1. Mang fan ni sunmiy Jehovah urngin ban’en nib fos?

IMMOY ba ngiyal’ ni yigoo Jehovah ni immoy. Machane da i par nib kireban’, ya de t’uf be’ ni nge yibnag e felfelan’ ngak. Yugu aram rogon, ma baadag ni nge felfelan’ e girdi’ ko yafos rorad. Bochan e t’ufeg rok Jehovah, ma aram me tabab ni nge sunmiy urngin ban’en.​—Ps. 36:9; 1 John 4:19.

2. Uw rogon e lem rok Jesus nge pi engel u nap’an ni sunmiy Jehovah e tin ka bay ban’en?

² Som’on e sunmiy Jehovah be’ ni ngar maruwelgow u taabang. Ma aram me fanay e cha’nem ni aram Fak ni nge sunmiy “urngin ban’en” nib muun ngay urngin e pi engel. (Kol. 1:16) Rib felfelan’ Jesus ngay ni ngar maruwelgow e Chitamangin u taabang. (Prov. 8:30) Ku arrogon e pi engel ni kub gel e felfelan’ ni ur ted. Ur moyed u nap’an ni sunmiy Jehovah nge Jesus ni ir e En nib Salap i Maruweliy Ban’en e tharmiy nge fayleng. Ere mang e rin’ e pi engel? Ur “tolulgad u fithik’ e felfelan’” u nap’an ni sunmiy Jehovah e fayleng, maku aram rogon e n’en rin’ed u nap’an ni sunmiy Jehovah e tin ka bay ban’en nib muun e girdi’ ngay. (Job 38:7; Prov. 8:31) Urngin ban’en ni sunmiy Jehovah nra reb ma be m’ug riy rogon e t’ufeg nge gonop rok.​—Ps. 104:24; Rom. 1:20.

3. Mang e rayog ni nge buch ni bochan fare biyul ni maligach ni pi’ Jesus nrogon ni bay ko 1 Korinth 15:21, 22?

³ Baadag Jehovah ni nge par e girdi’ ndariy n’umngin nap’an u lan fare fayleng ni ke sunmiy nrib fel’ yaan. Machane nap’an ni denen Adam nge Efa nib togopuluw ngak Jehovah, ma aram me mul e yafos ni manemus u pa’row. Munmun mar m’ow maku arrogon pi fakrow ni ki af e yam’ ngorad. (Rom. 5:12) Ere mang e rin’ Jehovah? Ka chingiyal’ nem me weliy rogon nra ayuweg e girdi’. (Gen. 3:15) Ra pi’ Jehovah Fak ni aram Jesus ni nge mang biyul ni maligach ya nge yag ni chuweg pi fak Adam nge Efa u fithik’ e denen nge yam’. Aram  e ngiyal’ nrayog ni nge pi’ e yafos ni manemus ngak e en nra dugliy ni nge pigpig ngak.​—John 3:16; Rom. 6:23; mu beeg e 1 Korinth 15:21, 22.

4. Mang deer e gad ra weliy e fulweg riy?

⁴ Boor e deer nrayog ni ngad fithed u murung’agen e n’en ke micheg Got ni aram e ra fos e piin kar m’ad. Bod ni, uw rogon nsana yira faseg e girdi’ ko yam’? Ka gad ra poy e piin nib t’uf rodad ni yira fasegrad ko yam’, fa? Mang boch e kanawo’ ni gad ra felfelan’ riy ko fos ko yam’ nra tay e girdi’ e ngiyal’ nem? Ma mang e be fil e re fos ko yam’ ney ngodad u murung’agen e t’ufeg, nge gonop, nge gum’an’ rok Jehovah? Ngad weliyed e fulweg ko pi deer ney.

