1-2. Mang e kan pag fan ngak Timothy nrogon ni bay ko 1 Timothy 6:20?

BA GA’ ni bay boch ban’en nib ga’ fan u wan’dad ni gad ma pag fan ngak boch e girdi’. Bod ni salpiy rodad e gad ma tay nga bank. Nap’an ni gad ra tay e salpiy rodad ngaram, ma gad manang nrayog ni ngan ayuweg ndabi yan nga bang fa iring be’. Ere gad manang e n’en be yip’ fan ni ngad paged fan ban’en ngak be’ nrib ga’ fan u wan’dad.

² Mu beeg e 1 Timothy 6:20. I puguran apostal Paul ngak Timothy ni bay ban’en nib ga’ fan ni ke yag ngak. Re n’ey e aram e bin riyul’ e tamilangan’ u murung’agen e n’en nib m’agan’ Got ngay ni fan ko girdi’. Ki pag Jehovah fan fare maruwel ni ngan “machibnag e thin rok Got ko girdi’” ngak Timothy, ma ngki “rin’ e maruwel rok e tamachib ko Thin Nib Fel’ ni yib rok Got.” (2 Tim. 4:2, 5) I pi’ Paul e athamgil nga laniyan’ Timothy ni nge ayuweg e n’en kan pag fan ngak. Ku arrogodad ni bay boch ban’en nib ga’ fan ni kan pag fan ngodad ni bod rogon Timothy. Mang e pi n’ey? Ma mang fan nthingar da ayuweged fare tow’ath ni ke pi’ Jehovah ngodad?

3-4. Mang boch i fan nib ga’ fan e tin riyul’ u lan e Bible?

³ Bochan nib gol Jehovah ma ke pi’ e bin riyul’ e tamilangan’ ngodad ni murung’agen e tin riyul’ ni bay u lan e Thin rok u Bible. Rib ga’ fan e tin riyul’ u lan e Bible ni bochan e be fil ngodad rogon ni nge fel’ e tha’ u thildad Jehovah, maku be weliy murung’agen e n’en nra yibnag e bin riyul’ e felfelan’ nga lan e yafos rodad. Nap’an nra m’agan’dad ko tin riyul’ u lan e Bible ma gad fol riy, ma aram e ra ayuwegdad ndab kud manged sib ko pi machib ni googsur nge boch e ngongol nde yalen.​—1 Kor. 6:9-11.

⁴ Ku reb i fan nib ga’ fan e tin riyul’ u lan e Thin rok Got e bochan ni yigoo piin nib sobut’an’rad mab “munguy lanin’rad ma kub m’agan’rad ngay ni ngar filed e tin riyul’” e ir e be ayuwegrad Jehovah ni ngar nanged e pi thin nem. (Acts 13:48, NW) Pi cha’ney nib sobut’an’rad e ba m’agan’rad ngay ni fare tapigpig nib yul’yul’ mab gonop e aram e piin be fanayrad Jehovah ni ngar filed e n’en bay u Bible ngodad e ngiyal’ ney. (Matt. 11:25; 24:45) Dabiyog ni ngad nanged  fan e n’en bay u Bible ni faanra dab ni ayuwegdad, ma dakuriy ban’en nib ga’ fan nge migid e re n’ey.​—Prov. 3:13, 15.

5. Ku mang e ke pag Jehovah fan ngodad?

⁵ Ki pag Jehovah fan fare maruwel ngodad ni ngan fil ko girdi’ e tin riyul’ u murung’agen nge n’en nib m’agan’ ngay. (Matt. 24:14) Fare thin ni ke yib rok Jehovah ni gad be machibnag e rib ga’ fan ni bochan e be ayuweg e girdi’ ni ngar manged bang ko tabinaw rok Jehovah miki bing e kanawo’ ngorad nrayog ni nge yag e yafos ni manemus ngorad. (1 Tim. 4:16) Demtrug ko boor e tayim ni gad be machib riy ara buchuuw, machane gad be pi’ e ayuw u rogon ni ngan rin’ e bin th’abi ga’ fan e maruwel ni yibe rin’ e ngiyal’ ney. (1 Tim. 2:3, 4) Ri gad ba tow’ath ni gad be maruwel Got u taabang!​—1 Kor. 3:9.

