1. Mang reb e ban’en ni gad ma felfelan’ ngay nrogon ni bay ko 3 John 3, 4?

MU LEMNAG gelngin e felfelan’ ni tay apostal John u nap’an ni rung’ag ni piin ke ayuwegrad kar nanged e tin riyul’ e ka yad be ulul ko pigpig ni yad be tay ngak Jehovah u fithik’ e yul’yul’! Boor e magawon ni be mada’nag e pi Kristiano ney ni yad ba yul’yul’, ma be athamgil John u rogon nrayog rok ni nge gelnag e michan’ rorad, ya yad bod bogi bitir ni fak. Ku arrogodad nib gel e felfelan’ ni gad ma tay u nap’an nra dugliy pi fakdad ara piin gad be ayuwegrad ni ngar nanged e tin riyul’ ni ngar ognaged e yafos rorad ngak Jehovah mar ululgad ko pigpig ni yad be tay ngak.​—Mu beeg e 3 John 3, 4. 

2. Mang fan fa dalip yang i babyor ni yoloy John?

² Nap’an e duw ni 98 C.E., ma sana be par John u Efesus ara bang nib chugur ngaram. Sana rayog ni yan i par ngaram u tomuren nni pag u kalbus ko fare donguch nu Patmos. Bang ko re ngiyal’ i n’em ma aram me pow’iy gelngin Jehovah nib thothup ni nge yoloy dalip yang i babyor. Fan ni yoloy e yungi babyor nem e bochan ni nge pi’ e athamgil nga laniyan’ e pi Kristiano ni yad ba yul’yul’ ni ngar pared nib mich Jesus u wan’rad mar ululgad ni nga u ranod u kanawoen e tin riyul’.

3. Mang boch e deer ni gad ra weliy e fulweg riy?

³ Ngiyal’ nem e yigoo John e kab fos u fithik’ fapi apostal, ma be magafan’ nga boch e ngongol nde puluw ni be rin’ boch e tamachib ni googsur ni be magawonnag e ulung. * (1 John 2:18, 19, 26) Pi tamachib ni googsur nem e u rogned ni yad manang Got, machane darur folgad ko pi motochiyel rok Jehovah. Chiney e ngad weliyed murung’agen fare fonow nni thagthagnag nga laniyan’ John ni nge pi’. Nap’an ni gad be weliy e re n’ey, ma gad ra weliy e fulweg u dalip e deer ni be gaar: Mang e be yip’ fan ni nga u darod u kanawoen e tin riyul’? Mang e rayog ni nge talegdad ndab kud rin’ed e re n’ey? Ma uw rogon nrayog ni nge bagadad me ayuweg bagadad ni nge par ko tin riyul’?

4. Mang e ba t’uf ni ngad rin’ed ya nge yag ni nga u darod u kanawoen e tin riyul’ nrogon ni bay ko 1 John 2:3-6 nge 2 John 4, 6?

⁴ Ra nga u darod u kanawoen e tin riyul’, mab t’uf ni ngad nanged e tin riyul’ ni bay u lan e Thin rok Got ni aram e Bible. Maku reb e, thingar ud folgad ko “thin rok [Jehovah].” (Mu beeg e 1 John 2:3-6; 2 John 4, 6.) Jesus e ke dag e bin th’abi fel’ e kanawo’ u rogon ni ngan fol rok Jehovah. Ere reb e kanawo’ nib ga’ fan nrayog ni ngad folgad rok Jehovah riy e aram e ngad folwokgad rok Jesus u rogon kanawoen nth’abi fel’ nrayog ni ngad rin’ed.​—John 8:29; 1 Pet. 2:21.

