1-2. Ra bagadad ma mang e thingari rin’ nrogon ni ke m’ug ko n’en ni buch rok Angelito?

GALLABTHIR rom e yow l’agruw e Pi Mich Rok Jehovah, fa? Faanra arrogon, ma thingar dab mu pagtalin ni yugu aram rogon ni gallabthir rom e ba fel’ e tha’ u thilrad Jehovah, ma gathi aram e be yip’ fan ni kub fel’ e tha’ u thilmew Got. Demtrug ko ma pigpig e gallabthir rodad ngak Got fa danga’, ma ra bagadad ma ir e nge maruweliy e tha’ u thilrow Jehovah.

² Am lemnag e n’en ni buch rok reb e walag ni pumoon ni ka nog Angelito ngak. Re walag ney e nni chuguliy u reb e tabinaw ni yad boch e Pi Mich Rok Jehovah. Machane nap’an ni kab bitir, ma de chugur e tha’ u thilrow Got. I gaar, “Ug pigpig ngak Jehovah ni bochan e gu baadag ni nggu rin’ e n’en ni be rin’ girdien e tabinaw rog.” Machane i dugliy u wan’ ni nge tay e tayim ni nge beeg e Thin rok Got, me fal’eg i lemnag e n’en ni be beeg riy, miki tabab ni nga i meybil ngak Jehovah ni boor yay. Ere mang angin ni yib riy? I gaar Angelito, “Kug fil ni taare kanawo’ ni bay nrayog ni nggu chugur riy ngak Jehovah ni Chitamag e aram e nggu fil murung’agen ni yigoo gag.” N’en ni buch rok Angelito e ra k’aringdad ni ngad lemnaged e gal deer ni baaray nib ga’ fan ni be gaar: Mang e ba thil riy ni ngad nanged in ban’en u murung’agen Jehovah ko bin ni ngar da nanged nib fel’ rogon? Ma mang e rayog ni ngad rin’ed ma gad nang Jehovah nib fel’ rogon?

3. Mang e ba thil riy ni ngad nanged in ban’en u murung’agen Jehovah ko bin ni ngad nanged nib fel’ rogon?

³ Rayog ni ngad lemnaged ni gad manang Jehovah ni bochan e gad manang fithingan ara boch ban’en ni ke yog ara ke rin’. Machane re n’ey e gathi be yip’ fan nri gad manang Jehovah nib fel’ rogon. Ra ngad nanged Jehovah nib fel’ rogon ma boor ban’en nib muun ko re n’ey. Ba t’uf ni ngad ted e tayim ni ngad filed murung’agen  nge pi fel’ngin nib manigil. Faan gad ra rin’ ni aray rogon, ma aram e rayog ni ngad tababgad ni ngad nanged fan ni ma yog ara ma rin’ boch ban’en. Re n’ey e ra ayuwegdad ni ngad nanged ko ba m’agan’ ko pi n’en ni gad ma lemnag, nge pi n’en ni gad ma dugliy, nge ngongol rodad fa danga’. Nap’an ni gad ra nang e n’en nib m’agan’ Jehovah ngay ni fan ngodad, mab t’uf ni ngad folgad ko n’en ni kad filed.

4. Faan gad ra lemnag murung’agen boch e girdi’ u lan e Bible, ma uw rogon nra ayuwegdad?

⁴ Rayog ni nge moningnagdad boch e girdi’ ni bochan e gad baadag ni ngad pigpiggad ngak Jehovah, maku rayog ni nge gel e togopuluw ni ngar ted ngodad u nap’an ni gad ra tabab ni ngad uned ko muulung. Machane faanra pagan’dad ngak Jehovah, ma dariy ba ngiyal’ nra digeydad. Aram e ngiyal’ ni gad ra tabab ni ngad maruweliyed e tha’ u thildad Got nra par u n’umngin nap’an e yafos rodad. Ere rayog ni ngad nanged Jehovah nib fel’ rogon, fa? Arrogon, rayog! Ke dag boch e pumoon ndawor ra flontgad ni bod rogon Moses nge David ni Pilung e kanawo’ ni be micheg nrayog ni ngad rin’ed e re n’ey. Nap’an ni gad be weliy e n’en ni rin’ e gali cha’ney, ma aram e gad ra weliy e fulweg ko gal deer ni baaray ni be gaar: Uw rogon nra nangew Jehovah? Ma mang e rayog ni ngad filed ko n’en ni buch rorow?

