NI GARGELNAGEG ko duw ni 1926 u Crooksville, Ohio u Meriken. Gallabthir rog e gathi yow l’agruw ni’ ni yow ba m’ing nga barba’ e teliw, machane yow ma yog ngomad pi walageg ni ngaug warod nga galesiya. Gamad meruk u gubin. Ere, ug un nga barba’ e teliw ni ka nog e Methodist ngay. Nap’an ni gaman 14 e duw rog, me pi’ reb e tamachib ko re raba’ i teliw nem reb e tow’ath ngog ni bochan e ke gaman reb e duw nda ug pag e misa ko yu Madnom.

Bang ko ngiyal’ nem ma aram me tabab be’ ni buguli yoror romad ni ir reb e Pi Mich Rok Jehovah ni ka nog Margaret Walker ngak ni nga i yib i guy e nina’ rog ngaur weliyew murung’agen e Bible. Me yan i reb e rran, mug dugliy ni nggu un ko motoyil. I lemnag e nina’ rog ni gu ra magawonnag e fol Bible ni yow be tay. Ere, yog ngog ni nggu wan nga wen. Machane, ug guy rogon ni nggu motoyil ko n’en ni yow be weliy. Tomuren in yay ni yib Margaret i guy e nina’ rog, ma aram me fith ngog ni gaar, “Ga manang ko mini’ fithingan Got?” Me lungug ngak, “Gubin e girdi’ ni manang ni Got.” Me gaar ngog, “Mu fek e Bible rom ngam beeg e Psalm 83:18.” Ma aram e n’en ni gu rin’. Nap’an ni gu beeg, ma aram mug nang ni Jehovah fithingan Got. Ma aram mug mil i yan ko gin ni bay e pi fager rog riy me lungug ngorad, “Nap’an ni gimed ra yan nga tabinaw romed e daba’, mi gimed beeg e Bible romed ko Psalm 83:18 ngam nanged ko mini’ fithingan Got.” Ere, rayog ni nga nog ni aram e ngiyal’ ni gu tabab ko machib.

Ere, gu tabab i fil e Bible, ma aram mug un ko taufe ko  duw ni 1941. De n’uw nap’an nga tomuren, ma aram min teg ni ngaug yarmiy reb e fol Bible ko ulung ni un tay. Ba ga’ ni gu ma pi’ e athamgil nga laniyan’ e nina’ rog nge pi walageg ni ngaur bad ko re muulung nem. Ere, faani munmun mu ur bad ni yad gubin ni ngar uned ko bin baaram e fol babyor ko ulung ni gag e gu ma yarmiy. Machane, Papa’ rog e dabun e machib.

Munmun ma aram mu kun pi’ yugu boch e maruwel ngog u lan e ulung. Ere, boor e babyor ni ke ngongliy e Pi Mich Rok Jehovah ni ug chaariy. Yan i reb e rran, me yib e Papa’ rog i non ngog ni be yip’ pa’ ko fa yu ke babyor rog, me gaar: “Am guy e pi chugum rom ni beer? Gu baadag ni ngam kunuy ni gubin ngam chuweg u lan e re naun ney, mu kum man ngam chuw u roy.” Ere, gu chuw u tabinaw mug wan gu par nga reb e binaw u Ohio nib chugur ko binaw rog ni ka nog yu Zanesville ngay. Machane, ba ga’ ni gu ma sul ko binaw rog ni ngaug pi’ e athamgil nga laniyan’ chon e tabinaw rog.

I guy e Papa’ rog rogon ni nge taleg e Nina’ rog ndab ki un ko muulung. Bay yu ngiyal’ nra be yan e Nina’ rog ni nge yan ko muulung, me lol’og nge yan i girngiy nge sulweg nga lan e naun. Machane, nap’an ni yow ra sul nga naun, me yan e Nina’ rog u yugu reb e mab nga wen nge yan ko muulung. Bayi n’en me lungug ko Nina’ rog: “Dabi magafan’um. Ya ra munmun me chalban i lol’ogem.” Munmun, ma aram e n’en ni buch, ma aram me yag ni nga i yan e Nina’ rog ko muulung ndakuriy be’ ni be taleg.

