De yog Moonyan’ ngak Efa ni faanra kay wom’engin e re ke gek’iy nem ni ke yog Got ndabi kay, ma aram e nap’an nra yim’ ma ka bay ban’en u fithik’ i dow (ni ma yog boch e girdi’ e ngiyal’ ney ni aram e yaal) nra i par u bang nib fos. I yog Satan u l’ugun fare porchoyog ni faanra kay Efa fare wom’engin e gek’iy ma dabi “yim’.” Re n’ey e be yip’ fan nra par nib fos, me fel’ boch e par rok u fayleng, ma dabki yog Got e n’en ni nge rin’.​—Gen. 2:17; 3:3-5.

Ere faanra fare machib ni murung’agen e yaal ko girdi’ ndabi yim’ ni yibe fil ko girdi’ e ngiyal’ ney e de sum u lan fare milay’ nu Eden, me ere mingiyal’ e sum? Dabiyog ni ngar dogned ko mingiyal’ e sum e re machib ney. Gad manang ni gubin e liyor ni googsur ni chuw u nap’an ni yib fare Ran nge Tharey e Fayleng u nap’an Noah. Dariy reb e machib ni googsur ni magey u tomuren fare Ran ni Tharey e Fayleng ni bochan e yigoo Noah nge chon e tabinaw rok e yad e tin riyul’ e tapigpig rok Got nra mageygad ni yad ba fos.

Ere fare machib ni murung’agen e yaal ko girdi’ ndabi yim’ e rayog ni sum u tomuren fare Ran ni Tharey e Fayleng. Nap’an ni athukuy Got e thin ko girdi’ u Babel, ma aram me wer e girdi’ “nga gubin yang u fayleng.” Dabisiy nra feked e re machib nem nge un ngorad. (Gen. 11:8, 9) Demtrug ko mingiyal’ e sum e re machib ney, machane rayog ni nge mich u wan’dad ni Satan ni Moonyan’ ni “chitamangin urngin e malulifith” e ir e be tay tanggin e re machib ney mab felfelan’ ngay ni ke garer u gubin yang.​—John 8:44.