1-2. (a) Mang e ra ayuwegdad ni ngad athamgilgad u reb e rran ngu reb? Mu weliy rogon. (b) Mang e gad ra weliy u lan e re article ney?

“NAP’AN nug ra lemnag e skeng ni kug wan u fithik’, ma gu manang ndabiyog ni nggu athamgiliy u gelngig.” Bay ba ngiyal’ ni ka mog ban’en ni aray rogon, fa? Boor i gadad e ke yog e re n’ey. Rayog ni ka mog e re n’ey u tomuren ni kam sul kam lemnag rogon ni ke yag ni ngam athamgil u fithik’ ba mit e m’ar nib ubchiya’ ni keb ngom, ara rogon ni kam athamgil u nap’an ni ke yim’ be’ nib t’uf rom. Nap’an ni ga ra lemnag e pi magawon ney, ma rayog ni ngam nang ni fan ni ke yag ni ngam athamgil u reb e rran ngu reb e bochan gelngin Jehovah “ni ir e ba th’abi gel” ni be pi’ ngom.​—2 Kor. 4:7-9.

² Ku gad ma taga’ nga gelngin Got nib thothup ni nge ayuwegdad ni nge dab da paged e re fayleng nib kireb ney ni nge gagiyegnagdad. (1 John 5:19) Maku reb e, ba t’uf ni nge yib gelngidad ni ngad chamgad nga ‘gelngin e pi kan nib kireb.’ (Efe. 6:12) Ere chiney e ngad weliyed l’agruw e kanawo’ ni ma ayuwegdad gelngin Got nib thothup u fithik’ e pi magawon rodad. Ngemu’ ma gad weliy e n’en nrayog ni ngad rin’ed ya nge yag ni ngari yib angin gelngin Got nib thothup ngodad.

3. Mang reb e kanawo’ ni ma ayuwegdad Jehovah riy ya nge yag nda athamgilgad u fithik’ e pi skeng ni ma yib ngodad?

³ Gelngin Jehovah nib thothup e ma ayuwegdad ni aram e ma pi’ gelngidad ni ngad rin’ed urngin ban’en nib t’uf ni ngad rin’ed ni yugu aram rogon ni gad be mada’nag e magawon. I nang apostal Paul ni fan ni ke yag ni nge ulul ko pigpig ngak Jehovah ni yugu aram rogon ni be mada’nag e magawon e bochan e i taga’ nga “gelngin Kristus.” (2 Kor. 12:9) Nap’an e yay ni l’agruw e milekag ni tay ni be machib, ma gathi kemus ni yoornag e tayim rok ni fan ko machib ya ki un ko maruwel ni nge yag e salpiy ngak ni nge fek e tin nib t’uf rok. I par ko fare binaw nu Korinth u tafen Aquila nge Priscilla ni yow ma mongongol tent. Ere bochan ni ku manang Paul rogon i ngongliy e tent, ma aram ma ur maruwelgad boch e rran u taabang. (Acts 18:1-4) Gelngin Got nib thothup e ayuweg Paul ni nge maruwel ni nge yognag e tin nib t’uf rok, maku be machib.

4. Mang magawon e immoy rok Paul nrogon ni bay ko 2 Korinth 12:7b-9?

 ⁴ Mu beeg e 2 Korinth 12:7b-9. * Mang e be yip’ Paul fan u nap’an ni yog ni be gafgow ni bochan ban’en ni bod “ba rachangal nib gel e amith riy” nrogon ni bay ko pi verse ney? Faanra ke rag e rachangal nga bang u dowam mab mudugil nib gel e amith riy. Ere n’en ni be yog Paul e bay ba magawon ni be mada’nag nri be gafgow riy. I yog nre magawon ney e ba “mol’og rok moonyan’” ni yug be ‘pirdiiy.’ Sana gathi Satan nge pi moonyan’ e yad be k’aring e magawon ngak Paul ni bod ba rachangal ni yibe rogoy ngak. Machane nap’an ni nang e pi kan nib kireb e magawon ni be mada’nag Paul, ma sana rayog nra k’aringed e re magawon nem ni nge gel boch e mo’maw’ riy. Re n’ey e bod ni bay be’ ni be pi’ e re rachangal nem be toar i yan. Ere mang e rin’ Paul?