5. Mang e dugliy Moses ni nge rin’?

⁵ I dugliy Moses ni nge pigpig ku Got. Sogonap’an 40 e duw rok Moses me dugliy ni nge chag ngak e pi Hebrew ni yad e girdi’ rok Got ko bin ni nga nog ni ir “fak be’ ni ppin ni fak Farao.” (Heb. 11:24) I digey e liw rok nib tolang. Nap’an ni dugliy ni nge ayuweg e pi Hebrew ni yad e sib u Egypt, ma manang nra damumuw Farao ni ir e pilung u Egypt nib gel lungun, maku yima tay ni ir reb e got. Ere riyul’ nib gel e michan’ rok Moses! I par ni be pagan’ ngak Jehovah. Ma bochan e re pagan’ nem ni immoy rok, ma aram reb i fan ni par nib chugur e tha’ u thilrow Jehovah u n’umngin nap’an e yafos rok.​—Prov. 3:5.

6. Mang e rayog ni ngad filed ko n’en ni rin’ Moses?

⁶ Mang e gad be fil ko re n’ey? Gad gubin ni bay ban’en nib t’uf ni ngad dugliyed ni bod Moses. Re n’ey e aram e: Gad ra dugliy ni ngad pigpiggad ngak Got ma gad chag ko girdi’ rok, fa? Rayog ni bay boch ban’en nib t’uf ni ngad paged fan ya nge yag nda pigpiggad ngak Got. Maku reb e, piin ndar nanged Jehovah e rayog ni ngar togopuluwgad ngodad. Machane faanra ba pagan’dad ngak e Chitamangidad ni bay u tharmiy, ma rayog ni nge pagan’dad ngay nra ayuwegdad!

7-8. Mang e ulul Moses ni nga i fil?

⁷ I ulul Moses ni nge fil murung’agen pi fel’ngin Jehovah me rin’ e n’en nib m’agan’ ngay. Bod nnap’an ni yog Jehovah ngak Moses ni nge pow’iy piyu Israel nga wuru’ yu Egypt, ma de pagan’ Moses ma boor yay ni yog ngak Jehovah ndabiyog ni nge rin’ e re n’em. Fulweg ni pi’ Got ngak e be dag ni bay e runguy rok. Re n’ey e be yip’ fan ni manang rogon laniyan’ Moses, ma baadag ni nge ayuweg. (Ex. 4:10-16) Angin ni yib riy e aram e yag rok Moses ni nge yan i weliy ngak Farao murung’agen e pufthin ni bayi tay Jehovah ko re nam nu Egypt nem. I guy Moses rogon ni fanay Jehovah gelngin u nap’an ni ayuweg e yafos rok piyu Israel me thang Farao nge pi salthaw rok u lan fagi day ni Red Sea.​—Ex. 14:26-31; Ps. 136:15.

⁸ Tomuren ni pow’iy Moses piyu Israel nga wuru’ yu Egypt ma gubin ngiyal’ ni ur gun’gun’gad. Yugu aram rogon me guy Moses rogon ni i gum’an’nag Jehovah ir u puluwon e pi girdi’ nem ni ke chuwegrad ko sib. (Ps. 78:40-43) Ki guy Moses rogon ni dag Jehovah ni ir be’ nrib  sobut’an’ u nap’an ni motoyil ngak me thilyeg e lem rok ndaki thang piyu Israel.​—Ex. 32:9-14.

9. Uw feni chugur e tha’ u thilin Moses nge Jehovah nrogon ni be tamilangnag e Hebrews 11:27?

⁹ Tomuren nra chuwgad u Egypt, mi ri chugur e tha’ u thilin Moses nge Jehovah nge par ni gowa bod nrayog ni nge guy Moses e Chitamangin ni bay u tharmiy. (Mu beeg e Hebrews 11:27.) Be weliy e Bible rogon feni chugur e tha’ u thilrow ni be gaar: “Ma par Moses u p’eowchen Somol, ma yow ma welthin Somol ni bod rogon ruw i fager.”​—Ex. 33:11.

