1-2. (a) Mang e bayi yog e pi nam ndab ki n’uw nap’an? (b) Mang boch e deer nib t’uf ni ngad nanged e fulweg riy?

MU SUSUNNAG ni ka fini yog e pi nam fare thin ni ke n’uw nap’an ni gad be sonnag ni aram e “ke gapas ndariy ban’en nra buch.” Sana rayog ni kar ufgad ni bochan e yad be lemnag ni kari gapas e fayleng. Baadag e pi nam ni ngad lemnaged ni ke yag ni ngar pithiged urngin e magawon u fayleng. Machane dariy ban’en nrayog ni ngar rin’ed ko n’en ni bayi buch nga tomuren! Mang fan? Ya ke yiiynag e Bible ni “yad ra da’da’ ni ke taw e riya’ ngorad! Ma dabiyog ni ngar milgad riy.”​—1 Thess. 5:3.

² Bay boch e deer nib ga’ fan nib t’uf ni ngad nanged e fulweg riy, ni aram e: Mang e ra buch u nap’an fare “gafgow” nib ga’? Mang e baadag Jehovah ni ngad rin’ed e ngiyal’ nem? Ma uw rogon ni ngad fal’eged rogodad e chiney ya nge yag nda pared ni gad ba yul’yul’ u nap’an fare gafgow nib ga’?​—Matt. 24:21.

3. Uw rogon nra thang Got “fare Babylon nib Gilbuguwan” nrogon ni bay ko Revelation 17:5, 15-18?

³ Mu beeg e Revelation 17:5, 15-18. Yira thang “fare Babylon nib Gilbuguwan”! Kad weliyed faram ndakuriy ban’en nrayog ni nge rin’ e pi nam ko n’en nra buch e ngiyal’ nem. Mang fan? Bochan nra “ta’ Got nga lan gum’ircha’rad ni ngar ngongliyed e tin ni be finey.” Mang e tin be finey? Aram e nge thang urngin raba’ e teliw ni googsur u roy u fayleng, nib muun e pi yurba’ i teliw ko Kristiano ni googsur ngay. * Ra tay Got nga lan gum’irchaen fa ‘ragag i gagey’ ko fare “gamanman nib row” ni ngar ngongliyed e tin be finey. Fa ragag i gagey e be yip’ fan urngin e am nu fayleng ni yad ma ayuweg  fare “gamanman” ni be yip’ fan fare United Nations. (Rev. 17:3, 11-13; 18:8) Nap’an nra chel e pi am nem ngar chamgad ko pi yurba’ i teliw ni googsur, ma aram e pow riy ni ke tabab fare gafgow nib ga’. Ra buch e re n’em nib tomgin ma gubin e girdi’ nu fayleng ni yad ra rus ngay.

4. (a) Mang tapgin nra yog e pi nam ni ngar chamgad ko pi yurba’ i teliw ni googsur? (b) Mang e dabisiy nra rin’ e piin ur uned ko pi yurba’ i teliw nem kafram?

⁴ Dariy bagadad ni manang ko mang tapgin nra yog e pi nam ni ngar chamgad ko fare Babylon nib Gilbuguwan. Sana rayog ni yad ra yog ni pi yurba’ i teliw u fayleng e ir e be magawonnag rogon e gapas, ma gubin ngiyal’ ni be guy rogon ni nga i gagiyegnag e n’en ma rin’ e pi am. Fa reb e yad ra yog ni kaygi pag urngin e salpiy rorad nge boch ban’en nib milfan ngorad ni bod rogon e naun nge ku boch ban’en. (Rev. 18:3, 7) Nap’an nra chel e pi nam ngar chamgad ko pi yurba’ i teliw ni googsur ma sana dab ra thanged urngin i girdien e pi yurba’ i teliw nem. Ya bod ni pi ulung ko pi yurba’ i teliw e ir e ra thang e pi nam. Tomuren ni yira thang e pi ulung ney, ma aram e piin ur uned ko pi yurba’ i teliw ney kafram e yad ra nang nde yag ko pi tayugang’ rorad ni ngar rin’ed e tin nra micheged ngorad, ma aram e yad ra yog ni gathi yad boch i girdien e pi yurba’ i teliw nem.

