1. Mang e yog David u murung’agen e sobut’an’ ni ma dag Jehovah?

RAYOG ni nga dogned nib sobut’an’ Jehovah, fa? Arrogon. Immoy bayay ni gaar David: “Somol, mu yoror rog ma ga be ayuweg e pogofan rog; ayuw ni kam tay ngog [“sobut’an’ rom,” NW] e ke gilnag buguwag.” (2 Sam. 22:36) Sana rayog ni be lemnag David e rofen ni yib Samuel ni profet nga tafen e chitamangin ni nge mel’eg e en nge mang e bin migid e pilung u Israel. David e ir e th’abi bitir u fithik’ fa meruk i pagel ni walagen, machane ir e en ni mel’eg Jehovah ni nge yan nga lon Saul ni Pilung.​—1 Sam. 16:1, 10-13.

2. Mang e gad ra weliy ko re article ney?

² Ba mudugil nib puluw u wan’ David fapi thin ni ki yog reb e psalmist u murung’agen Jehovah ni be gaar: “Ma lumel nga but’ nge guy e pi tharmiy nge fayleng. Me suwonnag e piin gafgow . . . me tayrad ngar manged fager ko piin pagel ni fak e pilung.” (Ps. 113:6-8, BT) U lan e re article ney e gad ra weliy riy boch ban’en nib ga’ fan nrayog ni ngad filed u murung’agen e sobut’an’, ni aram e som’on e ngad weliyed rogon ni ke dag Jehovah e re fel’ngin ney. Ngemu’ mu kud filed boch ban’en u murung’agen e sobut’an’ ko n’en ni rin’ Saul ni Pilung, nge Daniel ni profet, nge Jesus.

3. Uw rogon e ngongol rok Jehovah ngodad, ma mang e be micheg e re n’ey?

³ Ke dag Jehovah nib sobut’an’ u rogon e ngongol ni ma dag ngak e pi tapigpig rok ndawor ra flontgad. Gathi kemus nib fel’ e liyor rodad u wan’ ya kki taydad ni gadad boch e fager rok. (Ps. 25:14) Machane, ke pi’ Jehovah Fak ni nge mang maligach ni fan ko denen rodad ni bochan e nge yag ni mab e kanawo’ ngodad ni ngad manged fager rok. Ere rriyul’ nrib ga’ e runguy ni ke dag Jehovah ngodad!

4. Mang e ke pi’ Jehovah ngodad, ma mang fan?

⁴ Kum lemnag yugu reb e kanawo’ ni ke dag Jehovah e sobut’an’ riy. Bochan ni Ir e Ke Sunmiydad, ma rayog ni nge taydad ndabiyog ni ngad dugliyed e n’en ngad rin’ed ko yafos rodad. Machane,  de rin’ ni aram rogon. I sunmiydad ni gad bod yaan me pi’ e puf rogon ngodad. Yugu aram rogon ni gadad e girdi’ ni gad ba sobut’, machane baadag ni ngad pigpiggad ngak u polo’ i gum’ircha’dad ni bochan e ba t’uf rodad ma gad manang nra yib angin ngodad ni faanra ud folgad rok. (Deut. 10:12; Isa. 48:17, 18) Ere ri gad be pining e magar nga rogon feni sobut’an’ Jehovah!