10. Mang e ba t’uf ni ngad rin’ed ni faanra ngad nanged Jehovah nib fel’ rogon?

¹⁰ Mang e gad be fil ko re n’ey? Ra ngad nanged Jehovah nib fel’ rogon, ma gathi kemus ni ngad filed murung’agen pi fel’ngin ya kub t’uf ni ngad rin’ed e n’en nib m’agan’ ngay. N’en nib m’agan’ Jehovah ngay e ngiyal’ ney e aram e nge thap urngin e girdi’ ngak mar “nanged e tin nib riyul’.” (1 Tim. 2:3, 4) Reb e kanawo’ ni ngad rin’ed riy e n’en nib m’agan’ Jehovah ngay e aram e ngad filed murung’agen ngak yugu boch e girdi’.

11. Uw rogon nrayog ni ngad nanged Jehovah nib fel’ rogon u nap’an ni gad be fil murung’agen ngak yugu boch e girdi’?

¹¹ Ba ga’ nnap’an ni gad ra fil murung’agen Jehovah ngak yugu boch e girdi’, maku ma ayuwegdad ni ngad nanged nib fel’ rogon. Bod ni, gad ma guy ni ma runguy Jehovah e girdi’ u nap’an ni ma ayuwegdad ni ngad pirieged e piin yad baadag ni ngar manged fager rok. (John 6:44; Acts 13:48) Ku gad ma guy ni bay gelngin e Thin rok Got ni bochan e be ayuweg e piin yad be fil e Bible ni ngar taleged boch ban’en nib kireb ni kar mechamgad ngay mar thilyeged boch ban’en u rarogorad. (Kol. 3:9, 10) Ku gad ma guy rogon ni ma gum’an’nag ir u puluwon e girdi’ ko gin gad ma machib riy ni bochan e boor yay ni be l’ogdad ni ngad sulod ngorad ya ngad ayuweged yad ni ngar filed murung’agen me yag nra mageygad ni yad ba fos.​—Rom. 10:13-15.

12. Mang e yog Moses ngak Jehovah nrogon ni bay ko Exodus 33:13, ma mang fan?

¹² Ba ga’ fan u wan’ Moses e tha’ u thilrow Jehovah. I fanay Jehovah Moses ni nge rin’ boch e maang’ang ni yira ngat ngay, ma bochan e re n’ey ma aram mi ri nang Moses Jehovah nib fel’ rogon. Machane ki yog Moses ngak Jehovah ni nge ayuweg ngki nang boch ban’en u murung’agen. (Mu beeg e Exodus 33:13.) Ke pag 80 e duw rok Moses u nap’an ni yog e re n’ey ngak Jehovah, machane manang ni ka boor ban’en ni bay ni nge fil u murung’agen e Chitamangin ni bay u tharmiy.

13. Mang reb e kanawo’ nrayog ni ngad daged nib ga’ fan u wan’dad e tha’ u thildad Got?

¹³ Mang e gad be fil ko re n’ey? Demtrug n’umngin nap’an ni kad pigpiggad ngak Jehovah, ma susun e gubin ngiyal’ ni nge ga’ fan u wan’dad e tha’ u thildad. Reb e kanawo’ nrayog ni ngad rin’ed e re n’ey riy e aram e ngad daged nib ga’ fan u wan’dad e tha’ u thildad Got ni aram e ngaud nonad ngak u daken e meybil.

14. Mang fan ni meybil e aram reb e ban’en nib ga’ fan nra ayuwegdad ni ngkud nanged boor ban’en u murung’agen Got?

¹⁴ Faanra ga baadag ni nge chugur e tha’ u thilmew be’ mab t’uf ni ngaum nonow. Ere mu guy rogon ni nge chugur e tha’ u thilmew Got ni aram e ngaum meybil ngak ni gubin ngiyal’, ma dab mu rus ni nga mog ngak e tin bay u lanin’um nge gum’irchaem. (Efe. 6:18) Krista ni ma par u Turkey e gaar: “Gubin yay ni gu ra weliy lanin’ug ngak Jehovah u daken e meybil ma ma gel e t’ufeg nge pagan’ rog ngak, ma kug ma guy rogon ni be ayuwegeg. Bochan ni gu ma guy rogon ni ma fulweg Jehovah taban e meybil rog ma ke ayuwegeg e re n’ey ni nggu tay ni ir e Chitamag nge Fager rog.”

