchuuw e salpiy ara chugum rorad, machane boor ban’en nib manigil ni ke pi’ Jehovah ngorad. (Mark 10:29, 30) Rib t’uf e pi walag ney rodad, ma gad ba felfelan’ ngay ni yad bang ko ulung rodad!

8. Mang fan ni urngin e piin yad ma machibnag fare thin nib fel’ nib ga’ farad u wan’ Jehovah?

⁸ Ere gur, yigoo pi walag ni pumoon ni kan dugliyrad nge pi walag ni yad ma machib u polo’ e tayim rorad e aram e piin bay e maruwel nib milfan ngorad u lan e ulung? Danga’! Gubin e piin yad be machibnag fare thin nib fel’ nib ga’ farad u wan’ Got ngu lan e ulung. (Rom. 10:15; 1 Kor. 3:6-9) Bin riyul’ riy e, reb e maruwel nib ga’ fan ni be nameg urngin e walag u lan e ulung e aram e ngar ayuweged e girdi’ ni ngar manged pi gachalpen Jesus Kristus ni Somol rodad. (Matt. 28:19, 20; 1 Tim. 2:4) Gubin e girdi’ u lan e ulung nib muun ngay e piin kar uned ko taufe nge piin dawor ra uned ko taufe machane yad ma un ko machib e yad ma guy rogon ni nge par e re maruwel ney ni aram e n’en th’abi ga’ fan u lan e yafos rorad.​—Matt. 24:14.

9. Mang nrib ga’ fan u wan’dad e pi walagdad nib pin?

⁹ Ma tay Jehovah fan e pi walag nib pin u lan e ulung ni aram e ke pi’ e maruwel nib ga’ fan  ngorad u lan e ulung. Ba ga’ fan u wan’ e piin leengiy, nge pi matin, nge piin ke yim’ figirngirad, nge pi walag nib pin ni ka yad ba muchugbil ni yad ma pigpig ngak ni yad ba yul’yul’. Boor e ppin ni be weliy e Bible murung’agrad ni yad ba fel’ u wan’ Got. Ka nog nib fel’ e kanawo’ ni kar daged u rogon ni ur daged e gonop, nge michan’, nge rogon ni ur pared ni yad ba pasig, ma darur rusgad, ma yad ba gol, ma ur rin’ed boch e maruwel nib fel’. (Luke 8:2, 3; Acts 16:14, 15; Rom. 16:3, 6; Fil. 4:3; Heb. 11:31, 35) Ri gad be pining e magar ngak Jehovah ni bochan e pi walag nib pin ni Kristiano ni yad bay u lan e ulung rodad ni ku bay e pi fel’ngin ney rorad nrib manigil!

10. Mang nib ga’ fan u wan’dad e pi walagdad ni kar pilibthirgad?

¹⁰ Ku gad ba felfelan’ ni bochan e boor e walag u lan e ulung rodad ni kar pilibthirgad. Bay boch e ulung ni bay e pi walag ni pumoon nge ppin riy ni kar pilibthirgad ni kar pigpiggad ngak Jehovah u n’umngin nap’an e yafos rorad. Sana bay boch e walag ni kar pilibthirgad ni ka fin ra nanged e tin riyul’. Machane boor e pi walag ney ni kar m’argad ni bochan e yad be pilibthir i yan. Bochan e m’ar rorad ma sana buchuuw ban’en nrayog ni ngar rin’ed u lan e ulung nge tin nrayog ni ngar rin’ed ni fan ko fare maruwel ni machib. Yugu aram rogon, ma pi walag ney e yad ma rin’ e tin rayog rorad ni fan ko machib, ma yad ma pi’ e athamgil nga laniyan’ yugu boch e walag ma yad ma fil boch ban’en ngorad u rogon nrayog rorad! Ku ma yib angin ngodad e pi n’en kar filed. Ri yad ba fel’ u wan’ Jehovah maku arrogodad.​—Prov. 16:31.

11-12. Uw rogon ni ke pi’ e piin fel’ yangaren u lan e ulung rom e athamgil nga lanin’um?

