1-2. Mang e yog reb e engel ngak fapi ppin ni ur moyed ko gin nni k’eyag Jesus riy, ma mang e yog Jesus ngorad ni ngar rin’ed?

ROFEN nem e Nisan 16 ko duw ni 33 C.E. nri kakadbul. Ke yib boch e ppin nib t’uf Got rorad ko gin kan chibgiliy Jesus riy. Kari kireban’rad ko n’en ke buch. Ke pag 36 e awa ni kan chibgiliy Somol i Jesus Kristus. Ka ranod ngaram ni yad be nameg ni ngar liyfed downgin Jesus ko florida nge gapgep. Machane ra gingad ya ra guyed ndaki moy downgin Jesus ko gin kan chibgiliy riy. Me yib ba engel i yog ko fapi ppin ni ke fos Jesus ko yam’, miki gaar ngorad: “Ke m’on romed nga Galile; nu rom e bay mu guyed riy!”​—Matt. 28:1-7; Luke 23:56; 24:10.

² Tomuren ni chuw fapi ppin ko gin kan k’eyag Jesus riy, me yib i m’ug ngorad me gaar: ‘Marod nga mogned ngak pi walageg nga ranod nga Galile, ya bay ra guyed gag u rom.’ (Matt. 28:10) Ba mudugil ni bay ban’en nib ga’ fan ni nge yog Jesus ngak pi gachalpen ni ngar rin’ed ni bochan e ireray e n’en som’on ni yarmiy ni ngan rin’ u nap’an nni faseg ko yam’!

3-4. Mang fan nrayog ni nga dogned ni fapi thin ni yog Jesus ko Matthew 28:19, 20 e gathi kemus ni fan ngak e pi apostal rok? (Mu guy e sasing ni bay u wuru’ e re ke babyor ney.)

³ Mu beeg e Matthew 28:16-20. Nap’an fare muulung ni yarmiy Jesus, me yog ngak pi gachalpen murung’agen fare maruwel nib ga’ fan ni ngar rin’ed e ngiyal’ nem. Ku aram e re maruwel ni gad be rin’ e chiney. I gaar Jesus: “Mmarod ngak girdien e pi nam u gubin yang ngam pingeged yad ngar manged pi gachalpeg, . . . mi gimed fil ngorad rogon ni nguur folgad u gubin e tin ni ku gog ngomed ni nguum rin’ed.”

⁴ Baadag Jesus ni nge machib urngin pi gachalpen. Gathi kemus ni  yigoo fare 11 i apostal rok ni yad ba yul’yul’ e tay chilen e re maruwel ney ngorad. Uw rogon ni kad nanged e re n’ey? Nap’an ni yog Jesus ni ngan pingeg e girdi’ ngar manged pi gachalpen, ma gathi yigoo pi apostal rok e yad bay u rom u daken bburey u Galile. Uw rogon ni kad nanged e re n’ey? Dab mu pagtalin ni yog fare engel ngak fapi ppin ni gaar: “Bay mu guyed [u Galile].” Ere rayog ni immoy boch e ppin ni yad ba yul’yul’ ko re muulung nem. Machane gathi kemus aram, ya yog apostal Paul ni yib i m’ug Jesus “ngak pi gachalpen u taab ngiyal’ ni yad ba pag e lal mir’ay.” (1 Kor. 15:6) Uw e buch e re n’ey riy?

5. Mang e gad be fil ko 1 Korinth 15:6?

⁵ Bay fan ni nge mich u wan’dad ni fapi thin ni yog Paul ko 1 Korinth 15:6 e be weliy murung’agen fare muulung nni tay u Galile ni bay murung’agen ko Matthew ko guruy ni 28. Mang fan ni bay tapgin ni nge mich u wan’dad e re n’ey? Bin som’on e, yooren pi gachalpen Jesus e yad e girdi’ nu Galile. Ere ba mom ni nge muulung e pi girdi’ nem ni aram urngirad nga daken reb e burey u Galile ko bin ngar muulunggad u tafen be’ u Jerusalem. Bin migid e, ke mu’ Jesus nge fa 11 i apostal rok ko muulung u tafen be’ u Jerusalem u tomuren ni kan faseg ko yam’. Ere faanra baadag Jesus ni yigoo pi apostal rok e ngar machibgad mi yad pingeg e girdi’ ngar manged pi gachalpen, ma ra yog ngorad u rom u Jerusalem ko bin nge yog ngorad, nge fapi ppin, nge tin ka bay e girdi’ ni ngar mada’gad nga Galile.​—Luke 24:33, 36.

