MANG reb e ban’en ni ke buch u lan e yafos rom nrib gel e felfelan’ nim tay riy? Rofen nim un ko mabgol fa rofen nni gargeleg e bin th’abi som’on e bitir ni fakam, fa rofen nim un ko taufe? Dabisiy nrayog ni nga mog ni rofen nim un ko taufe e aram e rofen nrib gel e felfelan’ nim tay maku aram reb e rran u lan e yafos rom nrib ga’ fan. Dariy e maruwar riy nrib gel e felfelan’ ni tay e pi walagem u lan e ulung u nap’an nra guyed gur ni kam dag ko girdi’ ni yoor nib t’uf Got u polo’ i gum’irchaem, ngu polo’ i lanin’um, ngu polo’ i gelngim!​—Mark 12:30.

Dariy e maruwar riy nrib gel e felfelan’ ni kam tay u nap’an nim tabab ko pigpig ngak Jehovah u nap’an nim un ko taufe. Machane, bay boch e walag u lan e ulung ni gathi ri ka yad be pigpig ngak Got ni yad ba felfelan’ ni bod rogon aram ko som’on. Ere gur, mang e ke buch rorad? Ma mang boch i fan nib t’uf ni ngad ululgad ngad pigpiggad ngak Jehovah u fithik’ e felfelan’?

Ba mudugil nri gad ma felfelan’ ko fare thin nib fel’ u murung’agen Gil’ilungun Got ni kad nanged ni aram e dab ki n’uw nap’an me thang Jehovah e re m’ag nib kireb ney me fek i yib reb e fayleng nib beech. Maku reb e be yog e Zefaniah 1:14 (BT) ngodad ni gaar: “Fare rran ni bayi par Somol nga tagil’ e pufthin e be chugur nrib pay!” Machane, faanra gad be lemnag ni kaygi n’uw nap’an ni gad be sonnag e re rran nem ma rayog ni nge war e felfelan’ rodad ma aram ma gad malmal ko pigpig ni gad be tay ngak Got.​—Prov. 13:12.

Chag ni gad ma tay pi walagdad u taabang e aram e n’en ni ma pi’ e athamgil nga lanin’dad ni ngad ululgad ngad pigpiggad ngak Jehovah u fithik’ e felfelan’. Bin riyul’ riy e, rayog ni ngongol nib fel’ ni i dag e pi tapigpig rok Jehovah e aram e n’en ni k’aringdad ni ngad adaged ni ngad uned ko tin riyul’ ma gad pigpig ngak Got u fithik’ e felfelan’. (1 Pet. 2:12) Machane, mang e rayog ni nge buch ni faanra kan yal’uweg reb e walag u lan e ulung ni bochan e de fol ko pi motochiyel rok Got? Faanra buch boch ban’en ni aray rogon, ma rayog ni nge k’aring boch e walag u lan e ulung ni nge mulan’rad ma dab kur felfelan’gad.

Pi n’en ni ma guy e re fayleng rok Satan ney rogon ni nge adag e girdi’ e ku aram boch ban’en nrayog ni nge warnag e felfelan’ rodad. Ma fanay Moonyan’ e re fayleng rok ney ni nge k’aringdad ni ngad adaged ni nge yag boch ban’en ngodad ni gathi rib t’uf rodad. Machane, ngad guyed rogon ndab da paged talin fapi thin ni yog Jesus ni faani gaar: “Dariy be’ nrayog ni nge mang sib rok l’agruw i masta: ya ra fanenikay bagayow me t’uf bagayow rok; ya ra yul’yul’ ngak bagayow me darifannag bagayow. Dabiyog ni ngam manged tapigpig rok Got ma ki gimed e tapigpig rok e salpiy.” (Matt. 6:24) Dabiyog ni ngad pigpiggad ngak Jehovah ni gad ba felfelan’ maku gad be guy rogon ni nge yag urngin ban’en nrayog ni nge yag ngodad ko re fayleng ney.

