1-2. Mang rogon fare thin ko Eklesiastes 11:6 ko fare maruwel ni ngan machibnag fare thin nib fel’ ni murung’agen Gil’ilungun Got?

BAY boch e nam nnap’an nra rung’ag e girdi’ fare thin nib fel’ riy, ma yad baadag ni ngkur filed boch ban’en u murung’agen. Ireram e n’en ni yad be son ni ngar rung’aged! Machane, bay boch e nam ni gathi ri baadag e girdi’ riy ni ngar filed murung’agen Got ara Bible. Uw rogon e girdi’ ko gin ga ma par riy? Demtrug rogon, ma baadag Jehovah ni ngad ululgad ko machib nge mada’ ko ngiyal’ ni ke yog ni ke mus e maruwel rodad.

² Ra taw ko ngiyal’ ni ke dugliy Jehovah, ma ra mus fare maruwel ni machib ma aram me yib e ‘tomur.’ (Matt. 24:14, 36) Machane, chiney ndawori taw ko re ngiyal’ i n’em e uw rogon ni ngad folgad ko fapi thin ni be gaar “dab mu toffan”? *​—Mu beeg e Eklesiastes 11:6, NW. *

3. Mang e gad ra weliy ko re article ney?

³ Fa binem e article e kad weliyed riy aningeg ban’en nib t’uf ni ngad rin’ed ya nge yag nda salapgad u rogon ni ngad ‘yognaged e girdi’.’ (Matt. 4:19) Biney e article e gad ra weliy riy dalip e kanawo’ nrayog ni ngad dugliyed u wan’dad ni ngad machibgad ndemtrug e n’en be buch rodad. Gad ra weliy fan nib ga’ fan ni ngad (1) ululgad ngaud m’oneged fare maruwel ni machib u lan e yafos rodad, (2) mad gum’an’naged gadad, ma gad (3) par nib gel e michan’ rodad.

4. Mang fan nib t’uf ni ngad ululgad ngaud m’oneged fare maruwel ni ke pi’ Jehovah ngodad ni ngad rin’ed?

⁴ I yiiynag Jesus murung’agen boch ban’en nra buch nge rarogon e girdi’ ni aram e pow riy ni gad bay ko tin tomuren e rran, ma pi n’em e rayog ni nge taleg pi gachalpen ndab kur ululgad ni ngar m’oneged  fare maruwel ni machib. Ki yog ngak pi gachalpen ni ngar ‘fal’eged rogorad ngar pired.’ (Matt. 24:42) Nap’an Noah ma boor ban’en ni i taleg e girdi’ nda ur tedan’rad ko ginang ni i pi’ ngorad. Ku aram e pi n’en ni ku rayog ni ngki talegdad e ngiyal’ ney ndab kud tedan’dad. (Matt. 24:37-39; 2 Pet. 2:5) Aram fan nib t’uf ni ngad ululgad ngaud m’oneged fare maruwel ni ke pi’ Jehovah ngodad ni ngad rin’ed.