6. Uw rogon ni be dag e Matthew 28:20 ni fare maruwel ni kan tay chilen ni ngan rin’ ni aram e ngan pingeg e girdi’ ngar manged pi gachalpen Jesus e ku bay rogon ngodad e ngiyal’ ney? Uw rogon ni yibe fol ko re thin ney e ngiyal’ ney?

⁶ Mu tay fanam i yan ko bin dalip i fan ni kub ga’ fan. Re n’em ni yog Jesus ni ngan pingeg e girdi’ ngar manged pi gachalpen e gathi kemus ni yigoo pi Kristiano ko bin som’on e chibog e tay chilen ngorad. Uw rogon ni kad nanged e re n’ey? Tin tomur e thin ni yog Jesus ngak pi gachalpen e gaar: “Gu bay romed nge yan i mada’ ko ngiyal’ ni ke chugur nga tungun e re m’ag ney.” (Matt. 28:20, NW) Boor e girdi’ e ngiyal’ ney ni yad be pingeg yugu boch e girdi’ ni ngar manged pi gachalpen Jesus ni bod rogon ni yog. Am lemnag e re n’ey! Gubin e duw nib chugur ko 300,000 e girdi’ ni yibe taufenagrad yad be mang boch e Pi Mich Rok Jehovah nge boch i gachalpen Jesus Kristus!

7. Mang e ngad weliyed e chiney, ma mang fan?

⁷ Boor e piin yad be fil e Bible ni yad be mon’og ma yad be un ko taufe. Machane, bod ni bay boch e girdi’ ni yad be fil e Bible ni yad be rus ni ngar manged boch i gachalpen Jesus. Yad baadag ni yad be fil e Bible, machane der yag ni ngar mon’oggad ngar uned ko taufe. Faanra bay be’ ni ga be fil e Bible ngak, mab mudugil ni ga baadag ni ngam ayuweg ni nge fol ko tin be fil me mang reb i gachalpen Kristus. Re article ney e gad ra weliy riy rogon ni ngad ayuweged e piin gad be fil e Bible ngorad ni nge t’uf Jehovah rorad, mi yad mon’og ko tirok Got ban’en. Mang fan nib t’uf ni ngad weliyed murung’agen e re n’ey? Bochan e bay yu ngiyal’ nib t’uf ni ngad dugliyed ko ngad ululgad i fil e Bible ngak be’, fa ngad talgad.

8. Mang fan nrayog ni nge mo’maw’ ni ngad ayuweged e piin gad ma fil e Bible ngorad ni nge t’uf Jehovah rorad?

⁸ Baadag Jehovah ni nge pigpig e girdi’ ngak ni bochan e ba t’uf rorad. Ere n’en ni gad be nameg e ngad ayuweged e piin gad ma fil e Bible ngorad ni nge tamilang u wan’rad nri ma lemnagrad Jehovah ni be’ nge be’, ma ri yad ba t’uf rok. Gad baadag ni ngad ayuweged yad ni ngar ted Jehovah ni gowa ba matam ni “ma ayuweg e piin ka nim’ rorad ma ma yoror rok e piin ke yim’ figirngirad.” (Ps. 68:5, BT) Nap’an nra nang e piin gad ma fil e Bible ngorad nri yad ba t’uf rok Got, ma aram e ra tabab ni ngki t’uf Got rorad. Bay boch e piin gad ma fil e Bible ngorad nib mo’maw’ ngorad ni ngar ted Jehovah ni bod rogon reb e Matam ni ma t’ufegey ni bochan e chitamangirad e da i dag e t’ufeg ngorad. (2 Tim. 3:1, 3) Ere nap’an ni ga be fil e Bible ngak be’ ni aray rogon, ma ngarim tamilangnag ngak pi fel’ngin Jehovah nrib manigil. Mu ayuweg e piin ga  ma fil e Bible ngorad ni nge tamilang u wan’rad ni Got rodad ni gad ba t’uf rok e baadag ni nge pi’ e yafos ni manemus ngorad, ma ba’ ni nge ayuwegrad ni nge yag e re n’ey ngorad. Ku mang e rayog ni ngad rin’ed?