15. Uw rogon ni weliy Jehovah murung’agen David ni Pilung?

¹⁵ Nap’an nni gargeleg David ni Pilung ma gallabthir rok nge urngin e girdi’ u tooben e yad ma pigpig ngak Jehovah Got. Machane gathi fan ni i pigpig David ngak Jehovah e bochan ni ku aram e n’en ni be rin’ girdien e tabinaw rok. Ya guy rogon ni nge fel’ e tha’ u thilrow Jehovah, ma aram me par nrib t’uf rok Jehovah. I weliy Jehovah murung’agen David ni ‘ir e cha’ ni baadag.’ (Acts 13:22) Uw rogon ni yag ni ngari chugur e tha’ u thilin David nge Jehovah?

16. Mang e fil David u murung’agen Jehovah u nap’an ni i yaliy e tin kan sunmiy?

¹⁶ I fil David murung’agen Jehovah ko tin ke sunmiy. Nap’an ni kab bitir David, ma boor e awa ni i par u daken e ted ni be ayuweg e saf ko chitamangin. Rayog ni aram e ngiyal’ ni tabab ni nge fal’eg i lemnag e tin ke sunmiy Jehovah. Bod nra nep’ ni sap David nga lan e lang ma gathi kemus ni ma guy bokum biyu’ e t’uf, ya ku ma guy fel’ngin e En ke sunmiy e pi t’uf nem. Aram e n’en ni k’aring David ni nge yoloy fapi thin ni be gaar: “Lan e lang e rib gagiyel ni be gilnag buguwan Got! Rib gagiyel ni be dag e n’en ni ke sunumeg!” (Ps. 19:1, 2) Nap’an ni i fal’eg David i lemnag rogon ni kan sunmiy e girdi’, me guy nrib gonop Jehovah. (Ps. 139:13-15) Nap’an ni fal’eg i lemnag e tin ke sunmiy Jehovah, me nang rok ndabiyog ni nge taarebrogonnag ir ngak Jehovah.​—Ps. 139:6.

17. Faan gad ra fal’eg i lemnag murung’agen e tin kan sunmiy, ma mang e rayog ni ngad filed riy?

¹⁷ Mang e gad be fil ko re n’ey? Ngam adag ni ngam nang boch ban’en u murung’agen e tin kan sunmiy. Mu tay e tayim ni ngaum yaliy boch ban’en nib liyegdad nib fel’ yaan ni ke sunmiy Jehovah. Mu ngat nga feni fel’ yaan e pi n’em! Gubin e rran ni ngaum fal’eg i lemnag e n’en ni ga be fil u murung’agen Jehovah ko tin kan sunmiy ni bay u toobem ni bod rogon e woldug, nge gamanman, nge girdi’. Faan ga ra rin’ ni aray rogon, ma gubin e rran ni ga ra fil boor ban’en u murung’agen e Chitamam ni bay u tharmiy ni gab t’uf rok. (Rom. 1:20) Kag ra guy ni gubin e rran ni be gel e t’ufeg rom ngak.

18. Mang e nang David nrogon ni bay ko Psalm 18?

¹⁸ I nang David ni Jehovah e ir e be ayuweg. Bod nnap’an ni ayuweg David e saf rok e chitamangin u l’ugun ba layon nge ba bear, me nang ni Jehovah e ir e ke pi’ gelngin ni nge li’ e gal gamanman ni maloboch nem. Nap’an ni gel ngak Goliath nreb e salthaw nib pag feni ga’, miki nang ni Jehovah e ir e be pow’iy. (1 Sam. 17:37) Ma nap’an ni mil rok Saul ni Pilung ni be awan’ ngak, miki nang ni Jehovah e ir e ke ayuweg e pogofan rok. (Kenggin e Ps. 18) Faanra ba tolangan’ David, ma rayog ni nge lemnag ni ke yag ni nge rin’ e pi n’em ni ir rok. Machane bochan ni ir be’ nib sobut’an’, ma aram fan ni nang ni Jehovah e ir e be ayuweg e pogofan rok.​—Ps. 138:6.

