1. Uw rogon ni kad nanged ni fare maruwel ni ngan pingeg e girdi’ ngar manged pi gachalpen Jesus e rayog ni nge ayuweg e yafos ko girdi’?

FARE maruwel ni ngan pingeg e girdi’ ngar manged pi gachalpen Jesus e rayog ni nge ayuweg e yafos ko girdi’! Uw rogon ni kad nanged e re n’ey? Nap’an ni tay Jesus chilen fapi thin ni bay ko Matthew 28:19, 20, me gaar: “Mmarod . . . ngam pingeged yad ngar manged pi gachalpeg, mi gimed taufenagrad.” Uw feni ga’ fan ni ngan un ko taufe? Thingar da uned ko taufe ni faanra gad baadag ni nge yag e yafos ni manemus ngodad. Be’ ni baadag ni nge un ko taufe e thingari mich u wan’ nra yag e yafos ni manemus ngak ni bochan e yam’ ni tay Jesus ni fan ngodad min faseg ko yam’. Aram fan ni yog apostal Peter ngak e pi Kristiano ni gaar: “Taufe . . . e aram e n’en ni be thapegmed e chiney . . . u daken e fos ko yam’ ni tay Jesus Kristus.” (1 Pet. 3:21, NW) Ere nap’an nra un be’ ko taufe nge mang reb i gachalpen Jesus, ma aram e rayog ni nge athapeg ni nge yag e yafos ni manemus ngak.

2. Ba miti mang sensey e susun e ngad boded nrogon ni be yog e 2 Timothy 4:1, 2?

² Ra nge yag ni ngad pingeged e girdi’ ngar manged pi gachalpen Jesus, mab t’uf ni ngad salapgad u “rogon i fil ban’en ku be’.” (Mu beeg e 2 Timothy 4:1, 2, NW. *) Mang fan? Bochan ni ke tay Jesus chilen ngodad ni ke gaar: “Mmarod . . . ngam pingeged yad ngar manged pi gachalpeg, . . . mi gimed fil ngorad rogon ni nguur folgad.” I yog apostal Paul ni ‘ngaud rin’ed’ e re maruwel ney, ya ‘faanra ud rin’ed ma gad ra ayuwegdad nge piin ni yad ra motoyil ngodad ngar thapgad ngak  Got.’ Aram fan ni yog Paul ni gaar: “Mu . . . ayuweg rogon ni ga be weliy murung’agen e thin rok Got ngak e girdi’.” (1 Tim. 4:16) Faanra gad baadag ni ngad ayuweged e girdi’ ni ngar manged pi gachalpen Jesus, mab t’uf ni ngad skulnaged yad. Ere aram fan ni gad baadag ni ngad skulnaged e girdi’ ko bin th’abi fel’ e kanawo’ nrayog ni ngad rin’ed riy.

3. Mang e gad ra weliy ko re article ney u murung’agen rogon ni ngad filed e Bible ko girdi’?

³ Gad be fil e Bible ngak bokum milyon e girdi’ u ga’ngin yang e fayleng. Machane kad weliyed ko fa binem e article nib t’uf ni ngad nanged rogon ni ngad ayuweged yooren e pi girdi’ ney ni ngar uned ko taufe ngar manged boch i gachalpen Jesus Kristus. U lan e re article ney e gad ra weliy riy lal ban’en nib t’uf ni nge rin’ gubin e sensey ni faanra ngar ayuweged e en yad be skulnag ni nge mon’og nge yag ni un ko taufe.

4. Mang fan nsusun e yugu dabi pag urngin ban’en ni nge yog be’ u nap’an ni be fil e Bible ngak be’? (Kum guy e footnote.)

⁴ Gad baadag e pi n’en gad ma fil ko girdi’ u lan e Thin rok Got. Ere sana rayog ni gad baadag ni ngaud weliyed murung’agen e pi n’ey. Machane demtrug ko be yarmiy be’ e Fol Wulyang ko Damit, ara Fol Bible ko Ulung, ara be fil e Bible ngak be’ u tafen, ma susun e yugu dabi pag urngin ban’en ni nge yog. Faanra be fil be’ ban’en ngak yugu be’ ma susun e nge fanay e Bible nib fel’ rogon. Ere ba t’uf ni nge kol ayuw ni yugu dabi pag urngin ban’en ni nge yog, maku dabi guy rogon ni nge weliy urngin ban’en ni manang u murung’agen reb e thin nu Bible ara n’en ni yibe weliy. * (John 16:12) Am taarebrogonnag urngin ban’en ni ga manang u murung’agen e Bible u nap’an nim un ko taufe ko tin ga manang e chiney. Sana rayog nnap’an nim un ko taufe ma kemus ni pi kenggin e machib u Bible e ir e ke tamilang u wan’um. (Heb. 6:1) Boor e duw ni kam fil ke mit ngom e pi n’en ni kam nang e chiney, ere dab mu guy rogon ni ngam fil urngin ban’en ni ga manang ngak be’ ni ka fini tabab ko fol Bible.

