1, 2. (a) Uw rogon ni kad nanged nrayog ko girdi’ ni ngar manged fager rok Got? (b) Mang e gad ra weliy ko re article ney?

 NAP’AN ni yira gargelegdad mab t’uf ni ngaun dag e t’ufeg ngodad nge yan i mada’ ko ngiyal’ ni kad m’ad. Gubin e girdi’ nib t’uf ni ngaun t’ufegrad, maku yad ma yim’ ni bochan ni ngan t’ufegrad. Machane, gathi kemus ni gad be weliy murung’agen e t’ufeg u thilin e pumoon nge ppin. Ya gad gubin ni gad baadag ni nge yag e fager ngodad me fel’ thildad boch e girdi’. Machane, kemus ni taab mit e t’ufeg e ir e rib t’uf rodad ni aram e, t’ufeg rok Jehovah. Boor e girdi’ nib mo’maw’ ni nge mich u wan’rad nrayog ko girdi’ ni ngar fagergad Got ni ma par u tharmiy ndabiyog ni ngan guy, maku ir ba Got ni Gubin Ma Rayog Rok. Aray rogon e lem rodad, fa? Danga’!

² Be tamilangnag e Bible ni bay boch e girdi’ ni ur manged fager rok Got. Ba fel’ ni ngad fal’eged i lemnag murung’agen e pi girdi’ ney ni bochan e ireray e re miti fager nrib ga’ fan ni ngad nameged u lan e yafas rodad. Abraham e ir bagayad e piin ni mang fager rok Got. (Mu beeg e James 2:23.) Mang e rin’ me yag ni ngari chugur e tha’ u thilin Abraham  nge Jehovah? Michan’ rok Abraham e aram reb e ban’en ni ayuweg e fager rorow ni nga i par nib manigil. Bin riyul’ riy e, be yog e Bible ni Abraham e ir “chitamangin urngin e piin ni ke mich Got u wun’rad.” (Rom. 4:11) Ere, chiney e ngad weliyed rogon ni ke yag ni nge mang Abraham e fager rok Got u daken e michan’ rok. Ma nge bagadad me fith ir ni nge gaar, ‘Uw rogon ni nggu folwok ko michan’ rok Abraham mug guy rogon ni ngari chugur e tha’ u thilmow Jehovah ni ir e fager rog?’

3, 4. (a) Mu weliy murung’agen ban’en ni buch rok Abraham nri skengnag rogon feni mich Got u wan’. (b) Mang fan nib m’agan’ Abraham ngay ni nge pi’ Isak ni maligach?

³ Mu susunnag yaan be’ nib pumoon ni kari pilibthir ni be yan u but’ i yan nga daken reb e burey. Rib mo’maw’ rogon e re milekag nem ni be tay. Machane, fan nib mo’maw’ e re n’em ngak e gathi bochan ni ke pilibthir. Ya ngiyal’ nem e sogonap’an 125 e duw rok Abraham, machane kab gel. ^[1] Ere, nap’an ni be yan Abraham i yan nga daken e burey, ma bay Isak ni fak ni be lay u tomur ni be fek e l’ud ni fan ko maligach. Ma ngiyal’ nem e sogonap’an 25 e duw rok Isak. Bay bangi yar ni be fek Abraham nge boch ban’en ni ngan k’eg e nifiy ngay. Rib mo’maw’ e re milekag nem ni yow be tay ni bochan e ke yog Jehovah ngak Abraham ni nge ognag fak ni maligach!​—Gen. 22:1-8.

⁴ Aram e bin th’abi mo’maw’ e skeng ni mada’nag Abraham. Ma bay boch e girdi’ ni yad ma yog nib kireb Got ko n’en ni yog ngak Abraham ni nge rin’, maku boch e girdi’ e yad ma yog ni m’agan’ Abraham ngay ni nge rin’ e re n’em ni bochan e de t’uf fak rok. Ma yog boch e girdi’ e re n’ey ni bochan e dariy e michan’ rorad maku dar nanged rarogon e bin riyul’ e michan’. (1 Kor. 2:14-16) Gathi yigi fol Abraham rok Got nde lem u m’on riy. Ya fol rok Got ni bochan e bay e bin riyul’ e michan’ rok. Manang ndabi yog Jehovah ni Chitamangin ni bay u tharmiy ngak e pi tapigpig Rok ni yad ba yul’yul’ ni ngar rin’ed ban’en ni ngar gafgowgad riy. Ku manang Abraham ni faanra fol rok Jehovah, ma ra tow’athnagrow fak nrib t’uf rok. Ere, mang e be tor e michan’ rok Abraham ngay? Be tor nga daken e tamilangan’ ni immoy rok nge pi n’en ni i buch u lan e yafas rok.