5. Mang e thingari mich u wan’dad?

⁵ Ra ngaud pared ni gad be yan u kanawoen e tin riyul’, ma thingari mich u wan’dad ni Jehovah e ir e bin riyul’ e Got, mab riyul’ urngin ban’en ni be yog ngodad u lan e Thin rok ni aram e Bible. Thingar ki mich u wan’dad ni Jesus e ir fare Messiah ni kan micheg. Boor e girdi’ e ngiyal’ ney ni ma maruwar u wan’rad ni Jesus e ir e kan dugliy ni nge mang Pilung u Gil’ilungun Got. I yog John u m’on riy ni boor e “piin ni yad be bannag e girdi’” nra ur bannaged e piin gathi ri be mich u wan’rad e tin riyul’ u murung’agen Jehovah nge Jesus. (2 John 7-11) I yoloy John ni gaar: “Mini’ e en ni be lifith l’ugun? En ni ir e be yog ni Jesus e gathi ir faanem i Kristus.” (1 John 2:22) Ere taare kanawo’ ni bay ndabiyog ni ngan bannagdad riy e aram e ngad filed e Thin rok Got. Faan gad ra rin’ e re n’ey, ma aram e rayog ni ngad nanged Jehovah nge Jesus. (John 17:3) Ku aram rogon nrayog ni ngari mich u wan’dad ni gad bay ko tin riyul’.

6. Mang reb e magawon ni ma mada’nag e pi Kristiano ni kab fel’ yangarrad?

⁶ Gubin e Kristiano nthingar ra kol ayuwgad ndab ra paged boch e machib ni ke sum ko girdi’ ni nge bannagrad. (1 John 2:26) Ba ga’ ni pi Kristiano ni kab fel’ yangarrad e ba t’uf ni ngar kol ayuwgad ko re wup ney. Alexia * nreb e walag nib pin ni 25 e duw rok ni be’ nu France e yog ni gaar: “Nap’an ni kug bay u skul, mug fil murung’agen fare machib ni ke sum e girdi’ ko gamanman nge ku boch e machib ni ke sum ko girdi’, ma aram me k’aringeg e pi n’ey ni nge maruwar e tin riyul’ u wan’ug. Bay yu ngiyal’ ni gu baadag ni gu ma motoyil ko pi machib nem. Machane, gu lemnag nde puluw ni nggu fek owcheg ko tin be fil e Bible me mich u wan’ug urngin ban’en ni be yog e pi sensey rog.” Ere fil Alexia fare ke babyor ni Life​—How Did It Get Here? By Evolution or by Creation? De gaman in e wik nga tomuren ma daki maruwar boch ban’en u wan’. I yog ni gaar: “Gu micheg nga  lanin’ug ni bay e tin riyul’ u lan e Bible. Maku reb e, gu nang ni faan gu ra fol ko thin riy ma rayog ni nggu pirieg e felfelan’ nge gapas.”

7. Mang e thingar da kol ayuwgad ndab da rin’ed, ma mang fan?

⁷ Gubin e Kristiano ni tabab ko tin kab bitir nge mada’ ko tin ke pilibthir nthingar ra kol ayuwgad ndab ur dake yad be pigpig ngak Jehovah, machane ka yad be rin’ boch e ngongol nib kireb. I yog John ndabiyog ni nga darod u kanawoen e tin riyul’ ma ka gad be un nga boch e ngongol nib kireb. (1 John 1:6) Faanra gad baadag ni nge felfelan’ Jehovah ngodad, ma gubin ngiyal’ nthingar dab da paged talin ni ma guy Jehovah urngin ban’en ni gad ma rin’. Mus ni faanra der guy e girdi’ e tin gad be rin’ nib mith, machane Jehovah e rayog ni nge guy urngin ban’en ni gad be rin’.​—Heb. 4:13.

8. Mang e thingar da siyeged?

⁸ Thingar da siyeged rogon ni ma lemnag e girdi’ nu fayleng e denen. I yoloy apostal John ni gaar: “Faanra lungudad e dariy e denen rodad, ma aram e gadad be bannagdad ma tin nib riyul’ e dariy u fithik’ i lanin’dad.” (1 John 1:8) Pi tamachib ni googsur ni ur moyed u nap’an John e u rogned nrayog ni nga i denen be’ ma ka be par nib fel’ e tha’ u thilrow Got. Ngiyal’ ney e ka gad be par u fithik’ e girdi’ ni aram rogon e lem rorad. Boor e girdi’ ni yad ma yog nib mich Got u wan’rad, machane de puluw u wan’rad e n’en ke yog Jehovah u murung’agen e denen. Pi girdi’ ney e ba ga’ nri der ma puluw u wan’rad e n’en be yog Jehovah u murung’agen e par ko pumoon nge ppin. Tin baaray e ngongol ni ma yog Jehovah nra rin’ be’ ma aram e ke denen e yad ma yog ni aram boch e ngongol nrayog ni nge rin’ be’ ni faanra baadag.

