1-2. Mang boch ban’en ni ma mada’nag e girdi’ rok Jehovah, ma mang e rayog ni nge rin’ e pi n’ey ngorad?

AM LEMNAG e re dalip i n’en ni baaray nrayog ni nge buch: Reb e walag ni kab pagel e ke yog e togta ngak ni keb ba mit e m’ar ngak nra k’aring ni nge meewar i yan. Reb e walag ni pumoon ni ke pag wugem e duw rok e kan n’ag ko maruwel, mab mo’maw’ ni nge pirieg yugu reb e maruwel ni nge un ngay. Ma reb e walag nib pin nib yul’yul’ ni ke pilibthir e dakir yag ni nge rin’ urngin e tin rayog rok ni fan ko pigpig rok ngak Jehovah ni bod rogon ni i rin’ kafram.

² Faanra bay reb ko re dalip i magawon ney ni ga be mada’nag, ma rayog ni ngam lemnag ndakuriy fam. Pi n’ey ni ma buch e rayog ni nge chuweg e felfelan’ rom, mag par ndakuriy fam u wan’um, miki magawonnag e tha’ u thilmed yugu boch e girdi’.

3. Uw rogon e yafos ko girdi’ u wan’ Satan nge piin be gagiyegnagrad?

³ Re fayleng ney e dariy fan e yafos ko girdi’ u wan’rad ni bod rogon Satan. Kab kafram i yib ni ma darifannag Satan e girdi’. I yog ngak Efa ni faanra dabi fol rok Got ma ra yag e puf rogon ngak ni yugu aram rogon ni manang ni wenegan nra yib riy e yam’. Satan e ir e be gagiyegnag e pi siyobay, nge am, nge teliw ko re fayleng ney. Ere aram fan ndab da gingad ngay ni pi girdien e siyobay, nge pi tayugang’ ko am, nge teliw e ku de ga’ fan e yafos ko girdi’ u wan’rad, ma darur lemnaged laniyan’ e girdi’.

4. Mang e gad ra weliy ko re article ney?

⁴ Machane Jehovah e ba thil, ya baadag ni ngad nanged ni bay fadad, maku ma ayuwegdad u nap’an ni kad mada’naged boch ban’en ni ma k’aringdad ni ngad lemnaged ndakuriy fadad. (Ps. 136:23; Rom. 12:3) Re article ney e ra weliy rogon ni ma ayuwegdad Jehovah u nap’an ni ke buch e pi n’en ni baaray rodad: (1) Nap’an ni kad m’argad, (2) nap’an ni kad magawongad ko salpiy, nge (3) nap’an ni kad pilibthirgad ma gad be lemnag ndakuriy ban’en nrayog ni ngad rin’ed ni fan ko pigpig rodad ngak Jehovah. Machane som’on e ngad weliyed fan nrayog ni nge pagan’dad ni gad gubin nib ga’ fadad u wan’ Jehovah ni be’ nge be’.

5. Mang e be micheg ngom nib ga’ fan e girdi’ u wan’ Jehovah?

⁵ Yugu aram rogon ni kan ngongliydad ko but’, machane kab ga’ fadad ngab gogow i but’. (Gen. 2:7) Am lemnag boch i fan ni kad nanged nib ga’ fadad u wan’ Jehovah. Ke sunmiy e girdi’ nrayog ni nge m’ug pi fel’ngin rorad. (Gen. 1:27) Re n’ey e be dag ni girdi’ e ka yad ba fel’ ko tin ka bay ban’en ni ke sunmiy ke tay nga fayleng. Ki taydad ni ngad suweyed e fayleng nge gamanman.​—Ps. 8:4-8.

