1. Mang e ke pi’ Jehovah ngak urngin e pi tapigpig rok ni yad ba yul’yul’ ngak?

BOCHAN ni gad ba t’uf rok Jehovah, ma urngin e pi tapigpig rok ni yad ba yul’yul’ ngak nra bagayad ma bay reb e maruwel ni ke pi’ ngak u lan e ulung rok. Yugu aram rogon nib thilthil e maruwel rodad, machane gad gubin nib ga’ fadad, ma ra bagadad mab t’uf rok bagadad. Ke ayuwegdad apostal Paul ni nge tamilang u wan’dad e re n’ey nib ga’ fan. Ni uw rogon?

2. Mang fan nib t’uf ni nge bagadad me ga’ fan u wan’ bagadad mu ud maruwelgad u taabang nrogon ni bay ko Efesus 4:16?

² Ke tamilangnag Paul ko fare kenggin e thin nu Bible ni fan ko re article ney ndariy bagadad nrayog ni nge sap ngak yugu reb e tapigpig rok Jehovah me gaar ngak: “I gur e dariy fam ngog!” (1 Kor. 12:21) Faanra nge par e ulung rodad nib gapas, ma thingari bagadad me ga’ fan u wan’ bagadad mu ud maruwelgad u taabang. (Mu beeg e Efesus 4:16.) Faanra ud maruwelgad u taabang nib taareban’dad, ma aram e urngin e girdi’ u lan e ulung ni yad ra guy ni yibe t’ufegrad me par e ulung rodad nib gel.

3. Mang e gad ra weliy ko re article ney?

³ Mang boch e kanawo’ nrayog ni ngad ted fan yugu boch e Kristiano riy u lan e ulung? U lan e re article ney e gad ra weliy riy rogon nrayog ni nge tay e piin piilal fan yugu boch e piilal. Bin migid e gad ra weliy rogon nrayog ni ngad daged nib ga’ fan u wan’dad e pi walagdad ni pumoon nge ppin ndawor ra mabgolgad. Ma bin tomur e gad ra weliy rogon nrayog ni ngad daged ni gad be tayfan e pi walag ni gathi ri yad ba salap ko thin rodad.

4. Mang fonow e pi’ Paul u Roma 12:10 nsusun e nge fol e piin piilal riy?

⁴ Gubin e piilal u lan e ulung ni kan dugliyrad u daken gelngin Jehovah nib thothup. Yugu aram rogon ma yad gubin nib thilthil e tow’ath nge pi salap ni bay rorad. (1 Kor. 12:17, 18) Bay boch i yad ni  ka fini mang piilal ma gathi ri boor ban’en ni yad manang ni bod rogon yugu boch e piilal. Ma boch i yad e buchuuw e tin rayog ni ngar rin’ed ni bochan yangarrad ara bochan ba mit e m’ar ni bay rorad. Machane, susun e dariy reb e piilal ni nge sap ngak yugu reb e piilal me gaar, “I gur e dariy fam ngog!” Ya gubin e piilal nsusun e ngar folgad ko fare fonow ni pi’ Paul ni bay ko Roma 12:10.​—Mu beeg.

5. Uw rogon ni nge dag e piin piilal nra bagayad ma be tayfan bagayad? Mang nib ga’ fan ni ngar rin’ed e re n’ey?

⁵ Piin piilal e yad ma dag nra bagayad ma be tayfan bagayad ni aram e ra bagayad ma ma motoyil ngak bagayad nib fel’ rogon. Rib ga’ fan e re n’ey u nap’an yad ra mada’ nga taabang ni ngar weliyed murung’agen reb e magawon nib ga’. Mang fan? Am tay fanam i yan ko n’en ni yog Fare Wulyang ko Damit ko October 1, 1988 ni thin ni Meriken ni gaar: “Manang e piin piilal nrayog rok Kristus ni nge fanay gelngin Got nib thothup ni nge ayuweg reb e piilal u fithik’rad ni nge yog murung’agen boch i kenggin e motochiyel u Bible nra ayuwegrad ni ngar nanged e n’en ni ngar rin’ed nga reb e magawon ni ke sum ara rogon ni ngar dugliyed ban’en nib ga’ fan. (Acts 15:6-15) Gubin e piilal u lan e ulung ni ma ayuwegrad gelngin Got nib thothup, ma gathi kemus ni taa bagayad.”