¹¹ Kum lemnag e piin fel’ yangaren u lan e ulung. Boor e magawon ni yad be mada’nag ni bochan e yad be ilal u lan e re fayleng ney ni be gagiyegnag Satan ni Moonyan’ ma ke garer e llowan’ rok riy. (1 John 5:19) Yugu aram rogon ma nap’an ni gad ra guy e piin fel’ yangaren ni yad be pi’ e fulweg u lan e ulung, ma yad be un ko machib, maku darur rusgad ni ngar pared ni yad ba mudugil ni fan ko pi n’en ke mich u wan’rad, mab gel e athamgil ni yad ma pi’ nga lanin’dad. Arrogon, gimed e piin fel’ yangaren e bay e maruwel nib ga’ fan nib milfan ngomed u lan e ulung!​—Ps. 8:2.

¹² Machane, bay boch e walag nib mo’maw’ ni nge mich u wan’rad nib ga’ farad u lan e ulung. Ere mang e rayog ni nge ayuwegdad ni gad gubin ni  ngad nanged nib ga’ fadad u lan e ulung? Ngad guyed.

13-14. Mang fan nrayog ni nge lemnag boch e walag ndariy farad u lan e ulung?

¹³ Mu tay fanam i yan ko bin migid e n’en nrayog ni ngad filed ko fare fanathin rok Paul. I weliy murung’agen reb e magawon ni ma mada’nag boor e girdi’ e ngiyal’ ney ni aram e ba mo’maw’ rogon ni nge mich u wan’rad nib ga’ farad u lan e ulung. I yoloy Paul ni gaar: “Faanra nge gaar reb e rifrif u ey, ‘Gathi gag bayang u dowey, ni bochan e gathi gag reb i rifrifen paay,’ ma gathi aram e ra tal ndab ki mang bang ko fare dowef. Ma faanra gaar baraba’ i teliy, ‘Gathi gag bangi dowey, ni bochan e gathi gag baraba’ i lan owchey,’ ma gathi aram e ra tal ndab ki mang bang ko fare dowef.” (1 Kor. 12:15, 16) Mang e be fil Paul ngodad u roy?

¹⁴ Faanra um taareb rogonnagem ngak yugu boch e girdi’ u lan e ulung, ma aram e rayog ni ngam tabab ni ngam lemnag ndariy fam u lan e ulung. Sana bay boch e walag u lan e ulung ni yad manang rogon ni ngar filed ban’en ko girdi’, ara yad ba salap i yarmiy ban’en, ara yad manang rogon ni ngaur fal’eged laniyan’ e pi walag ma yad be pi’ e athamgil ngorad. Sana ga be lemnag ndabiyog ni nge taareb rogom ko pi walag ney. Re n’ey e be dag ni gur be’ ni gab sobut’an’ ma ga manang e gin ngam mus riy. (Fil. 2:3) Machane, ngam kol ayuw. Ya faanra um par ni ga be taareb rogonnagem ngak yugu boch e girdi’ ni boor ban’en ni yad ba salap riy, ma ra munmun me mulan’um. Ku rayog ni ngam lemnag ndariy fam u lan e ulung ni bod rogon ni yog Paul. Ere mang e rayog ni nge ayuwegem ni ngam siyeg e tiney e lem?

15. Mang e ba t’uf ni ngad nanged u murung’agen e pi tow’ath ni bay rodad nrogon ni bay ko 1 Korinth 12:4-11?

¹⁵ Am lemnag e re n’ey: Nap’an e bin som’on e chibog me pi’ Jehovah boch e tow’ath ngak boch e Kristiano u daken e maang’ang, machane gathi gubin e pi Kristiano nem ni taareb rogon e tow’ath ni yag ngorad. (Mu beeg e 1 Korinth 12:4-11.) Ba thilthil e tow’ath nge salap ni pi’ Jehovah ngorad, machane yad gubin nib ga’ farad. Ngiyal’ ney e dakir yag boch e tow’ath ngodad u daken gelngin Got nib thothup. Machane, ka bay rogon e re thin ney ngodad. Sana rayog nib thilthil e salap rodad, machane gad gubin nib ga’ fadad u wan’ Jehovah.