5. (a) Mang e gad baadag ni nge tamilang u wan’ e en gad be fil e Bible ngak nrogon nib puluw ko 1 Thessalonika 2:13? (b) Uw rogon ni ngad pied e athamgil nga laniyan’ e en gad be fil e Bible ngak ni nge weliy rogon laniyan’ u murung’agen e n’en be fil?

⁵ Gad baadag ni nge tamilang u wan’ e en gad be fil e Bible ngak e n’en ni be fil u lan e Thin rok Got. (Mu beeg e 1 Thessalonika 2:13.) Ere uw rogon nrayog ni ngad rin’ed e re n’ey? Mu pi’ e athamgil ngak ni nge weliy rogon laniyan’ u murung’agen e pi n’en be fil. Rayog ni nga mog ngak ni nge weliy rogon ni ke nang fan reb e thin nu Bible ko bin ni gur e ngam weliy fan ngak ni gubin ngiyal’. Mu ayuweg ni nge guy rogon nra yib angin e Thin rok Got ngak. Mu fith boch e deer ngak nra ayuweg ni nge weliy e n’en be lemnag u murung’agen e pi thin nu Bible ni be beeg. (Luke 10:25-28) Bod nrayog ni ngam fith ni nge lungum: “Uw rogon ni ke ayuwegem e re thin  nu Bible ney ni ngam nang reb i fel’ngin Jehovah?” “Uw rogon nrayog ni nge ayuwegem e pi n’en ga be fil u Bible?” “Uw rogon u wan’um e n’en ni ka fin mu fil?” (Prov. 20:5) N’en nib ga’ fan e gathi urngin ban’en ni ke nang e en ga be fil e Bible ngak, ya rogon feni ga’ fan u wan’ e pi n’en be fil nge rogon ni be fol riy e aram e n’en nib ga’ fan.

6. Mang fan nib fel’ ni ngam fek reb e walag nib salap i fil ban’en ko girdi’ ni nge un ngom u nap’an ni ngam fil e Bible ngak be’?

⁶ Ga ma fek boch e walag ni yad ba salap i fil ban’en ko girdi’ ni ngar uned ngom u nap’an ni ngam fil e Bible ngak be’, fa? Faanra ga ma rin’ e re n’ey, ma rayog ni nga mog ngorad ni ngar weliyed lanin’rad u rogon ni ga be fil e Bible ngak facha’ nge rogon ni yad be guy ni ga be fanay e thin nu Bible ni ngam fil ban’en ngak. Ba t’uf ni ngam sobut’nag e lem rom ni faanra ngam mon’ognag rogon ni ga ma fil e Bible ngak be’. (Mu taarebrogonnag ko Acts 18:24-26.) Tomuren mag fith fare walag ni ke un ngom ko be lemnag ni facha’ ni ga be fil e Bible ngak e be tamilang u wan’ e n’en be fil fa danga’. Ku rayog ni nga mog ko re walag ney ni nge mang ir e fil e Bible ngak facha’ ko ngiyal’ ni ngam man nga bang u lan taareb ara l’agruw e wik. Re n’ey e rayog ni nge ayuweg e fol Bible ni gimew be tay facha’ ni nga i yan nib fel’ rogon, miki tamilangnag ngak feni ga’ fan e re n’ey. Dab mu lemnag ni kemus ni yigoo “gur” e ngaum fil e Bible ngak facha’, ma dariy be’ nrayog ni ngki fil e Bible ngak. Bin riyul’ riy e, ga baadag ni nge yib angin ngak facha’ e tin be fil ya nge yag ni ulul ni nge mon’og u rogon ni be fil e tin riyul’.