6. Uw rogon nrayog ni nge maruwel e piin piilal u taabang nib taareban’rad? Faan yad ra rin’ e re n’ey ma uw rogon nra yib angin ko ulung?

⁶ Reb e piilal ni ma tayfan e tin ka bay e piilal ni yad ma maruwel u taabang e der ma guy rogon ni nge urngin yay e muulung ni ngar ted e piin piilal ma ir e nge non nsom’on. Ku gathi yigoo ir e ma non u nap’an e muulung rorad, maku der ma lemnag ni urngin ban’en ni ma lemnag nib puluw. Ya ma weliy rogon laniyan’ u fithik’ e sobut’an’. Ku ma fal’eg e motoyil ko n’en ke yog yugu boch e piilal. Ma bin th’abi ga’ fan riy e, gubin ngiyal’ nib m’agan’ ngay ni ngan weliy murung’agen e pi kenggin e motochiyel u Bible min fol ko fonow ni ke pi’ “fare tapigpig nib yul’yul’ ma ba gonop.” (Matt. 24:45-47) Nap’an nra weliy e piin piilal boch ban’en u fithik’ e t’ufeg nge tayfan, ma aram e ra pow’iy gelngin Got nib thothup e muulung rorad, miki pow’iyrad u rogon ni ngar dugliyed boch ban’en nra ayuweg e ulung ni nge par nib gel.​—Jas. 3:17, 18.

7. Uw rogon e piin nib muchugbil u wan’ Jesus?

⁷ Ulung rodad e ngiyal’ ney e bay e piin mabgol riy nge girdien e tabinaw. Machane, ku bay boch e walag ni pumoon nge ppin u lan e ulung ni yad ba muchugbil. Ere susun nge uw rogon u wan’dad e piin yad ba muchugbil? Susun e ngad folwokgad rok Jesus u rogon ni i lemnag e pi girdi’ ney. Nap’an ni i machib Jesus u fayleng, ma de un ko mabgol. I par nib muchugbil, me fanay e tayim rok ni nge tiyan’ ko maruwel rok. Da i machibnag Jesus nthingar ni un ko mabgol ara yog nib kireb ni ngan mabgol. Machane, i yog ni bay boch e Kristiano ni yad ra dugliy ndab ra uned ko mabgol. (Matt. 19:11, 12) I tay Jesus fan e piin nib muchugbil. Da i lemnag ni girdi’ ni aray rogon e yad ba sobut’ ko girdi’ ni kar mabgolgad, fa bay ban’en ndariy rorad ni bochan e dawor ra uned ko mabgol.

8. Mang e pi’ Paul e athamgil nga laniyan’ e piin Kristiano ni ngar lemnaged nrogon nib puluw ko 1 Korinth 7:7-9?

⁸ Nap’an e machib ni i tay apostal Paul me par nde un ko mabgol ni bod rogon Jesus. Machane de machibnag Paul nib kireb ni nge un reb e Kristiano ko mabgol. Ya manang nra be’ ma ir rok e nge dugliy ko nge un ko mabgol fa danga’. Yugu aram rogon, me pi’ Paul e athamgil nga laniyan’ e piin Kristiano ni ngar lemnaged ko rayog ni ngar pigpiggad ngak Jehovah ndab ra uned ko mabgol fa dabiyog. (Mu beeg e 1 Korinth 7:7-9.) Da i lemnag Paul ni pi Kristiano ni yad ba muchugbil e dariy farad. Bin riyul’ riy e, mel’eg Timothy nreb e walag ni pumoon nib muchugbil ni nge rin’ boch e maruwel nib ga’ fan. * (Fil. 2:19-22) Ere ba tamilang nde fel’ ni ngad lemnaged nrayog rok reb e walag ni pumoon ni nge rin’ boch e maruwel ni bochan e ba mabgol ara ba muchugbil, fa reb e da lemnaged nde bung rogon ni nge rin’ boch e maruwel ni bochan e ba mabgol ara ba muchugbil.​—1 Kor. 7:32-35, 38.