5. Uw rogon ni fil Abraham murung’agen Jehovah? Uw rogon u wan’ e n’en ni fil u murung’agen Got?

⁵ Tamilangan’. I ilal Abraham u Ur, ma girdi’ u rom e yad ma meybil ko liyos. Yugu aram rogon, me yag ni nge fil Abraham murung’agen Jehovah. Uw rogon ni yag ni nge nang murung’agen Got ni faanra mus ngak Terah ni chitamangin ma ir be’ ni ma meybil ko liyos? (Josh. 24:2) Der tamilangnag e Bible, machane be yog ni Abraham e yib ko tabinaw rok Shem nreb fapi pagel ni fak Noah. Ma Shem e ir be’ nrib gel e michan’ rok. I gaman 150 e duw rok Abraham ma ka bay Shem ndawori yim’. Ere, dad nanged ko ri aram rogon fa danga’, machane rayog ni aram e cha’ ni fil Abraham murung’agen Jehovah rok. Machane, ba mudugil nnap’an ni kab fas Shem ma i weliy murung’agen Jehovah ko girdi’ u lan e tabinaw rok. Ma aram e re tamilangan’ ni ki yag ngak Abraham me taw nga gum’irchaen. Bochan e pi n’en ni fil Abraham u murung’agen Got, ma aram me t’uf Got rok mi ri mich u wan’.

6, 7. Uw rogon ma pi n’en ni buch rok Abraham e ayuweg ni nge gel e michan’ rok ngak Jehovah?

⁶ Pi n’en ni i buch rok. Uw rogon ma pi n’en ni buch rok Abraham e ayuweg ni nge gel e michan’ rok ngak Jehovah? Ba ga’ ni yima yog ni pi n’en ni gad ma lemnag e aram e pi n’en ni ma m’ug ko ngongol rodad. Pi n’en ni fil Abraham u murung’agen Got e aram e pi n’en ni ayuweg ni ngari ga’ fan Got u wan’ ni ir fare “Got nib Th’abi Tolang, ni ir e sunumeg e tharmiy nge but’.” (Gen. 14:22) Be yog e Bible nre n’ey e aram e nga i “fol” be’ rok Got nib m’agan’ ngay. Mab ga’ fan ni ngad rin’ed e re n’ey ni bochan e ireray e n’en nra chugurnag e tha’ u thildad Got. (Heb. 5:7; Ps. 25:14) Ma ireray e n’en ni k’aring Abraham ni nge fol rok Got.

⁷ I yog Got ngak Abraham nge Sarah ni ngar pagew taferow u Ur nga ranow ra parew nga reb e  binaw nib palog. Ma ngiyal’ nem ni yog Got e re thin nem ngorow e kar pilibthirgow, ma tent e ir e thingar ur parew riy u n’umngin nap’an e yafas rorow. Machane, bochan ni fol Abraham ko n’en ni yog Jehovah ngak, ma aram fan ni tow’athnag mi i ayuweg. Bod ni, i rusnag Abraham Sarah ni leengin ni bochan e ir be’ nrib pidorang ma ri chey min fek rok. Ma ki i rusnag Abraham ir nri chey mu kun li’ ngem’. Bay tapgin ni nge lem Abraham ni aram rogon, machane de pag e re n’ey ni nge k’aring ndab ki fol rok Jehovah. Boor yay ni ngongliy Jehovah boch e maang’ang ni nge ayuweg Abraham nge Sarah ndabi buch ban’en rorow. (Gen. 12:10-20; 20:2-7, 10-12, 17, 18) Pi n’ey ni buch rok Abraham e ayuweg ni ngari gel e michan’ rok.

8. Uw rogon ma tamilangan’ ni bay rodad nge pi n’en ni ma buch rodad e rayog ni ngari chugurnag e tha’ u thildad Jehovah?

