1. Mang fan ni yigoo Jehovah e ngad liyorgad ngak?

SUSUN e yigoo Jehovah e ngad liyorgad ngak ni bochan e ir e ke sunmiydad, ma ir e ke pi’ e yafos ngodad. (Rev. 4:11) Machane bay ban’en nthingar da kol ayuwgad riy. Yugu aram rogon nib t’uf Jehovah rodad ma gad ma tayfan, machane rayog ni ngad paged boch ban’en ni nge mang ir e m’on u lan e yafos rodad ma dab kud t’ufeged Jehovah ma dab kud liyorgad ngak u rogon nsusun e ngad rin’ed. Ba t’uf ni ngad nanged rogon nrayog ni nge buch e re n’ey. Machane som’on e ngad weliyed ko mang e be yip’ fan ni kemus ni yigoo Jehovah e ngad liyorgad ngak.

2. Mang e gad ra rin’ ni faanra yigoo Jehovah e gad ba yul’yul’ ngak nrogon ni bay ko Exodus 34:14?

² Be yog e Bible nra ngad yul’yul’gad ngak Got ma be yip’ fan ni nge t’uf rodad. Faanra yigoo Jehovah e gad ba yul’yul’ ngak, ma aram e yigoo ir e gad ra liyor ngak. Dab da paged be’ ara ban’en ni nge m’on u wan’dad me tomur Jehovah.​—Mu beeg e Exodus 34:14.

3. Mang fan ni bay tapgin ni ngad yul’yul’gad ngak Jehovah?

³ Gathi yugu dariy tapgin e yul’yul’ rodad ngak Jehovah. Mang fan? Ya yul’yul’ rodad ngak e be tor nga daken e tin riyul’ ni kad filed u murung’agen. Bochan e re n’ey, ma aram e kar da adaged pi fel’ngin nrib manigil. Kad nanged ma kki m’agan’dad ko tin baadag nge tin dabun. Ke tamilang u wan’dad e n’en nib m’agan’ ngay ni fan ngodad, ma gad be fol riy. Ri gad ba tow’ath ni ke bing e kanawo’ ngodad nrayog ni ngad manged fager rok. (Ps. 25:14) Gubin e tin kad filed u murung’agen e En Ke Sunmiydad e ke chugurnagdad ngak.​—Jas. 4:8.

4. (a) Mang e ma fanay Moonyan’ ni nge warnag e t’ufeg rodad ngak Jehovah? (b) Mang e gad ra weliy ko re article ney?

⁴ Moonyan’ e ir e be gagiyegnag e re fayleng ney. Ere ma fanay e re n’ey ni nge k’aringdad ni nge ga’ fan u wan’dad e tin nib ga’ fan u wan’ e girdi’, miki mo’maw’ ngodad ni ngad siyeged boch ban’en nib kireb ni gad ma ar’arnag. (Efe. 2:1-3; 1 John 5:19) Dabun ni yigoo Jehovah e gad be t’ufeg, ere aram fan ni baadag ni ngkud adaged  yugu boch ban’en. Ngad weliyed l’agruw e kanawo’ nrayog ni nge rin’ Moonyan’ e re n’ey riy. Bin som’on e, ma guy rogon ni nge k’aringdad ni nge pag feni ga’ fan e salpiy u wan’dad, ma bin l’agruw e ma guy rogon ni nge k’aringdad ni ngad chuweged e chalban rodad nga boch ban’en nib kireb.

5. Mang fan nthingar da kol ayuwgad ndabi pag feni ga’ fan e salpiy u wan’dad?

⁵ Gad gubin ni gad baadag ni nge gaman e ggan ni ngad ked, ma bay e mad ni ngad chuwgad ngay, nge bang ni ngad pared riy. Machane thingar da kol ayuwgad ndabi pag feni ga’ fan e salpiy u wan’dad. Boor e girdi’ e ngiyal’ ney e “kari gel e chogow rorad,” ma kki ga’ fan e chugum u wan’rad. (2 Tim. 3:2) Manang Jesus nrayog ni ngan waliy pi gachalpen ni nge m’on e salpiy u wan’rad. Ere yog ni gaar: “Dariy be’ nrayog ni nge mang sib rok l’agruw i masta: ya ra fanenikay bagayow me t’uf bagayow rok; ya ra yul’yul’ ngak bagayow me darifannag bagayow. Dabiyog ni ngam manged tapigpig rok Got ma ki gimed e tapigpig rok e salpiy.” (Matt. 6:24) Be’ ni be liyor ngak Jehovah machane ku boor e tayim ni be fanay ni be guy rogon ni nge yoor e salpiy rok e bod be’ ni be guy rogon ni nge pigpig nga l’agruw e masta. Ra aram rogon ma gathi yigoo Jehovah e ir e be yul’yul’ ngak.