9. Mang e rayog ni nga dogned u murung’agen e mabgol nge ngan par ni yib muchugbil?

⁹ Da i machibnag Jesus nge Paul ni piin Kristiano e thingar ra uned ko mabgol ara thingar ra pared ni yad ba muchugbil. Ere mang e rayog ni nga dogned u murung’agen e mabgol nge ngan par ni yib muchugbil? Rib tamilang e fulweg ko re deer ney ni bay ko Fare Wulyang ko Damit ko October 1, 2012 ni thin ni Meriken. Be gaar: “Riyul’ ni l’agruw e gali n’ey [ngan mabgol ara ngan par ni yib muchugbil] nrayog ni nga nog ni tow’ath ni ke yib rok Got. . . . Der ma lemnag Jehovah ni piin nib muchugbil e susun e ngar tamra’gad ara nge kireban’rad ni bochan e dawor ra uned ko mabgol.” Ere ba t’uf ni ngad ted fan e pi walag ni pumoon nge ppin u lan e ulung ni yad ba muchugbil.

10. Uw rogon ni ngad daged ni gad be tayfan e pi walag ni yad ba muchugbil?

 ¹⁰ Uw rogon ni ngad daged ni gad be tayfan e pi walag ni yad ba muchugbil nge rogon lanin’rad? Susun e dab da paged talin ni bay boch e Kristiano ni kar dugliyed ni ngar pared ndab ra uned ko mabgol. Ma boch e Kristiano ni yad ba muchugbil e yad baadag ni ngar uned ko mabgol, machane dawor ra pirieged be’ nib fel’ ni ngar mabgolgad. Ku bay boch e Kristiano ni ke yim’ e en mabgol rorad. Demtrug rogon, ma gur, ba puluw ni nge fith yugu boch e girdi’ u lan e ulung ngak e pi walag ney fan ndawor ra uned ko mabgol fa reb e rogned ngorad ni ngar gayed be’ ni ngar leayed, fa? Riyul’ nsana bay boch e Kristiano ni yad ra yog ni ngan ayuwegrad ko re n’ey. Machane, faanra darur rogned ni ngan ayuwegrad ni ngar gayed be’ ni ngar leayed, ma ra uw rogon e tafinay rorad ni faanra unog boch ban’en ngorad ni aray rogon? (1 Thess. 4:11; 1 Tim. 5:13) Ngad guyed e n’en ke yog boch e walag ni pumoon nge ppin ni yad ba yul’yul’ ndawor ra uned ko mabgol.

11-12. Mang boch ban’en nrayog ni ngaud rin’ed nra i muleg laniyan’ e pi walag nib muchugbil?

¹¹ Reb e walag ni pumoon nib muchugbil ni ma lekag e ulung ma rib fel’ rogon ni ma rin’ e maruwel rok e ke yog ni boor fel’ngin ni ngan par ni yib muchugbil. Machane, ki yog ni ma mulan’ u nap’an nra fith boch e walag ngak ni lungurad: “Mang fan dawor mu un ko mabgol?” Ku bay reb e walag ni pumoon nib muchugbil ni ma pigpig u reb e branch ofis ni ke yog ni gaar: “Bay yu ngiyal’ ni ma k’aringeg boch e walag ni nggu lemnag nsusun e nge kireban’uy ngak e piin yad ba muchugbil. Re n’ey e ma k’aringeg ni nggu lemnag nre n’ey ni ngan par ni yib muchugbil e reb e magawon ma gathi ba tow’ath.”