5. Uw rogon ni ma fil Jehovah ngodad rogon ni nge sobut’an’dad? (Mu guy e sasing ni bay u wuru’ e re ke babyor ney.)

⁵ Ma fil Jehovah ngodad rogon ni ngaud daged e sobut’an’ u rogon e ngongol rok ngodad. Jehovah e ir e En th’abi gonop u ga’ngin e palpalth’ib. Yugu aram rogon, mab m’agan’ ngay ni nge pag yugu boch e girdi’ ni nga rogned lanin’rad u boch ban’en. Bod ni pag Jehovah Fak ni nge ayuweg u nap’an ni sunmiy urngin ban’en. (Prov. 8:27-30; Kol. 1:15, 16) Maku reb e, yugu aram rogon ni gubin ma rayog rok machane ku ma pag fan boch e maruwel ngak yugu boch e girdi’ ni ngar rin’ed. Bod ni ke mel’eg Jesus ni nge mang Pilung u Gil’ilungun, maku ra pi’ mat’awun 144,000 e girdi’ ni ngar uned ngak Jesus ko gagiyeg. (Luke 12:32) Machane, ke skulnag Jehovah Jesus ni nge mang Pilung nge Prist Nth’abi Tolang. (Heb. 5:8, 9) Ki skulnag e piin yad ra un ngak Jesus ko gagiyeg, machane gathi ke pi’ e re maruwel ney ngorad maku bay ni be gagiyegnag rogon ni yad be rin’ e re maruwel nem. Ya ba pagan’ ngay ni yad ra rin’ e n’en nib m’agan’ ngay.​—Rev. 5:10.

6-7. Mang e rayog ni ngad filed rok e Chitamangidad ni bay u tharmiy u rogon ni ngad pied mat’awun boch e girdi’ ni ngar rin’ed boch e maruwel?

⁶ Faanra Chitamangidad ni bay u tharmiy e ma pi’ mat’awun yugu boch e girdi’ ni ngar rin’ed boch e maruwel ni yugu aram rogon nde t’uf be’ ni nge ayuweg, me ere gadad e susun ni ngkud rin’ed ni aram rogon! Bod ni, gur lolugen reb e tabinaw ara reb e piilal u lan e ulung, fa? Mu folwok rok Jehovah ni aram e ngaum pi’ boch e maruwel ngak yugu boch e girdi’ ni ngar rin’ed, ma  dab mu guy rogon ni nge mang gur e mu gagiyegnag rogon ni yad be rin’ e re maruwel nem. Faan ga ra folwok rok Jehovah, ma aram e gathi kemus nrayog ni nge m’ay fare maruwel, ya ku rayog ni ngam skulnag yugu boch e girdi’ mu kum ayuwegrad ni nge ga’ e pagan’rad rorad. (Isa. 41:10) Mang e ku rayog ni nge fil e piin yad ma yog e thin rok Jehovah?

⁷ Be tamilangnag e Bible ni baadag Jehovah ni nge nang rogon laniyan’ e pi engel rok u boch ban’en. (1 Ki. 22:19-22) Gimed e piin gallabthir e uw rogon nrayog ni ngam folwokgad ko n’en ma rin’ Jehovah? Faanra ba puluw ni ngam rin’ed, mi gimed yog ngak pi fakmed ni ngar weliyed lanin’rad u rogon ni ngan rin’ reb e maruwel. Ma faanra ba puluw, mi gimed rin’ ni bod rogon ni ka rogned.

8. Uw rogon ni i gum’an’nag Jehovah ir u puluwon Abraham nge Sarah?

⁸ Ku ma m’ug nib sobut’an’ Jehovah u rogon ni ma dag e gum’an’ rok. Bod ni, ma gum’an’nag Jehovah ir u nap’an nra fith e pi tapigpig rok boch e deer ngak u fithik’ e tayfan ni bay rogon ko pi n’en ke dugliy. I motoyil u nap’an ni yog Abraham ngak ni be lemnag nde puluw e n’en ke dugliy ni aram e nge thang yu Sodom nge Gomorrah. (Gen. 18:22-33) Ku dab mu pagtalin rogon e ngongol ni dag ngak Sarah ni leengin Abraham. De damumuw u nap’an ni minmin Sarah ko fa ngiyal’ nem nnog ngak ni bayi diyen ni yugu aram rogon ni ke pilibthir. (Gen. 18:10-14) Ya bin riyul’ riy e, dag e tayfan ngak Sarah.