16. Mang fonow ni pi’ apostal Paul e ba t’uf ni ngad folgad riy?

 ¹⁶ Ba t’uf ni ngad folgad ko fonow ni pi’ apostal Paul ko bin ngaud taareb rogonnaged gadad ngak yugu boch e Kristiano. I gaar: “Ra be’ ma nge mang ir e changar ngak nge fal’eg i yaliy e ngongol rok ara pangin. Ma faanra ba fel’ e ngongol rok, me ere rayog ni nge felfelan’ ko ngongol ni ke rin’, me siy i puluwnag e ngongol rok ko ngongol ni ke rin’ yugu be’.”​—Gal. 6:4.

17. Mang angin nra yib ngodad ni faan gad ra fol ko fonow ni pi’ Paul?

¹⁷ Faan gad ra fol ko re fonow ney nni thagthagnag nga laniyan’ Paul ni nge pi’ me bagadad me fal’eg i yaliy rogon e ngongol rok, ma aram e sana rayog ni ngad guyed ni bay boch e tow’ath nge salap rodad ndariy rok yugu boch e girdi’. Bod nsana gathi rib salap reb e piilal u rogon ni nga i pi’ e welthin u nap’an e muulung, machane sana rayog nrib salap u rogon ni nge ayuweg e girdi’ ni ngar manged boch i gachalpen Jesus. Fa reb e sana gathi rib fel’ rogon ni ma yarmiy boch ban’en ni bod rogon boch e piilal ko ulung rok, machane sana rayog ni goo yimanang ni ir reb e piilal nrib sumunguy ma ma dag e t’ufeg ma der ma magagawon e pi walag ni pumoon nge ppin ni ngar nonad ngak. Fa reb e goo yimanang ni ir be’ nib ta pining e girdi’ nga tabinaw rok ara ba gol ko girdi’. (Heb. 13:2, 16) Faan gad ra guy e pi tow’ath ni bay rodad, ma aram e rayog ni nge fel’ u wan’dad e tin be yag ni ngad rin’ed ni fan ko ulung rodad. Maku reb e, ra mo’maw’ rogon ni nge awan’dad ngak e pi walagdad ni bay boch e tow’ath rorad nib thil ko tin bay rodad.

18. Uw rogon ni ngad mon’ognaged e pi salap rodad?

¹⁸ Demtrug e maruwel nib milfan ngodad u lan e ulung, ma gad gubin nsusun e ngad adaged ni ngad mon’oggad ko pigpig ni gad be tay mu kud mon’ognaged e pi salap rodad. Bay boch e skul ni ke ngongliy Jehovah rogon u daken e ulung rok nrayog ni nge ayuwegdad ni ngad mon’oggad. Bod nu nap’an e muulung ni gad ma tay u lan e wik ma yima pi’ boch e fonow ngodad u rogon ni nge mon’og rogon e machib ni gad be tay. Ga be guy rogon ni ngam fol ko pi fonow ni yibe pi’ u nap’an e re muulung ney, fa?

19. Uw rogon nrayog ni ngam un ko fare skul ni ka nog e School for Kingdom Evangelizers ngay?

¹⁹ Ku reb e kanawo’ ni yibe skulnagdad riy e u daken fare skul ni ka nog e School for Kingdom Evangelizers ngay. Pi walag ni pumoon nge ppin ni yad ma un ko machib u polo’ e tayim rorad ni bay e duw rorad u thilin e 23 nge 65 e rayog ni ngar uned ko re skul ney. Sana ga be lemnag ndabi chugur ni nge yag nim un ko biney e skul. Machane, mu lemnag boch i fan ni ga baadag ni ngam un ko re skul ney ko bin ni ngam lemnag boch i fan ndabiyog ni ngam un ngay. Ngemu’ mag rin’ e pi n’en nib t’uf ni ngam rin’ ya nge yag ni bung rogom ni ngam un ko re skul ney. U daken e ayuw rok Jehovah nge maruwel nib gel ni ga ra tay, ma rayog ni ngam rin’ ban’en nim lemnag ndabiyog ni ngam rin’ ko som’on.