9. Mang fan nib fel’ ni faanra fol e piin fel’ yangaren ko n’en be yog e Bible nib puluw ni ngan rin’?

⁹ Rib mo’maw’ ngak e pi Kristiano ni kab fel’ yangarrad ni nge puluw rogon e lem rorad u murung’agen e par ko pumoon nge ppin ni faanra girdi’ u skul ara tabon e maruwel rorad e darur folgad ko n’en be yog e Bible u murung’agen e re n’ey. Ireray e n’en ni buch rok reb e pagel ni ka nog Aleksandar ngak. I gaar: “Immoy boch e rugod u skul ni ur guyed rogon ni ngar towasariyed gag ni  nggu pared. Rogned nsana gu baadag e piin pumoon ni bochan e dariy reb e ppin nib fel’ e thin romow.” Ku rayog ni nge buch ban’en rom ni aray rogon. Machane faan ga ra rin’ e n’en ni ga manang nib puluw ni ngam rin’ nrogon ni be yog e Bible, ma ga ra felfelan’ ngom, mag ayuweg fithik’ i dowam, me yag ni nge dab mu rin’ ban’en nra amithnag lanin’um ko tomur, miki par nib fel’ e tha’ u thilmew Jehovah. Maku reb e, urngin yay ni ga ra siyeg e tin yibe waliyem ngay, ma ra mom ngom ni ngam rin’ e tin nib fel’. Ku dab mu pagtalin nrogon e lem ko girdi’ nu fayleng u murung’agen e par ko pumoon nge ppin e ke sum rok Satan. Ere nap’an ni ga ra siyeg ni ngam lem ni bod rogon e girdi’ nu fayleng, ma aram e kam ‘gel ngak Faanem nib Kireb.’​—1 John 2:14.

10. Uw rogon ni be ayuwegdad fare thin ko 1 John 1:9 ni ngad pigpiggad ngak Jehovah nib beech e nangan’ rodad?

¹⁰ Ba puluw u wan’dad ni Jehovah e ir e bay mat’awun ni nge yog ko ba miti mang ngongol e yira rin’ ma aram e kan denen. Ma gad ma athamgil u rogon nrayog rodad ndab da denengad. Machane faanra kad rin’ed reb e denen, ma gad ma wenignag e denen rodad ngak Jehovah u daken e meybil. (Mu beeg e 1 John 1:9.) Ma faanra ba ubchiya’ e denen ni kad rin’ed, ma gad ma ning e ayuw ko piin piilal ni ke tayrad Jehovah ni ngar ayuweged gadad. (Jas. 5:14-16) Machane, susun e dab ud pared ni gad be lemnag e kireb ni ud rin’ed kafram. Mang fan? Bochan ni Chitamangidad ni gad ba t’uf rok e ke pi’ fare biyul ni maligach u daken Fak ya nge yag ni n’ag fan e denen rodad. Nap’an nra yog Jehovah nra n’ag fan u wan’ e denen ni ke rin’ be’ ni ke kalngan’ riy, ma ra rin’ nrogon ni ke yog. Ere ke bing Jehovah e kanawo’ ngodad nrayog ni ngad pigpiggad ngak nib beech e nangan’ rodad.​—1 John 2:1, 2, 12; 3:19, 20.

11. Uw rogon ni ngad ayuweged gadad u boch e machib nrayog ni nge warnag e michan’ rodad?

¹¹ Thingar da siyeged e machib ko piin kar digeyed e bin riyul’ e liyor ma yad be chel ngaur togopuluwgad ngay. Ka nap’an ni sum e ulung ni Kristiano ni be fanay Moonyan’ e piin yad ma bannag e girdi’ ni ngar guyed rogon ni nge war e michan’ ko piin Kristiano. Bochan e re n’ey, ma aram fan  nib t’uf ni ngad nanged e n’en nib thil u thilin e tin riyul’ nge tin de riyul’. * Rayog ni nge fanay e pi toogor rodad e Internet ara yungi n’en bay ko Internet ni yima non riy ko girdi’ ni ngar guyed rogon ni ngar warnaged e pagan’ rodad ngak Jehovah nge t’ufeg rodad ngak pi walagdad. Ere dabi mich u wan’um e tiney e ban, ya ke sum rok Satan!​—1 John 4:1, 6; Rev. 12:9.