6. Mang reb e ban’en ni ku be micheg nib ga’ fan e girdi’ u wan’ Jehovah ni yugu aram rogon ndawor ra flontgad?

⁶ Mus nga tomuren ni denen Adam, ma ka be par e girdi’ nib ga’ farad u wan’ Jehovah. Bochan nrib ga’ fadad u wan’, ma aram fan ni ke pi’ Jesus ni Fak nrib t’uf rok ni nge biyuliy e denen rodad. (1 John 4:9, 10) Ra fanay Jehovah angin e re biyul nem ni nge faseg urngin e girdi’ ni kar m’ad ni bochan e denen rok Adam, “ni tin nib fel’ nge tin nib kireb.” (Acts 24:15) Be tamilangnag e Thin rok nib ga’ fadad u wan’ ni yugu aram rogon ni kad m’argad, ara gad be magawon ko salpiy, ara kad pilibthirgad.​—Acts 10:34, 35.

7. Ku mang boch i fan nrayog ni nge mich u wan’ e pi tapigpig rok Jehovah nib ga’ farad u wan’?

⁷ Ku bay boch i fan ni nge mich u wan’dad nib ga’ fadad u wan’ Jehovah. Ke pow’iydad ngak ma manang e n’en kad rin’ed u nap’an ni kad rung’aged fare thin nib fel’. (John 6:44) Nap’an nda tababgad ni ngad chugurgad ngak Jehovah, ma aram me chugur ngodad. (Jas. 4:8) Ki tay e tayim miki athamgil ni nge skulnagdad ni bochan e ba ga’ fadad u wan’. Manang rarogodad e chiney maku manang rogon ni ngad mon’oggad. Ku ma yal’uwegdad ni bochan e gad ba t’uf rok. (Prov. 3:11, 12) Pi n’ey e be micheg nrib ga’ fadad u wan’!

8. Uw rogon nra ayuwegdad fapi thin ko Psalm 18:27-29 u rogon ni ngaud lemnaged e magawon rodad?

⁸ Yugu aram rogon ni bay boch e girdi’ ni i lemnag ndariy fan David ni Pilung, machane ir e manang nib t’uf rok Jehovah ma be ayuweg. Ireray e n’en ni ayuweg ni nge puluw rogon e lem rok u murung’agen e n’en be buch rok. (2 Sam. 16:5-7) Nap’an nra kireban’dad ara da mada’naged e magawon, ma rayog ni nge ayuwegdad Jehovah ni ngad thilyeged rogon ni gad be lemnag fare magawon miki yag ni ngad gelgad nga urngin e magawon ni gad be mada’nag. (Mu beeg e Psalm 18:27-29. *) Faanra be ayuwegdad Jehovah ma dariy ban’en nrayog ni nge talegdad ndab kud pigpiggad ngak u fithik’ e felfelan’. (Rom. 8:31) Chiney e ngad weliyed dalip ban’en nnap’an nra buch rodad mab t’uf ni ngad guyed rogon ndab da paged talin ni gad ba t’uf rok Jehovah mab ga’ fadad u wan’.

9. Nap’an ni gad ra m’ar, ma mang e ma rin’ nga rogon ni gad ma lemnag rarogodad?

⁹ Nap’an ni gad ra m’ar ma rayog ni nge kireb rogon e lem ni gad ma tay, ma gad lemnag ndakuriy fadad. Rayog ni ngad tamra’gad u nap’an nra guy boch e girdi’ ni bay boch ban’en ndabkiyog ni ngad rin’ed, ara u nap’an nthingar da taga’gad ngak yugu boch e girdi’ ni ngar ayuweged gadad. Mus ni faanra bay boch e girdi’ nde nang ni kad m’argad, machane ku rayog ni ngad tamra’gad ni bochan e bay boch ban’en ndabkiyog ni ngad rin’ed ni bod rogon kafram. Ireray e ngiyal’ ni ma pi’ Jehovah e athamgil nga lanin’dad. Ni uw rogon?