20. Mang e rayog ni ngad filed ko Roma 12:6-8?

²⁰ Bin dalip e n’en nrayog ni ngad filed ko fare fanathin rok Paul e bay ko Roma 12:6-8. (Mu beeg.) Ki tamilangnag Paul bayay ko re thin ney ni pi walag u lan e ulung e ba thilthil e tow’ath ni bay rorad. Machane ki tamilangnag nsusun e nge bagadad me fanay e tow’ath rok ni nge pi’ e athamgil nga laniyan’ e pi walag me gelnag e ulung.

21-22. Mang e rayog ni ngad filed rok Robert nge Felice?

²¹ Am lemnag e n’en ni buch rok reb e walag ni ka nog Robert * ngak. Tomuren ni ke pigpig u reb e nam ni gathi nam rok, ma aram mi nog ngak ni nge sul ko nam rok ni nge pigpig u Bethel. Yugu aram rogon nnog ngak ni gathi kan thilyeg e gin be pigpig riy ni bochan e ke rin’ ban’en nib kireb, machane i yog ni gaar: “Boor e pul ni ug par nib kireban’ug ni bochan e gu be lemnag nde fel’ rogon e maruwel ni ug rin’ ko gin nni pieg ngay ko  som’on. Immoy yu ngiyal’ nug lemnag ni nggu tal ko pigpig u Bethel.” Ere mang e ayuweg ni ngki felfelan’ bayay? Immoy reb e piilal ni puguran ngak ni ke skulnagdad Jehovah ko maruwel ni ud rin’ed ko som’on ni bochan e nge yag nni fanaydad nib fel’ rogon ko maruwel ni gad be rin’ e chiney. Ere nang Robert nib t’uf ni nge tal ndab ki lemnag e tin i rin’ kafram ya nge tiyan’ ko tin be yag ni nge rin’ e chiney.

²² Ku aray rogon e n’en ni buch rok reb e walag ni pumoon ni ka nog Felice Episcopo ngak. Nap’an e duw ni 1956 mar mu’nagew e ppin rok fare skul u Gilead, ma aram min tayrow ni ngaur lekagew boch e ulung u Bolivia. Nap’an e duw ni 1964 ma aram mar fakayew bochi tir. I gaar Felice: “Ba mo’maw’ ngomow ni nggu chuwgow ko gin nni pi’mow ngay ko som’on nri gamow baadag. Bin riyul’ riy e, sogonap’an reb e duw nug par ni ke mulan’ug ni bochan e n’en ke buch romow. Machane bochan e ayuw rok Jehovah, ma aram mug thilyeg rogon e lem rog mug tiyan’ug ko bin nib beech e maruwel ni ke milfan ngog ni gag reb e gallabthir.” Ga ma lem ni bod rogon Robert ara Felice, fa? Ma mulan’um ni bochan e dakumur rin’ boch e maruwel ni um rin’ kafram ni fan ko pigpig ni ga be tay, fa? Faanra aray rogon, ma aram e rayog ni ngam felfelan’ ni faan ga ra thilyeg e lem rom ngam tiyan’um ko tin rayog ni ngam rin’ e chiney ni fan ngak Jehovah nge pi walagem. Mu yoornag e tin ga be rin’, mag fanay e pi tow’ath ni bay rom nge salap rom ni ngam ayuweg yugu boch e girdi’ ngay. Faan ga ra rin’ ni aray rogon ma ga ra felfelan’ u rogon ni ga be ayuweg e ulung ni nge par nib gel.

23. Mang e susun ni ngad ted e tayim ni ngad rin’ed, ma mang e gad ra weliy ko bin migid e article?

²³ Gad gubin nib ga’ fadad u wan’ Jehovah. Baadag ni ngad manged bang ko tabinaw rok. Faan gad ra tay e tayim ni ngad fal’eged i lemnag rogon nrayog ni ngad gelnaged pi walagdad ma gad guy rogon ni ngad rin’ed e re n’ey, ma aram e rayog ni nge mo’maw’ ni ngad lemnaged ndariy fadad u lan e ulung! Machane, uw rogon e lem rodad ngak yugu boch e girdi’ u lan e ulung? Uw rogon ni ngad daged ni yad ba t’uf rodad ma gad be tay farad? Ireray reb e ban’en nib ga’ fan ni gad ra weliy ko bin migid e article.