Be m’ug e mich riy ni mang Jesus e Prist Nth’abi Tolang u nap’an nni taufenag ko duw ni 29 C.E. Uw rogon ni kad nanged e re n’ey? Nap’an nni taufenag Jesus me dag nib m’agan’ ngay ni nge pi’ e yafos rok nib maligach u daken fare altar ni be yip’ fan e n’en ni “ba adag” Got ara n’en nib m’agan’ ngay. (Gal. 1:4; Heb. 10:5-10) Altar e aram reb e ban’en ni bay u lan e tempel nib ga’ fan. Ere rayog ni sum fare tempel nib fanathin u nap’an nni taufenag Jesus. Fare tempel rok Jehovah nib fanathin e be yip’ fan urngin ban’en ni bay ni be ayuwegdad ni ngad liyorgad ngak ko bin nib puluw e kanawo’ ni bochan fare biyul ni maligach ni ke pi’ Jesus.​—Matt. 3:16, 17; Heb. 5:4-6.

Ba t’uf be’ ni nge mang prist nth’abi tolang ko fare tempel nib fanathin. Ere aram fan ni dugliy Jehovah Jesus ni nge mang prist nth’abi tolang u daken “fare Kan ni Thothup [“gelngin Got nib thothup,” NW] nge gelngin.” (Acts 10:37, 38; Mark 1:9-11) Machane, uw rogon ma gad nang nriyul’ nni dugliy Jesus ni nge mang Prist Nth’abi Tolang u m’on ni yim’ ngkun faseg ko yam’? N’en ni i rin’ Aron nge piin ur manged prist nib tolang nga tomuren e ra ayuwegdad ni ngad nanged e fulweg ko re deer ney.

Fare Motochiyel ni pi’ Jehovah ngak Moses e be yog ni kemus ni yigoo fare prist nib tolang e rayog ni nge yan ko Gin Th’abi Thothup ko fare tabernacle, nge Gin Th’abi Thothup ko fare tempel nni ngongliy boch nga tomuren. Gin Th’abi Thothup e ba ki’ ko Gin nib Thothup, ma bay ba kateng u thilin e gali yang i n’em. Kemus ni yigoo nap’an fare Rran ko Biyul e rayog ni nge yan e en nib tolang ko prist nga barba’ e gi kateng nem. (Heb. 9:1-3, 6, 7) Aron nge piin ur manged prist nib tolang nga tomuren e nni dugliyrad ni ngar manged prist nib tolang u m’on nrayog ni nga ranod nga barba’ fagi kateng ngar thum’gad nga lan e Gin Th’abi Thothup. Ere ku arrogon Jesus nthingar ni dugliy ni nge mang Prist Nth’abi Tolang u m’on ni nge yim’, me yan “i kuruf fa gi mad ni kateng ni bay u tempel ni aram downgin” nge yan nga tharmiy. (Heb. 10:20) Aram fan ni yog apostal Paul ni Jesus e ke yib ni “ir e prist nib th’abi tolang” me yan i kuruf ‘fare tent ni ir e be pigpig u lan ni ka ba ga’ fan ma ri kab gel feni fel’ ni gathi girdi’ e ngongliy,’ me yan nga lan e “tharmiy.”​—Heb. 9:11, 24.

Dariy ban’en nib thil ko ngiyal’ nni micheg e bin nib beech e m’ag nge ngiyal’ ni tabab. Mang fan? Nap’an ni yan Jesus nga tharmiy nge yan i ognag fel’ngin e yafos rok nib flont ni fan ngodad, ma aram me rin’ e bin som’on u dalip ban’en nthingari rin’ ya nge yag ni micheg fa bin nib beech e m’ag. Ku aram e n’en ni tababnag e re m’ag nem. Mang e re dalip i n’em?

Som’on e, yan i sak’iy Jesus nga p’eowchen Jehovah. Me migid, ma aram me ognag ngak Jehovah fel’ngin fare maligach ni ke pi’. Ma tomur riy, ma aram me m’agan’ Jehovah nga fel’ngin rachaen Jesus ni map’. Fin ngiyal’ ni rin’ Jesus e re dalip i n’ey e aram e ngiyal’ ni tabab fa bin nib beech e m’ag.

Der yog e Bible e ngiyal’ ni m’agan’ Jehovah nga fel’ngin e maligach ni pi’ Jesus. Ere dabiyog ni ngar dogned e ngiyal’ nni micheg fa bin nib beech e m’ag nge ngiyal’ ni tabab. Machane, gad manang ni ragag e rran u m’on ko rofen ni Pentekost, ma aram me yan Jesus nga tharmiy. (Acts 1:3) Ba ngiyal’ ko re ngiyal’ i n’em e ognag ngak Jehovah fel’ngin fare maligach ni pi’, ma aram me m’agan’ Jehovah ngay. (Heb. 9:12) Nap’an e rofen ni Pentekost, me m’ug e mich riy ni kan mu’ i micheg ma ke tabab fa bin beech e m’ag. (Acts 2:1-4, 32, 33) Ere ba tamilang ni taw ko ngiyal’ nem ma bay fa bin nib beech e m’ag ni be maruwel.

Ere ni micheg miki tabab fa bin nib beech e m’ag u tomuren ni m’agan’ Jehovah nga fel’ngin rachaen Jesus ni map’ me uneg e piin kan dugliyrad nga lan e re m’ag nem. Aram e ngiyal’ ni tabab e re m’ag nem ni Jesus ni ir e Prist Nth’abi Tolang e Ta Maaf riy.​—Heb. 7:25; 8:1-3, 6; 9:13-15.