Deer ko Piin Ma Beeg
Gur, fare thin ko Eklesiastes 5:8 e fan ngak e girdi’ ni be gagiyeg, ara fan ngak Jehovah?
Re verse ney e ra k’aringdad ni ngad fal’eged i lemnag boch ban’en, ya be gaar: “Dab mu gin ngay u nap’an ni ga ra guy ni am e be gafgownag e piin gafgow ma be siyeg ni nge rin’ e tin nib mat’aw ngorad nge tin mat’awrad. Gubin e pi ga’ ma bay u tan e gagiyeg rok be’ nib tolang ngak, ma yow bay u tan e gagiyeg rok e piin kab ga’ ngorow.”—Ekl. 5:8, BT.
Faanra dab da lemnaged rogon e re n’ey u wan’ Jehovah, ma rayog ni ngad lemnaged nre verse ney e kemus ni be weliy murung’agen girdien e pi am nib ga’ lungurad. Machane faan gad ra fal’eg i lemnag, ma be weliy murung’agen ban’en nib riyul’ u murung’agen Jehovah nsusun e nge fal’eg lanin’dad me pi’ e pagan’ ngodad.
Be weliy e Eklesiastes 5:8 murung’agen be’ ni be gagiyeg ni be gafgownag e girdi’ nib gafgow, ma de mat’aw rogon e ngongol ni ma rin’ ngorad. Cha’ney e susun e dabi pagtalin nsana bay be’ ni kab tolang ngak ara kab ga’ lungun ngak ni be yaliy rogon e gagiyeg ni be tay. Bin riyul’ riy e, rayog ni ka bay boch e girdi’ ni kab tolang e liw rorad ngak. Ba gel e kireban’ riy ni bochan e pi tayugang’ ko am e rayog ni yad ba sasalap, ma bochan e re n’ey ma aram fan ni be gafgow e girdi’ u tan e gagiyeg rorad nde mat’aw.
Yugu aram rogon ni gowa dakuriy e athap u gubin ban’en, machane rayog ni nge fel’ lanin’dad ya gad manang ni “gubin e pi ga’” ko am ni be yaliy Jehovah rogon e gagiyeg ni yad be tay. Rayog ni ngad weniggad ngak Got ni nge ayuwegdad, ma gad weliy ngak e pi n’en be magafan’dad ngay. (Ps. 55:22; Fil. 4:6, 7) Gad manang ni Jehovah e be fal’eg i yaliy e “re fayleng ney ni ga’ngin, ni nge pi’ gelngin e piin yad ba yul’yul’ ngak u gum’ircha’rad.”—2 Kron. 16:9, BT.
Ere be puguran e Eklesiastes 5:8 ngodad rarogon e re fayleng ney ni gad be par riy ni gubin ngiyal’ ma bay be’ riy ni kab tolang ngak be’. Bin th’abi ga’ fan riy e, re thin nu Bible ney e be puguran ngodad ni Jehovah e ir e En Th’abi Tolang u fithik’ urngin e girdi’. Ngiyal’ ney e be gagiyeg u daken Jesus Kristus ni Fak ni ir e Pilung u Gil’ilungun Got. Got ni Gubin Ma Rayog Rok ni ir e be guy urngin ban’en nge urngin e girdi’ e ir be’ nib mat’aw maku arrogon Fak.