5. Uw rogon ni fulweg Jehovah taban e meybil rok Paul?

⁵ Som’on e baadag Paul ni nge chuweg Jehovah e re magawon rok nem ni “bod ba rachangal.” I gaar: “Dalip yay ni kug meybil ngak Somol [Jehovah] . . . ni nge chuweg rog.” Yugu aram rogon ni ke meybil Paul, machane dan chuweg e re magawon rok nem ni bod ba rachangal. Ere gur, re n’ey e be yip’ fan nde sulweg Jehovah taban e meybil rok Paul? Danga’, ya sulweg taban e meybil rok. De chuweg Jehovah e re magawon nem, machane i pi’ gelngin Paul ni nge athamgil u fithik’. I gaar Jehovah: “Gelngig e rib gel ko ngiyal’ ni gab meewar.” (2 Kor. 12:8, 9) U daken e ayuw rok Got, me yag ni nge par Paul nib felfelan’ mab gapas laniyan’!​—Fil. 4:4-7.

6. (a) Uw rogon nrayog ni nge fulweg Jehovah taban e meybil rodad? (b) Mang boch ban’en ni kan micheg ko fapi thin nu Bible ni bay u lan e paragraph ni be pi’ gelngim?

⁶ Bay bayay ni kam wenig ngak Jehovah ni nge chuweg reb e magawon ni ga be mada’nag ni bod e n’en ni rin’ Paul, fa? Rayog ni boor yay ni kam yibilay murung’agen e re n’em ngak, machane der chuweg fare magawon, fa reb e be gel boch e mo’maw’ riy. Be magafan’um ni bochan e ga be lemnag nsana kam rin’ ban’en nde m’agan’ Jehovah ngay, fa? Faanra aray rogon, ma dab mu pagtalin e n’en ni buch rok Paul. Ra fulweg Jehovah taban e meybil rom ni bod rogon ni fulweg taban e meybil rok Paul! Rayog nsana dabi chuweg Jehovah e re magawon nem, machane ra pi’ gelngin nib thothup ni nge ayuwegem nge yib gelngim ni ngam athamgil u fithik’ e magawon rom. (Ps. 61:3, 4) Yugu aram rogon nsana “ba gel” e gafgow ni ga ra mada’nag, machane dabi digeyem Jehovah.​—2 Kor. 4:7-9.

7-8. (a) Uw rogon ni kan taarebrogonnag gelngin Got nib thothup ko nifeng? (b) Uw rogon ni ke weliy Peter rogon ni ma maruwel gelngin Got nib thothup?

⁷ Ku mang reb e kanawo’ ni ma ayuwegdad gelngin Got nib thothup riy? Rayog ni ngan taarebrogonnag gelngin Got nib thothup ko nifeng. Rab puluw e gin ni be thow e nifeng riy ma rayog ni nge milekag reb e barkow ni lay nge yan i taw ko gin be sor ngay ni yugu aram rogon nib meyko’. Ere ku arrogon gelngin Got nib thothup nra ayuwegdad ni ngad ululgad ko pigpig ngak Jehovah nge mada’ ko ngiyal’ ni kad thapgad nga lan e bin nib beech e fayleng ni ke micheg Got ni yugu aram rogon ni gad be mada’nag boch e skeng.

⁸ Bochan ni apostal Peter e immoy ni ir reb e tafita’, ma aram fan ni boor ban’en ni manang u murung’agen e milekag u maday. Sana aram fan nnap’an ni be weliy murung’agen rogon ni ma maruwel gelngin Got nib thothup, ma aram me fanay ba thin ni bay rogon ko milekag u maday. I yoloy ni gaar: “Dariy bbugithin ni yog e profet ni sum u laniyan’ be’, ya fare Kan ni Thothup rok Got [“gelngin Got nib thothup,” NW] e yib i ying ngak e girdi’ ngar weliyed e thin ni ke yib rok Got ngorad.” Fare bugithin ni Greek ni kan pilyeg ni “ying” e be yip’ fan ni “ngam pagem ngan fekem nga bang” ara “ngam pagem ngan pow’iyem.”​—2 Pet. 1:21.