5. Mang fan nrayog ni ngad lemnaged ndab ni faseg urngin e girdi’ ni taab yay?

⁵ Nap’an nra faseg Jehovah bokum milyon e girdi’ u daken Fak, ma gad manang ndabi fasegrad ni yad gubin ni taab yay. Mang fan? Ya faanra yigi yoor e girdi’ u fayleng nib tomgin ma sana ra wagey gubin ban’en u fayleng. Ma gad manang ni Jehovah e gubin ban’en ni ma rin’ nib yaram. Manang nib t’uf ni nge yaram urngin ban’en ya nge yag ni par e girdi’ u fithik’ e gapas. (1 Kor. 14:33) Ba gonop Jehovah Got ma ka i gum’an’nag ir u nap’an ni yow be maruwel Jesus u taabang ni ngar fal’egew rogon e fayleng ni buchuuw ma buchuuw ya nge yag ni par e girdi’ riy. Ere ku ireray e gal fel’ngin nra dag Jesus u nap’an e Gagiyeg Nra Tay u Lan Fare Biyu’ i Duw u nap’an ni yad be maruwel e piin yad ra magey u tomuren e Armageddon u taabang ni ngar fal’eged rogon e re fayleng ney u m’on ni ngan faseg e piin kar m’ad.

6. Mini’ e piin yad ba muun ko girdi’ nra fasegrad Jehovah nrogon ni bay ko Acts 24:15?

⁶ Bin th’abi ga’ fan riy e, piin yad ra magey u tomuren e Armageddon e yad ra fil murung’agen Gil’ilungun Got nge pi motochiyel rok Jehovah ngak e piin yira fasegrad. Mang fan? Ya yooren e piin yira fasegrad e yad ba muun ko “tin nde  mat’aw” e girdi’. (Mu beeg e Acts 24:15, NW. *) Pi cha’ney e ba t’uf ni ngar thilyeged boor ban’en u rarogorad ya nge yag ni yib angin fare biyul rok Kristus ngorad. Am lemnag gelngin e maruwel ni yira tay ni ngan fil e tin riyul’ u murung’agen Jehovah ngak bokum milyon e girdi’ ndar nanged Got. Ere gur, ra bagayad e pi cha’ney ma bay be’ ni ir e nge skulnag ni bod rogon ni gad ma fil e Bible ko girdi’ e ngiyal’ ney, fa? Gur, yira tayrad nga boch e ulung min fil ngorad rogon ni ngar skulnaged e piin ku yira fasegrad ko yam’ boch nga tomuren, fa? Thingar da songad nge taw ko ngiyal’ nem ma gad guy e n’en nra buch. Machane gad manang nnap’an nra taw nga tungun fare Biyu’ i Duw Nra Gagiyeg Kristus riy, ma ‘girdi’ ko pi nam e kari tamilangan’rad u murung’agen’ Jehovah. (Isa. 11:9) Boor e maruwel ni gad ra rin’ u lan e re biyu’ i duw nem nra yibnag e felfelan’ ngodad!

7. Mang fan nra i lemnag e girdi’ rok Got rogon laniyan’ e piin yira fasegrad u nap’an ni yad be skulnagrad?

⁷ U lan fare Biyu’ i Duw Nra Gagiyeg Kristus riy, ma urngin e girdi’ rok Jehovah nib t’uf ni ngar ululgad i thilyeg boch ban’en u rarogorad ya nge yag nra fel’gad u wan’. Ere yad gubin nra ur lemnaged rogon laniyan’ e piin yira fasegrad u nap’an ni yad be ayuwegrad ni ngar gelgad ko pi n’en ma k’aringrad ni ngar denengad mi yad fol ko pi motochiyel rok Jehovah. (1 Pet. 3:8) Piin yira fasegrad ko yam’ e yad ra guy ni girdi’ rok Jehovah e ba sobut’an’rad, maku yad be thilyeg boch ban’en u rogon e ‘ngongol’ rorad ya nge m’agan’ Jehovah ngay, ma aram e yad ra adag ni ngar uned ngorad ko pigpig ni yad be tay ngak Jehovah.​—Fil. 2:12.