Piin nib t’uf Jehovah rorad e darur lemnaged ni pigpig ni yad ma tay ngak e ban’en ni kaygi tomal ngorad. (1 John 5:3) Dab mu pagtalin ni yog Jesus ni gaar: “Mired ngog, ni gimed gubin e piin ni ke aw parowmed i fek e n’en nib tomal ni gimed be fek, mu gu pi’ e toffan ngomed. Mfeked e mat’ rog ngam tiyed nga pomed, mi gimed folwok rog, ya gub munguy ma gub sobut’an’; mi gimed pirieg e toffan. Ya re mat’ ni gu ra pi’ ngomed e mmom, ma tomalngin e re n’en ni gu ra tay nga pomed e bbaud.” (Matt. 11:28-30) Nap’an nra mang be’ reb e tin riyul’ e Kristiano ma rib gel e felfelan’ ni ma tay. Ma bay fan ni ngad felfelan’gad ko pigpig ni gad be tay ngak Jehovah. Chiney e ngad weliyed dalip i fan nrayog ni ngad ‘pared nri gad ba felfelan’’ ko pigpig ni gad be tay ngak Got ni ir e be ayuwegdad.​—Hab. 3:18.

Gad be pigpig ngak e En ni Ke Pi’ e Yafos ngodad, ni ir reb e Got nib felfelan’. (Acts 17:28; 1 Tim. 1:11) Gad manang nib milfan e yafos rodad ngak e En ni Ke Sunmiydad. Ere, aram fan ni ka gad be ulul ni ngad pigpiggad ngak ndemtrug urngin e duw ni kan taufenagdad.

Am lemnag e n’en ni rin’ Héctor ni ir reb e walag ni ke gaman 40 e duw ni ma lekag boch e ulung rodad. Yugu aram rogon ni “ke pilibthir” machane ka be pigpig ngak Jehovah nib felfelan’. (Ps. 92:12-14, BT) Bochan ni ke m’ar e ppin rok ma aram fan ndabkiyog ni nge rin’ boor ban’en ni fan ko pigpig ni be tay ngak Got. Yugu aram rogon ma ka ma par nib felfelan’. I yog ni gaar: “Yugu aram rogon ni be kireban’ug ni gu be guy e ppin rog ni be ubchiya’ i yan, ma kub mo’maw’ rog rogon ni nggu ayuweg, machane da gur ma pag e re n’ey ni nge k’aringeg ni nge dab kug pigpig ngak Got u fithik’ e felfelan’. Gu manang nib milfag ngak Jehovah. Ma gu manang ni bay fan ni ke sunmiy e girdi’, ere bay rogon ni nggu t’ufeg mug pigpig ngak u polo’ i gum’irchaeg. Ere, gu ma athamgil ni nggu par ni gub pasig ko machib, ma kug ma athamgil ni nggu par nib m’on u wan’ug e pi n’en ni ke l’agan’dad ngay nra rin’ Gil’ilungun Got ni fan ngodad boch nga m’on ya nge dabi war e felfelan’ rog.”

Ke pi’ Jehovah fare biyul ni maligach ya nge yag ni ngki yag bayay e yafos ngodad ni bay e felfelan’ riy. Arrogon, “Got e rib t’uf e girdi’ nu fayleng rok, ma aram me pi’ Fak ni kari maagirag rok nge yib, ni fan e nge urngin e piin ni michan’rad ngak e aram e dab kur m’ad, ya ke yog e yafos ndariy n’umngin nap’an ngorad.” (John 3:16) Arrogon, fare biyul ni maligach ni pi’ Got u daken Jesus e aram e n’en ni ke bing e kanawo’ ngodad ni nge yag ni ngan n’ag fan e denen rodad me yag ni ngki yag bayay e yafos ndariy n’umngin nap’an ngodad. Ere uw rogon u wan’um, gathi bay rogon ni ngad felfelan’gad ko re n’ey? Maku gathi susun ni ngad pigpiggad ngak Jehovah ni gad ba felfelan’ ni bochan e gad be pining e magar ko fare biyul ni ke pi’?

I yog reb e walag ni pumoon ni ma par u Mexico ni ka nog Jesús ngak ni gaar: “Ug par ni kug mang sib ko maruwel rog, ya bay boch e rran ni gu ma maruwel u lan boor e awa ni yugu aram rogon ni gathi ban’en ni thingar gu rin’. Ug rin’ e re n’em ni bochan e gu baadag ni nge yoor e salpiy rog. Machane, faani boch nga tomuren mug fil murung’agen Jehovah nge rogon ni ke pi’ Fak ke  yim’ ni fan ko girdi’. Nap’an ni gu fil e pi n’ey, ma aram mug adag ni nggu pigpig ngak. Ere, gu ognag e yafos rog ngak Jehovah, ma aram mug tal ko fare maruwel ni ke gaman 28 e duw ni kug par riy. Ma nga tomuren ma aram mug un ko pigpig u polo’ e tayim rog.” Ka aram nap’an i yib ni be pigpig e re walag ney ngak Jehovah nib felfelan’.