⁸ Ma uw rogodad? Gur, rayog ni ngkud manged fager rok Jehovah? Rayog, ya bay e tamilangan’ rodad maku bay boch ban’en ni ma buch rodad nrayog ni nge ayuwegdad ni ngari mich Jehovah u wan’dad. Abraham e kari mus ni buchuuw e gonop u lan e Bible ni manang. (Dan. 12:4; Rom. 11:33) Machane, gad manang ni boor ban’en nrayog ni ngad filed u lan e Thin rok Got nra ayuwegdad ni ngari tamilangan’dad u rarogon e en “ni ir e sunumeg e tharmiy nge but’,” miki ayuwegdad ni ngari ga’ fan u wan’dad miki t’uf rodad. Maku nap’an nra k’aringdad e re n’ey ni ngad folgad rok Got, ma aram e rayog ni ngad guyed angin ni be yib ngodad. Ku gad ra guy rogon ni ma ayuwegdad e pi fonow rok nge rogon ni ma tow’athnagdad me pi’ gelngidad. Ku gad ra nang ni faan gad ra pigpig ngak Got u polo’ i gum’ircha’dad ma ra k’aring e felfelan’ nge gapas laniyan’ ngodad. (Ps. 34:8; Prov. 10:22) Ma nap’an nra yoor ban’en nda nanged u murung’agen Jehovah ma gad guy rogon ni be tow’athnagdad, ma aram e rayog ni ngari gel e michan’ rodad ngak miki chugur e tha’ u thildad.

9, 10. (a) Mang e ba t’uf ni nge rin’ l’agruw ni’ ni faanra ngari fel’ e fager rorow? (b) Mang e be dag nrib ga’ fan e tha’ u thilin Abraham nge Jehovah u wan’ Abraham ma i guy rogon ni ngari chugur e tha’ u thilrow?

⁹ Fager u thilin l’agruw ni’ e bod e machaf nrib tolang puluwon. (Mu beeg e Proverbs 17:17.) Machane, de bod ba rume’ nib tolang puluwon ni kemus nib fel’ yaan. Ya bod rogon reb e floras ni kan yung nrib fel’ yaan nib t’uf ni ngaun rannag ma yibe ayuweg ya nge yag ni nga i par ma be pi’ e floras. Rib ga’ fan e tha’ u thilin Abraham nge Jehovah u wan’ Abraham ma i guy rogon ni nge par e re tha’ nem nib fel’. Uw rogon ni rin’ e re n’em?

¹⁰ Dariy ba ngiyal’ ni lemnag Abraham nib gaman e fol nge yul’yul’ ni i tay. Ya nap’an nra milekaggad chon e tabinaw rok nga Kanaan, miki ulul ni nge pag Jehovah ni nge pow’iy u rogon e pi n’en ni ma dugliy ni tabab ko tin nib achig ban’en nge yan i mada’ ko tin nib ga’. Reb e duw u m’on ni ngan gargeleg Isak, ma aram me yog Jehovah ngak Abraham ni ngan maad’adnag urngin e pumoon u lan e tabinaw rok. Ma ngiyal’ nem e ke gaman 99 e duw rok Abraham. Ere gur, i maruwar laniyan’ Abraham ara gay boch i fan ndabi fol ko  n’en ni ke yog Jehovah ngak? Danga’, ya pagan’ ngak Got ma “ka chirofen nem” me rin’ e n’en ni ke yog ngak.​—Gen. 17:10-14, 23.

11. Mang fan ni magafan’ Abraham ko fa gal mach nu Sodom nge Gomorrah, ma uw rogon ni ayuweg Jehovah ni nge tamilang boch ban’en u wan’?

¹¹ Bochan ni gubin ngiyal’ ni ma fol Abraham rok Jehovah ni ki mada’ ko tin nib achig ban’en, ma aram e n’en ni ayuweg e tha’ u thilrow Got ni nga i par nrib manigil. Ba pufpuf rogon nrayog ni nge weliy urngin ban’en ni bay u laniyan’ ngak Jehovah. Mus ko pi n’en nda i nang fan mab mom ngak ni nge fith murung’agen ngak Jehovah. Bod nnap’an ni nang ni bayi gothey Got fa gal mach nu Sodom nge Gomorrah, ma bay boch ban’en ni magafan’ ngay. I lemnag nrayog ni sana ka bay boch e girdi’ ko gal mach nem ni yad ba fel’ ni ku yira thangrad. Rayog ni sana ki i magafan’ ngak Lot ni fak be’ ni walagen nge chon e tabinaw rok ni bochan e ur pared u Sodom. I fith Abraham boch ban’en ngak Got u fithik’ e sobut’an’, machane ba pagan’ ngak Got ni ir e “tapufthin ko fayleng ni polo’.” I ayuweg Jehovah Abraham ni nge nang gelngin feni ri Ma runguy e girdi’, maku ma fal’eg i yaliy laniyan’ e girdi’, maku ma gay e piin ni yad ba manigil ni nge ayuweg e yafas rorad.​—Gen. 18:22-33.