5. Mang e ke micheg Jehovah u murung’agen fare gafgow nib ga’, ma mang fan?

⁵ Der yog e Bible n’umngin nap’an ni yira thang fare Babylon nib Gilbuguwan, machane gad manang ndabi n’uw nap’an e re ngiyal’ i n’em. (Rev. 18:10, 21) Ke micheg Jehovah nra ‘lichnag e pi rran’ ko fare gafgow nib ga’ ni bochan e nge yag ni magey e “piin ni girdien ni ke mel’egrad” nge baan riyul’ e teliw. (Mark 13:19, 20) Machane mang e ba m’agan’ Jehovah ngay ni ngad rin’ed u thilin e ngiyal’ nra tabab fare gafgow nib ga’ nge yan i mada’ ko ngiyal’ ni ke tabab fare mahl ni Armageddon?

6. Mang fan nde gaman ni kemus ni ngad chuwgad ko pi yurba’ i teliw ni googsur?

⁶ Kad weliyed ko fa binem e article ni ke yan ni baadag Jehovah ni nge chuw urngin e pi tapigpig rok ko fare Babylon nib Gilbuguwan. Machane, de gaman ni kemus ni ngad chuwgad ko pi yurba’ i teliw ni googsur. Thingar kud pared ni gad ba mudugil ni fan ko pigpig ni gad be tay ngak  Jehovah. Am lemnag l’agruw e kanawo’ nrayog ni ngad rin’ed e re n’ey riy.

7. (a) Uw rogon ni ngad pared ni gad ba mudugil ni fan ko pi motochiyel rok Jehovah nib mat’aw ni murung’agen rogon ni ngaud ngongolgad? (b) Uw rogon ni be tamilangnag e Hebrews 10:24, 25 feni ga’ fan ndab ud paged e muulung? Mang nrib ga’ fan ni ngad folgad ko re n’ey e chiney?

⁷ Som’on e, thingar da pared ni gad ba mudugil ni fan ko pi motochiyel rok Jehovah nib mat’aw ni murung’agen rogon ni ngaud ngongolgad. Thingar dabi m’agan’dad nga rogon e ngongol nib kireb ni ma rin’ e girdi’ nu fayleng. Bod nde m’agan’dad nga urngin mit e ngongol ndarngal ni yima rin’, ni kub muun ngay e bin nge mabgol reb e pumoon nge pumoon ara ppin nge ppin nge ku boch e ngongol nde yalen u thilin e pumoon nge pumoon nge ppin nge ppin. (Matt. 19:4, 5; Rom. 1:26, 27) Bin migid e, thingar da ululgad ko liyor ni gad ma tay e pi walagdad ni Kristiano u taabang. Gad ma rin’ e re n’ey ko gin rayog ni ngad rin’ed riy ni aram e pi Tagil’ e Liyor rodad, fa ra dabiyog ni ngad mada’gad u rom ma aram e gad ma mada’ u tafen boch e walag ara yu yang nib mith. Demtrug e n’en nra buch, ma dab da talgad ndab kud uned ko muulung. Bin riyul’ riy e, ba t’uf ni ngad tedan’dad ndab ud paged e muulung rodad “ni fan e [gad] be guy ni Chirofen ni bay yib Somol riy e be chugur.”​—Mu beeg e Hebrews 10:24, 25.

8. Uw rogon nsana ra thil e n’en ni gad ra machibnag murung’agen boch nga m’on?

⁸ Nap’an fare gafgow nib ga’, ma sana ra thil e n’en ni ngad machibnaged. Chiney e gad be machibnag fare thin nib fel’ ni murung’agen Gil’ilungun Got ma gad be guy rogon ni ngad ayuweged e girdi’ ni ngar manged boch i gachalpen Jesus. Machane, ra taw ko ngiyal’ nem ma sana gad ra wereg ba thin nib gel gelngin ni kan taarebrogonnag nga yungi ayis ni gagang’ yang ni be mul u lang nga but’ ni bod e n’uw. (Rev. 16:21) Sana gad ra machibnag ndab ki n’uw nap’an ma bay ni thang e re fayleng rok Satan ney. Ra boch nga m’on ma gad ra nang ko mang e re thin nem ni gad ra machibnag nge rogon ni ngad machibnaged. Ere gur, gad ra fanay e pi n’en ni ka ud fanayed ni ke yan bokum miriay e duw ni ngad machibgad ma gad fil e tin riyul’ ko girdi’? Fa gad ra fanay boch ban’en nib beech? Dariy bagadad ni manang. Machane demtrug rogon, ma bod ni gad ra un i wereg e thin rok Jehovah ni murung’agen e pufthin nra fek i yib!​—Ezek. 2:3-5.