Nap’an e duw ni 1943, ma aram me tabab e ulung rodad i tay fare Theocratic Ministry Skul. Ere, un pi’ boch e welthin ngog ni ngaug pi’ u nap’an e re skul nem. Pi fonow ni un pi’ ngog u nap’an ni ug pi’ e pi welthin nem e ayuwegeg ni nggu mon’og u rogon ni gu ma weliy boch ban’en.

Nap’an e duw ni 1944, ma aram min tay e Bin L’agruw e Mahl ko Fayleng. Ere, taw e thin ngog ni thingar gu un ko salthaw. Ma aram mug wan nga bangi ban’en ni ka nog yu Fort Hayes ngay ni bay u Columbus, Ohio, ni ngan skengnageg ko m’ar ngemu’ mug fal’eg boch e babyor nib t’uf ni nggu fal’eg. Machane, mu gog ngak fapi cha’ ni yad ba ga’ ko salthaw ndab gu un ko salthaw. Ma aram mi yad pageg nggu wan. In e rran nga tomuren, ma aram me yib reb e polis nga tafenag me gaar ngog: “Corwin Robison, kan fal’eg e babyor ni be pi’ mat’awug ni nggub gu kolem nggu fekem nga kalbus.”

L’agruw e wik nga tomuren ma aram min fekeg nga kort, me gaar e en tapuf oloboch ngog: “Faan gomanga gag e nggu dugliy ko mang e ngan rin’ ngom, ma gu ra dugliy ni ngan tem u kalbus u n’umngin nap’an e yafos rom. Ere, bay ban’en ni nga mog?” Mug fulweg ni lungug: “Wenig ngom, ma susun ni ngan teg ni gag reb e tamachib. Ya langan e mab ko girdi’ e aram e gin ni gu ma sak’iy riy ngaug machib, ma boor e girdi’ ni kug weliy ngorad fare thin nib fel’ ni murung’agen Gil’ilungun Got.” Ma aram me gaar fare tapuf oloboch ngak e piin ni kar bad ni ngar dugliyed ko ba fel’ e rog fa danga’: “Gathi kam bad e ngaray ni ngam dugliyed ko re pagel ney e ir reb e tamachib fa danga’. Ya kam bad e ngaray ni ngam dugliyed ko nap’an ni taw e thin ngak ni nge yan ko salthaw me yan fa danga’.” De gaman reb e awa nga tomuren, ma aram me sul e thin ni kan mu’ i dugliy nib kireb e rog. Ere, dugliy fare tapuf oloboch ni ngan teg u kalbus ni lal e duw u Ashland, Kentucky.

Nap’an e gal nsom’on e wik ko ngiyal’ ni baaram nni teg nga kalbus, min fekeg nga reb e kalbus u Columbus, Ohio. Rofen ni gu taw ngaram e yug gu par u lan e chi singgil ni baaram ni kan teg ngay ndan pageg nga wen. Mug meybil ngak Jehovah ni lungug: “Dabiyog ni nggu par u lan e re singgil ney ni lal e duw. Dagnang ko mang e nggu rin’.”

Faani bin migid e rran me yib e piin ni yad ma matanagiy e kalbus ra paged gag nga wen. Ma aram mug wan gu sak’iy nga tooben be’ nib pumoon nib n’uw mab ga’ ni ka yigi par nib sak’iy u langan e winda be sap nga wen. Ma aram mug parew u rom ngaug sapgow nga wen. Me gaar  ngog, “Mang fan ni kan tem ngaray gur e binir e Ngochngoch?” Me lungug ngak, “Gag reb e Pi Mich Rok Jehovah.” Me gaar ngog, “Gur bagayad? Ere mang fan ni ga bay u roy?” Me lungug ngak, “Ya Pi Mich Rok Jehovah e dubrad ni ngar uned ko mahl ni ngar lied e girdi’ nge yim’.” Me gaar, “Ere gur e ka non’em nga kalbus ni bochan e dab mu li’ be’ ngem’. Ma yugu boch e girdi’ e yibe yon’rad nga kalbus ni bochan e kar lied boch e girdi’ kar m’ad. Ba puluw e re n’em?” Me lungug ngak, “Danga’, de puluw.”