6. Mang e rayog ni ngad filed ko thin ni yog Jesus ngak fare ulung nu Laodicea?

⁶ Nap’an ni ke chugur nga tungun e bin som’on e chibog C.E., ma girdien fare ulung ni bay ko fare mach nu Laodicea e ur ufgad ni yad be gaar: “Ke yoor ban’en rog ni ke fel’ rogog, ya urngin e tin ni nge yog ngog e ke yog ngog.” Machane rogorad u wan’ Jehovah nge Jesus e ‘kar gafgowgad, ma dakuriy e mad u dakenrad, ma kar malmitgad.’ Gathi fan ni fonownagrad Jesus e bochan ni boor e salpiy rorad, ya fonownagrad ni bochan e ke pag feni ga’ fan e salpiy u wan’rad ma ke kireb e tha’ u thilrad Jehovah. (Rev. 3:14-17) Faanra kad nanged ni ke tabab ni nge m’on e salpiy u wan’dad, ma aram e thingar da gurgad ngad yal’uweged e lem rodad. (1 Tim. 6:7, 8) Faanra dab da rin’ed e  re n’ey, ma aram e gad ra tabab ni ngkud adaged yugu boch ban’en ma dabki fel’ u wan’ Jehovah e liyor rodad ngak. Jehovah e “dabun yugu reb e kan ni nge tagenging ngak.” (Deut. 4:24) Ere uw rogon nrayog ni nge pag feni ga’ fan e salpiy u wan’dad?

7-9. Mang e kam fil ko n’en ni buch rok reb e piilal ni ka nog David ngak?

⁷ Am lemnag e n’en ni buch rok reb e piilal ni ma par u Meriken nib gel e maruwel ni ma tay ni ka nog David ngak. Ma yog ni ir be’ nib yul’yul’ u tabon e maruwel. Re raba’ i maruwel nem ni ma un ngay e pi’ yugu reb e maruwel ngak ni kab fel’ ko bin i rin’ kafram, ma kub tolang puluwon riy. Ku yima yog ni ir be’ ko nam rok nrib chag i rin’ e re miti maruwel nem. I gaar David: “Ngiyal’ nem e gu lemnag ni pi tow’ath ney ni ke yag ngog e aram e mich riy ni be tow’athnageg Jehovah.” Machane gur, riyul’ e re n’ey?

⁸ I tabab David ni nge nang ni maruwel rok e be magawonnag e tha’ u thilrow Jehovah. I gaar: “Ra nap’an e muulung ara machib ma gu be lemnag e pi magawon u tabon e maruwel rog. Yugu aram rogon ni boor e salpiy ni be yag ngog machane ba gel e magafan’ ni gu be tay, miki tabab ni nge magawon e mabgol rog.”

⁹ I tamilang u wan’ David nib t’uf ni nge dugliy e n’en ni nge m’oneg u wan’. I gaar: “Gu dugliy u wan’ug ni nggu rin’ ban’en ko re n’ey.” Baadag David ni nge thilyeg e ngiyal’ ni ma maruwel riy nge n’umngin nap’an ni ma maruwel, ma aram me yog ngak e en nib ga’ u tabon e maruwel e n’en ni ke dugliy. Ere mang e buch? Kan n’ag David ko maruwel! Ere mang e rin’? I gaar: “Faani bin migid e rran mug fal’eg e babyor rog ni nggu auxiliary pioneer ni gubin e pul.” I un David nge ppin rok nga reb e maruwel ni yow ma klin ya nge yag e salpiy ngorow ni ngar fekew e tin nib t’uf rorow riy. Boch nga tomuren me un ko regular pioneer me munmun miki un e ppin rok ngak ko pioneer. Re wu’ i mabgol ney e ra dugliyew ni ngar unew nga reb e maruwel ni nge yag e salpiy riy ni boor e girdi’  ndabun ni nge rin’. Machane maruwel ni yow be rin’ e gathi aram e n’en th’abi ga’ fan u wan’row. Yugu aram rogon ni ke lich e salpiy ni be yag ngorow e chiney nga urngin ni i yag ngorow kafram, machane gubin e pul nib gaman e salpiy ni be yag ngorow ni ngar piew puluwon e tin nib t’uf rorow. Yow baadag ni nge m’on Jehovah u wan’row ma kar guyew rogon ni ma ayuweg Jehovah e piin yad ma m’oneg Gil’ilungun u wan’rad.​—Matt. 6:31-33.