9. Mang e baadag Peter ni nge lemnag e girdi’ u nap’an ni yog fare thin ni “ngam pagem ngan pow’iyem”?

⁹ Mang e baadag Peter ni nge lemnag e girdi’ u nap’an ni yog fare thin ni “ngam pagem ngan pow’iyem”? Bay bbugithin ni Greek ni ku taareb fan ko re bugithin ney ni fanay Luke ni ir e yoloy fare  babyor ko Acts ni nge weliy murung’agen e barkow ni be “un ko nifeng.” (Acts 27:15) I weliy be’ ni boor ban’en u murung’agen e Bible ni manang nnap’an ni yoloy Peter ni ke “yib i ying” gelngin Got nib thothup ngak e piin nra yoloyed e Bible, me fanay ba thin nra k’aring e girdi’ ni ngar lemnaged murung’agen e milekag u maday. Ere n’en ni be yog Peter e gelngin Got nib thothup e ir e pow’iy e piin nra yoloyed e Bible ni ngar rin’ed e maruwel rorad ni bod rogon e nifeng ni ir e be pow’iy bbarkow nge taw ko gin nge sor ngay. Ki weliy e cha’ney ni piin nra yoloyed e Bible e yad bod bbarkow ni “ke puf radan e lay riy.” Re n’ey e be yip’ fan ni kar fal’eged rogorad ni ngar rin’ed e maruwel ni be pow’iyrad gelngin Got nib thothup ni ngar rin’ed. I rin’ Jehovah e birok e maruwel ni aram e nge pi’ fare “nifeng” ara gelngin nib thothup. Ma piin nra yoloyed e Bible e kur rin’ed e birorad e maruwel ni aram e ngar folgad u rogon ni be pow’iyrad gelngin Got nib thothup.

10-11. Mang l’agruw ban’en nib t’uf ni ngad rin’ed ya nge yag ni pow’iydad gelngin Got nib thothup? Mu susunnag.

¹⁰ Riyul’ ni ngiyal’ ney e dakir fanay Jehovah gelngin nib thothup ni nge thagthagnag nga laniyan’ e girdi’ ni ngar yoloyed boch e babyor ko Bible. Machane ka be fanay gelngin nib thothup ni nge pow’iy e pi tapigpig rok. Ka be rin’ Jehovah e birok e maruwel. Ere uw rogon ni nge yib angin gelngin Got nib thothup ngodad? Ba t’uf ni ngad ululgad ngad rin’ed e n’en nib milfan ngodad. Uw rogon ni ngad rin’ed e re n’ey?

¹¹ Am lemnag e re n’ey. Faanra nge yag ni pow’iy e nifeng bbarkow ni lay nib fel’ rogon, ma bay l’agruw ban’en nthingari rin’ e en be yap’nag fare barkow. Som’on e nge fek fare barkow nge yan i tay ko gin bay e nifeng riy. Ya bin riyul’ riy e, dabiyog ni nge yan fare barkow ni faanra be par ko gin kan yiluy riy nib palog ko gin bay e nifeng riy. Bin migid e, ba t’uf ni nge girngiy e lay ko fare barkow nga lang me pithig radan. Ya bin riyul’ riy e, mus ni faanra bay e nifeng ma dabiyog ni nge mithmith fare barkow ni faanra der aw e nifeng nga lan e lay riy. Ere ku arrogodad nrayog ni ngad athamgilgad ko pigpig ni gad be tay ngak Jehovah ni faanra be ayuwegdad gelngin Got nib thothup. Ra nge yib angin gelngin Got nib thothup ngodad, maku bay l’agruw ban’en nib t’uf ni ngad rin’ed. Som’on e, thingar da rin’ed e tin ma pow’iy gelngin Got nib thothup e pi tapigpig rok ni ngar rin’ed. Bin migid e, ba t’uf ni ngad rin’ed  e pi maruwel ney u rogon nrayog rodad ni bod rogon e lay ko fare barkow nib t’uf ni “ngan girngiy nga lang min pithig radan.” (Ps. 119:32) Gad ra rin’ e gali n’ey, ma aram e rayog ni nge pi’ gelngin Got nib thothup gelngidad ni ngad ululgad ko pigpig ni gad be tay ngak Jehovah u fithik’ e yul’yul’ nge mada’ ko ngiyal’ ni kad thapgad nga lan e bin nib beech e fayleng rok.