Me gaar ngog, “Ragag nge lal e duw ni ug par u yugu reb e kalbus, ma bay boch e babyor romed ni ug beeg u rom.” Ma aram mug meybil u lanin’ug ni be lungug, “Jehovah, mu ayuwegeg ni nge mang e re pumoon ney ngog.” Ka chingiyal’ nem me gaar fare pumoon ngog ni yima pining Paul ngak: “Yugu ra math pa’ bagayad e pi cha’ney ngom, mag tolul, mu gub gu ayuwegem.” Ere, gubin e piin ni ka nin’rad ko gin ni gu bay riy ko re kalbus nem ni yad 50 u gubin e dariy bagayad ni ma magawonnageg.

Nap’an ni chuwegeg e piin ni yad ba ga’ ko kalbus ngar feked gag nga yugu reb e kalbus ni bay u Ashland, ma aram mug wan gu nang ni boor e pi walag nib gel e michan’ rorad ni yad bay ko re kalbus nem. Ere, bochan ni ug chagilgad e pi walag nem u taabang, ma aram e n’en ni ayuwegmad yugu boch e walag ni nggu pared ni gamad ba gel ko tirok Got ban’en. I yarmiy e pi walag nem ni ngaug beeged e Bible u gubin e wik nra reb e wik ma bay bang u lan e Bible ni kug beeged, ngemu’ ma gamad yoloy boch e deer nga but’ nge fulweg riy ni nggu weliyed u nap’an e muulung ni gamad ma tay ni yima yog e Bible Bees ngay. Ku bay reb e walag ni kan dugliy u fithik’mad ni nge par ni ir e nga i yarmiy rogon e gin ni gamad be machib riy. Ba ga’ e re kalbus nem ni ug moyed riy, ma boor e bet riy nib k’af u dow e rungrung i yan. Ere, bayi n’en me gaar e re walag ni baaram ngog ni ir e ma yarmiy e gin ni gamad ma machib riy: “Robison, aram e gur e ngam machib ko gin baaram nge gin baaram e bet. Piin ni yad bay ko yungi bet nem e aram e piin ni kan pag fan ngom ni ngam machibnagrad. Mu guy rogon ni ngam machibnagrad u m’on ni ngar chuwgad.” Aram rogon ni i yan e machib ni ug ted nib yaram.

Nap’an e duw ni 1945, ma aram me mus e Bin L’agruw e Mahl ko Fayleng, machane mu kun teg u kalbus nda kaan pageg. I magafan’ug ko tabinaw rog ni bochan e ke yog e Papa’ rog ngog ni gaar, “Faanra ke yag ni kug chuwegem u roy, maku rayog ni ngkug chuweg e tin ni ka bay e girdi’.” Machane, nap’an nni pageg u kalbus, ma rug gin, ya gu wan gu nang ni yugu aram rogon gelngin e togopuluw ni be tay e Papa’ rog ngomad, ma medlip e girdi’ u lan e tabinaw rog ni be un ko muulung, ma bay reb e ppin ni walageg ni ke un ko taufe.

Nap’an e duw ni 1950 ma aram me tabab reb e Mahl u Korea ni kub muun yu Meriken ngay. Miki taw e thin ngog bayay ni nggu un ko salthaw, ma aram mug wan nga Fort Hayes. Tomuren nni pi’ reb e skeng ngog ni ngan guy riy gelngin fanag llowan’, ma aram me yog reb e ga’ ko salthaw ngog ni gaar, “Gur bagayad e piin th’abi fel’ e skeng rok u fithik’ e piin ni kar feked e re skeng ney.” Me lungug ngak, “Dariy fan, ya dab gu un ko salthaw.” Ma aram mug weliy ngak e n’en ni bay ko 2 Timothy 2:3, me lungug ngak, “I gag reb e salthaw rok Kristus.” Ba n’uw nap’an ni par fare  pumoon nde non, ngemu’ me gaar ngog, “Rayog ni ngam man.”