5. Uw rogon ni be weliy e Acts 1:6-8 ga’ngin yang nra garer fare maruwel ni machib riy?

⁵ Ngiyal’ ney e rib t’uf ni ngad tedan’dad ko fare maruwel ni ngan machibnag murung’agen Gil’ilungun Got. I yiiynag Jesus nra ulul pi gachalpen ko machib u tomuren ni ke yim’, ma kub ga’ yang e gin yad ra machib riy ko gin ni i machib riy u m’on ni nge yim’. (John 14:12) Tomuren ni yim’ Jesus, miki sul boch i gachalpen ko maruwel rorad ni yad boch e tafita’. Tomuren nni faseg Jesus ko yam’, ma aram me ngongliy ba maang’ang me ayuweg boch i gachalpen ni ngar koled boor e nig. Tomuren e re maang’ang nem ni ngongliy Jesus, me tamilangnag ni kab ga’ fan fare maruwel ni ngan machib min ayuweg e girdi’ ngar manged boch i gachalpen ko tin ka bay e maruwel. (John 21:15-17) De n’uw nap’an u m’on ni nge sul Jesus nga tharmiy, ma aram me yog ngak pi gachalpen ni fare maruwel ni machib ni ke tababnag e ra garer nge yan i taw ko pi nam ni bay u wuru’ yu Israel. (Mu beeg e Acts 1:6-8.) Boch e duw nga tomuren, me pilyeg Jesus e changar rok apostal John nge guy e n’en nra buch u nap’an e “chirofen ni rran rok Somol.” * Reb u fithik’ e pi n’en ni guy John e ba engel ni “ba’ rok e thin ndabi math biid, ni Thin Nib Fel’ ni nge weliy” nga “urngin e pi nam, nge ganong nge thin nge gubin mit e girdi’.” (Rev. 1:10; 14:6) Ere ba tamilang nib m’agan’ Jehovah ngay ni ngad uned ko re maruwel ni machib ney ni yibe tay u ga’ngin yang e fayleng nge mada’ ko ngiyal’ ni ke m’ay e re maruwel ney.

6. Uw rogon nrayog ni ngad ululgad ngad m’oneged fare maruwel ni machib u lan e yafos rodad?

⁶ Faan gad ra lemnag urngin ban’en ni be rin’ Jehovah ni nge ayuwegdad, ma aram e rayog ni ngad  ululgad ngad m’oneged fare maruwel ni machib u lan e yafos rodad. Bod ni, boor ban’en ni be pi’ ni fan ko tirok ban’en ni boch e kan ngongliy ni babyor ma boch e rayog ni ngan beeg ko cellphone ara tablet, nge boch ban’en ni kan ngongliy nrayog ni ngan motoyil ngay nge boch e video, nge broadcast nrayog ni ngan guy ko Internet. Am lemnag e re n’ey: Boor ban’en ni kan tay ko website rodad ni kan pilyeg nga boor ko 1,000 mit e thin! (Matt. 24:45-47) Girdi’ ko re fayleng ney e kar yurba’gad ni bochan e ba thilthil e am ni yad be tay langin e gagiyeg riy, ma kub thilthil e teliw rorad, ma boch i yad e ba flaab ma boch e ba gafgow. Machane, pi tapigpig rok Got u ga’ngin yang e fayleng ni ke pag meruk e milyon urngirad e rriyul’ nib taareban’rad. Bod nnap’an e Biyernes ko April 19, 2019, mab taareban’ e Pi Mich u ga’ngin yang e fayleng ni bochan e yag ni ngar yaliyed ba video ni kan ngongliy rogon ni be weliy e thin nu Bible ni fan ko rofen nem. Rofen nem ni blayal’ ma aram me muulung 20,919,041 e girdi’ nga taabang ni ngar madnomnaged fare Puguran ko yam’ ni tay Jesus. Nap’an ni gad ra lemnag gelngin nri gad ba tow’ath ni gad be guy e pi n’ey ni be buch nge rogon ni gad be un i lebguy, ma gad baadag ni ngad fanayed e tayim rodad ni ngad machibnaged murung’agen Gil’ilungun Got.

7. Uw rogon ni be ayuwegdad e n’en ni rin’ Jesus ni ngad ululgad ngad m’oneged fare maruwel ni machib?

⁷ Ku reb e kanawo’ nrayog ni ngad ululgad ngad m’oneged fare maruwel ni machib u lan e yafos rodad e aram e ngad folwokgad rok Jesus. De pag ban’en ni nge taleg ndab ki weliy murung’agen e tin riyul’. (John 18:37) De aw ko ban rok Satan u nap’an ni ognag “urngin e nam nu fayleng nge fel’ngin ngak,” maku de pag ir ko n’en ke ognag e girdi’ ngak ni aram e nge mang pilung. (Matt. 4:8, 9; John 6:15) Ku de pag ir ni nge adag ni nge yoor e chugum rok, maku de rus ko togopuluw nib gel ni un tay ngak. (Luke 9:58; John 8:59) Nap’an ni gad ra mada’nag boch ban’en ni be skengnag rogon e michan’ rodad, ma rayog ni ngad ululgad ngad m’oneged fare maruwel ni machib ni faan gad ra lemnag e fonow ni pi’ apostal Paul. I yog ngak e pi Kristiano ni ngar folwokgad ko n’en ni rin’ Jesus ya nge ‘dabi mulan’rad ngar paged yad’!​—Heb. 12:3.