9-10. Mang fa gal ke babyor nsusun e ngad fanayed ni ngad filed e Bible ku be’? Mang fan ni ngad fanayed e gal ke babyor ney?

⁹ Mu fanay fa gal ke babyor ni “Mang e Ri Be Fil e Bible?” nge “Um Pired ni Gimed Ba T’uf rok Got.” Kan ngongliy e gal ke babyor ney ni ngad fanayed ni ngad ayuweged e piin gad ma fil e Bible ngorad ni nge t’uf Jehovah rorad. Bod ni guruy ni 1 ko fare ke babyor ni Be Fil e Bible e be pi’ e fulweg ko fapi deer ni be gaar: Ma runguydad Got ma bay fadad u wan’ fa danga’?, Uw rogon e gafgow rodad u wan’ Got?, nge Rayog ni ngam chugur ngak Jehovah, fa? Ma fare ke babyor ni T’ufeg rok Got e ra ayuweg e piin gad ma fil e Bible ngorad ni nge tamilang u wan’rad rogon nrayog ni nge mon’og e par rorad ni faan yad ra fol ko pi kenggin e motochiyel u Bible, miki chugurnagrad ngak Jehovah. Yugu aram rogon ni kam mu’ i fil e gal ke babyor ney ngak yugu boch e girdi’, machane kab t’uf ni ngam fal’eg rogom u m’on ni ngam man mu guy e en ngam filew e Bible mu kum fal’eg i lemnag e n’en nib t’uf rok.

 ¹⁰ Machane, uw rogon ni faanra baadag facha’ ni gimew be fil e Bible ni ngam weliyew murung’agen ban’en ni bay u yugu reb e babyor ndariy ko fare Tafen Talin e Maruwel ni Yima Fil Ban’en Riy ko Girdi’? Rayog ni ngam pi’ e athamgil nga laniyan’ ni nge beeg e re ke babyor nem u ba ngiyal’ ni yigoo ir ya nge yag nim ululgow i fil e Bible u lan fa gal ke babyor ni kad weliyed murung’agen.

11. Mingiyal’ e susun ngad tababgad ko meybil u m’on ngu tomuren e fol Bible ni kad ted be’? Uw rogon ni ngad ayuweged facha’ ni nge nang feni ga’ fan ni ngan rin’ e re n’ey?

¹¹ Mu tababgow ko meybil u nap’an e fol Bible. Ba ga’ nib fel’ ndab mu son nge n’uw nap’an mfin mu tabab i fek e meybil u nap’an ni gimew be fil be’ e Bible. Ba fel’ ni ngam tabab i fek e meybil u lan e in som’on e wik u tomuren ni kam tababgow ko fol Bible. Thingar da ayuweged facha’ ni be fil e Bible ni nge nang ni kemus nu daken gelngin Got nib thothup e rayog ni nge nang fan e Thin rok Got riy. Bay boch e walag ni yad ma weliy ngak faen ni yad be fol Bible fan ni yima meybil u nap’an e fol Bible. Som’on e yad ma beeg fare thin ko James 1:5 ni be gaar: “Faanra dariy e gonop rok bigimed, ma nge wenignag ngak Got.” Tomuren ma aram mar fithed facha’ ni lungurad, “Uw rogon ni ngad ninged e gonop ngak Got?” Dabisiy nra yog facha’ nsusun e ngad meybilgad ngak Got.