¹² Ku bay reb e walag nib pin nib muchugbil ni ma pigpig u Bethel ni yog ni gaar: “Bay boch e walag ni yad ma lemnag ni urngin e girdi’ nib muchugbil e yad be gay be’ ni ngar leayed, ara yad ma lemnag ni urngin e girdi’ nib muchugbil ni yad ma lemnag ni urngin yay ni yad ra muulung boch e girdi’ nga taabang ma aram e ngiyal’ nib fel’ ni ngar gayed be’ ni ngar leayed. Immoy bayay nug wan nga reb e binaw ni nggu rin’ boch e maruwel ni kan pi’ ngog, ma nap’an ni blayal’ ma aram mug wan ko muulung. Re walag nib pin ni baaram nug par rok e yog ngog ni bay l’agruw e walag ni pumoon u lan e ulung ni gamad taab yangar. Machane me yog ngog ni gathi be guy rogon ni nge gay be’ ni nggu mabgolgow. Machane, nap’an ni yug gu tawgow nga Tagil’ e Liyor, me fekeg ko gin bay fa gal walag riy ya nge yag nug mada’gad. Re n’ey e ri k’aring e tamra’ ngomad e gal walag ni pumoon nem.”

13. Mang boch ban’en ni ke pi’ e athamgil nga laniyan’ reb e walag nib pin nib muchugbil?

¹³ Ku bay reb e walag nib pin nib muchugbil ni ma pigpig u Bethel ni yog ni gaar: “Gu manang boch e walag ni yad ba ilal boch ni yad ba muchugbil nib tamilangan’rad, ma taab n’en e yad be nameg, mab m’agan’rad ngay ni ngar ayuweged yugu boch e girdi’, ma yad be par ni yad ba felfelan’, mab ga’ e ayuw ni yad ma pi’ ko ulung. Pi walag ney e ba fel’ rogon ni yad ma lemnag rarogorad ndawor ra uned ko mabgol, ma darur lemnaged ni ka yad ba fel’ ngak boch e girdi’ ni bochan e kar pared ndar uned ko mabgol fa reb e yad be lemnag ndabiyog ni ngar felfelan’gad ni bochan e dawor ra uned ko mabgol maku dariy e bitir rorad.” Aram fan ni gad ba felfelan’ ni ngad uned ko pigpig u reb e ulung ni urngin e girdi’ riy ni yad ma tayfan pi walagrad ma kub ga’ farad u wan’rad. Ga manang nder kireban’uy ngom ara i awan’uy ngom, maku danir fek yathim, maku danir lemnag ni ka gab fel’ ngak yugu boch e girdi’ u lan e ulung. Ya ga manang ni gab t’uf rok pi walagem.

14. Uw rogon nrayog ni ngad daged ni gad be tayfan e piin yad ba muchugbil?

¹⁴ Ra felfelan’ pi walagdad ni pumoon nge ppin ni yad ba muchugbil ni faanra ga’ farad u wan’dad ni bochan pi fel’ngirad nib manigil, ma gathi nge kireban’dad ngorad ni bochan e dawor ra uned ko mabgol. Ere ba manigil ni nge ga’ fan u wan’dad rogon farad yul’yul’ ko bin nge kireban’dad ngorad. Faan gad ra rin’ ni aray rogon, ma aram e  dariy ba ngiyal’ nra lemnag e pi walag ney ni be lungudad ngorad: “I gur e dariy fam ngog!” (1 Kor. 12:21) Ya bin riyul’ riy e, yad ra nang ni gad be tay farad mab ga’ farad u lan e ulung.

15. Mang boch ban’en ni ke thilyeg boch e walag u rogon e par rorad ya nge yag nra yoornaged e kanawo’ ni yad be machib riy?