De n’uw nap’an nga tomuren, ma aram mug un nga reb e muulung nni tay ni fan ngak e piin ni yad baadag ni ngar uned ko maruwel u Bethel u nap’an reb e convention nni tay u Cincinnati, Ohio. I yog Brother Milton Henschel ngomad ni faanra bay reb e walag ni pumoon ni baadag ni nge maruwel nib gel ni fan nga Gil’ilungun Got, ma rayog ni ngan fek nga Bethel ni nge rin’ boch e maruwel u rom. Ere, gu ngongliy bang e babyor ni ma ngongliy e piin ni yad baadag ni ngar uned ko maruwel u Bethel, ma aram me taw e thin ngog nrayog ni nggu maruwel u Bethel. Ere, nap’an e August 1954 ma aram mug wan nga Brooklyn Bethel, ma aram e gin ni kug pigpig riy ke mada’ ko chiney.

Dariy ba ngiyal’ ni kug par u Bethel ndariy e maruwel ni nggu rin’. Immoy boch e duw ni maruwel rog e gu ma maruweliy boch ban’en u boch e masin ni yima fanay ko gin ni yima fal’eg e babyor riy nge pi ofis ni yima maruwel riy, maku ug maruwel ni gu ma fal’eg e lok ko mab. Ku immoy ba ngiyal’ ni ug maruwel u boch e naun ni yima tay e Assembly riy u New York City.

Ri gu baadag e pi n’en ni yima rin’ u Bethel ni fan ko tirok Got ban’en, ya ra kakadbul ma yima beeg boch e thin nu Bible min weliy u taabang, maku gamad ma tay e Fol Wulyang ko Damit, maku gamad ma yan girdien e ulung ko machib u taabang. Ga ra lemnag e re n’ey, ma ireray boch ban’en ni susun e nga i rin’ chon e pi tabinaw ni yad boch e Pi Mich Rok Jehovah. Faanra i beeg e gallabthir nge bitir e thin nu Bible ni fan ko yu rran u taabang, mu ur ted e Fol Bible ni Tabinaw u gubin e wik, maku yad be un ko muulung nge machib ni gubin ngiyal’, ma aram e rayog ni ngar pared ni yad ba gel ko tirok Got ban’en.

Boor e fager ni ke yag ngog u Bethel ngu lan e ulung. Boch e pi fager rog nem e yad bang ko fachi ulung ni yad bay u tharmiy e chiney, ma boch i yad e danga’. Machane, gubin e pi tapigpig rok Jehovah ni kub muun ngay e piin ni yad ma pigpig u Bethel e dawor ra flontgad. Ere, faanra kug luagew reb e walag e thin, ma gu ma guy rogon ni nggu awnag e gapas u thilmow. Ba ga’ ni gu ma lemnag fare thin ni bay ko Matthew 5:23, 24 nge rogon ni be yog ngodad ni ngaud pithiged e magawon ni ke sum u thildad boch e girdi’. De mom ni ngam wenig u nap’an ni kam rin’ ban’en ndabun be’, machane boor e magawon u thilin boch e girdi’ ni ke yag ni ngan pithig ni bochan e bay be’ ni ke wenig.

Chiney ni kug pilibthir e ke mo’maw’ ni ngaug un ko machib u mit e tabinaw i yan. Machane, dawor gu tal i rin’ e re maruwel ney. Kug gay rogon ni nggu fil reb e thin ni yima yog u China ni ka nog e Mandarin Chinese ngay, ma gu baadag ni gu ma machibnag e girdi’ nu China ni gu ma mada’nagrad  u kanawo’ ni yad manang e re thin nem. Bay boch e kadbul ni gu ma wereg 30 i yan ko 40 ken e magazine ko girdi’ ni yad baadag e machib.