10. Uw rogon ni ngad kol ayuwgad ko pi n’en ni gad ma tay nib ga’ fan u wan’dad?

¹⁰ Demtrug ko boor ara buchuuw e salpiy rodad, machane ba t’uf ni ngad kol ayuwgad ko pi n’en ni gad ma tay nib ga’ fan u wan’dad. Uw rogon? Mu guy rogon ni nge dabi tabab ni nge ga’ fan e salpiy u wan’um. Ku dab mu pag e maruwel rom ni nge ga’ fan ko pigpig rom ngak Jehovah. Uw rogon ni ngam nang ni faanra be tabab ni nge buch e re n’ey rom? Baaray boch e deer nrayog ni ngam fithem riy: ‘Ba ga’ ni gu ma lemnag murung’agen e maruwel rog u nap’an e muulung nge machib, fa? Gubin ngiyal’ ni be magafan’ug nri chey ma dabi gaman e salpiy rog boch nga m’on, fa? Be k’aring e salpiy nge chugum e magawon nga lan e mabgol rog, fa? Ra m’agan’ug ni nggu rin’ boch e maruwel ndabun e girdi’ ni ngar rin’ed ni bochan e nge yoor e tayim ni nggu fanay ko pigpig rog ngak Jehovah, fa?’ (1 Tim. 6:9-12) Nap’an ni gad be fal’eg i lemnag e pi deer ney, ma dab da paged talin ni gad ba t’uf rok Jehovah, ma ke micheg ko piin yad ba yul’yul’ ngak ni ke gaar: “Ri dab gu pagem; ma ri dab gu n’igem.” Aram fan ni yoloy apostal Paul ni gaar: “Dabi m’on e salpiy u lanin’med.”​—Heb. 13:5, 6.

11. Mang e rayog ni nge buch rok be’ ni bochan e pi n’en ni be mel’eg ni nge chuweg e chalban rok ngay?

¹¹ Baadag Jehovah ni ngad felfelan’gad ko yafos rodad, ma pi n’en ni gad ma chuweg e chalban rodad ngay e rayog ni nge yibnag e felfelan’ ngodad. Bin riyul’ riy e, be yog e Thin rok Got ni “bin th’abi fel’ ngak be’ ni nge rin’ e nge abich me garbod me felfelan’ ko tin ke thognag.” (Ekl. 2:24, BT) Machane, yooren e pi n’en ni yima chuweg e chalban ngay u roy u fayleng e rayog ni nge magawonnagdad. Rayog ni nge k’aring e girdi’ ni ngar tababgad ni nge m’agan’rad ko tin be yog e Thin rok Got nib kireb, fa reb e ra adaged e pi ngongol nem.

12. Mang fan ni ngad kol ayuwgad ko pi n’en ni gad ma mel’eg ni ngad chuweged e chalban rodad ngay nrogon ni bay ko 1 Korinth 10:21, 22?

¹² Gad baadag ni kemus ni yigoo Jehovah e ngad liyorgad ngak, ere dabiyog ni ngad “abichgad u tebel rok Somol” ma kad gad be abich u “tebel rok e pi moonyan’.” (Mu beeg e 1 Korinth 10:21, 22.) Gimew ra abich be’ u taabang ma aram e pow riy nib fel’ thilmew. Faan gad ra mel’eg boch ban’en ni ngad chuweged e chalban rodad ngay  nra k’aringdad ni ngad adaged e cham, ara ngongolen e pig, ara ngongol ndarngal, ara ku boch ban’en nib kireb ni yima ar’arnag, ara boch e lem nde puluw, ma aram e bod ni gad be abich e pi toogor rok Got u taabang ma gad be kay e ggan ni kar ngongliyed. Ere ra yan i aw ni gathi kemus ni gad be gafgownagdad, ya ku gad be kirebnag e tha’ u thildad Jehovah.

13-14. Mang fan nthingar da kol ayuwgad ko pi n’en ni gad ma mel’eg ni ngad chuweged e chalban rodad ngay nrogon ni bay ko James 1:14, 15? Mu susunnag.