12. Mang fan nsusun e ngad guyed rogon ni ngari mich u wan’dad e tin riyul’ ni kad filed?

¹² Ra ngad siyeged e pi n’en be rin’ Satan ni nge warnag e michan’ rodad, mab t’uf ni ngari pagan’dad ngak Jesus nge rogon ni be maruwel Jehovah u daken ni nge lebguy e n’en nib m’agan’ ngay. Kub t’uf ni nge pagan’dad ngak e piin be pow’iy Jehovah e ulung rok u dakenrad e ngiyal’ ney. (Matt. 24:45-47) Rayog ni ngari gel e pagan’ rodad ni faanra ud filed e Thin rok Got ni gubin ngiyal’. Faan gad ra rin’ ni aray rogon, ma ra par e michan’ rodad ni bod rogon ba ke gek’iy nib toar lik’ngin nga fithik’ e but’. Ki yog Paul ban’en ni taareb fan ko re n’ey u nap’an ni be yol ko ulung nu Kolose. I gaar: “Ke mich u wun’med ni Kristus Jesus e ir e Somol romed, ere um pired rok. Mu tiyed lik’ngimed nib toar nga fithik’ Kristus, mu ubunged e ngongol romed nga daken yi ir e def romed, mi i gel i yan e mich u wun’med ngak.” (Kol. 2:6, 7) Faan gad ra maruwel nib gel ni ngad gelnaged e michan’ rodad, ma dabiyog rok Satan ara piin nib mang ngak ni ngar taleged gadad ndab ku darod u kanawoen e tin riyul’.​—2 John 8, 9.

13. Mang e gad manang nra buch, ma mang fan?

¹³ Gad manang nra fanenikaydad e girdi’ nu fayleng. (1 John 3:13) Ke puguran John ngodad ni “tin ni ka ba’ e girdi’ nu fayleng e ke suweyrad Faanem nib Kireb.” (1 John 5:19) Chiney nri gad be chugur i yan nga tungun e re m’ag ney e ri be gel boch e damumuw rok Satan. (Rev. 12:12) Ere ma cham ngodad u boch e kanawo’ nib mo’maw’ rogon ni ngad nanged, ni bod ni nge fanay e ngongol ndarngal ara pi ban ni ma wereg e piin kar chuwgad ko tin riyul’ ma kar chelgad yad be togopuluw ngay. Ku ra fanay e togopuluw nib gel ni nge cham ngodad. Manang Satan ni kari lich e tayim nrayog ni nge guy rogon ni nge taleg fare maruwel ni machib ni gad be tay ara kirebnag e michan’ rodad. Ere aram fan ndarud gingad ngay ni bay boch e nam ni kan taleg boch ban’en ko maruwel rodad riy ara kan taleg e machib rodad riy. Yugu aram rogon ma ka be athamgil pi walagdad ko pi nam ney. Yad be micheg ndemtrug e miti n’en nra fek Satan i yib ngodad ma rayog ni ngad pared ni gad ba yul’yul’!

14. Mang reb e kanawo’ nrayog ni ngad ayuweged pi walagdad riy ni ngar pared ko tin riyul’?

¹⁴ Faanra ngad ayuweged pi walagdad ni ngar pared ko tin riyul’, mab t’uf ni ngaud daged e runguy ngorad. (1 John 3:10, 11, 16-18) Ba t’uf ni ngaud t’ufeged gadad ni gathi kemus nu nap’an ni be yan urngin ban’en nib fel’ rogon, ya kub muun ngay e ngiyal’ ni ke sum e magawon. Bod ni, ga manang be’ ni ke yim’ be’ nib t’uf rok mab t’uf ni ngan fal’eg laniyan’ ara ni ayuweg u yugu boch e kanawo’, fa? Kam rung’ag ni bay boch e walag ni kar gafgowgad ni bochan e yoko’ mab t’uf ni ngan ayuwegrad ni ngkur ngongliyed Tagil’ e Liyor rorad bayay ara naun rorad, fa? Rayog ni ngad daged gelngin feni t’uf pi walagdad rodad ma gad be runguyrad u daken e thin ni gad ma yog, machane ri kub ga’ fan ni nga i m’ug ko ngongol rodad.