8. Mang fan nrayog ni ngad lemnaged ni piin yad ra mada’ e piin yira fasegrad ko yam’ e rayog ni ngar poyed e piin nib t’uf rorad?

⁸ Boor fan nrayog ni ngad lemnaged ni piin yad ra mada’ e piin yira fasegrad ko yam’ e rayog ni ngar poyed e piin nib t’uf rorad. Bod ni bochan rogon ni i faseg Jehovah e girdi’ kakrom ma bod nra faseg e girdi’ e ngiyal’ nem ni ka rogon yaarad, nge rogon ni yad ma non, nge rogon ni yad ma lem u m’on ni ngar m’ad. Dab mu pagtalin ni ke taarebrogonnag Jesus be’ ni ke yim’ ngak be’ ni ke mol, me taarebrogonnag e fos ko yam’ ngak be’ ni be mol ni ke od. (Matt. 9:18, 24; John 11:11-13) Nap’an nra od be’ ma ka rogon yaan nge laman, ma dawori pagtalin e pi n’en ni immoy u laniyan’ u m’on ni nge mol. Am lemnag e n’en ni buch rok Lazarus. Ke gaman aningeg e rran ni ke yim’, ere ke tabab ni nge kireb. Machane nap’an ni faseg Jesus Lazarus ko yam’ ma fa gal ppin ni walagen e ka chingiyal’ nem mar poyew, maku arrogon Lazarus ni ka manangrow.​—John 11:38-44; 12:1, 2.

9. Mang fan ni piin yira fasegrad ko yam’ e dabin fasegrad ni ke flont lanin’rad nge dowrad?

⁹ Ke micheg Jehovah ndariy be’ nra par u tan e gagiyeg rok Kristus ni bay ki yog “nib m’ar.” (Isa. 33:24; Rom. 6:7) Ere piin yira fasegrad ko yam’ e yira pi’ reb e dowef ngorad nib manigil. Machane dab ra flontgad ni ka chingiyal’ nem. Ya faanra kar flontgad, ma rayog ni nge mo’maw’ ngak chon e tabinaw rorad nge pi fager rorad ni ngar poyed yad. Bod ni urngin e girdi’ ni yad ra flont ni buchuuw ma buchuuw u lan fare Biyu’ i Duw Nra Gagiyeg Kristus riy. Fin u tomuren fare biyu’ i duw e aram e ngiyal’ nra sulweg Jesus Gil’ilungun Got ngak e Chitamangin. Ra taw ko ngiyal’ nem ma ke lebguy Gil’ilungun Got urngin ban’en ni baadag Jehovah ni nge rin’ nib muun ngay ni nge ayuweg e girdi’ ngkur flontgad bayay.​—1 Kor. 15:24-28; Rev. 20:1-3.

10. Ra uw rogon e lem rom u nap’an yira faseg e piin kar m’ad?

¹⁰ Am susunnag e ngiyal’ nem ni gimed ra mada’ bayay e piin nib t’uf rom. Gur, ga ra minmin fa ga ra yor ni bochan gelngin e felfelan’ ni ga ra tay?  Ma gur, ra um tang ni ga be pining e sorok ngak Jehovah ni bochan gelngin e felfelan’ ni kam tay, fa? Rayog ni nge pagan’dad nra gel e t’ufeg rodad ngak a Chitamangidad ni ma lemnagdad nge Fak ni gad ba t’uf rok ni bochan e yow e kar fasegew e piin kar m’ad.