12. Mang e ngad weliyed e chiney?

¹² Kad weliyed l’agruw e kanawo’ u rogon ni ma ayuwegdad gelngin Got nib thothup riy. Gelngin Got nib thothup e ma pi’ gelngidad me ayuwegdad ni ngad pared ni gad ba yul’yul’ u nap’an ni gad be mada’nag e skeng. Ku ma pow’iydad ma be ayuwegdad ni ngad rin’ed e maruwel ni baadag Jehovah ni rin’ed, ma angin nra yib ngodad e yafos ni manemus. Ere chiney e ngad weliyed aningeg ban’en nib t’uf ni ngad rin’ed ya ngari yib angin gelngin Got nib thothup ngodad.

13. Mang e rayog ni nge rin’ e Thin nu Bible ngodad nrogon nib puluw ko 2 Timothy 3:16, 17, machane mang e thingar da rin’ed?

¹³ Bin som’on e, ngam fil e Thin rok Got. (Mu beeg e 2 Timothy 3:16, 17.) I fanay Got gelngin nib thothup ni nge “yib i pi’” e thin rok nga laniyan’ e piin nra yoloyed e Bible. Nap’an ni gad ra beeg e Bible ma gad fal’eg i lemnag e thin riy, ma aram e gad be pag e fonow rok Got ni nge suguy lanin’dad nge gum’ircha’dad. Pi thin ney e ma k’aringdad ni ngad thilyeged boch ban’en u lan e yafos rodad ya nge yag nda rin’ed e tin nib m’agan’ Jehovah ngay. (Heb. 4:12) Machane faanra ngari yib angin gelngin Got nib thothup ngodad, ma thingar da ted e tayim ni ngad filed e Bible ni gubin ngiyal’ ma gad be fal’eg i lemnag e pi n’en ni gad be beeg. Gad ra rin’ ni aray rogon, ma aram e ra par e thin rok Got ni ir e be gagiyegnag e thin nge ngongol rodad.

14. (a) Mang fan nrayog ni nga dogned ni bay gelngin Got nib thothup ko pi muulung ni gad ma tay? (b) Mang e ra ayuwegdad ni ngari yib angin gelngin Got nib thothup ngodad u nap’an e pi muulung rodad?

¹⁴ Bin l’agruw e, ngad liyorgad ngak Got u taabang. (Ps. 22:22) Bay gelngin Jehovah nib thothup ko pi muulung ni gad ma tay. (Rev. 2:29) Mang fan nrayog ni nga dogned e re n’ey? Bochan e nap’an ni gad ra muulung e pi walag ni Kristiano nga taabang ni ngad liyorgad ma gad ma yibilay gelngin Got nib thothup, ma gad ma yon’ boch e tang nib puluw ko Thin rok Got, ma gad ma motoyil ko pi welthin nib puluw e fonow riy ko thin nu Bible ni be pi’ e piin piilal ni kan dugliyrad u daken gelngin Got nib thothup. Ku aram e re gelngin ni ma ayuweg e pi walag nib pin ni ngar fal’eged rogon e welthin rorad ngar pied. Machane faanra ngari yib angin gelngin Got nib thothup ngodad, mab t’uf ni ngaud fal’eged rogodad ni ngad pied e fulweg u nap’an e muulung. Gad ra rin’ e re n’ey, ma aram e nap’an ni gad ra yib ko muulung ma kad fal’eged rogodad ni nge yib angin gelngin Got nib thothup ngodad ni bod fare barkow ni lay ni kan pithig radan e lay riy.

15. Uw rogon ni ma ayuwegdad gelngin Got nib thothup u nap’an e machib?

¹⁵ Bin dalip e, ngam un ko fare maruwel ni machib. Nap’an ni gad ra fanay e Bible ni ngad machibgad ma gad fil e thin riy ko girdi’, ma aram e gad be pag gelngin Got nib thothup ni nge ayuwegdad u nap’an e machib. (Rom. 15:18, 19) Ra ngari yib angin gelngin Got nib thothup ngom, ma thingar mu un ko machib ni gubin ngiyal’ ma ga be fanay e Bible ko ngiyal’ nrayog ni ngam fanay riy. Reb e kanawo’ nrayog ni ngam mon’og u rogon ni ga ma non ko girdi’ u nap’an e machib e aram e ngam fanay boch ban’en nrayog ni nga nog ni bay ko fare babyor rodad ni Pi N’en ni Ma Rin’ e Piin Kristiano nge Machib ni Yad Ma Tay.