9. Mang e sana ra rin’ e pi nam ni bochan e thin ni gad ra machibnag, machane mang e rayog ni nge pagan’dad ngay?

⁹ Dabisiy nre thin nem ni gad ra machibnag e ra k’aring e pi nam ni ngar guyed rogon ni ngar taleged gadad ndab kud machibgad. Ra taw ko ngiyal’ nem ma ra t’uf ni ngad taga’gad ngak Jehovah ni nge ayuwegdad ni bod rogon e chiney ni gad ma taga’ ngak ni nge ayuwegdad u nap’an e machib. Rayog ni nge pagan’dad nra pi’ e Got rodad gelngidad ni ngad lebguyed e n’en nib m’agan’ ngay.​—Mik. 3:8.

10. Ra uw rogon u wan’ yooren e girdi’ e pi n’en nra buch u nap’an fare gafgow nib ga’ nrogon ni kan yiiynag ko Luke 21:25-28?

¹⁰ Mu beeg e Luke 21:25-28. Nap’an fare gafgow nib ga’, ma ra gin e girdi’ ni bochan e yad ra guy ni urngin ban’en ni bay ko re fayleng ney ni ur lemnaged nra par ni manemus e goo ke chuw. Ba gel e “amith” nra tay lanin’rad, ma yad ra rusnag e yafos rorad ko ngiyal’ nem nrib gel e gafgow ni yira tay u fayleng. (Zef. 1:14, 15, BT) Ra taw ko ngiyal’ nem ma dabisiy nra gel boch e mo’maw’ ko par ko pi tapigpig rok Jehovah. Sana gad ra gafgow u boch ban’en ni bochan e gathi gad bang ko re fayleng ney. Maku reb e, sana gad ra par e ngiyal’ nem ndariy boch ban’en nib t’uf ko par rodad.

11. (a) Mang fan nra sap owchen e girdi’ nge tayugang’ ko pi nam ngak e Pi Mich Rok Jehovah? (b) Mang fan ndariy rogon ni ngad rusgad ko fare gafgow nib ga’?

¹¹ Ra taw nga ba ngiyal’ ma piin ni kan thang e pi yurba’ i teliw ni ur uned ngay kafram e yad ra damumuw ni bochan e ka bay e teliw rok e Pi  Mich Rok Jehovah. Ba mudugil ni yad ra weliy gelngin e damumuw ni kar ted, nib muun ngay ni ngar weliyed e pi n’ey ko Internet. Ra fanenikaydad e pi nam nge Satan ni pilung rorad ni bochan e yigoo teliw rodad e ke magey e ngiyal’ nem. Dawori lebug e n’en ni kar nameged ni aram e ngar thanged mit urngin raba’ e teliw u fayleng. Ere aram e ngiyal’ nra sap owchen e girdi’ nge tayugang’ ko pi nam ngodad. Ra taw ko ngiyal’ nem ma aram e pi nam e yad ra mang Gog nu Magog. * Yad ra chagil nga taabang ngar chamgad ko girdi’ rok Jehovah. (Ezek. 38:2, 14-16) Sana ba mom ni nge magafan’dad ko n’en nra buch nib ga’ ni faanra gathi rib tamilangan’dad u urngin ban’en nra buch e ngiyal’ nem. Machane, taab n’en e bay nrayog ni nge pagan’dad ngay ni aram e: Dariy rogon ni ngad rusgad ko fare gafgow nib ga’. Ra yog Jehovah e n’en ni ngad rin’ed e ngiyal’ nem ya nge yag nda mageygad ni gad ba fos. (Ps. 34:19) Ra taw ko ngiyal’ nem ma rayog ni ngad ‘sak’iygad ngad changargad nga lang’ ni bochan e kad nanged ni ‘ke chugur ni ngan chuwegdad u fithik’ e gafgow.’ *

12. Uw rogon ni be ayuwegdad “fare tapigpig nib yul’yul’ ma ba gonop” ni ngad fal’eged rogodad ni fan ko pi n’en ni bayi buch boch nga m’on?

¹² Kab kafram i yib ni be ayuwegdad “fare tapigpig nib yul’yul’ ma ba gonop” ya nge yag nda pared ni gad ba yul’yul’ u nap’an fare gafgow nib ga’. (Matt. 24:45) Boor e kanawo’ ni ke rin’ fare tapigpig nib yul’yul’ e re n’ey riy. Machane reb e kanawo’ e aram e pi convention rodad ni kan tay u nap’an e duw ni 2016 nge mada’ ko 2018. Pi welthin ni kan pi’ u nap’an e pi convention ney e be pi’ e athamgil nga lanin’dad ni ngad maruweliyed boch e fel’ngin nib t’uf ni nge yag ngodad e chiney ni gad be chugur ko fare rran rok Jehovah. Ngad weliyed boch ban’en u murung’agen e pi fel’ngin ney.