¹³ Mang boch e kanawo’ nrayog ni ngad taareb rogonnaged e pi n’en ni gad ma chuweg e chalban rodad ngay ko ggan? Nap’an ni gad ra abich ma rayog ni ngad gagiyegnaged e re miti ggan ni ngad ked. Machane nap’an ni gad ra ful’ e pi ggan nem, ma dabkiyog ni ngad gagiyegnaged e n’en nra rin’ nga fithik’ i dowdad. Ggan nib fel’ ngodad e rayog ni nge fal’eg fithik’ i dowdad, machane ggan nib kireb ngodad e ra kirebnag fithik’ i dowdad. Sana dabiyog ni ngad guyed angin ara wenegan nra yib ngodad ni ka chingiyal’ nem, machane ra munmun ma gad ra guy.

¹⁴ Ku arrogon nnap’an ni gad ra mel’eg e pi n’en ni ngad chuweged e chalban rodad ngay, ma rayog ni ngad gagiyegnaged rogon e tin ngad suguyed nga lanin’dad. Machane tomuren e re n’ey, ma pi n’en ni kad mel’eged ni ngad chuweged e chalban rodad ngay e ir e ra gagiyegnag rogon e lem rodad nge pi n’en ni bay u gum’ircha’dad. Gad ra chuweg e chalban rodad ko tin nib fel’ ban’en ma ra yibnag e felfelan’ ngodad, ma faanra ud chuweged e chalban rodad ko tin nib kireb ban’en ma ra yib wenegan nib kireb ngodad. (Mu beeg e James 1:14, 15.) Sana dab da guyed wenegan ni ka chingiyal’ nem, machane ra munmun ma ra gagiyel. Aram fan ni be gaar e Bible: “Dab mu banniged gimed, ya dariy be’ nrayog ni nge bannag Got. Ra be’ ma mit i n’en ni yung e ir e ra t’ar wom’engin. Faanra yung be’ ban’en nga daken e milay’ ni aram e tin nib kireb ni be ar’arnag, ma wom’engin nra yib riy ngak e yam’.” (Gal. 6:7, 8) Ere rib ga’ fan ni ngad siyeged gubin ban’en ni yima chuweg e chalban ngay nra k’aringdad ni ngad adaged e tin ma fanenikay Jehovah!​—Ps. 97:10.

15. Mang tow’ath e ke pi’ Jehovah ngodad nrayog ni ngad felfelan’gad ngay?

¹⁵ Boor e girdi’ rok Jehovah ni yad ma felfelan’ ni yad ma yaliy fare JW Broadcasting^® ni aram bang ni bay ko Internet nrayog ni ngan yaliy boch e video riy nib manigil. Bay reb e walag nib pin ni ka nog Marilyn ngak ni gaar: “Fare JW Broadcasting e ke ayuwegeg ni nge gel e felfelan’ rog. Gubin ban’en ni bay riy nrayog ni nggu yaliy ni bochan e ba fel’ ngog. Nap’an nra kireban’ug ni bochan e yigoo gag ara ke mulan’ug, ma gu ma gay reb e welthin ara Morning Worship ni nggu yaliy nra pi’ e athamgil nga lanin’ug. Re n’ey e ma chugurnag e tha’ u thilmow Jehovah nge ulung rok. Pi n’en ni bay ko JW Broadcasting e kari thilyeg e yafos rog.” Be yib angin ngom e re tow’ath ney ni ke pi’ Jehovah, fa? Gathi kemus ni gubin e pul ni bay boch ban’en nib beech ni yima tay ko JW Broadcasting, ya ku boor ban’en ni bay riy nrayog ni ngan motoyil ngay, nge boch e video nrayog ni ngan yaliy, nge ku boch e tang nra pi’ e athamgil nga lanin’uy. Pi n’ey e demtrug e ngiyal’ nrayog ni ngan yaliy ara ni motoyil ngay.

16-17. Mang fan nthingar da gonopiyed urngin e tayim ni gad ma tay ni fan ko tin gad ma chuweg e chalban rodad ngay? Uw rogon ni ngad rin’ed e re n’ey?