Ngongol nib fel’ ni gad ma rin’ e der ma k’aring e kireban’ ngodad, ya bin riyul’ riy e ba gel e felfelan’ ni ma yibnag ngodad. Ka ga manang rogon e yafos rom u m’on ni ngam fil murung’agen Jehovah? I puguran apostal Paul ngak e pi Kristiano u Roma ni ‘immoy ba ngiyal’ ni ur pired ni yad e sib rok e denen,’ machane kar manged “sib rok e tin nib mat’aw.” Ma bochan ni kar thilyeged e ngongol rorad kar beechgad u p’eowchen Got ma aram fan nrayog ni ngar athapeged ni nge yag e yafos ndariy n’umngin nap’an ngorad. (Rom. 6:17-22) Ku arrogodad ni gad ma fol ko pi motochiyel rok Jehovah, ma bochan ni gad ma rin’ e re n’ey ma aram fan ndarud pared nib kireban’dad ni bod rogon e piin ni yad ma par ni gubin ngiyal’ ni yad be rin’ boch e ngongol nib kireb. Riyul’ nib gel e felfelan’ ko biney e par ni gad be tay!

Am lemnag e n’en ni buch rok Jaime. Cha’ ney e ir be’ nde mich Got u wan’, ma ma lemnag ni ke sum e girdi’ ko gamanman, maku ir reb i girdien e tug. Nap’an ni un nga boch e muulung mi ri gin nga rogon e t’ufeg nni dag ngak. Machane, ba mo’maw’ ngak ni nge digey e ngongol ni i rin’ kafram. Ere, thingari meybil ngak Jehovah ni nge ayuweg ni ngari mich u wan’. I yog ni gaar: “Buchuuw ma buchuuw ma aram me riyul’ u wan’ug nriyul’ ni bay Got ni Chitamangidad ni ma t’ufegey ma ri ma runguyey. Bochan ni gu ma fol ko pi motochiyel rok Jehovah nib mat’aw, ma aram e n’en ni ke ayuwegeg. Faan gomanga dag thilyeg e ngongol rog, ma sana ku gum’ ni bod rogon ni ke buch rok boch e fager rog ni ku yad ma un ko tug. Rib gel e felfelan’ ni kug tay u nap’an e pi duw ni kug pigpig ngak Jehovah.”

Ga be lemnag ma susun ni nge uw rogon e lem rodad u nap’an ni gad be sonnag e ngiyal’ ni yira thang e re m’ag nib kireb ney riy? Dab mu pagtalin ni gad be ‘yung ban’en ni fan’ nga gelngin Got nib thothup. Ere, “wom’engin nra yib riy” ngodad e aram e yafos ndariy n’umngin nap’an. Ere, “dabi chalbadad i ngongliy e ngongol nib fel’; ya faanra dab da paged gadad, ma ba’ nap’an ni bayi taw ngay ma gadad t’ar wom’engin.” (Gal. 6:8, 9) Manga yigi ayuwegdad Jehovah nge yag nda athamgilgad, ma gad maruwel nib gel ni nge yag ngodad e pi fel’ngin nra ayuwegdad ni ngad mageygad ni gad ba fos u nap’an “fare gafgow ni ba ga’,” ma gad ulul ni ngad pigpiggad ngak Jehovah ni gad ba felfelan’ ndemtrug ko mang magawon e gad ra mada’nag.​—Rev. 7:9, 13, 14; Jas. 1:2-4.

Ba pagan’dad ni yira tow’athnagdad ko athamgil ni gad be tay, ya manang Got e maruwel ni gad be rin’ nge rogon ni gad be t’ufeg nge rogon ni gad be tayfan fithingan. Faan gad ra ulul ni ngad pigpiggad ngak Jehovah ni gad ba felfelan’, ma rayog ni ngad boded David ni fare psalmist ni faani gaar: “Ba’ Somol u lanin’ug ni gubin ngiyal’; ba’ nrib chugur ngog, ma dariy ban’en nrayog ni nge rurgeg. Ere gu be par ni gub sug ko felfelan’ ma ba fel’ lanin’ug, ma gu be par ni gubin ngiyal’ nib pagan’ug.”​—Ps. 16:8, 9.