12. Uw rogon ni ngam fanay fare thin ko Psalm 139:2-4 ni ngam ayuweg e en gimew be fil e Bible ni nge weliy gubin ban’en ni bay u laniyan’ ngak Jehovah u daken e meybil?

¹² Mu fil ngak rogon ni nge meybil. Mu weliy ngak ni baadag Jehovah ni nge motoyil ko meybil rok ni ke yib u gum’irchaen. Ku mog ngak ni faan gad ra meybil ngak Jehovah, ma aram e rayog ni ngad weliyed ngak urngin ban’en ni bay u lanin’dad nge boch ban’en nsana dubdad ni ngad weliyed ngak be’. Bin riyul’ riy e, manang Jehovah e tin bay u fithik’ i lanin’dad ndariy be’ ni manang. (Mu beeg e Psalm 139:2-4.) Ku rayog ni ngad pied e athamgil nga laniyan’ e piin gad ma fil e Bible ngorad ni ngar ninged e ayuw ngak Got ni nge ayuwegrad ngar thilyeged boch e lem nde puluw ni bay rorad, mi yad tal i rin’ boch ban’en ni kar mechamgad ngay nib kireb. Bod nrayog ni bay be’ ni ma fil e Bible ni baadag ni nge un nga reb e madnom nder ma un e piin Kristiano ngay. Manang nde fel’ ni nge un ko re madnom nem, machane bin riyul’ riy e bay boch ban’en ni yima rin’ riy ni baadag ni nge un ngay. Mu pi’ e athamgil ngak ni ngari weliy laniyan’ ngak Jehovah, me wenig ngak ni nge ayuweg ni nge ga’ fan u wan’ e tin nib t’uf rok Got.​—Ps. 97:10.

13. (a) Mang fan ndab da songad nge n’uw nap’an mfin nda pininged e en gad ma fil e Bible ngak ni nge un ko muulung? (b) Uw rogon nrayog ni ngad ayuweged e en gad ma fil e Bible ngak ni nge dabi magagawon u nap’an nra yib nga Tagil’ e Liyor rodad?

¹³ Dab mu son nge n’uw nap’an mfin mu pining e en ga ma fil e Bible ngak ni nge un ko muulung. Tin nra rung’ag me guy u nap’an e muulung ko piin Kristiano e rayog ni nge k’aring ni nge pigpig ngak Jehovah, miki ayuweg ni nge mon’og. Mu dag fare video ngak ni kenggin e Mang e Yima Rin’ ko Pi Tagil’ e Liyor Romad?, mag pining ni nge un ngom ko muulung. Faanra rayog mag ayuweg u rogon ni nge thap ko muulung. Kub fel’ ni ngaud pininged boch e walag nib thilthil ni nge un ngodad u nap’an ni gad be fil e Bible ngak be’. Gad ra rin’ e re n’ey ma rayog ni nge nang facha’ yugu boch e walag u lan e ulung, ma nap’an nra un ko muulung ma dabi magagawon.

14. Mang e rayog ni nge k’aring e en gimew be fil e Bible ni nge mon’og ko tirok Got ban’en?

¹⁴ N’en gad be nameg e ngad ayuweged e en gad be fil e Bible ngak ni nge mon’og ko tirok Got ban’en. (Efe. 4:13) Nap’an nra m’agan’ be’ ngay ni ngad filed e Bible, ma rayog ni kemus ni be lemnag rogon ni nge yib angin e fol Bible ngak. Machane nap’an nra gel e t’ufeg rok ngak Jehovah, ma dabisiy nra tabab ni nge lemnag rogon nrayog ni nge ayuweg yugu boch e girdi’ nib muun e piin yad bang ko ulung ngay. (Matt. 22:37-39) Ra taw ko ngiyal’ nib puluw ni ngam rin’ ma dab mu tuntun ni nga mog ngak murung’agen rogon nrayog ni ngad pied e salpiy ni ayuw ni fan ko fare maruwel ni machib.