10. Mang e rayog ni nge ayuwegdad u nap’an ni kad m’argad nrogon nib puluw ko Proverbs 12:25?

¹⁰ Nap’an ni gad ra m’ar ma “thin nib fel’” e rayog ni nge pi’ e athamgil nga lanin’dad. (Mu beeg e Proverbs 12:25, BT.) Boor ban’en ni ke yog Jehovah ngodad u lan e Bible ni be puguran  ngodad nib ga’ fadad u wan’ ni mus ni faanra kad m’argad. (Ps. 31:19; 41:3) Faan gad ra beeg, fa reb e ud sulod ngaud beeged e pi thin nem ni kan thagthagnag, ma ra ayuwegdad Jehovah ni ngad athamgilgad u fithik’ e magafan’ ni gad ma tay ni bochan e kad m’argad.

11. Uw rogon ni ke ayuweg Jehovah reb e walag ni pumoon?

¹¹ Am lemnag e n’en ni buch rok Jorge. Nap’an ni kab pagel Jorge me yib ba mit e m’ar ngak nib papey ni ubchiya’ riy, me k’aring ni nge lemnag ndakuriy fan. I yog ni gaar: “Da ug lemnag ni m’ar rog e ra k’aringeg ni nggu lemnag ndakuriy fag ara ug tamra’ ni be sap e girdi’ ngog ni bochan e m’ar rog. Nap’an ni gel boch e ubchiya’ ko m’ar rog, mug lemnag ni aram e ngari thil rogon e par rog. Kari kireban’ug, ma aram mug wenig ngak Jehovah ni nge ayuwegeg.” Uw rogon ni ayuweg Jehovah Jorge? Ki ulul ngay ni gaar: “Bochan ni ke mo’maw’ rogon ni nggu tiyan’ug nga ban’en nib n’uw nap’an, ma aram min pi’ e athamgil nga lanin’ug ni nggu beeg in e thin nu Bible ko Psalms ni be dag ni ma lemnag Jehovah e pi tapigpig rok. Gubin e rran ni gu ma beeg in e pi thin nem ma kug pirieg nri ma pi’ e athamgil nga lanin’ug. Munmun ma aram me guy e girdi’ ni kug felfelan’ buchuuw. Ku rogned ni bochan e gu be sap nga fel’ngin boch ban’en, ma kki yag ni nggu pi’ e athamgil nga lanin’rad. Ki tamilang u wan’ug ni ke fulweg Jehovah taban e meybil rog! Ke ayuwegeg ni nggu thilyeg rogon ni gu be lemnag rarogog, ma aram mug tabab ni nggu tiyan’ug ko n’en ni be yog e Thin rok Got u murung’agen rogon ni be lemnageg ni yugu aram rogon ni kug m’ar.”

12. Faanra kam m’ar, ma mang boch ban’en nrayog ni ngam rin’ ya nge yag ni ayuwegem Jehovah?

¹² Faanra kam m’ar ma nge pagan’um ni manang Jehovah e n’en ni ga be yan u fithik’. Mu wenig ngak ni nge ayuwegem ya nge yag ni puluw rogon ni ngam lemnag e magawon rom. Ngemu’ mag gay boch e thin rok Jehovah ni bay u lan e Bible nrayog ni nge fal’eg lanin’um. Mu tiyan’um ko pi thin ni bay riy ni be weliy rogon feni ga’ fan  u wan’ Jehovah e pi tapigpig rok. Faan ga ra rin’ ni aray rogon, ma ga ra guy ni Jehovah e ba gol ngak e piin yad be pigpig ngak u fithik’ e yul’yul’.​—Ps. 84:11.

13. Mang e ra lemnag reb i lolugen e tabinaw u nap’an ni yira n’ag ko maruwel?

¹³ Urngin e piin lolugen e tabinaw e yad baadag ni ngar pied e tin nib t’uf ko tabinaw rorad. Machane rayog ni ngan n’ag reb e walag ni pumoon ko maruwel ni yugu aram rogon ndariy ban’en ni ke rin’ nib kireb. Rayog nri be guy rogon ni nge pirieg yugu reb e maruwel, machane der yag. Bochan e re n’ey, ma rayog ni nge tabab ni nge lemnag ndakuriy fan. Ere faanra tiyan’ ko tin ke micheg Jehovah, ma uw rogon nrayog ni nge ayuweg?