19. Mang e rayog ni ngad filed ko n’en ni buch rok David?

¹⁹ Mang e gad be fil ko re n’ey? Ku bay ban’en nib t’uf ni ngad rin’ed ko bin ni kemus ni ngad ninged e ayuw ngak Jehovah. Thingar kud guyed rogon ni ngad nanged e ngiyal’ nge rogon ni ma ayuwegdad. Faanra ba sobut’an’dad, ma gad ra nang ndabiyog ni ngad rin’ed gubin ban’en u gelngidad, ma Jehovah e ir e ma ayuwegdad ni ngad rin’ed e tin dabiyog rodad. Gubin ngiyal’ ni gad ra guy rogon ni be ayuwegdad Jehovah ma ra gel boch e chugur ko tha’ u thildad. Isaac nreb e walag ni pumoon ni ma par u Fiji, ma ke yoor e duw ni ke pigpig ngak Jehovah e ke guy nriyul’ e re n’ey. I gaar: “Gu ra lemnag e pi n’en ni ke buch u lan e yafos rog, ma rayog ni ngguy rogon ni ke ayuwegeg Jehovah ni ka nap’an nug tabab i fil e Bible ke mada’ ko chiney. Ere aram fan nrib riyul’ Jehovah u wan’ug.”

20. Mang e rayog ni ngad filed ko tha’ u thilin David nge Got?

 ²⁰ I guy David rogon ni nge m’ug pi fel’ngin Jehovah rok. I sunmiydad Jehovah nrayog ni nge m’ug pi fel’ngin rodad. (Gen. 1:26) Ra yoor ban’en nda filed u murung’agen pi fel’ngin Jehovah, ma aram e rayog ni ngad folwokgad rok. I yag ni nge nang David murung’agen e Chitamangin u tharmiy nib fel’ rogon, ere aram fan ni yag ni nge folwok rok u rogon e ngongol ni ma dag ngak yugu boch e girdi’. Am lemnag reb e ban’en ni buch. I denen David nib togopuluw ngak Jehovah u nap’an nra parew Bath-sheba ni leengin yugu be’, ngemu’ me yog ni ngan thang e fan ko pumoon rok. (2 Sam. 11:1-4, 15) Machane dugliy Jehovah ni nge dag e runguy ngak David ni bochan e ir be’ ni ku ma runguy e girdi’. Bochan nrib fel’ e tha’ u thilrow Jehovah, ma aram fan ni par ni ir reb e pilung nrib t’uf rok piyu Israel, miki tay Jehovah nrayog ni nge folwok yugu boch e pilung nu Israel rok.​—1 Ki. 15:11; 2 Ki. 14:1-3.

21. Mang angin nra yib ni faan gad ra “folwok rok Got” nrogon nib puluw ko Efesus 4:24 nge 5:1?

²¹ Mang e gad be fil ko re n’ey? Ba t’uf ni ngad ‘folwokgad rok Got.’ Gad ra rin’ e re n’ey, ma gathi kemus nra yib angin ngodad ya ku ra ayuwegdad ni ngad nanged Got nib fel’ rogon. Nap’an nra m’ug pi fel’ngin rodad, ma aram e ku gad be dag ni gad pi fak.​—Mu beeg e Efesus 4:24; 5:1.

22-23. Mang e ra buch ni faan gad ra fol ko tin kad filed u murung’agen Jehovah?

²² Kad filed nrayog ni ngad nanged murung’agen Jehovah ko tin ke sunmiy ngu daken e Thin rok u Bible. Boor murung’agen boch e tapigpig rok Got ni yad ba yul’yul’ u Bible nrayog ni ngad folwokgad rorad ni bod rogon Moses nge David. Ke rin’ Jehovah e n’en nib milfan ngak. Ere gadad e ba t’uf ni ngad rin’ed e n’en nib milfan ngodad ni aram e ngad filed urngin ban’en nrayog ni ngad filed u murung’agen.

²³ Dariy ba ngiyal’ ni gad ra tal i fil murung’agen Jehovah. (Ekl. 3:11) N’en ni gad ra rin’ ko tin kad filed u murung’agen Jehovah e aram e n’en nib ga’ fan, ma gathi urngin e tin gad manang u murung’agen. Faan gad ra fol ko tin kad filed ma gad guy rogon ni ngad folwokgad rok e Chitamangidad ni gad ba t’uf rok, ma aram e ra i chugurnag ir ngodad. (Jas. 4:8) Ke micheg ngodad u daken e Thin rok ndabi digey e piin yad be guy rogon ni ngar nanged nib fel’ rogon.