8. Uw rogon be’ nib gum’an’? Mang nrib t’uf ni ngad daged e re fel’ngin ney e chiney?

⁸ Be’ nib gum’an’ e rayog ni nge par nib gapas laniyan’ nge mada’ ko ngiyal’ ni ke thil rarogon ban’en. Boor ban’en nib t’uf ni ngad gum’an’naged gadad riy. Sana rayog ni gad baadag ni ngad chuwgad u fithik’ reb e magawon ni gad be mada’nag ara bay ban’en nib fel’ ni ke n’uw nap’an ni gad be sonnag ni nge buch. Habakkuk ni profet e i par ni be athapeg ni nge tal e cham nge boch ban’en nib kireb ni be rin’ e girdi’ nu Judah. (Hab. 1:2) Pi gachalpen Jesus e ur athapeged ni nge “m’ug” Gil’ilungun Got ni ka chingiyal’ nem ya nge yag ni chuwegrad u tan e gagiyeg rok yu Roma. (Luke 19:11) Ma gadad e gad be athapeg e ngiyal’ nra chuweg Gil’ilungun Got e kireb me fek e bin nib beech e fayleng i yib ni piin nib mat’aw e yad ra par riy. (2 Pet. 3:13) Machane, ba t’uf ni ngad gum’an’naged gadad ngad sonnaged e ngiyal’ ni ke dugliy Jehovah ni nge rin’ e re n’ey riy. Am lemnag boch e kanawo’ ni be fil Jehovah ngodad rogon ni ngaud gum’an’naged gadad.

9. Mang boch ban’en ni be dag ngodad nib gum’an’ Jehovah?

⁹ Jehovah e ir e ke dag e bin th’abi fel’ e kanawo’ u rogon ni ngaun gum’an’nagey. Ba gaman e tayim ni pi’ ngak Noah ni nge ngongliy rogon fare arke riy miki “machibnag e tin nib mat’aw.” (2 Pet. 2:5; 1 Pet. 3:20) I motoyil Jehovah u nap’an ni be fith Abraham boor e deer ngak u murung’agen e n’en ke dugliy ni aram e nge thang e piin nib kireb ni yad ma par ko fa gal mach nu Sodom nge Gomorrah. (Gen. 18:20-33) Ku boor e chibog ni i gum’an’ Jehovah u puluwon piyu Israel nda ur yul’yul’gad. (Neh. 9:30, 31) Ku rayog ni ngad guyed nib gum’an’ Jehovah ni bochan e ba gaman e tayim ni be pi’ ngak urngin e piin yad baadag ni ngar manged fager rok ni ngar ‘pied keru’rad ko urngin e denen ni yad be rin’.’ (2 Pet. 3:9; John 6:44; 1 Tim. 2:3, 4)  N’en be rin’ Jehovah e be dag ngodad nib fel’ ni ngad gum’an’naged gadad ngad ululgad i machibnag e girdi’ ma gad be fil e tin riyul’ ngorad. Ku be fil ngodad rogon ni ngad gum’an’naged gadad u daken reb e fanathin ni bay ko Thin rok.