¹⁶ Gathi kemus ni ngad gonopiyed e miti n’en ni gad ma chuweg e chalban rodad ngay, ya thingar kud gonopiyed urngin e tayim ni gad ma tay ni fan ngay. Faanra dab da rin’ed e re n’ey, ma aram e rayog ni nge yoor e tayim ni gad be tay ni fan ko tin yima chuweg e chalban ngay, me buchuuw e tayim ni gad be tay ni fan ko pigpig rodad ngak Jehovah. Boor e girdi’ nib mo’maw’ ngorad ni ngar gonopiyed urngin e tayim ni yad ma tay ni fan ko pi n’en ni yad ma chuweg e chalban rorad ngay. Bay reb e walag nib pin ni 18 e duw rok ni ka nog Abigail ngak ni gaar: “Faanra ri boor pa’ u puluwog u reb e rran, ma ra yan i blayal’ ma gu baadag ni gu ma yaliy e TV ya ma ayuwegeg ni nge gapas lanin’ug. Machane faanra dab gu kol ayuw ma rayog  ni nggu par u mit e TV ni boor e awa.” Ku bay reb e walag ni kab pagel ni ka nog Samuel ngak ni gaar: “Bay yu ngiyal’ ni gu ma yaliy boor e video nib ngoch ko Internet. Som’on e gu ma yaliy taareb, ma gu ra da’da’ ma ke yan dalip ara aningeg e awa ni gu be yaliy e pi video nem.”

¹⁷ Uw rogon ni ngam gonopiy urngin e tayim ni ga ma tay ni fan ko tin ni ga ma chuweg e chalban rom ngay? Som’on e ngam nang urngin e tayim ni ga be tay ni fan ko pi n’ey. Ere mang ndab mu yoloy nga but’ urngin e awa ni kam fanay u lan reb e wik ni fan ko pi n’en ni yima chuweg e chalban ngay? Mu yoloy nga lan reb e calendar urngin e awa ni kam yaliy e TV riy, ara kam yaliy boch ban’en ko Internet, ara kam fafel nga boch e game ni bay ko cellphone rom. Faanra ga be lemnag ni kaygi pag urngin e tayim ni ga be tay ni fan ko pi n’ey, ma aram e ngam guy rogon ni ngam fal’eg e schedule rom. Som’on e ngam tay e tayim ni fan ko tin nib ga’ fan, ma aram mfin mu tay e tayim ni fan ko pi n’en ni ga ma chuweg e chalban rom ngay. Bin migid e, ngam ning e ayuw ngak Jehovah ni nge ayuwegem nge yag nim fol ko schedule rom. Faan ga ra rin’ ni aray rogon, ma aram e ra yib e tayim rom miki pasigan’um ko fol Bible ni ga ma tay ni yigoo gur, nge fol Bible ni tabinaw, nge muulung, nge rogon e pigpig ni ga ma tay ngak Jehovah u daken fare maruwel ni machib nge ngan fil e Bible ko girdi’. Maku reb e, dabi magawon e tafinay rom u nap’an ni ga be rin’ boch ban’en ni nge chuweg e chalban rom ya ga manang ni ga be m’oneg e tirok Jehovah ban’en.

18-19. Uw rogon ni ngad daged ni kemus ni yigoo Jehovah e gad be liyor ngak?

¹⁸ Tomuren ni yoloy apostal Peter murung’agen e ngiyal’ ni yira thang e re fayleng rok Satan ney nge murung’agen e bin nib beech e fayleng, me gaar: “Pi tafager rog, n’umngin nap’an ni gimed be par ni gimed be sonnag e re Rran nem e nguum athamgilyed ngam pired ni gimed mmachalbog ma dariy thibngimed u p’eowchen Got ma ngam pired nib aw e gapas u thilmed Got.” (2 Pet. 3:14) Nap’an ni gad ra fol ko re fonow ney ma gad athamgil u rogon nrayog rodad ni nge puluw e ngongol nge liyor rodad ko tin nib m’agan’ Jehovah ngay, ma aram e gad be dag ni kemus ni yigoo ir e gad be liyor ngak.

¹⁹ Dabi tal Satan nge re m’ag rok ney i guy rogon ni nge k’aringdad ni ngad m’oneged yugu boch ban’en u wan’dad, me tomur Jehovah. (Luke 4:13) Machane demtrug e re miti magawon ni gad ra mada’nag, ma dab da paged be’ ara ban’en ni nge m’on u wan’dad me tomur Jehovah. Kad dugliyed u wan’dad ni yigoo Jehovah e ngad liyorgad ngak, ya kemus ni yigoo ir e bay rogon ni ngan liyor ngak!