9. Mang e rayog ni nge fil e piin gallabthir nge piin piilal rok Jehovah?

⁹ Gimed e piin gallabthir nge piin piilal e mang e rayog ni ngam filed ko n’en ke rin’ Jehovah? Am lemnaged e n’en ni gimed ma rin’ u nap’an nra yog reb i fakmed ara be’ u lan e ulung nde m’agan’ ko n’en kam dugliyed. Faanra buch ban’en ni aray rogon, ma gimed ma yog ngorad ni ka chingiyal’ nem nde puluw e n’en ka rogned? Fa gimed ma guy rogon ni ngam nanged fan lanin’rad? Dariy e maruwar riy nra fel’ rogon e tabinaw nge ulung ni faanra i folwok e piin yad ma yog e thin rok Jehovah. Ere kad weliyed e n’en nrayog ni ngad filed u murung’agen e sobut’an’ ko n’en ke rin’ Jehovah. Chiney e ngkud guyed boch ban’en nrayog ni ngad filed u murung’agen e sobut’an’ rok yugu boch e girdi’ ni bay murung’agrad ko Thin rok Got.

10. Uw rogon ni ma fanay Jehovah murung’agen boch e girdi’ ni nge fil ban’en riy ngodad?

¹⁰ Bochan ni Jehovah e ir e En ma ‘fonownagdad,’ ma aram fan ni ke weliy murung’agen boch e girdi’ u lan e Thin rok ni ngad filed ban’en riy. (Isa. 30:20, 21) Rayog ni ngad filed boch ban’en ko pi chep u Bible ni be weliy murung’agen boch e girdi’ ni immoy e pi fel’ngin rorad nib fel’ u wan’ Got, nib muun e sobut’an’ ngay. Ku rayog ni ngad filed boch ban’en u nap’an ni gad ra fil e n’en ni buch rok e piin nde yag ni ngar daged e pi fel’ngin ney.​—Ps. 37:37; 1 Kor. 10:11.

11. Mang e rayog ni ngad filed ko n’en nib kireb ni rin’ Saul?

¹¹ Am lemnag e n’en ni buch rok Saul ni Pilung. Som’on e ir reb e pagel nib sobut’an’. Manang e gin nge mus riy ma nap’an nni pi’ boch e maruwel ni nge milfan ngak me maruwar u wan’ ko rayog rok fa dabiyog. (1 Sam. 9:21; 10:20-22) Machane, faani munmun me tolangan’ Saul ma aram me rin’ boch ban’en ndawor ni pi’ mat’awun ni nge rin’. De n’uw nap’an nga tomuren ni mang pilung ma aram me tabab ni nga i ngongol ni aram rogon. Immoy bayay ndaki yag ni nge gum’an’nag ir u nap’an ni be sonnag Samuel ni profet. Ere ognag ba maligach ni mooruf ndariy mat’awun ni nge ognag ko bin nge pagan’ ngak Jehovah nra rin’ e n’en nib t’uf ni nge rin’ ni fan ko girdi’ rok. Wenegan ni yib riy e daki yag ni nge par Saul nib fel’ u wan’ Jehovah me munmun ma daki m’agan’ Jehovah ngay ni nge par ni ir e pilung. (1 Sam. 13:8-14) Gad ba gonop  ni faan gad ra fil ban’en ko re n’ey, ma gad siyeg ndab da rin’ed boch ban’en ndariy mat’awdad ni ngad rin’ed.

12. Uw rogon ni dag Daniel e sobut’an’?

¹² Machane, am lemnag e n’en nib fel’ ni rin’ Daniel ni profet nib thil ko n’en nib kireb ni rin’ Saul. N’umngin nap’an e yafos rok Daniel ni i par nib sobut’an’, ma gubin ngiyal’ ni ma yog ngak Jehovah ni nge pow’iy. Bod nnap’an ni fanay Jehovah Daniel ni nge weliy fan e lik’ay rok Nebukadnezzar, ma de yog Daniel ni ke yag ni nge weliy fan e re lik’ay nem u gelngin. Ya bochan nib sobut’an’ ma aram me yog ni Jehovah e ir e ngan pining e sorok ngak ko n’en ke buch. (Dan. 2:26-28) Ere mang e gad be fil ko re n’ey? Faanra baadag e pi walag ni yad ma motoyil ko welthin ni gad ma pi’ ara be yib angin e machib ni gad ma tay, ma susun e dab da paged talin ni Jehovah e ir e ngad pininged e sorok riy ngak. Susun e ngad nanged ndariy reb e pi n’ey nrayog ni ngad rin’ed ni faanra der ayuwegdad Jehovah. (2 Kor. 4:7) Faan gad ra rin’ ni aray rogon, ma aram e ku gad be folwok rok Jesus. Ni uw rogon?