12, 13. (a) Uw rogon ma pi n’en ni i fil Abraham nge pi n’en ni i buch rok e yag ni nge ayuweg boch nga tomuren? (b) Mang e be dag nri be pagan’ Abraham ngak Jehovah?

¹² Dariy e maruwar riy ni pi n’en ni i fil Abraham nge pi n’en ni i buch rok e aram e n’en ni ayuweg ni nge par nrib fel’ e tha’ u thilrow Jehovah. Ma boch nga tomuren u nap’an ni mada’nag reb e skeng nrib mo’maw’ ni aram e yog Jehovah ngak ni nge pi’ Isak ni fak ni maligach ma de pagtalin ni ir reb e Got nib gum’an’, ma ma runguyey, ma rayog ni nge pagan’uy ngak, ma ma ayuwegey. Manang Abraham ndawori thil Jehovah nge mang be’ nib kireb! Uw rogon ni kad nanged e re n’ey?

¹³ U m’on ni nge chuw Abraham ko fa gal tapigpig rok nra unew ngak, me gaar: “Mu pirew rok e re donkey ney u roy. Bay gu warow e cha’ney ngaram nggu meybilgow, nge mu’ ma gamow sul ngomew.” (Gen. 22:5) Mang fan e re thin ney ni yog Abraham? Gur, be bannag e gal tapigpig rok nem ya ngar lemnagew ni ku ra sul Isak, machane bin riyul’ riy e nge yan i pi’ ni maligach? Danga’, ya be weliy e Bible rogon e n’en ni i lemnag Abraham. (Mu beeg e Hebrews 11:19.) Manang Abraham “nrayog rok Got ni nge faseg Isak ko yam’.” Arrogon, ba mich e fas ko yam’ u wan’ Abraham. Ku manang ni Jehovah e ir e ke ayuwegrow Sarah ni nge yag nra fakayew e bitir ni yugu aram rogon ni kar pilibthirgow. (Heb. 11:11, 12, 18) Ku manang Abraham ndariy ban’en ndabiyog rok Jehovah. Ere, ba pagan’ ngay ndemtrug rogon, ma ra faseg Jehovah fak ni fan e nge yag ni lebug urngin ban’en ni ke micheg Jehovah ngak. Dariy e maruwar riy ni aram fan ni yima yog ni Abraham e ir “chitamangin urngin e piin ni ke mich Got u wun’rad”!

14. Mang boch e magawon ni ga ma mada’nag ko pigpig ni ga be tay ngak Jehovah? Uw rogon nrayog ni nge ayuwegem e n’en ni buch rok Abraham?

¹⁴ Ma uw rogodad? Riyul’ nder ma yog Got boch ban’en ni ngad rin’ed ni aray rogon. Machane, bay  boch e motochiyel ni ke yog ni ngad folgad riy. Ma bay yu ngiyal’ nib mo’maw’ ngodad ni ngad folgad ko pi motochiyel nem ara bayi n’en mu ud lemnaged ko mang fan ni ke yog ngodad ni ngad folgad riy. Rayog ni ngam lemnag ban’en ni ke yog Got ni ngam rin’ nib mo’maw’ ngom, fa? Bay boch e girdi’ nib mo’maw’ ngorad ni ngar uned ko fare maruwel ni machib. Sana rayog ni yad ba tatamra’, ara ba mo’maw’ ni ngar weliyed fare thin nib fel’ ngak boch e girdi’ ndar nanged owcherad. Ku bay boch e girdi’ nib mo’maw’ rorad ni ngar pared ni yad ba thil u fithik’ e girdi’ u skul rorad ara tabon e maruwel. (Ex. 23:2; 1 Thess. 2:2) Nap’an nra yog Got ngom ni ngam rin’ ban’en nib mo’maw’, mag lemnag gelngin e michan’ ni dag Abraham nge rogon nda i rus ni nge rin’ e n’en ni ke yog Got ngak ni nge rin’. Ya faan gad ra fal’eg i lemnag murung’agen boch e girdi’ ni yad ba yul’yul’ ma rayog ni nge ayuwegdad ni ngad folwokgad rorad ma gad chugur ngak Jehovah ni ir e Fager rodad.​—Heb. 12:1, 2.