6. Mang e buch rok boch e girdi’ ni bochan e daki ga’ fan u wan’rad e n’en kan pag fan ngorad?

⁶ Nap’an Timothy ma immoy boch e Kristiano nde ga’ fan u wan’rad e tow’ath ni bay rorad ni aram e ngar maruwelgad Got u taabang. Bochan nib t’uf e tin nu fayleng ban’en rok Demas, ma aram me pag fan e tow’ath ni kan pi’ ngak ni aram e ngar pigpiggow Paul u taabang. (2 Tim. 4:10) Figelus nge Hermogenes e be m’ug riy nra talgow ko machib ni bochan e yow be rus nri chey min gafgownagrow ni bod rogon ni un gafgownag Paul. (2 Tim. 1:15) Himeneus, nge Alexander, nge Filetus e ra chelgad ngar togopuluwgad ko tin riyul’ mar talgad nda kur pigpiggad ngak Jehovah. (1 Tim. 1:19, 20; 2 Tim. 2:16-18) Urngin e pi cha’ney e immoy nib t’uf Jehovah rorad, machane me munmun ma dakur lemnaged nib ga’ fan e pi n’en ke pi’ ngorad.

7. Mang e ma rin’ Satan ya nge yag nda rin’ed e n’en baadag?

⁷ Uw rogon ni ma guy Satan rogon ni nge k’aringdad ni ngad digeyed e pi tow’ath ni ke pag Jehovah fan ngodad? Mu tay fanam i yan u boch e ban rok Satan. Ma fanay e pi n’en yima dag yaan u TV, nge kachido, nge Internet, nge pi shimbung, nge pi babyor ni nge k’aringdad ni ngad lemgad mu kud ngongolgad u reb e kanawo’ nra k’aringdad ni nge munmun ma dabki t’uf Jehovah rodad ara dab kud folgad ko pi motochiyel rok. Ma guy rogon ni nge k’aring e marus ngodad ni bochan e pi n’en be yog e girdi’ u murung’agdad ara bochan e gafgow ni yibe tay ngodad ya ngad talgad ko machib. Ku ma guy rogon ni nge k’aringdad ni ngad motoyilgad ko “llowan’ ni ke balyang boch e girdi’ ka rogned e llowan’ ngay” ni be weliy e piin kar chelgad kar togopuluwgad ko tin riyul’ ya ngad digeyed e tin riyul’.​—1 Tim. 6:20, 21.

8. Mang e ga be fil ko n’en ni buch rok reb e walag ni pumoon ni ka nog Daniel ngak?

⁸ Faanra dab da kol ayuwgad, ma ra munmun ma rayog ni ngad digeyed e tin riyul’. Am lemnag e n’en ni buch rok Daniel * ni ir be’ ni baadag ni ma fafel ko pi video game. I yog ni gaar: “Gu tabab ni  ngaug fafel ko pi video game u nap’an ni ke gaman ragag e duw rog. Som’on e ug fafel nga boch e game ndariy ban’en nib kireb riy. Machane munmun mug tabab ni ngaug fafel nga boch ni bay yaan e cham, nge yaan e pig, nge yaan e kan riy.” Munmun ma ra reb e rran ma 15 e awa ni be fafel Daniel ko video game. I gaar: “Bin riyul’ riy e, gu manang nre miti video game ni gu be fafel ngay nge urngin e tayim ni gu be n’ag ngay e be palognag e tha’ u thilmow Jehovah. Machane ug lemnag ndaki t’uf ni nggu rin’ e n’en be yog e Bible.” Ere faanra dab da kol ayuwgad, ma rayog ni nge k’aringdad e pi n’en gad ma chuweg e chalban rodad ngay ni ngad digeyed e tin riyul’. Faanra buch e re n’ey, ma aram e rayog ni nge mul u pa’dad fapi n’en nib ga’ fan ni ke pag Jehovah fan ngodad.