14. Mang boch i fan ni ma lebguy Jehovah e tin ke micheg?

¹⁴ Gubin ngiyal’ ni ma lebguy Jehovah e tin ke micheg. (Josh. 21:45; 23:14) Boor fan ni ma rin’ e re n’ey. Bin som’on riy e bay rogon nga fithingan ara thin. Ke micheg Jehovah nra ayuweg e pi tapigpig rok ni yad ba yul’yul’, ma rogon u wan’ e ba milfan ngak ni nge lebguy e re n’ey ni ke micheg. (Ps. 31:1-3) Maku reb e, manang Jehovah nra kireban’dad miki mulan’dad ni faanra dabi ayuweg e piin yad bang ko tabinaw rok. Ke micheg nra pi’ e tin nib t’uf ko par rodad nge tin nib t’uf rodad ni fan ko tirok ban’en, ma dariy ban’en nra taleg ndabi lebguy e re n’ey ni ke micheg!​—Matt. 6:30-33; 24:45.

15. (a) Mang magawon e mada’nag e pi Kristiano ko bin som’on e chibog? (b) Mang e be ayuwegdad e Psalm 37:18, 19 ni nge pagan’dad ngay?

¹⁵ Faanra dab da paged talin fan ni ma lebguy Jehovah e tin ke micheg, ma aram e rayog ni nge pagan’dad nra ayuwegdad u nap’an ni kad magawongad ko salpiy. Am lemnag e n’en ni buch ko pi Kristiano ko bin som’on e chibog. Nap’an nni tabab i gafgownag e ulung u Jerusalem, ma aram me wer e piin Kristiano nge bagayad me yan i par nga bang, ma “ke mus ni fapi apostel e dar uned  ko mil.” (Acts 8:1) Am lemnag e n’en nrayog ni nge buch ni bochan e re n’ey. Ra mo’maw’ ko pi Kristiano nem ni ngar yognaged e tin nib t’uf rorad! Bay boch e pi Kristiano nem ndakuriy e gin ngar pared riy nge siyobay rorad. Yugu aram rogon, ma de digeyrad Jehovah mu kur pared ni yad ba felfelan’. (Acts 8:4; Heb. 13:5, 6; Jas. 1:2, 3) I ayuweg Jehovah e pi Kristiano nem ni yad ba yul’yul’, maku arrogodad nra ayuwegdad.​—Mu beeg e Psalm 37:18, 19. *

16. Mang e rayog ni nge k’aringdad ni ngad lemnaged ndaki ga’ fan u wan’ Jehovah e liyor ni gad be tay ngak?

¹⁶ Nap’an ni gad ra pilibthir i yan, ma rayog ni ngad tababgad ni ngad lemnaged ni buchuuw e tin rayog ni ngad pied ngak Jehovah. Rayog ni ku ireray e n’en ni k’aring e magafan’ ngak David ni Pilung u nap’an ni ke pilibthir. (Ps. 71:9) Uw rogon nrayog ni nge ayuwegdad Jehovah?