15. Mang fan nrayog ni nga dogned nde kal Abraham ngan’ ni i fol rok Jehovah?

¹⁵ Ga be lemnag ni bay ba ngiyal’ ni taw ngay me kal Abraham ngan’ ni i fol rok Jehovah? Am lemnag e n’en ni be yog e Bible u murung’agen e ngiyal’ ni yim’ riy. Be gaar: “Ma aram me aw e fan rok ni aram yangaren. I yim’ nib felfelan’ nga rogon e par ni i tay.” (Gen. 25:8, NW) Mus ko ngiyal’ ni ke gaman 175 e duw rok, ma rayog ni nge lemnag urngin ban’en ni ke rin’ u lan e yafas rok ndariy reb ni kalngan’ riy. Ya fanay e yafas rok ni nge fal’eg e tha’ u thilrow Jehovah Got. Yugu aram rogon ma re n’ey ni be yog e Bible ni “yim’ nib felfelan’ nga rogon e par ni i tay” e der yip’ fan ndaki athapeg e bin baaram e par ni ka bay boch nga m’on.

16. Mang boch ban’en nra felfelan’ Abraham ngay u Paradis?

¹⁶ Be weliy e Bible murung’agen Abraham ni gaar: “I sonnag fare binaw ni Got e ke gonopiy yaan ke toy, ni fare binaw ni ba’ taan u but’ ndabi chuw biid.” (Heb. 11:10) Ba mich u wan’ Abraham ni bay ba ngiyal’ nra taw ngay ma ra guy e re mach nem, ni aram Gil’ilungun Got ni be gagiyegnag e re fayleng ney! Am lemnag gelngin e felfelan’ nra tay Abraham ni nge par u Paradis u fayleng miki ulul ni nge gelnag e tha’ u thilrow Jehovah. Dariy e maruwar riy nrib gel e felfelan’ nra tay u nap’an nra nang ni pi n’en ni i rin’ u fithik’ e michan’ rok e ke ayuweg e pi tapigpig rok Jehovah u lan bokum biyu’ e duw! Nap’an ni yira Paradisnag e fayleng maku ra fil Abraham ni rogon ni sulweg Got Isak ngak e be ‘susunnag’ yaan ban’en nra buch nga tomuren ni kab ga’ fan. (Heb. 11:19) Ku ra fil ni gelngin e amith ni tay laniyan’ u nap’an ni be fal’eg rogon Isak ni nge pi’ ni maligach e ke yag ni nge ayuweg bokum milyon e girdi’ ni yad ba yul’yul’ ni ngar nanged gelngin e amith ni tay laniyan’ Jehovah u nap’an ni pi’ Jesus Kristus ni Fak ni nge biyuliydad. (John 3:16) Pi n’en ni i rin’ Abraham nge pi n’en ni i buch rok e ke yag ni nge ayuwegdad ni ngari ga’ fan fare biyul u wan’dad ni aram e bin th’abi fel’ e kanawo’ ni ke dag Got ngodad riy gelngin fadad t’uf rok!

17. Mang e kam dugliy u wan’um ni ngam rin’? Mang e gad ra weliy ko bin migid e article?

¹⁷ Manga yigi bagadad me dugliy u wan’ ni nge folwok ko michan’ rok Abraham. Faan gad ra ulul ni ngkud filed boch ban’en u murung’agen Jehovah ma gad fol rok, ma rayog ni ngad guyed rogon ni ma tow’athnagdad ma be ayuwegdad. (Mu beeg e Hebrews 6:10-12.) Manga yigi par Jehovah ni ir e Fager rodad ndariy n’umngin nap’an! Bin migid e article e gad ra weliy riy murung’agen dalip ni’ ni yad ba yul’yul’ ni kur manged boch e fager rok Got.