9. Mini’ e taarebrogonnag Paul Timothy ngak nrogon ni bay ko 1 Timothy 1:18, 19?

⁹ Mu beeg e 1 Timothy 1:18, 19. I taarebrogonnag Paul Timothy ngak reb e salthaw me pi’ e athamgil ngak ni nge ulul ‘ko cham ni be tay nib mat’aw.’ Der weliy Paul murung’agen e cham ni ngan tay ngak reb e salthaw nib girdi’. Ere mang boch e kanawo’ ni piin Kristiano e yad bod e salthaw ni yad be un ko cham u nap’an e mahl? Ma mang boch e fel’ngin nib t’uf ni ngad maruweliyed ni gadad boch e salthaw rok Kristus? Ngad weliyed lal ban’en nrayog ni ngad filed ko fare fanathin ni yog Paul. Pi n’ey e rayog ni nge ayuwegdad ni ngad chichiiyed pa’dad ko tin riyul’.

10. Mang e be yip’ fan ni ngan yul’yul’ ngak Got, ma mang fan nib t’uf ni ngad rin’ed e re n’ey?

¹⁰ Mmaruweliy ni ngam par ni gab yul’yul’ ngak Got. Reb e salthaw nib manigil e ir be’ nib yul’yul’. Ra athamgil u rogon nrayog rok ni nge cham ni nge ayuweg be’ nib t’uf rok ara ban’en nib ga’ fan u wan’. I pi’ Paul e athamgil nga laniyan’ Timothy ni nge maruweliy ni nge par nib yul’yul’ ngak Got. (1 Tim. 4:7) Ra gel e t’ufeg rodad ngak Got, ma aram e ri gad ra adag ni ngad chichiiyed pa’dad ko tin riyul’.​—1 Tim. 4:8-10; 6:6.

11. Mang fan nib t’uf ni ngad filed rogon ni ngad rin’ed e tin nib mat’aw?

¹¹ Mu fil rogon ni ngam rin’ e tin nib mat’aw. Be’ nib salthaw e thingari maruwel nib gel ya nge yag ni par ni gubin ngiyal’ ni ke fal’eg rogon ni nge yan ko mahl. Rayog ni nge cham Timothy ko pi ban rok Satan ni bochan e ke fol ko fonow rok Paul ni nge maruwel nib gel ni nge cham ko pi ar’ar nib kireb, me maruweliy boch e fel’ngin nib manigil, me chagil ko pi walag ni Kristiano. (2 Tim. 2:22) Ba t’uf ni nge fil rogon ni nge rin’ e pi n’ey. Ku arrogodad nib t’uf ni ngad filed rogon ni ngad chamgad ko pi ar’ar nib kireb. (Rom. 7:21-25) Maku reb e, ba t’uf ni ngad filed rogon ni ngad thilyeged rarogodad ma gad maruweliy boch e fel’ngin nib manigil. (Efe. 4:22, 24) Ra yan i blayal’ u reb e rran ni kari aw parowdad, ma rayog nib t’uf ni ngad athamgilgad ngad uned ko muulung.​—Heb. 10:24, 25.

12. Mang boch e kanawo’ nrayog ni ngad salapgad u rogon ni ngad fanayed e Bible?

¹² Be’ nib salthaw e ba t’uf ni nga i fil rogon ni nge fanay e pi talin e cham rok. Faanra baadag ni nge salap u rogon ni nge fanay e pi talin e cham rok nem, mab t’uf ni nge rin’ e re n’ey ni gubin e rran. Ere ku arrogodad nib t’uf ni ngad salapgad i fanay e Thin rok Got. (2 Tim. 2:15) Rayog ni ngad filed rogon ni ngad rin’ed e pi n’ey u nap’an e pi muulung rodad. Machane faanra ngad micheged nga laniyan’ yugu boch e girdi’ ni tin riyul’ u lan e Bible e rayog ni nge ayuwegrad, mab t’uf ni ngad filed ni gubin ngiyal’. Ba t’uf ni ngad fanayed e Thin rok Got ni nge gelnag e michan’ rodad. Re n’ey e be yip’ fan ni gathi kemus ni ngaud beeged e Bible, ya kub muun ngay ni ngad fal’eged i lemnag e pi n’en gad be beeg, ma gad gay murung’agen boch ban’en u lan e pi babyor rodad ya nge yag nda nanged fan e Thin nu Bible nib fel’ rogon, ma gad fol riy. (1 Tim. 4:13-15) Faan gad ra rin’ ni aray rogon, ma aram e rayog ni ngad fanayed e Thin rok Got ni ngad filed ngak boch e girdi’. Re n’ey e ku be yip’ fan ni gathi kemus ni ngad beeged  e thin nu Bible ngorad. Gad baadag ni ngad ayuweged e piin yad be motoyil ngodad ni ngar nanged fan e thin nu Bible, mu kur nanged rogon ni ngar folgad riy. Ere faan gad ra fil e Bible rodad ni gubin ngiyal’, ma aram e rayog ni ngad nanged rogon ni ngad filed e Bible ngak e girdi’ nib fel’ rogon.​—2 Tim. 3:16, 17.