¹⁵ Nap’an fapi duw ni ka fini yan, ma boor e walag ni kar nameged ni ngar filed yugu reb e thin ya nge yag nra yoornaged e kanawo’ ni yad be machib riy. Ere thingar ra thilyeged boch ban’en u rogon e par rorad ya nge yag nrin’ed e re n’ey. Pi walag ney e kar chuwgad ko ulung ni yad ma un ngay ni yima non riy ko thin rorad ni fan e ngar pigpiggad u reb e ulung nib thil e thin rorad nib t’uf boch e tamachib riy. (Acts 16:9) Re n’ey e ban’en ni ke dugliy e pi Kristiano ney ni yad rorad ya nge yag nra yoornaged e kanawo’ ni yad be pigpig riy ngak Jehovah. Yugu aram rogon ni boor e duw mfini yag ni ngar salapgad ko numon u reb e thin ni yad be fil, machane boor ban’en nib manigil ni be yag ni ngar rin’ed. Pi fel’ngirad nrib manigil nge pi n’en ni ka i buch u lan e yafos rorad e ma gelnag e pi walag u lan e ulung. Rib ga’ fan e pi walag ney u wan’dad ni yad be pag farad u boch ban’en!

16. Mang e ra dugliy ko rayog ni nge mang reb e walag ni pumoon reb e piilal ara ministerial servant fa dabiyog?

¹⁶ Susun e dabi dugliy e piin piilal ndabiyog ni nge mang reb e walag ni pumoon reb e piilal ara ministerial servant ni bochan e gathi rib salap ko thin ni yima yog u reb e ulung. Ya ra yaliy fapi piilal rarogon fare walag ni be yan u rogon e n’en be yog e Bible nthingari rin’ be’ me yag ni nge mang reb e piilal ara ministerial servant, ma gathi be yan u rogon feni salap u rogon ni ma non ko thin ni yima yog u reb e ulung.​—1 Tim. 3:1-10, 12, 13; Titus 1:5-9.

17. Mang boch e deer ni ma sum u nap’an nra chuw reb e tabinaw nga ranod ra pared nga yugu reb e nam?

¹⁷ Bay boch e tabinaw ni ka ranod ra pared nga yugu reb e nam ni bochan e ke mo’maw’ rogon ni ngar pared ko nam rorad ara bochan ni ngar gayed e maruwel. Bochan e re n’ey ma aram e ra tabab pi fakrad ni ngar filed e thin ko fare nam ni ka ranod ra pared ngay. Sana ku ra t’uf ni nge fil fapi gallabthir e thin ko fare nam ya nge yag nra pirieged e maruwel. Ere uw rogon ni faanra bay e ulung rodad ko fare nam ni yima non riy ni thin ko nam rok fare tabinaw ni ka ranod ra pared ngaram? Kun ulung e nga i un fare tabinaw ko muulung riy? Gur, ngar uned nga reb e ulung ni yima non riy ni thin ko fare nam ni ka ranod ra pared ngay, fa ngar uned nga reb ni yima non riy ko thin rorad?

18. Uw rogon ni ngad daged ni gad be tayfan e n’en ke dugliy e en lolugen reb e tabinaw nrogon nib puluw ko Galatia 6:5?

¹⁸ En lolugen e tabinaw e thingari dugliy ko kun ulung e nge un chon e tabinaw rok ngay. Bochan nra reb e tabinaw ma ir e ba milfan ngak ni nge dugliy e n’en nge rin’ ko re n’ey, ma aram fan nthingari dugliy e en lolugen e tabinaw e n’en nib fel’ ni fan ko tabinaw rok. (Mu beeg e Galatia 6:5.) Ba t’uf ni ngad ted fan e n’en ke dugliy e en lolugen fare tabinaw. Demtrug e n’en ke dugliy, ma ngad ted fan ma gad dag ko fare tabinaw ni gad ba felfelan’ ni kar manged bang ko ulung rodad, ma gad dag e t’ufeg ngorad.​—Rom. 15:7.