10. Mang e gad be fil ko n’en ma rin’ fare tamilay’ ni bay murung’agen ko James 5:7, 8?

¹⁰ Mu beeg e James 5:7, 8. Fare tamilay’ ni kan weliy murung’agen ni ke yung e woldug rok e be fil ngodad rogon ni ngaud gum’an’naged gadad. Riyul’ ni bay boch e woldug ni ma tugul nib papey. Machane yooren e woldug, nib ga’ ni tin baaray ni ma yib wom’engin e ba n’uw nap’an mfini yib wom’engin nrayog ni ngan t’ar. U Israel kakrom e ba ga’ ni nel’ e pul ni ma ilal e woldug riy. Ere ra yung fare tamilay’ e awoch rok u tomuren ni ke tabab e n’uw u nap’an ni be mulmul yuwan e gek’iy, me t’ar wom’engin e woldug rok u nap’an ni ke for yuwan e gek’iy bayay u tomuren ni ke mus nap’an e n’uw. (Mark 4:28) Ere ra m’ug ni gad ba gonop ni faan gad ra folwok u rogon e gum’an’ ni ma dag fare tamilay’. Machane, rayog ni nge mo’maw’ ni ngan rin’ e re n’ey.

11. Uw rogon nra ayuwegdad e gum’an’ u nap’an ni gad be machib?

¹¹ Bochan ndawori flont e girdi’ mab ga’ ni yad baadag ni ngar guyed angin e maruwel rorad ni ka chingiyal’ nem. Machane, faanra gad baadag ni nge ilal e woldug rodad nge yib wom’engin, ma thingar da ayuweged ni gubin ngiyal’. Thingar da gi’ed e but’, ngad yunged e woldug rodad ngay, ma gad pug e pan riy, mu ud rannaged. Ku arrogon fare maruwel ni ngan ayuweg e girdi’ ngar manged pi gachalpen Jesus nib t’uf ni ngan maruweliy nib gel. Ba t’uf e tayim ni ngad ayuweged e piin gad be fil e Bible ngorad ni ngar filed rogon ni nge taareb rogon e girdi’ u wan’rad mu ur daged e t’ufeg. Faanra gad ba gum’an’, ma aram e n’en nra ayuwegdad ndabi mulan’dad u nap’an der motoyil e girdi’ ngodad. Mus ni faanra ke m’agan’ boch e girdi’ ngay ni ngar motoyilgad ngodad mar filed e pi n’en gad be fil ngorad, maku thingar da gum’an’naged gadad. Dabiyog ni ngad towasariyed be’ ni be fil e Bible ni nge gel e michan’ rok. Bay yu ngiyal’ ni mus ngak pi gachalpen Jesus nib sagaal ni ur nanged fan boch ban’en ni i fil ngorad. (John 14:9)  Dab da paged talin ni gadad e gad be yung e woldug ma gad be rannag, machane Got e ir e be pi’ gelngin be ga’.​—1 Kor. 3:6.

12. Uw rogon ni ngad gum’an’naged gadad u nap’an ni gad be machibnag girdien e tabinaw rodad ni gathi yad boch e Pi Mich?

¹² Rayog ni nge mo’maw’ ni ngad gum’an’naged gadad u nap’an ni gad be machibnag girdien e tabinaw rodad ni gathi yad boch e Pi Mich. Machane rayog ni nge ayuwegdad fare kenggin e motochiyel ni bay ko Eklesiastes 3:1, 7, NW. Be gaar: “Bay . . . ngal’an ni ngan th’ab gulungey nge ngal’an ni ngan welthin.” Ngongol nib fel’ ni gad ma dag e rayog ni nge ayuweg chon e tabinaw rodad ni ngar adaged ni ngar motoyilgad ko machib rodad. Machane, gubin ngiyal’ nthingar da fal’eged rogodad ni ngad weliyed ngorad murung’agen Jehovah. (1 Pet. 3:1, 2) Riyul’ nthingar da machibnaged e girdi’ ma gad fil e tin riyul’ ngorad u fithik’ e pasig, machane susun e ngkud gum’an’naged gadad u puluwon urngin e girdi’ nib muun chon e tabinaw rodad ngay.

13-14. Mini’ e piin kar pared ni yad be gum’an’naged yad nrayog ni ngad folwokgad rorad?