13. Mang e rayog ni ngad filed rok Jesus nrogon ni bay ko John 5:19, 30?

¹³ Yugu aram rogon ni Jesus e ir Fak Got maku ir be’ nib flont, machane gubin ngiyal’ ni ma taga’ ngak Jehovah. (Mu beeg e John 5:19, 30.) Da i guy rogon ni nge milfan mat’awun e Chitamangin ngak. Be yog e Filippi 2:6 ngodad ni Jesus e “de guy rogon ni nge gelnag ir nge yan i par nib taareb rogon ngak Got.” Bochan ni ma fol Jesus ko Chitamangin, ma aram fan ni manang e gin nge mus riy maku ma tayfan mat’awun e Chitamangin.

14. Mang e rin’ Jesus u nap’an nnog ngak ni nge rin’ ban’en ndariy mat’awun ni nge rin’?

¹⁴ Am lemnag e n’en ni rin’ Jesus u nap’an ni yib James nge John ni yow l’agruw i gachalpen nge chitiningrow ngak mar ninged reb e tow’ath ndariy mat’awun Jesus ni nge pi’ ngak James nge John. Ka chingiyal’ nem me yog Jesus ngorad ni kemus ni yigoo Chitamangin ni bay u tharmiy e ir e rayog ni nge dugliy e en nge par nga ba’ ni mat’aw nge ba’ ni gilay’ rok u Gil’ilungun. (Matt. 20:20-23) Ere dag Jesus nib ga’ fan u wan’ e gin nge mus riy. Ir be’ nib sobut’an’. De thum’ nga wuru’ e tin ke pi’ Jehovah mat’awun nrayog ni nge rin’. (John 12:49) Ere uw rogon nrayog ni ngad folwokgad ko n’en nib fel’ ni rin’ Jesus?

15-16. Uw rogon nrayog ni ngad folgad ko fare fonow nu Bible ni bay ko 1 Korinth 4:6?

¹⁵ Ra m’ug ni gad be folwok rok Jesus u rogon ni i dag e sobut’an’ ni aram e ngad folgad ko fare  fonow nu Bible ni bay ko 1 Korinth 4:6, NW. Be yog e re thin ney ngodad ni be gaar: “Dab mu thum’gad nga wuru’ e pi n’en kan yoloy nga but’.” Ere nap’an ni yira fith ban’en ngodad, ma susun e dab da guyed rogon ni ngad towasariyed yugu boch e girdi’ ni ngar folgad ko n’en gad be lemnag ara da gurgad ngad welthingad ndawor da fal’eged i lemnag e n’en ka nog ngodad. Ya bin riyul’ riy e, susun e ngad weliyed ngorad e fonow ni bay u lan e Bible nge pi babyor rodad nib puluw e thin riy ko Bible. Faan gad ra rin’ ni aray rogon, ma aram e gad be dag ni gad manang e gin ngad musgad riy. Maku reb e, gad be dag ni pi fonow nib “mat’aw” ni ma yib rok e en Gubin Ma Rayog Rok e kab fel’ ko tin ke yib rodad.​—Rev. 15:3, 4. 

¹⁶ Gathi kemus ni gad ma dag e sobut’an’ ni bochan e ngad pininged e sorok ngak Jehovah, ya ku bay boch i fan nib fel’ ni ngad rin’ed e re n’ey. Chiney e ngad weliyed rogon nrayog ni nge ayuwegdad e sobut’an’ ni ngad felfelan’gad miki par nib fel’ thildad yugu boch e girdi’.