11. Mang e ra buch rok e piin yad ra fol rok Got nrogon nib puluw ko thin ni yog Jesus ni bay ko John 5:28, 29?

¹¹ Am lemnag gelngin e felfelan’ nra tay e piin yira fasegrad ko yam’ u nap’an ni yad ra thilyeg boch ban’en u rarogorad ya nge yag nra folgad rok Got. Piin yad ra rin’ e re n’ey e yira pagrad ni ngar pared u Paradis ndariy n’umngin nap’an. Machane piin dubrad ni ngar thilyeged boch ban’en u rarogorad e dabi pagrad Jehovah ni ngar pared u Paradis ngar magawonnaged e gapas u rom.​—Isa. 65:20; mu beeg e John 5:28, 29.

12. Uw rogon nra tow’athnag Jehovah urngin e girdi’ u fayleng?

¹² Nap’an nra gagiyeg Gil’ilungun Got ma urngin e girdi’ rok Got ni yad ra guy nib riyul’ fapi thin ni bay ko Proverbs 10:22 (BT) ni be gaar: “I Somol e ke fal’eg waatham kam flaab. Math’ kenyil’ e dabi yin’ daken e flaab rom.” U daken e ayuw nra pi’ gelngin Jehovah nib thothup, ma aram e rayog ko girdi’ rok Got ni ngar boded Kristus ni buchuuw ma buchuuw maku yad be flont i yan. (John 13:15-17; Efe. 4:23, 24) Maku reb e, gubin e rran ni be fel’ fithik’ i dowrad i yan ma yad be mang boch e girdi’ nib manigil. Rib gel e felfelan’ ni yira tay e ngiyal’ nem! (Job 33:25) Machane faanra um fal’eg i lemnag murung’agen e fos ko yam’ e ngiyal’ ney, ma uw rogon nra ayuwegem?

13. Mang e be dag e Psalm 139:1-4 u murung’agen rogon ni manangdad Jehovah nib fel’ rogon? Uw rogon ni be micheg e fos ko yam’ e re n’ey?

¹³ Kad weliyed boch kafram nnap’an nra faseg Jehovah e girdi’, ma ra sulweg e pi n’en immoy u lanin’rad nge rarogorad. Am lemnag e n’en be yip’ fan e re n’ey. Gelngin nrib gab t’uf rok Jehovah ma ma tiyan’ maku der pagtalin e pi n’en ga ma lemnag, nge pi n’en ga ma yog, nge pi n’en ga ma rin’. Ere faanra nge fasegem ko yam’ ma rib mom ni nge sulweg e pi n’en immoy u lanin’um, nge lem rom, nge rarogom. Manang David ni Pilung nri manangdad Jehovah nib fel’ rogon ni be’ nge be’. (Mu beeg e Psalm 139:1-4.) Nap’an ni gad ra nang rogon feni rib manangdad Jehovah nib fel’ rogon, ma uw rogon e re n’ey u wan’dad?

14. Susun nge uw rogon e lem rodad u nap’an ni gad ra fal’eg i lemnag rogon feni ri manangdad Jehovah?

¹⁴ Nap’an ni gad ra fal’eg i lemnag rogon feni ri manangdad Jehovah, ma susun e dabi magafan’dad. Mang fan? Dab mu pagtalin nri ma lemnagdad Jehovah. Ba ga’ fadad u wan’ ni be’ nge be’. Der ma pagtalin urngin ban’en ni ke buch u lan e yafos rodad ni ke rin’ ban’en nga rarogodad. Re n’ey e rayog ni nge fal’eg lanin’dad! Ere dariy ba ngiyal’ ni ngad lemnaged ni yigoo gadad. Gubin ngiyal’ ni bay Jehovah rodad ma baadag ni nge ayuwegdad.​—2 Kron. 16:9.