7. Mang e ra ayuweg e en ga be fil e Bible ngak ni nge adag e pi n’en be fil?

⁷ Ba t’uf ni nge guy facha’ ni ga be fil e Bible ngak nib t’uf rom e pi n’en be fil e Bible ma kub mich u wan’um. (1 Thess. 1:5) Re n’ey e rayog ni nge ayuweg ni ngki adag e pi n’en be fil. Rayog ni ngam weliy ngak rogon ni ke ayuwegem e thin nu Bible. Re n’ey e ra ayuweg ni nge guy ni ku rayog ni ngki yib angin ngak e pi n’en be fil u Bible.

8. Mang e rayog ni ngkum rin’ ni ngam ayuweg e en ga be fil e Bible ngak? Mang fan ni ngam rin’ e re n’ey?

⁸ Nap’an ni gimew be fil facha’ e Bible, ma rayog ni ngam weliy ngak murung’agen boch e walag ni ur mada’naged boch e magawon ni bod e pi magawon ni be mada’nag, nge rogon ni kar gelgad ko pi magawon nem. Ku rayog ni ngam fek reb e walag u lan e ulung ni nge un ngom nrayog ni nge folwok facha’ ko n’en ni rin’ me yib angin ngak. Fa reb e rayog ni ngam gay murung’agen boch e girdi’ ko fapi article ni kenggin e “The Bible Changes Lives” ni bay ko jw.org ni thin ni Meriken. * Pi article ney nge boch e video ni bay riy e rayog ni nge ayuweg facha’ ni nge tamilang u wan’ ni thin nu Bible e rayog ni nge ayuweg ni nge thilyeg boch ban’en u lan e yafos rok.

9. Uw rogon nrayog ni ngam pi’ e athamgil nga laniyan’ e en ga be fil e Bible ngak ni nge weliy ngak chon e tabinaw rok nge pi fager rok e pi n’en be fil?

 ⁹ Faanra ba mabgol facha’, ma be un e en mabgol rok ko fol Bible, fa? Faanra danga’, ma rayog ni ngam pining ni nge un ngomew ko fol Bible. Mu pi’ e athamgil nga laniyan’ e en ga be fil e Bible ngak ni nge weliy ngak chon e tabinaw rok nge pi fager rok e pi n’en be fil. (John 1:40-45) Ni uw rogon? Rayog ni ngam fith ni nge lungum: “Uw rogon ni ga ra weliy murung’agen e re n’ey ni kam fil ngak chon e tabinaw rom?” fa “Mang thin nu Bible e rayog ni ngam fanay ni ngam micheg e re n’ey ngak reb e fager rom?” Ga ra rin’ e re n’ey, ma aram e ga be skulnag facha’ u rogon ni nge fil e Bible ngak be’. Nap’an nra bung rogon, ma aram e rayog ni nga i un ko pi walag u lan e ulung ko machib. Rayog ni ngkum fith ngak ko bay be’ ni manang ni baadag ni nge fil e Bible fa dariy. Faanra bay, mag guy rogon ngam man mu guy nib papey ngam ognag e fol Bible ngak. Mu dag fare video ngak ni kenggin e Mang e Yima Rin’ u Nap’an e Fol Bible? *

10. Uw rogon nrayog ni nge folwok e en be fil e Bible ngak be’ rok Paul nrogon ni bay ko 1 Thessalonika 2:7, 8?

¹⁰ Piin yad be fil e Bible ngak be’ e thingar ra daged nriyul’ ni yad be lemnag facha’. Susun e ngaur lemnaged nrayog ni nge munmun mar manged boch e walag nib beech u lan e ulung. (Mu beeg e 1 Thessalonika 2:7, 8.) De mom ngorad ni ngar digeyed e pi fager rorad ndarur pigpiggad ngak Jehovah. Ku de mom ni ngar thilyeged boch ban’en u rarogorad ya nge yag nra pigpiggad ngak Jehovah. Ba t’uf ni ngad ayuweged yad ni ngar pirieged e tin riyul’ e fager u lan e ulung. Mu guy rogon ni ngam mang fager rok e en ga be fil e Bible ngak ni aram e ngaum tay e tayim ni ngaum rin’ew boch ban’en u taabang ni gathi kemus nu nap’an ni gimew be fil e Bible, ya kub muun yu ngiyal’ ngay nda mur filew e Bible. Rayog ni ngam callnag, ara mu textnag, ara mman mu guy u yugu reb e rran nda mur filew e Bible riy. Re n’ey e ra dag ngak facha’ nriyul’ ni ga be lemnag.