13. Uw rogon ni ngad gelnaged fadad yul’yul’ ngak Jehovah? Mang fan ni ka chiney e ngad rin’ed e re n’ey?

¹³ Yul’yul’: Kenggin e convention ko duw ni 2016 e “Mu Par ni Gab Yul’yul’ ngak Jehovah!” Kad filed ko re convention ney ni faanra rib fel’ e tha’ u thildad Jehovah, ma aram e gad ra par ni gad ba yul’yul’ ngak. Kun puguran ngodad ni faanra ud meybilgad u polo’ i gum’ircha’dad ma gad be fal’eg i fil e Thin rok Jehovah, ma aram e rayog ni nge chugur e tha’ u thildad. Faan gad ra rin’ ni aray rogon ma aram e rayog ni nge yib gelngidad ni ngad athamgilgad u fithik’ e tin th’abi mo’maw’ e skeng. Chiney ni gad be chugur i yan nga tungun e re m’ag rok Satan ney e gad manang ni bay ud mada’naged boch e skeng nib gel boch e mo’maw’ riy nra skengnag rogon e yul’yul’ rodad ngak Got nge Gil’ilungun. Maku reb e, dabisiy nra un moningnagdad. (2 Pet. 3:3, 4) Reb i fan nra i buch e pi n’ey rodad e bochan e darud uned ko pi n’en ni yibe rin’ ko re fayleng rok Satan ney. Ere thingar da gelnaged rogon fadad yul’yul’ e chiney ya nge yag nda pared ni gad ba yul’yul’ u nap’an fare gafgow nib ga’.

14. (a) Mang e ra buch ko pi walag ni yad be yog e thin rodad u roy u fayleng? (b) Mang fan nra t’uf ni ngad pared ni gad ba yul’yul’ e ngiyal’ nem?

¹⁴ Nap’an fare gafgow nib ga’ ma ra thil boch ban’en ni bay rogon ko pi walag ni pumoon ni yad ma yog e thin rodad u roy u fayleng. Bay ba ngiyal’ nra taw ngay ma urngin e piin kan dugliyrad ni ka yad bay u fayleng e yira kunuyrad nga tharmiy ni ngar uned ko fare mahl ni Armageddon. (Matt. 24:31; Rev. 2:26, 27) Re n’ey e be yip’ fan nra taw ko ngiyal’ nem ma daki moy fare Ulung ni Ma Pow’iyey u roy u fayleng. Machane, ka ra par girdien fare ulung nib ga’ ni yad ba yaram. Bay boch e walag ni pumoon nrayog ni ngar rin’ed e  re maruwel ney ni yad yugu boch e saf ni yad ra yog e thin rodad. Ere ra t’uf ni ngad daged ni gad ba yul’yul’ ni aram e ngad ayuweged e pi walag ney ma gad fol ko tin yad be yog ni ngad rin’ed. Faanra gad baadag ni ngad mageygad ni gad ba fos, ma thingar da folgad rorad!

15. Uw rogon ni ngad gelnaged lanin’dad ya nge yag nda athamgilgad? Mang nib ga’ fan ni ka chiney e ngad rin’ed e re n’ey?

¹⁵ Athamgil: Kenggin e convention ko duw ni 2017 e “Dabi Mulan’um!” Re convention ney e ke ayuwegdad u rogon ni ngad nanged rogon ni ngad athamgilgad u fithik’ e pi magawon ni ma yib ngodad. Kad filed riy nrogon e athamgil ni gad be tay e der yan u rogon feni mom boch ban’en nga puluwdad. Ya rayog ni ngad gelnaged lanin’dad nge yag nda athamgilgad ni faan gad ra taga’ ngak Jehovah. (Rom. 12:12) Manga yugu dab da paged talin e n’en ni micheg Jesus ni faani gaar: “En nra athamgil nge mada’ ko tomur e ra yog e yafos ngak.” (Matt. 24:13) Re thin ney ni kan micheg e be yip’ fan nthingar da pared ni gad ba yul’yul’ ndemtrug e re miti magawon ni gad ra mada’nag. Faanra ud athamgilgad u fithik’ e pi magawon ni be yib ngodad e chiney, ma aram e ra gel e michan’ rodad u m’on ni nge tabab fare gafgow nib ga’.

16. Mang e n’en nra dag ko gad be par ndarud rusgad fa danga’? Uw rogon ni ngad gelnaged lanin’dad e chiney ya nge yag nda pared ndab da rusgad?