15. Uw rogon ni ngad ayuweged e en gad be fil e Bible ni nge nang e n’en nge rin’ u nap’an ke mada’nag e magawon?

 ¹⁵ Mu ayuweg e en gimew be fil e Bible ni nge nang e n’en nge rin’ u nap’an ke mada’nag e magawon. Susun ni en ga be fil e Bible ngak e ir reb e unbaptized publisher, me yog ngom ni bay be’ u lan e ulung ni ke yog ara ke rin’ ban’en ni ke kirebnag laniyan’. Gathi nga mog ngak ko mini’ e ba fel’ e rok me mini’ e ba kireb e rok, ya ngam weliy ngak e n’en be yog e Bible nsusun e nge rin’. Rayog ni nge n’ag fan e kireb ko fare walag, fa reb e faanra dabiyog ni nge tal ndab ki lemnag, ma aram e susun nge yan i non ngak fare walag u fithik’ e gol nge t’ufeg ni be nameg ni nge ‘sulweg walagen.’ (Mu taarebrogonnag ko Matthew 18:15.) Mu ayuweg ni nge fal’eg i lemnag rogon e thin ni nge yan i yog ko fare walag. Kum dag ngak rogon ni nge fanay fare app ni JW Library^®, nge Research Guide for Jehovah’s Witnesses, nge jw.org^® ni nge nang rogon ni nge pithig e pi magawon ni be mada’nag. Faanra nang rogon ni nge pithig e magawon ni ke sum u thilrad yugu boch e girdi’ u m’on ni nge un ko taufe, mab mudugil nu tomuren nra un ko taufe ma ra fel’ e tha’ u thilrad e pi walag u lan e ulung.

16. Mang fan nib fel’ ni ngam pining yugu boch e walag u lan e ulung ni ngar uned ngom u nap’an ni ga be fil e Bible ngak be’?

¹⁶ Mu pining yugu boch e walag u lan e ulung nge en ma lekag e ulung ni ngar uned ngom u nap’an ni ga be fil e Bible ngak be’. Mang fan? Bochan fapi n’em ni kad weliyed, maku reb i fan e bochan ni bay boch e walag nrayog ni ngar ayuweged facha’ u reb e kanawo’ ndabiyog ni ngam rin’ riy. Bod nsusun e boor yay ni be guy rogon e en ga be fil e Bible ngak ni nge tal ko tamagow, machane der yag. Rayog ni ngam pining reb e Pi Mich ni nge un ngom ko re fol Bible nem ni aram rogon e magawon rok kafram, ma sana boor yay ni i guy rogon ni nge taleg machane ka be sul ngay. Rayog ni nge pi’ fare walag boch e fonow ngak facha’ ni gimew be fil e Bible u rogon ni nge gel ko binem e magawon. Faanra ke un reb e walag ni pumoon ngom ni ke ilal ko tirok Got ban’en ma ga be magagawon ni ngam fil e Bible ngak facha’ ni bay, ma rayog ni nga mog ngak ni nge mang ir e yarmiy fare fol Bible e rofen nem. Faan ga ra pining boch e walag ni ngar uned ngom u nap’an ni ga be fil e Bible ngak be’, ma rayog ni nge yib angin ngak facha’ e n’en ke buch rorad. Dab da paged talin ni n’en gad be nameg e ngad ayuweged e en gad be fil e Bible ngak ni nge mon’og ko tirok Got ban’en.

17-18. Mang e ba fel’ ni ngam lemnag u m’on ni ngam dugliy ni ngam talgow be’ ko fol Bible?

¹⁷ Faanra der thilyeg faen gimew be fil e Bible boch ban’en u rarogon, ma bay ba ngiyal’ nra taw ngay mab fel’ ni ngam fithem ni nge lungum, ‘Gur, ba fel’ ni nggu tal ndab kug fil e Bible ngak, fa?’ U m’on ni ngam dugliy ban’en mab fel’ ni ngam lemnag rarogon facha’. Bay boch e girdi’ nib papey ni ma mon’og, machane bay boch nib sowath. Mu fithem ni nge lungum: ‘Ba fel’ payngin ni be mon’og e en gu be fil e Bible ngak ni be yan u rogon e tin rayog ni nge rin’, fa?’ ‘Ke tabab ni nge ‘fol’ ko tin be fil, fa?’ (Matt. 28:20) Rayog nib n’uw nap’an mfini mang be’ ni be fil e Bible reb i gachalpen Jesus,  machane susun e nge m’ug ni bay boch ban’en ni be thilyeg u rarogon.