13. Mang e be yog e Hebrews 5:14 nthingar da rin’ed ya nge yag nda filed rogon ni ngad nanged e n’en nib thil u thilin e tin nib fel’ nge tin nib kireb?

¹³ Mu fil rogon ni ngam nang e n’en nib thil u thilin e tin nib fel’ nge tin nib kireb. Be’ nib salthaw e thingari nang rogon ni nge guy e riya’ ni be yib me pilo’ riy. Ku arrogodad nthingar da filed rogon ni ngad nanged e pi n’en rayog ni nge buch nrayog ni nge magawonnagdad, ma gad rin’ ban’en ngay ya nge yag nda paloggad ko riya’. (Prov. 22:3; mu beeg e Hebrews 5:14.) Bod nib t’uf ni ngad gonopiyed e pi n’en gad ma mel’eg ni ngad chuweged e chalban rodad ngay. Pi program u TV nge pi kachido e ba ga’ ni yima dag riy yaan e ngongol ndarngal. Gad ma siyeg e pi n’ey ni yima chuweg e chalban ngay ni bochan e rayog ni nge warnag e t’ufeg rodad ngak Jehovah ni buchuuw ma buchuuw. Gad manang ni ma fanenikay Jehovah e ngongol nde yalen, ma piin yad ma rin’ e mit ney e ngongol e yad ma gafgownaged yad nge yugu boch e girdi’.​—Efe. 5:5, 6.

14. Bochan ni yag ni nge nang Daniel e n’en nib thil u thilin e tin nib fel’ nge tin nib kireb, ma uw rogon ni ayuweg e re n’ey?

¹⁴ Daniel ni kad weliyed murung’agen boch kafram e tabab ni nge nang ni bay e magawon rok ko pi video game ni ma fafel ngay ni bay yaan e cham, nge yaan e pig, nge yaan e kan riy. I gay murung’agen boch ban’en ni nge ayuweg ko biney e magawon u lan fare Watchtower Library. Ere mang angin ni yib ngak? I tal ndaki fafel ko pi video game nib kireb. Miki tal nda kur fafelgad e piin yad ma fafel ko pi video game nem u taabang. I gaar Daniel: “Gu tabab ni ngaug rin’ boch ban’en u wen ara ug chag ko pi walag u lan e ulung ko bin ngaug fafel ko video game.” Chiney e be pigpig Daniel ni ir reb e pioneer maku ir reb e piilal.

15. Mang fan ni bay riy’en boch ban’en nde riyul’ ni yima wereg?

¹⁵ Thingar kud boded Timothy ni ngad nanged riy’en boch e thin nde riyul’ ni ma wereg e piin kar chelgad kar togopuluwgad ko tin riyul’. (1 Tim. 4:1, 7; 2 Tim. 2:16) Bod nrayog ni ngar guyed rogon ni ngar wereged boch e thin nde riyul’ u murung’agen pi walagdad, fa reb e ra k’aringed gadad ni nge maruwar lanin’dad ko rayog ni nge pagan’dad ko ulung rok Jehovah fa danga’. Pi n’ey nde riyul’ ni yibe wereg e rayog ni nge warnag e michan’ rodad. Ere thingar da guyed rogon ndab da awgad ko  biney e ban. Mang fan? Bochan ni pi n’ey e be yib rok e “girdi’ nib kireb lanin’rad ndakuriy e thin rok Got u wun’rad ni ir e tin nib riyul’.” N’en ni yad be nameg e ngaur ‘luaged e thin ma yad be tugthin ngak be’.’ (1 Tim. 6:4, 5) Yad baadag ni nge mich e pi ban nem u wan’dad ma dabki pagan’dad ngak pi walagdad.