19. Mang e susun ni nge yibilay e piin lolugen e tabinaw mar fal’eged i lemnag?

 ¹⁹ Ku bay boch e tabinaw ni yad be pigpig u reb e ulung ni yima non riy ni thin ko fa gallabthir, machane fapi bitir e gathi ri yad ba salap ko re thin nem. Faanra bay fare ulung u reb e binaw ni bin baaram e thin ni ir e ba ga’ ni ma yog fapi bitir u skul e yima fanay riy, ma aram e rayog ni nge mo’maw’ ngak fapi bitir ni ngar nanged fan e n’en yibe yog u nap’an e muulung ma dabiyog ni ngar mon’oggad ko tirok Got ban’en. Mang fan? Bochan e rayog ni be un fapi bitir nga reb e skul ni yima fanay e thin ko fare binaw riy ma gathi thin ko gallabthir rorad. Faanra buch ni aray rogon, ma piin lolugen e tabinaw e thingar ra meybilgad mar fal’eged i lemnag e n’en nib t’uf ni ngar rin’ed ya nge yag nra ayuweged pi fakrad ni ngar chugurgad ngak Jehovah nge girdi’ rok. Reb e nge guy fa gallabthir rogon ni nge salap pi fakrow ko bin baaram e thin ni yow ma yog, fa reb e nga ranod ra uned nga reb e ulung ni yima fanay e bin baaram e thin riy ni ir e ri manang pi fakrad. Demtrug e n’en ke dugliy reb i lolugen e tabinaw, ma re ulung ni ke mel’eg ni nge pigpig riy e susun e ngar daged ni yad be tayfan fare walag nge chon e tabinaw rok mab ga’ farad u wan’ e pi walag u lan e ulung.

20. Uw rogon ni ngad daged ni gad be tayfan e pi walag ni yad be fil reb e thin ni gathi thin rorad?

²⁰ Bochan e pi n’en kad weliyed, ma aram fan ni boor e ulung ni bay e walag riy ni pumoon nge ppin ni yad be athamgil ni ngar filed reb e thin ni gathi thin rorad. Sana rayog nib mo’maw’ ngorad ni ngar weliyed lanin’rad. Machane faanra gathi yigoo rogon ni yad ma yog e bin baaram e thin ni yad be fil e ngad lemnaged, ma aram e rayog ni ngad guyed rogon nib t’uf Jehovah rorad nge rogon ni yad baadag ni ngar pigpiggad ngak. Faan gad ra guy e pi fel’ngin ney ni bay rorad, ma aram e ra ga’ farad u wan’dad mu kud ted farad. Maku reb e, dabi lungudad ngorad “I gur e dariy fam ngog” ni bochan e gathi ri yad ba salap ko thin rodad.

21-22. Mang reb e tow’ath nrib manigil ni bay rodad?

²¹ Gad be pining e magar ngak Jehovah ni bochan e ra bagadad ma bay reb e maruwel nib ga’ fan ni ke pi’ ngak u lan e ulung rok. Demtrug ko gadad reb e pumoon, ara reb e ppin, ara gad ba muchugbil, ara gad ba mabgol, ara kad pilibthirgad, fa ka gad bbitir, ara bay reb e thin nri gad ba salap riy, fa reb e gathi ri gad ba salap ko fare thin, ma gad gubin nib ga’ fadad u wan’ Jehovah nge gadad ni gad gubin.​—Rom. 12:4, 5; Kol. 3:10, 11.

²² Manga yugu da ululgad ngad folgad ko pi n’en kad filed ko fare fanathin rok Paul ni murung’agen e dowef. Faan gad ra rin’ ni aram rogon, ma aram e ra k’aringdad ni ngkud lemnaged boch e kanawo’ nrayog ni nge m’ug riy nib ga’ fan u wan’dad e maruwel nib milfan ngodad nge pi walagdad u lan e ulung rok Jehovah.