Ku bay be’ nu China ni kug mada’gow ni kki yag ni ngkug nonow bayay! Immoy reb e rran ni yib i yan ba rugod u toobeg ni be wereg bogi babyor ko girdi’ ni bay murung’agen boch e wom’engin e gek’iy riy ni yibe pi’ ni chuway’. Ma faani sap ngog me siminmin, mu kug siminmin mug pi’ ba ken Fare Wulyang ko Damit nge Awake! ngak ni thin ni Chinese. Ma aram me fek, me yog ngog ni ir Katie. Tomuren e re n’ey, ma yug nap’an nra guyeg e cha’nem i Katie, me yib i non ngog. Ere, ug fil ngak rogon i yog fithingan boch e wom’engin e gek’iy nge yasay ko thin ni Meriken, ngemu’ me sul u daken fapi thin. Kug ma weliy boch e thin nu Bible ngak, ma aram me m’agan’ ngay ni nge fek ba ken fare babyor ni kenggin e Be Fil e Bible. Boch e wik nga tomuren, ma da kug mada’nag faanem i Katie.

Boch e pul nga tomuren, mu kug mada’nag reb e rugod ni ku be wereg boch e babyor ni bay murung’agen boch ban’en riy ni yibe pi’ ni chuway’. Ma nap’an ni gu pi’ boch e magazine ngak me fek. Faani bin migid e wik nga tomuren, me pi’ e cell phone rok ngog me gaar, “Mu non nga China.” Me lungug ngak, “Dariy be’ ni gu manang u China.” Machane ri be yog ngog ni nggu non, ma aram mug fek fare phone me lungug, “Hello, i gag Robison.” Me gaar facha’ ni gamow be non, “Robby, i gag Katie. Kug sul nga China.” Me lungug, “China?” Me gaar Katie, “Arrogon. Robby, ga manang e chi pin ni beer ni ke pi’ e phone ngom? Cha’nir e gamow walag. Boor ban’en ni kam fil ngog nrib manigil. Ere, wenig ngom mu fil ngak e pi n’en ni kam fil ngog.” Me lungug ngak, “Katie, bay gu rin’ u rogon nrayog rog. Kammagar ni ka mog ngog e gin ni ga bay riy.” De n’uw nap’an nga tomuren e yay ni tomur ni gu nonow e re ppin ni walagen Katie nem, ma aram e da kug mada’gow. Gu be athapeg ni gin ni bay e gal rugod ney riy e chiney e ke yag ni ngkur filew boch ban’en u murung’agen Jehovah.

Ke gaman 73 e duw ni kug pigpig ngak Jehovah. Ri gub felfelan’ ngay ni ke ayuwegeg ni nggu par u mathilin ngongolen e am mug par ni gub yul’yul’ u nap’an ni ug moy u kalbus. Maku reb e, ku ma yog e pi walageg ngog ni bochan ni gu par ni gub mudugil u nap’an ni i togopuluw e Papa’ rog ngog, maku aram reb e ban’en ni ke pi’ e athamgil nga lanin’rad. De n’uw nap’an nga tomuren me un e Nina’ rog nge tin ni ka bay i walageg ni yad nel’ u gubin ko taufe. Munmun miki munguy laniyan’ e Papa’ rog ma aram mi i un nga boch e muulung u m’on ni nge yim’.

Faanra ba m’agan’ Got ngay ma nap’an e bin nib beech e fayleng, ma yira faseg girdien e tabinaw rog nge pi fager rog ni kar m’ad. Am lemnag gelngin e felfelan’ ni gad ra tay u nap’an ni gad ra chagil ngak e piin nib t’uf rodad e ngiyal’ nem ngad liyorgad ngak Jehovah u taabang! *