15. Mang e ba t’uf ni ngad rin’ed nrogon ni bay ko 1 John 4:7, 8?

¹⁵ Faanra bagadad me t’ufeg bagadad ma aram e gad be folwok rok e Chitamangidad ni bay u tharmiy ni ma t’ufegdad. (Mu beeg e 1 John 4:7, 8.) Reb e kanawo’ nib ga’ fan nrayog ni ngad daged e t’ufeg riy e aram e nge bagadad mi i n’ag fan e kireb rok bagadad. Bod nrayog ni nge rin’ be’ ban’en ni ke kirebnag lanin’dad, machane me wenig ngodad. Ra m’ug ni gad be dag e t’ufeg ni faan gad ra n’ag fan rok ma dab kud lemnaged e kireb ni ke rin’ ngodad. (Kol. 3:13) Bay reb e walag ni  pumoon ni ka nog Aldo ngak ni mada’nag e biney e skeng u nap’an ni yog reb e walag ni pumoon ni ma tayfan ban’en nde fel’ u murung’agen e girdi’ ko nam ko re walag ney. I gaar Aldo: “Ug par ni gu be meybil ngak Jehovah ni nge ayuwegeg ni nge dab kug lemnag boch ban’en nib kireb u rarogon e re walag ney.” Machane ku bay ban’en ni rin’ Aldo. I dugliy ni nge pining e re walag nem ni nga ranow ko machib u taabang. Ma nap’an ni yow be machib, ma aram me yog Aldo ngak fare walag ndabun e n’en ke yog u murung’agen e girdi’ ko nam rok. I gaar Aldo: “Nap’an ni rung’ag fare walag ni ku gog ni ke kireban’ug ko n’en ke yog, ma aram me wenig ngog ko n’en ke rin’. Gu ra motoyil nga lungun ma rayog ni nggu nang ni kari kalngan’ ko n’en ke yog. Tomuren e re n’ey ma aram miki fel’ bayay e thin romow.”

16-17. Mang e susun ni ngad dugliyed u wan’dad ni ngad rin’ed?

¹⁶ Rib t’uf rok apostal John pi walagen ma baadag ni nge gel e michan’ rorad. Ba tamilang rogon e lem rok ko fonow ni pi’ u lan fa dalip yang i babyor ni yoloy nge yan ngorad. Rib manigil e re n’ey ni kad nanged ni pi pumoon nge ppin ni yad ra un ngak Jesus ko gagiyeg u tharmiy e ku yad ma dag e t’ufeg ma yad ma lemnag rarogon pi walagrad ni bod rogon John!​—1 John 2:27.

¹⁷ Manga yugu da daged nib ga’ fan u wan’dad e pi fonow ney ni kad weliyed. Ngad dugliyed u wan’dad ni nga u darod u kanawoen e tin riyul’, ma gad fol rok Jehovah u urngin e tin gad ma rin’ u lan e yafos rodad. Ngad filed e Thin rok, me pagan’dad ngay. Ma ngari mich Jesus u wan’dad. Ngad siyeged e pi machib ni ke sum ko girdi’ nge pi machib ni ma wereg e piin kar digeyed e bin riyul’ e liyor ma yad be chel ngaur togopuluwgad ngay. Dariy ba ngiyal’ ni ngaum dake ga be liyor ngak Jehovah machane ka ga be mith ngaum rin’ boch e ngongol nib kireb, ma dab um motoyil ngak e piin yad be guy rogon ni ngar suruyed gur ko ngongol nib kireb. Um fol u rogon kanawoen e ngongol nib m’agan’ Jehovah ngay ni ngad rin’ed. Ma gad gubin ni ngad ayuweged pi walagdad ni ngar pared ni yad ba gel ni aram e ngaud n’aged fan e kireb rok e piin kar rin’ed e kireb ngodad ma gad ayuweg e piin ke t’uf e ayuw rorad. Faan gad ra rin’ ni aray rogon, ma aram e demtrug e re miti magawon ni gad ra mada’nag ma gad ra ulul nga u darod u kanawoen e tin riyul’.