¹³ Rayog ni ngad nanged rogon ni ngad gum’an’naged gadad ko n’en ni rin’ boch e girdi’ ni yad ba yul’yul’ ni bay murung’agrad u Bible nge boch e girdi’ ni yad ba yul’yul’ e chiney. Habakkuk e i athapeg ni nge taw ko ngiyal’ ni nge chuw e kireb, machane i dag ni be gum’an’nag ir u nap’an ni gaar: “Bay gu wan nga p’ebugul tafen e damit rog, mu gu son.” (Hab. 2:1) I yog apostal Paul ni baadag ni nge “mu’nag” e machib ni be tay. Yugu aram rogon me gum’an’nag ir nga i “weliy ngan nang e Thin Nib Fel’ ni yib rok Got.”​—Acts 20:24.

¹⁴ Am lemnag e n’en ni rin’ ba wu’ e mabgol ni kar mu’nagew fare skul u Gilead min pi’row nga reb e nam nri in e Pi Mich ni bay riy, ma yooren e girdi’ riy e gathi yad e Kristiano. Ere ri in e girdi’ ni yad baadag ni ngar filed e Bible. Machane, pi walag nra uned e gal walag ney nga taab class u Gilead ni yad be pigpig u yugu boch e nam e yad ma yog ngorow murung’agen urngin e girdi’ ni yad be fil e Bible ngorad ma yad be ayuwegrad ni ngar manged boch e Pi Mich. Yugu aram rogon, miki ulul e gal walag ney ko machib ni yugu aram rogon ni yooren e girdi’ ko gin yow ma machib riy e darur motoyilgad. Tomuren e machib nra tew u lan meruk e duw ko re nam nem nri in e girdi’ riy ni be motoyil, ma rib gel e felfelan’ nra tew ni bochan e bay bagayad e piin yow ma fil e Bible ngorad ni un ko taufe. Mang e gad be fil ko pi n’ey ni i buch kakrom nge tin be buch e chiney? Pi cha’ney ni yad ba yul’yul’ e dar malmalgad ara ra toffangad, ma aram fan ni tow’athnagrad Jehovah ni bochan e gum’an’ nra ted. Manga yugu da boded yad nra ‘pired ni yad bod e piin nib mich Kristus u wun’rad ma ba gum’an’rad, ma aram fan ni ke yog ngorad e tin ni yog Got nra pi’.’​—Heb. 6:10-12.

15. Mang reb e kanawo’ nrayog ni nge ayuwegdad e michan’ rodad ni ngad dugliyed u wan’dad ni ngad ululgad ko machib?

¹⁵ Ba mich u wan’dad e thin ni gad be machibnag, ere ri gad baadag ni ngad weliyed ngak urngin e girdi’ nrayog. Kub pagan’dad ko pi n’en ni kan micheg ngodad u lan e Thin rok Got. (Ps. 119:42; Isa. 40:8) Kad guyed boch e yiiy u Bible ni ke lebug ko ngiyal’ ney ni gad bay riy. Kud guyed rogon ni ke thilyeg e girdi’ rogon e par rorad u nap’an ni kar tababgad ni ngar folgad ko pi fonow u Bible. Re n’ey e be k’aringdad ni ngari mich u wan’dad nib t’uf ni nge rung’ag urngin e girdi’ fare thin nib fel’ ni murung’agen Gil’ilungun Got.

16. Uw rogon ni be ayuwegdad e Psalm 46:1-3 ni ngad nanged ni faanra ba mich Jehovah nge Jesus u wan’dad, ma aram e gad ra dugliy u wan’dad ni ngad machibgad?

¹⁶ Kub mich Jehovah u wan’dad ni ir e En Ke Yib Rok e thin ni gad be machibnag, ma kub pagan’dad ngak Jesus ni ir e en ke pi’ Jehovah mat’awun ni nge mang Pilung u Gil’ilungun. (John 14:1) Demtrug e re miti n’en gad ra mada’nag, ma gubin ngiyal’ nra par Jehovah ni ir e manaf rodad nge gelngidad. (Mu beeg e Psalm 46:1-3.) Maku reb e, ba pagan’dad ni Jesus e ir e be pow’iy rogon fare maruwel ni machib u tharmiy ni be fanay gelngin nge mat’awun ni ke pi’ Jehovah.​—Matt. 28:18-20.