11. Mang e gad baadag ni nge guy e piin gad be fil e Bible ngorad u rarogon e ulung rodad, ma mang fan?

¹¹ Bay ba thin ni yima yog ni yima gaar: “Gubin e girdi’ u lan binaw nib t’uf ni ngar pied e ayuw u rogon ni ngan chuguliy reb e bitir.” Ere ku rayog ni nge lungudad: “Gubin e walag u lan e ulung nib t’uf ni ngar pied e ayuw ni ngan pingeg be’ nge mang reb i gachalpen Jesus.” Aram fan ni faanra ayuweg e piin yad ba salap i fil e Bible ngak e girdi’ be’ ni nge nang boch e walag u lan e ulung, ma aram e rayog ni nge ayuweg e pi walag ney e cha’ney ni nge chugur ngak Jehovah. Rayog ni nge felfelan’ e en be fil e Bible ni nga i chag ko girdi’ rok Got ya aram e piin rayog ni ngar ayuweged ni nge chugur e tha’ u thilrow Jehovah, mu kur pied e athamgil nga laniyan’ u nap’an nra mada’nag boch e magawon. Gad baadag ni nge lemnag e en yibe fil e Bible ngak ni ir bang ko ulung, maku ir reb i walagdad ni taareb e michan’  rodad. Gad baadag ni nge chugur ngak e pi walag u lan e ulung ni yad ba gol maku yad ma dag e t’ufeg. Re n’ey e ra ayuweg ni nge tal ndab ki chag ngak e piin ndarur ayuweged ni nge t’uf Jehovah rok. (Prov. 13:20) Faanra dab ki adag e piin ur moyed ni fager rok ni ngaur chaggad ngak, ma manang nrayog ni nge pirieg e tin riyul’ e fager u lan e ulung rok Jehovah.​—Mark 10:29, 30; 1 Pet. 4:4.

12. Mang fan thingar da weliyed ngak e en gad be fol Bible feni ga’ fan ni nge ognag e yafos rok ngak Jehovah nge un ko taufe?

¹² Thingar um weliy ngak e en gimew be fil e Bible feni ga’ fan ni nge ognag e yafos rok ngak Jehovah nge un ko taufe. Bin riyul’ riy e, fan ni gad ma fil e Bible ngak be’ e bochan ni ngad ayuweged ni nge mang reb i gachalpen Jesus ni kan taufenag. Tomuren ni ke yan in e pul ni kam filew be’ e Bible, nib ga’ nu tomuren ni ke tabab ni nga i un ko muulung, mab t’uf ni nge tamilang u wan’ ni gad baadag ni ngad ayuweged ni nge mang reb e Pi Mich Rok Jehovah.

13. Mang boch ban’en nib t’uf ni nge rin’ be’ ni be fil e Bible ya nge yag ni un ko taufe?

¹³ Bay boch ban’en nib t’uf ni nge rin’ be’ ni be fil e Bible ni faanra baadag ni nge un ko taufe! Som’on e ba t’uf ni nge nang Jehovah, me t’uf rok miki mich u wan’. (John 3:16; 17:3) Ra rin’ e re n’ey, ma aram e rayog ni nge mang reb e fager rok Jehovah miki mang fager ko pi walag u lan e ulung. (Heb. 10:24, 25; Jas. 4:8) Ra munmun ma ra siyeg facha’ ni nge un nga boch e ngongol nib kireb me kalngan’ ko kireb rok. (Acts 3:19) Maku reb e, ra tabab ni nga i weliy e tin riyul’ ni ke mich u wan’ ngak yugu boch e girdi’. (2 Kor. 4:13) Tomuren ma ra ognag ir ngak Jehovah me dag e re n’ey u daken e taufe nra un ngay. (1 Pet. 3:21; 4:2) Re rran nem e rib gel e felfelan’ ni yira tay riy! Nap’an nra rin’ facha’ e n’en nib t’uf ni nge rin’ ya nge yag ni un ko taufe, mag ulul ni nga u mog fel’ngin e n’en be rin’ ma ga be pi’ e athamgil nga laniyan’ ni nge ulul i rin’ e pi n’em.