16. Ra ngad pared ni gad be tedan’dad, ma mang boch ban’en nthingar da siyeged?

¹⁶ Ngad pared ni gad be tedan’dad. Timothy ni ir reb e “salthaw rok Kristus” e ba t’uf ni nge par ni be tiyan’ ko machib ni be tay ko bin nge yoornag e tayim rok ni be guy rogon ni nge yoor e salpiy ara chugum rok. (2 Tim. 2:3, 4) Susun e ngad boded Timothy ndab da paged chogowen e salpiy nge chugum ni nge chafeg lanin’dad nga bang. “Chogowen e fel’ rogon” e rayog ni nge warnag e t’ufeg rodad ngak Jehovah, ma dabki ga’ fan e Thin rok Got u wan’dad, ma dab kud adaged ni ngad weliyed ngak yugu boch e girdi’. (Matt. 13:22) Thingar da momnaged e par rodad ma gad fanay e tayim rodad ni ngad ululgad ni ngad ‘m’oneged u wun’dad e gagiyeg rok Got.’​—Matt. 6:22-25, 33.

17-18. Mang e rayog ni ngad rin’ed ya nge yag nda ayuweged e tha’ u thildad Jehovah?

¹⁷ Mu fal’eg rogom ni ngam rin’ ban’en nib papey. Be’ nib salthaw e ba t’uf ni nge tanomnag rogon ni nge ayuweg ir. Faanra ngad ayuweged e tin ke pag Jehovah fan ngodad, mab t’uf ni ngad rin’ed ban’en nib papey u nap’an ni gad ra guy e riya’. Ere mang e ra ayuwegdad ni ngad rin’ed e re n’ey? Ba t’uf ni ngad tanomnaged u m’on riy rogon e n’en ni ngad rin’ed u nap’an ni kad mada’naged ban’en nrayog ni nge magawonnagdad.

¹⁸ Rayog ni ngad taareb rogonnaged e re n’ey nga reb e gam’ing ni ngan tay. U m’on ni ngan tabab ma yima yog ko girdi’ ni kar bad ni ngar gayed e bin th’abi chugur e mab ngorad nrayog ni nga ranod riy nga wen. Mang fan? Ya gomanga ke buch ban’en nib tomgin, ma aram e gin nrayog ni nga ranod riy nga wen nib papey. Ere ku arrogodad nrayog ni ngad tanomnaged e n’en rayog ni ngad rin’ed u nap’an ni kad guyed yaan e ngongol ndarngal, ara yaan e cham, ara ban’en ni ke yib rok e piin kar chelgad kar togopuluwgad ko tin riyul’ u nap’an ni gad be fanay e Internet, ara gad be yaliy reb e kachido, ara reb e program u TV. Faan gad ra fal’eg rogodad ko n’en nrayog ni nge buch, ma rayog ni ngad rin’ed ban’en nib papey ya nge yag nda ayuweged e tha’ u thildad Jehovah, ma gad par ni gad bbeech u p’eowchen.​—Ps. 101:3; 1 Tim. 4:12.

19. Mang boch e tow’ath nra yag ngodad ni faan gad ra ayuweg e tin nib ga’ fan ban’en ni ke pag Jehovah fan ngodad?

¹⁹ Thingar da ayuweged e tin nib ga’ fan ban’en ni ke pag Jehovah fan ngodad ni aram e tin riyul’ u lan e Bible, nge fare maruwel ni ngad filed e tin riyul’ ngak e girdi’. Nap’an ni gad ra rin’ ni aray rogon, ma aram e rayog ni nge par e nangan’ rodad nib beech, miki yib fan e yafos rodad, ma gad felfelan’ ni bochan e gad be ayuweg e girdi’ ni ngar nanged Jehovah. U daken e ayuw rok Jehovah, ma rayog ni ngad ayuweged e tin kan pag fan ngodad.​—1 Tim. 6:12, 19.