17. Mu weliy ban’en ni buch ni be dag fan nsusun e ngad ululgad ko machib ni gad be tay.

 ¹⁷ Michan’ e aram e n’en nra ayuwegdad ni ngari pagan’dad nra tow’athnagdad Jehovah ko athamgil ni gad be tay, ma bay yu ngiyal’ nra rin’ u boch e kanawo’ ndad lemnaged nra rin’ riy. (Ekl. 11:6) Bod ni, gubin e rran ma bokum biyu’ e girdi’ ni yad ma guy e pi tebel nge cart ni kad ted ni bay e pi babyor rodad riy. Gur, ba fel’ e biney e kanawo’ ni gad ma machib riy? Arrogon! Fare Machib Ko Gil’ilungun ko November 2014 e be weliy murung’agen reb e fel’ yangaren ni ma un nga reb e skul nib tolang ni baadag ni nge yoloy bangi babyor ni fan nga reb e class rok ni murung’agen e Pi Mich Rok Jehovah. De yag ni nge pirieg reb e Tagil’ e Liyor, machane me pirieg reb e tebel ni kan tay u skul rok ni yibe pi’ boch e babyor rodad riy, miki pirieg riy boch e babyor ni be weliy murung’agen e pi n’en ni ke lemnag ni nge weliy u lan e gi babyor rok nem. Munmun, ma aram me mang reb e Pi Mich ma chiney e be pigpig ni ir reb e regular pioneer. Ireray boch ban’en ni ma k’aringdad ni ngad ululgad ko machib ni gad be tay ni bochan e be dag ni ka bay e girdi’ nib t’uf ni ngar rung’aged murung’agen Gil’ilungun Got.

18. Mang fan nrayog ni nge pagan’dad ni yira mu’nag fare maruwel ni machib ni bod rogon nib m’agan’ Jehovah ngay?

¹⁸ Rayog ni nge pagan’dad nra mus fare maruwel ni machib ko ngiyal’ ni kan dugliy ni nge mus riy. Am lemnag e n’en ni buch u nap’an Noah. I micheg Jehovah e ngiyal’ nem ni gubin ban’en ni ma rin’ ko ngiyal’ nth’abi fel’ ni nge rin’ riy. Sogonap’an 120 e duw u m’on riy, me dugliy Jehovah e ngiyal’ nra tabab fare Ran ni Tharey e Fayleng. Boor e duw nga tomuren, ma aram me yog Jehovah ngak Noah ni nge toy fare arke. Sogonap’an 40 ara 50 e duw u m’on ni nge tabab fare Ran ni Tharey e Fayleng, ma ka be ulul Noah ni be maruwel nib gel. Yugu aram rogon nder motoyil e girdi’ ngak, machane ki ulul ni nga i ginangrad nge mada’ ko ngiyal’ ni yog Jehovah ni ke taw nga nap’an ni nge kunuy urngin fapi gamanman nga lan fare arke. Ma faani taw nga nap’an ni ke dugliy Jehovah, ma aram me ‘ning fare mab.’​—Gen. 6:3; 7:1, 2, 16.

19. Mang e rayog ni ngad athapeged boch nga m’on ni faanra dab da toffangad ko maruwel rodad?

¹⁹ Dabki n’uw nap’an ma ra yog Jehovah ngodad ni aram e ke m’ay fare maruwel ni ngan machibnag fare thin nib fel’ ni murung’agen Gil’ilungun Got. Ngemu’, ma aram e ra thang e re m’ag rok Satan ney me fek i yib e bin nib beech e fayleng nib sug ko girdi’ ni yad ma fol rok Got. Machane chiney ndawori taw ko ngiyal’ nem e manga yugu da folwokgad rok Noah, nge Habakkuk, nge yugu boch e girdi’ ndar toffangad ko maruwel rorad. Manga yugu da ululgad ngad m’oneged fare maruwel ni machib, mad gum’an’naged gadad, ma gad par nrib mich Jehovah u wan’dad nge pi n’en ke micheg.