15. Uw rogon ni be micheg e fos ko yam’ nib gonop Jehovah?

¹⁵ Faanra be rus e girdi’ ni ngar m’ad, ma rayog ko pi toogor rorad ni ngar towasariyed yad ni ngar rin’ed boch ban’en ndarur rin’ed, ni aram e nga rogned ngorad ni faanra dab ra rin’ed e pi n’em ma yira thang e fan rorad. Girdi’ ni ma gagiyegnagrad Satan e yad ma fanay e re n’ey ni ngar towasariyed e girdi’ ni ngar yognaged e pi fager rorad ara ngar rin’ed ban’en ni yad manang nde fel’ ni ngar rin’ed. Machane gadad e dabiyog ni ngar towasariyed gadad ni ngad rin’ed e re n’ey. Ya gad manang ni faanra thang e pi toogor rodad e fan rodad, ma ra fasegdad Jehovah. (Rev. 2:10) Rib mich u wan’dad ndariy ban’en ni yad ra rin’ nrayog ni nge talegdad ko pigpig rodad ngak Jehovah. (Rom. 8:35-39) Ke micheg Jehovah nrib gonop u daken e athap ko fos ko yam’ ni ke pi’ ngodad! Bochan e re athap ney, ma darud rusgad ni faanra yog e piin yad ba mang ngak Satan ni yad ra thang e fan rodad ni faanra dab da rin’ed e n’en  yad be yog. Maku reb e, be ayuwegdad ni ngad gelnaged lanin’dad ndab da rusgad ni ngad pared ni gad ba yul’yul’ ngak Jehovah.

16. Mang deer e ba t’uf ni ngam fithem riy? Uw rogon nra ayuwegem e fulweg ko gal deer ney ni ngam nang gelngin ni be pagan’um ngak Jehovah?

¹⁶ Faanra yog e pi toogor rok Jehovah ngom ni ngar thanged e fan rom, ma gur, ra m’agan’um ngay ni ngam pag fan e yafos rom ngak Jehovah, fa? Uw rogon nrayog ni ngam nang e re n’ey? Reb e kanawo’ e aram e ngam fithem ni nge lungum, ‘Be m’ug ko pi n’en nug ma dugliy ni gubin e rran ni gathi rib ga’ fan ni be pagan’ug ngak Jehovah, fa?’ (Luke 16:10) Reb e ban’en ni ku rayog ni ngam fithem riy e, ‘Gur, be m’ug u rogon nug ma fanay e tayim nge salpiy rog ni be pagan’ug ko n’en ke micheg Jehovah ni aram e ra pi’ e tin nib t’uf rog ni faan gu ra mon’eg Gil’ilungun u lan e yafos rog, fa?’ (Matt. 6:31-33) Faanra fulweg rom ko gal deer ney e arrogon, ma aram e mich riy ni be pagan’um ngak Jehovah, ma kam fal’eg rogom ni fan ko pi skeng ni ga ra mada’nag boch nga m’on.​—Prov. 3:5, 6.

17. (a) Uw rogon ni be m’ug e gum’an’ rok Jehovah u daken e fos ko yam’? (b) Uw rogon nrayog ni ngad daged nib ga’ fan u wan’dad rogon e gum’an’ ni be tay Jehovah?

¹⁷ Ke mu’ Jehovah i dugliy e ngiyal’ ni nge thang e re fayleng nib kireb ney. (Matt. 24:36) Ra gum’an’nag ir ma dabi rin’ ban’en u m’on ko ngiyal’ ni ke dugliy. Riyul’ nri baadag ni nge faseg e piin kar m’ad, machane be gum’an’nag ir. (Job 14:14, 15) Be sonnag e ngiyal’ nib puluw ni nge taw ngay mfini faseg e piin kar m’ad. (John 5:28) Boor fan ni nge ga’ fan u wan’dad e gum’an’ ni be tay Jehovah. Aygum lemnag: Bochan e gum’an’ ni be tay Jehovah ma boor e girdi’ ni ku gad ba muun ngay ni ke yag ni ngar pied “keru’rad ko urngin e denen ni yad be rin’.” (2 Pet. 3:9) Baadag Jehovah ni nge yag e yafos ni manemus ngak urngin e girdi’ nrayog. Ere ngad daged nib ga’ fan u wan’dad e gum’an’ ni be tay. Ni uw rogon? Aram e ngad rin’ed urngin e tin rayog rodad ni ngad gayed e “piin nib munguy lanin’rad ma kub m’agan’rad ngay ni ngar filed e tin riyul’ nra yognag e yafos ndariy n’umngin nap’an ko girdi’,” ma gad ayuwegrad ni nge t’uf Jehovah rorad mar pigpiggad ngak. (Acts 13:48, NW) Aray rogon nra yib angin ngorad e gum’an’ ni be tay Jehovah ni bod rogon ni ke yib angin ngodad.