¹⁶ Dabin Rus: Kenggin e convention ko duw ni 2018 e “Dab Mu Rus!” Re convention ney e ke puguran ngodad ni pi salap rodad ara tin rayog rodad e gathi aram e n’en nra dugliy ko gad ra par ndab da rusgad fa danga’. Thingar da taga’gad ngak Jehovah ni nge ayuwegdad ndab da rusgad ni bod rogon ni gad ma taga’ ngak ni nge ayuwegdad ni ngad athamgilgad. Ere uw rogon ni ngad nanged rogon ni ngari gel e taga’ rodad ngak Jehovah? Aram e ngaud beeged e Thin rok ni gubin e rran ma gad be fal’eg i lemnag rogon ni i ayuweg e yafos ko girdi’ rok kakrom. (Ps. 68:20; 2 Pet. 2:9) Nap’an nra chel e pi nam ngar chamgad ngodad u nap’an fare gafgow nib ga’, ma ra t’uf ni ngad pared ndab da rusgad mad gelnaged e pagan’ rodad ngak Jehovah. (Ps. 112:7, 8; Heb. 13:6) Faanra ud taga’gad ngak Jehovah e chiney, ma aram e rayog ni nge dab da rusgad ni ngad pared ni gad ba mudugil u nap’an nra cham Gog ngodad. *

17. Mang fan nsusun e dab da rusgad ko Armageddon? (Mu guy e sasing ni bay u wuru’ e re ke babyor ney.)

¹⁷ Kad weliyed ko fa binem e article ni yooren i gadad e kan gargeleg u nap’an e tin tomuren e rran ma ke guy e pi n’en be buch ko re tayim ney. Machane, ku bay e athap rodad ni ngad mageygad ni gad ba fos u nap’an fare gafgow nib ga’. Fare mahl ni Armageddon e aram e n’en nra museg e re m’ag ney. Machane dab da rusgad. Mang fan? Bochan ni ireray e mahl rok Got. (Prov. 1:33; Ezek. 38:18-20; Zek. 14:3) Nap’an nra pi’ Jehovah e thin, ma aram e ra fek Jesus Kristus e pi salthaw rok Got ni ngar chamgad ko pi toogor rok. Piin kan dugliyrad ni kan fasegrad ka ranod nga tharmiy nge bokum biyu’ e engel e yad ra un ngak ko re mahl ney. Yad ra chagil nga taabang ngar chamgad ngak Satan, nge pi moonyan’ rok, nge pi salthaw rorad u roy u fayleng.​—Dan. 12:1; Rev. 6:2; 17:14.

18. (a) Mang e ke micheg Jehovah? (b) Uw rogon ni be ayuwegem e Revelation 7:9, 13-17 ni ngari pagan’um ko tin bayi buch nga m’on?

¹⁸ Ke micheg Jehovah ni ke gaar: “Dariy ba talin e cham nni ngongliy nra maad’ad [ngomed].” (Isa. 54:17) Bay ba ulung i girdi’ nib “pire’ ni pire’” ni yad boch e tapigpig rok Jehovah ni yad ba yul’yul’ ni yad ra thap nga barba’ “fare gafgow ni ba ga’” ndab ra m’ad! Ma aram mar ululgad ko pigpig ni yad be tay ngak Jehovah. (Mu beeg e Revelation 7:9, 13-17.) Be ayuwegdad e thin nu Bible ni ngari pagan’dad ko tin bayi buch nga m’on! Gad manang ni Jehovah e ra “yoror rok e piin ba yul’yul’.” (Ps. 31:23, BT) Gubin e piin nib t’uf Jehovah rorad ma yad ma pining e sorok ngak e yad ra felfelan’ u nap’an ni yad ra guy ni ke gagiyelnag Jehovah nde riyul’ urngin e pi ban ni ka nog nib togopuluw ngak ma ir e bay rogon ni ngan tayfan.​—Ezek. 38:23.

19. Mang boch ban’en nrib manigil ni bayi buch rodad ndab ki n’uw nap’an?

¹⁹ Am lemnag e n’en nra yog e 2 Timothy 3:2-5 ni faan gomanga be weliy murung’agen e girdi’ ni be par u lan e bin nib beech e fayleng nder gagiyegnagrad Satan. (Mu guy fare kahol ni kenggin e “ Rarogon e Girdi’ e Ngiyal’ Nem.”) Brother George Gangas ni immoy ni ir reb i girdien fare Ulung ni Ma Pow’iyey e weliy murung’agen e re n’ey ni gaar: “Rra manigil e par u fayleng ni faanra urngin e girdi’ ma yad walag. Dabki n’uw nap’an ma ga ra un ko par u lan e bin nib beech e m’ag. Ga ra par ni gab fos u n’umngin nap’an ni be par Jehovah nib fos. Gad ra par ni manemus.” Rib manigil e re athap ney!