16. Mang e bin nth’abi fel’ e kanawo’ ni nge yag gelngin Got nib thothup riy ngom?

¹⁶ Bin aningeg e, ngam meybil ngak Jehovah. (Matt. 7:7-11; Luke 11:13) Bin th’abi fel’ e kanawo’ ni nge yag gelngin Got nib thothup riy ngom e aram e ngam ning ngak u daken e meybil. Dariy ban’en nrayog ni nge taleg Jehovah ndabi rung’ag e meybil rodad ara talegdad ndabi yag gelngin Got nib thothup ngodad. Mus ni faanra gad bay u kalbus, ma rayog ni nge ayuwegdad gelngin Got nib thothup. Maku reb e, dariy ban’en nrayog ni nge rin’ Satan ni nge talegdad ndabi yag gelngin Got nib thothup  ngodad. (Jas. 1:17) Ere uw rogon ni ngad meybilgad ya ngari yib angin gelngin Got nib thothup ngodad? Ra ngad nanged e fulweg ko re deer ney, ma ngad weliyed boch ban’en u murung’agen e meybil ni bay u ba fanathin ni yigoo Gospel rok Luke e bay riy. *

17. Mang e rayog ni ngad filed u murung’agen e meybil ko fare fanathin ni yog Jesus ni bay ko Luke 11:5-9, 13?

¹⁷ Mu beeg e Luke 11:5-9, 13. I tamilangnag Jesus ko re fanathin ney rogon nsusun e ngad ninged gelngin Got nib thothup u daken e meybil. Kan weliy ko re fanathin ney ni fare moon e ke yag ngak e n’en nib t’uf rok ni bochan e ‘de tamra’ ni nga i par ni be wenig ngak’ fare fager rok. De rus e re moon ney ni nge ning e ayuw ko fager rok ni yugu aram rogon ni ke n’uw e nep’. (Mu guy e mwb18 ko July.) Uw rogon ni taarebrogonnag Jesus e n’en ni buch u lan e re fanathin ney ko meybil? I yog ni gaar: “Mu ninged, me yog ngomed; mu gayed, mi gimed pirieg; mu tugtuguyed e mab, min bing e mab ngomed.” Ere mang e gad be fil ko re n’ey? Ra nge ayuwegdad gelngin Got nib thothup ma thingar ud ninged u daken e meybil.

18. Mang fan nrayog ni nge pagan’dad nra pi’ Jehovah gelngin nib thothup ngodad nrogon nib puluw ko fare fanathin rok Jesus?

¹⁸ Ku be ayuwegdad e re fanathin rok Jesus ney ni ngad guyed fan nra pi’ Jehovah gelngin nib thothup ngodad. Fare moon u lan e re fanathin ney e baadag ni ngari ayuweg fare milekag ni ke yib nga tafen. I lemnag nib t’uf ni nge pi’ e ggan ni nge kay e re milekag nem ni ke yib nga tafen ni ke n’uw e nep’. I yog Jesus ni pi’ e fager ko fare moon e flowa ngak ni bochan e de tal i ning. Ere mang e be tamilangnag Jesus ko re n’ey? Faanra ba m’agan’ be’ nde flont ngay ni nge ayuweg e fager rok nder tal i ning ban’en ngak, me ere rayog ni nge pagan’dad ni Chitamangidad ni bay u tharmiy ni ir be’ nib gol e ra ayuweg e piin ni yugu yad be ning gelngin nib thothup! Ere aram fan nrayog ni nge pagan’dad nra fulweg Jehovah taban e meybil rodad u nap’an ni gad ra ning gelngin nib thothup.​—Ps. 10:17; 66:19.

19. Mang fan nrayog ni nge pagan’dad nrayog ni ngad athamgilgad?

¹⁹ Rayog ni nge pagan’dad ni yugu aram rogon nder tal Satan ko cham ni be tay ngodad, ma rayog ni ngad athamgilgad. Mang fan? Bochan e bay l’agruw e kanawo’ ni ma ayuwegdad gelngin Got nib thothup riy. Bin som’on, gelngin Got nib thothup e ma pi’ gelngidad ni ngad athamgilgad u fithik’ e magawon. Bin l’agruw, gelngin Got nib thothup e ma ayuwegdad ni ngad ululgad ko pigpig ni gad be tay ngak Jehovah nge mada’ ko ngiyal’ ni ka darod nga lan e bin nib beech e fayleng. Ere ngad dugliyed u wan’dad ni ngari yib angin gelngin Got nib thothup ngodad!