18. Mang fan nsusun e ngaud gum’an’naged gadad u puluwon yugu boch e girdi’?

¹⁸ Ra gum’an’nag Jehovah ir nge son nge mada’ nga tungun fare biyu’ i duw mfini lemnag ni ngaud rin’ed urngin ban’en nrib fel’ rogon ni bochan e kad flontgad. Machane chiney ndawori taw ko ngiyal’ nem e ba m’agan’ Jehovah ngay ni nga i n’ag fan e denen rodad. Ere susun e ngad folwokgad rok ni aram e ngaud yaliyed fel’ngin e girdi’  mu ud gum’an’naged gadad u puluwrad. Mu lemnag e n’en ni buch rok reb e walag nib pin ni tabab e pumoon rok ni nga i magafan’ nib pag rogon, ma aram me tal ndaki un ko muulung. I yog ni gaar: “Rib mo’maw’ ngog e re n’ey. Ri thil rogon e par romow nib tomgin ma dakiyog ni nggu rin’ew e pi n’en ni gamow baadag ni nggu rin’ew.” Yugu aram rogon me ulul e re walag ney ni nga i t’ufeg figirngin ma be gum’an’ u puluwon. I taga’ ngak Jehovah ma de mulan’. I folwok rok Jehovah ni aram e i par ni gathi yigoo magawon rok e be lemnag, maku be sap nga fel’ngin figirngin. I gaar: “Bay boch i fel’ngin figirngig nib manigil, ma be rin’ e tin rayog rok ni nge gel ko biney e magawon ni bay rok ni buchuuw ma buchuuw.” Ere rib ga’ fan ni ngaud gum’an’naged gadad u puluwon chon e tabinaw rodad, ara pi walag u lan e ulung ni yad be athamgil ni ngar gelgad ko pi magawon ni yad be mada’nag nib mo’maw’!

19. Mang e susun ni ngad dugliyed u wan’dad ni ngad rin’ed?

¹⁹ I felfelan’ Jesus nge pi engel u nap’an nni sunmiy e fayleng. Machane kum lemnag gelngin e felfelan’ ni yad ra tay u nap’an ni yad ra guy e fayleng ni ke sug ko girdi’ nib flont nib t’uf Jehovah rorad ma yad be pigpig ngak. Kum lemnag rogon e felfelan’ nra tay e piin yad ra un ngak Kristus ko gagiyeg u tharmiy u nap’an ni yad ra guy ni be yib angin ko girdi’ e maruwel ni yad be tay. (Rev. 4:4, 9-11; 5:9, 10) Kum lemnag rogon e par e ngiyal’ nem ndab ku un yor ni bochan e amith, nge m’ar, nge kireban’, nge yam’, ya urngin e girdi’ ni yad ra par ni yad ba felfelan’. (Rev. 21:4) Machane chiney ndawori taw ko ngiyal’ nem e ngam dugliy u wan’um ni ngam folwok rok e Chitamam ni gad ba t’uf rok, mab gonop, ma kub gum’an’. Faan ga ra rin’ ni aray rogon, ma demtrug e re miti skeng ni ga ra mada’nag ma ga ra par ni gab felfelan’. (Jas. 1:2-4) Ri gad be pining e magar ngak Jehovah ko n’en ke micheg ni aram e “bay ni faseg urngin e girdi’ ko yam’”!​—Acts 24:15, NW.