17. Mang e rayog ni ngad filed ko n’en ni buch rok reb e walag nib pin ni ka nog Jheri ngak?

¹⁷ Am lemnag e n’en ni buch rok reb e walag nib pin ni ka nog Jheri ngak. Nog ngak ni nge un nga reb e muulung ni ngan tay u Tagil’ e Liyor ni murung’agen rogon ni ngan ayuweg ma yibe fal’eg e yungin ke kireb ko Tagil’ e Liyor. Machane dabun ni nge un ko re muulung nem. I yog ni gaar: “Kug pilibthir ma kki yim’ e pumoon rog, ma dariy ba mit e maruwel ni gu manang rogon i rin’ nrayog ni nggu pi’ e ayuw u rogon ni ngan ayuweg min fal’eg e yungin ke kireb ko Tagil’ e Liyor. I gag e dakuriy fag.” Re nep’ nem u m’on ni ngan tay e re muulung ney me weliy Jheri laniyan’ ngak Jehovah u daken e meybil. Nap’an ni taw nga Tagil’ e Liyor ko bin migid e rran, ma ka be maruwar u wan’ ko ri bay fan ni nge yan i un ko re muulung nem fa danga’. Nap’an e re muulung nem ma bay  reb e walag ni pumoon ni pi’ e welthin ni tamilangnag ni bin th’abi ga’ fan e salap nib t’uf ni nge yag ngodad e aram e nge m’agan’dad ngay ni nge skulnagdad Jehovah. I gaar Jheri: “I lungug u wan’ug, ‘Bay e biney e salap rog!’ Bochan e re n’ey ma aram mug yor ni bochan e kug nang ni be fulweg Jehovah taban e meybil rog. Be micheg ngog ni bay ban’en nib ga’ fan nrayog ni nggu pi’ ngak, mab m’agan’ ngay ni nge skulnageg u rogon ni nggu rin’ e re n’ey!” Nap’an ni sul Jheri nge lemnag e rofen nem, me gaar: “Gu wan ko re muulung nem ni gu be rus, ma ke mulan’ug, maku be kireban’ug. Machane tomuren ma kari pagan’ug, ma kki yib e athamgil nga lanin’ug, ma kki yib fag u wan’ug!”

18. Uw rogon ni be tamilangnag e Bible ni kab ga’ fan u wan’ Jehovah e liyor rodad ngak ni yugu aram rogon ni gad be pilibthir i yan?

¹⁸ Nap’an ni gad ra pilibthir i yan, ma rayog ni nge pagan’dad ni ka bay e maruwel nra pi’ Jehovah ngodad ni ngad rin’ed. (Ps. 92:12-15) I fil Jesus ni yugu aram rogon ni gad be lemnag nde ga’ fan e tin gad be rin’, machane Jehovah e rib ga’ fan u wan’ e tin rayog ni ngad rin’ed ni fan ko pigpig rodad ngak. (Luke 21:2-4) Ere mu lemnag e tin rayog ni ngam rin’. Bod nrayog ni ngam weliy murung’agen Jehovah ko girdi’, mag yibilay pi walagdad, mu kum pi’ e athamgil nga laniyan’ e pi walag ni ngar pared ni yad ba yul’yul’. Ma sap Jehovah ngay ni gimew be maruwel u taabang ni gathi bochan e tin be yag ni ngam rin’, ya bochan rogon nib m’agan’um ngay ni ngam fol rok.​—1 Kor. 3:5-9.

19. Mang e be ayuwegdad e Roma 8:38, 39 ni nge pagan’dad ngay?

¹⁹ Ri gad ba felfelan’ ni gad be liyor ngak Jehovah ni ir reb e Got nib ga’ fan u wan’ e piin be pigpig ngak! Ke sunmiydad ni ngad rin’ed e tin nib m’agan’ ngay, ma faan gad ra un ko bin riyul’ e liyor ma ra yibnag e felfelan’ nga lan e yafos rodad. (Rev. 4:11) Yugu aram rogon nde ga’ fadad u wan’ e girdi’ ko re fayleng ney, machane gathi aram rogodad u wan’ Jehovah. (Heb. 11:16, 38) Nap’an nra mulan’dad ni bochan e kad m’argad, ara gad be magawon ko salpiy, ara kad pilibthirgad, ma dab da paged talin ndariy ban’en nrayog ni nge daregdad ko t’ufeg rok e Chitamangidad ni bay u tharmiy.​—Mu beeg e Roma 8:38, 39.