17. Mang fan ni girdi’ nib sobut’an’rad ma yad manang e gin ngar musgad riy e yad ba felfelan’?

¹⁷ Faanra ba sobut’an’dad ma gad manang e gin ngad musgad riy, ma aram e rayog ni ngad felfelan’gad. Mang fan? Faanra gad manang e gin ngad musgad riy, ma gad ra pining e magar ko ayuw nra pi’ yugu boch e girdi’ ngodad maku gad ba felfelan’ ngay. Am lemnag fa ngiyal’ nem ni golnag Jesus fa ragag i pumoon ni yad ba daraw. Kemus ni taa bagayad e sul nge pining e magar ngak Jesus ni ke golnag e binem e m’ar nrib kireb ni immoy rok ndabiyog ni nge chuweg u gelngin. Re pumoon ney ni ir be’ nib sobut’an’ e ri pining e magar ko ayuw ni kan pi’ ngak miki pining e sorok ngak Got.​—Luke 17:11-19.

18. Faanra ba sobut’an’dad ma gad manang e gin ngad musgad riy, ma uw rogon nra mom ni nge fel’ thildad yugu boch e girdi’? (Roma 12:10)

¹⁸ Girdi’ nib sobut’an’rad ma yad manang e gin ngar musgad riy e ba ga’ nib fel’ thilrad yugu boch e girdi’, ma kub mom ni nge yag boch e fager  ngorad nrib fel’ thilrad. Mang fan? Bochan e yad manang ni ku bay fel’ngin yugu boch e girdi’ nib manigil maku yad ma dag ni be pagan’rad ngorad. Girdi’ nib sobut’an’rad ma yad manang e gin ngar musgad riy e yad ma felfelan’ ni faanra yad be guy nib fel’ rogon ni be rin’ yugu boch e girdi’ e maruwel ni kan pi’ ngorad, ma yad ma gur nga u rogned fel’ngin e tin ke rin’ yugu boch e girdi’ mar ted farad riy.​—Mu beeg e Roma 12:10.

19. Mang boch i fan nsusun e ngad siyeged e tolangan’?

¹⁹ Machane girdi’ nib tolangan’rad e ba mo’maw’ ni nga u rogned fel’ngin e tin ke rin’ yugu boch e girdi’, ya yad baadag ni yad e nga unog e sorok ngorad. Ba ga’ ni yad ma taareb rogonnaged yad ngak yugu boch e girdi’ maku yad be tagenging ngorad. Be’ nib tolangan’ e ba ga’ ni ma lemnag nthingari rin’ urngin ban’en ni ir rok ni bochan e be lemnag ndabiyog ni nge rin’ yugu boch e girdi’ fare n’em nib fel’ rogon. Be’ nib tolangan’ e ba ga’ ni baadag ni nge ga’ fan ko tin ka bay e girdi’, ma ma awan’ ngak yugu boch e girdi’ ni faanra be guyrad ni kab fel’ rogon ni yad be rin’ ban’en nga rogon ni be rin’. (Gal. 5:26) Girdi’ ni aray rogon e der ma par nib fel’ thilrad be’ nib n’uw nap’an. Ere faanra gad be guy ni bay e biney e magawon rodad, ma susun e ngad meybilgad ngak Jehovah ni nge ayuwegdad ngad ‘piliyeged lanin’dad ni polo’,’ ya nge dabi par e biney e lem ni ke mang bang u rarogodad.​—Rom. 12:2.

20. Mang fan nsusun e nge sobut’an’dad ma gad nang e gin ngad musgad riy?

²⁰ Ri gad be pining e magar ko pi n’en nib fel’ ni ke rin’ Jehovah nrayog ni ngan folwok riy! Ma m’ug nib sobut’an’ u rogon e ngongol rok ngak e pi tapigpig rok, ma gad baadag ni ngad folwokgad rok. Maku reb e, gad baadag ni ngad folwokgad rok boch e girdi’ ni bay murung’agrad u Bible ni ur folgad rok Got u fithik’ e sobut’an’. Ere manga yugu da pininged e sorok ngak Jehovah ni gubin ngiyal’ ni bochan e ir e bay rogon ni ngan pining e sorok ngak. (Rev. 4:11) Faan gad ra rin’ ni aray rogon, ma aram e rayog ni ngad manged fager rok Jehovah ndariy n’umngin nap’an ni bochan e ba t’uf rok e piin nib sobut’an’rad ma yad manang e gin ngar musgad riy.