14. Uw rogon nrayog ni nge nang be’ ko be mon’og e en ni be fil e Bible ngak fa danga’?

¹⁴ Ba t’uf ni ngaud gum’an’naged gadad u nap’an ni gad be ayuweg e en gad be fil e Bible ngak ni nge mon’og nge yag ni ognag ir ngak Jehovah nge un ko taufe. Machane, ra taw nga ba ngiyal’ mab t’uf ni ngad guyed rogon ngad nanged ko baadag ni nge pigpig ngak Jehovah Got fa danga’. Ga be guy ni be athamgil ni nge fol ko pi n’en ni tay Jesus chilen? Fa kemus ni baadag ni nge fil boch ban’en nib manigil ni bay u lan e Bible?

15. Mang e ra tamilangnag ngak be’ ni ke bung rogon e en yow be fil e Bible nrayog ni nge un ko taufe?

¹⁵ Ngaum fal’eg i yaliy rogon e mon’og ni be tay e en ga be fil e Bible ngak. Bod ni ma weliy rogon laniyan’ u murung’agen Jehovah, fa? Ma meybil ngak Jehovah, fa? (Ps. 116:1, 2) Baadag ni ma beeg e Bible  rok, fa? (Ps. 119:97) Gubin ngiyal’ ni ma un ko muulung, fa? (Ps. 22:22) Ke thilyeg boch ban’en u lan e yafos rok ni nge dag ni be fol ko pi n’en be fil, fa? (Ps. 119:112) Ke tabab ni nge weliy ngak chon e tabinaw rok nge pi fager rok e pi n’en be fil, fa? (Ps. 9:1) Bin th’abi ga’ fan riy e, baadag ni nge mang reb e Pi Mich Rok Jehovah, fa? (Ps. 40:8) Faanra gubin e pi n’ey ndawori mon’og facha’ riy, mag gonopiy rogon ni ngam nang ko mang fan ndawori mon’og, mag weliy e re n’ey ngak u fithik’ e sumunguy, machane mu rin’ u reb e kanawo’ nib tamilang. *

16. Mingiyal’ e susun ni ngam tal i fil e Bible ngak be’?

¹⁶ Ba fel’ ni nge ba ngiyal’ mag fithem ko ba fel’ ni ki gimew be fil be’ e Bible fa ngam talgow. Mu fithem ni nge lungum: ‘Der ma fal’eg rogon ir u m’on ko fol Bible romow, fa? Dabun ni nge un ko muulung, fa? Ka bay boch ban’en ni be rin’ nib kireb, fa? Ka ir bang u barba’ e teliw ni googsur, fa? Faanra fulweg ko pi deer ney e arrogon, ma ki gimew ra ulul ko fol Bible ma bod ni ga be guy rogon ni ngam fil e minong ngak be’ ndabun ni nge munur! Faanra de ga’ fan u wan’ facha’ e n’en be fil, ma der m’agan’ ngay ni nge thilyeg boch ban’en u rarogon, me ere sana kab fel’ ni ngam talgow ko fol Bible.

17. Mang e thingari rin’ urngin e piin yad ma fil e Bible ngak e girdi’ nrogon ni bay ko 1 Timothy 4:16?

¹⁷ Rib ga’ fan u wan’dad ni ngad rin’ed e n’en nib milfan ngodad ni aram e ngad pingeged e girdi’ ngar manged boch i gachalpen Jesus, maku gad baadag ni ngad ayuweg e piin gad be fil e Bible ngorad ni ngar mon’oggad ngar uned ko taufe. Aram fan ni ngad filed ban’en ngak be’ ni gad be fanay e Bible, ma nge t’uf rodad e pi n’en ni gad be fil miki mich u wan’dad. Ngkud pied e athamgil nga laniyan’ e en gad be fil e Bible ngak ni nge m’ag fager ko pi walag u lan e ulung. Ku gad ra tamilangnag ngak feni ga’ fan ni nge ognag e yafos rok ngak Jehovah nge un ko taufe, mab fel’ ni nge ba ngiyal’ ma gad yaliy ko be mon’og fa danga’. (Mu guy fare kahol ko page 13 ni kenggin e, “ N’en nib T’uf ni Nge Rin’ e Piin Yad Be Fil e Bible Ngak e Girdi’ Ya Nge Yag Nra Ayuweged Yad ni Ngar Mon’oggad Ngar Uned ko Taufe.”) Ri gad ba felfelan’ ni gad be un ko re maruwel ney nrayog ni nge ayuweg e yafos ko girdi’! Ere gad baadag ni ngad rin’ed urngin ban’en nrayog rodad ni ngad ayuweged e piin gad be fil e Bible ngorad ni nge bung rogorad ni ngar uned ko taufe.