¹⁸ Machane uw rogon ni faanra ke n’uw nap’an ni kam filew be’ e Bible, ma der dag nib ga’ fan u wan’ e fol Bible ni gimew be tay? Am lemnag ban’en nrayog ni nge buch: Kam mu’gow i fil fare ke babyor ni Be Fil e Bible, ma sana kam tababnagew fa ken nem ni T’ufeg rok Got, machane dariy bayay ni ke un ko muulung ni kub muun e Puguran ngay! Ba ga’ ni ma yog ndabiyog ni ngam man mu guy ni bochan boch ban’en nde ga’ fan. Faanra ireray e n’en be rin’ e en ga be fil e Bible ngak, ma thingar mu non ngak nib tamilang. *

19. Mang e rayog ni nga mog ngak be’ ni be m’ug ni gathi rib ga’ fan e fol Bible u wan’, ma mang e ba t’uf ni ngam lemnag?

¹⁹ Som’on e rayog ni ngam fith ni nge lungum, ‘Ga be lemnag, ma mang e n’en th’abi mo’maw’ ni ngam rin’ ya nge yag nim mang reb e Pi Mich Rok Jehovah?’ Sana ra fulweg ni gaar, ‘Gu baadag ni gadow be fil e Bible, machane dariy e n’en nra rin’ mug mang reb e Pi Mich Rok Jehovah!’ Faanra aray rogon e lem rok ni yugu aram rogon ni ke n’uw nap’an ni kam filew e Bible, ma gur, bay fan ni ngkum ululgow ko fol Bible? Maku reb e, rayog ni fin aram e ngiyal’ nra yog ngom e n’en be taleg nder yag ni nge mon’og. Bod nsana rayog ni be lemnag ndabiyog ni nge un ko machib u mit e tabinaw. Ere chiney ni kam nang rogon laniyan’ e rayog ni ngam nang rogon ni ngam ayuweg.

20. Uw rogon ni be ayuwegdad e Acts 13:48 ni ngad dugliyed ko ngad ululgad i fil e Bible ngak be’ fa danga’?

²⁰ Ba gel e kireban’ riy ya bay boch e piin gad ma fil e Bible ngorad ni yad bod piyu Israel u nap’an Ezekiel. I weliy Jehovah murung’agen piyu Israel ngak Ezekiel ni gaar: “Rogon ni yad be lemnigem e taareb rogom ngak be’ ni ma paleg owchey ni ma yin’ tangin e adag ara be chubeg ba harp ni talin e musik. Yad be motoyil nga urngin e thin ni ga be weliy ma dariy taab bug riy ni yad be fol riy.” (Ezek. 33:32) Rayog ni nge mo’maw’ ngodad ni nga dogned ngak be’ ni ngad talgad ko fol Bible. Machane “daki yoor e tayim ni ke magey.” (1 Kor. 7:29) Ere ba t’uf ni ngad gayed e piin “bay rogon ni nge yag e yafos ni manemus ngorad” ko bin ni ngaud filed e Bible ngak be’ nder mon’og.​—Mu beeg e Acts 13:48, NW. *

21. Mang e thin nu Bible ni fan ko duw ni 2020, ma mang e ra ayuwegdad ni ngad rin’ed?

²¹ Thin nu Bible ni fan ko duw ni 2020 e ra ayuwegdad ni ngad lemnaged rogon nrayog ni ngad mon’oggad u rogon ni ngad pingeged e girdi’ ngar manged pi gachalpen Jesus. Kub muun ngay boch e thin ni yog Jesus u nap’an fare muulung nib ga’ fan nra ted pi gachalpen u daken bburey u Galile. I gaar: “Mmarod . . . ngam pingeged yad ngar manged pi gachalpeg, mi gimed taufenagrad.”​—Matt. 28:19.