“Aram fan nib pagan’dad u p’eowchen Got; mmudugil u wun’dad nra rung’ag e tin ni gadad be yog ni faan gadad ra ning ban’en ngak ni ban’en nib m’agan’ ngay.”​—1 John 5:14.

Bay boch e girdi’ ni yad ma yog ni yad ma meybil ni bochan e nge fel’ lanin’rad ni yugu aram rogon ndarur lemnaged ni bay be’ ni be motoyil ngorad. Machane meybil e gathi kemus ni ban’en ni gad ma rin’ ni bochan e nge fel’ lanin’dad ya nge yag nda athamgilgad u fithik’ e pi magawon rodad. Be micheg e Bible ngodad ni Got e “ba chugur ngak urngin e piin ni yad ma non ngak, ni yad be non ngak u fithik’ e yul’yul’. . . . Ma rung’ag e tin ni yad ma wenignag ngak.”​—Psalm 145:18, 19.

Ere rayog ni nge pagan’dad ni ma motoyil Jehovah Got ko meybil ko pi tapigpig rok. Bochan ni gad ba t’uf rok, ma aram fan ni ke gaar: “Bay um pininged gag. Ma bay um bad nguum meybilgad ngog ma bay gu fulweg taban e [“motoyil ko,” NW] meybil romed.”​—Jeremiah 29:12, BT.

“Um meybilgad ni gubin ngiyal’.”​—Roma 12:12.

Be pi’ e Bible e athamgil nga lanin’dad ni ngad ululgad ‘nguud meybilgad,’ ma ngkud rin’ed ni “gubin ngiyal’.” Ere ba tamilang ni baadag Jehovah Got ni ngaud meybilgad ngak.​—Matthew 26:41; Efesus 6:18.

Mang fan ni baadag Got ni ngaud meybilgad ngak? Am lemnag e re n’ey: Kun matam e dabun ni nge gaar fak ngak, “Papa’ rayog ni ngam ayuwegeg”? Yugu aram rogon nsana manang fare matam e n’en nib t’uf ko fare tir maku manang e n’en be lemnag, machane nap’an nra rung’ag e pi thin ney ni ke yog fare tir, ma aram e ra nang ni be pagan’ fare tir ngak ma kub chugur thilrow. Ere ku arrogodad nnap’an ni gad ra meybil ngak Jehovah Got, ma aram e gad be dag nib pagan’dad ngak ma gad baadag ni nge chugur thildad.​—Proverbs 15:8; James 4:8.

“Mpaged fan urngin e magafan’ romed ngak, ya be lemnag rogomed.”​—1 Peter 5:7.

Baadag Got ni ngaud meybilgad ngak ni bochan e gad ba t’uf rok maku ma lemnagdad. Ri manang e pi magawon rodad nge pi n’en ma k’aring e magafan’ ngodad, ma baadag ni nge ayuwegdad.

N’umngin nap’an e yafos rok David ni Pilung ni i meybil ngak Jehovah Got ni nge ayuweg, maku be weliy ngak rogon e tafinay rok nge pi n’en bay u fithik’ i laniyan’. (Psalm 23:1-6) Ere uw rogon David u wan’ Got? Ba t’uf David rok Got. Boor yay ni i meybil ngak Got, ma gubin yay ni i motoyil ko meybil rok. (Acts 13:22) Ere ku arrogodad ni ma motoyil Got ko meybil rodad ni bochan e ma lemnagdad.

Ireray e thin rok bagayad e piin ni yoloy reb fapi tang ni bay u Bible. Bochan nrib mich u wan’ ni ma motoyil Got ko meybil rok, ma rib ga’ e ayuw ni pi’ e re n’ey ngak. I guy ni ke chugur e tha’ u thilrow Got miki yib gelngin ni nge athamgil u fithik’ e pi gafgow nge kireban’ ni i tay.​—Psalm 116:1-9.

Faanra rib mich u wan’dad ni be rung’ag Got e meybil rodad, ma aram e gad ra ulul ni ngaud nonad ngak. Am lemnag e n’en ni buch rok Pedro ni ma par u lel’uch u Spain. Bay ba pagel ni fak ni 19 e duw rok ni chafin e karrow ni bay u langgin nge yim’. Bochan gelngin e kireban’ rok, ma aram me weliy urngin ban’en ni bay u laniyan’ ngak Got, miki par ni be meybil ni ngan fal’eg laniyan’ mu kun ayuweg. Ere mang e buch? I gaar Pedro: “I fulweg Jehovah taban e meybil rog ni aram e fanay e pi walag ni Kristiano ni ngar fal’eged lanin’mow e ppin rog mu kur ayuweged gamow.”

Yugu aram rogon nde fos fare pagel ni fak Pedro, machane meybil e aram e n’en nri ayuwegrad chon e tabinaw rok. María Carmen ni ppin rok e yog ni gaar: “Meybil e aram e n’en ni ayuwegeg ni nggu athamgil u fithik’ e kireban’ rog. Gu manang ni manang Jehovah Got rogon lanin’ug ni bochan e nap’an nug ra meybil ma gu ma thamiy ni ke gapas lanin’ug.”

Thin nu Bible nge pi n’en ke buch rok boch e girdi’ e ri be dag ngodad ni ma rung’ag Got e meybil. Yugu aram rogon, ma kub tamilang ni gathi urngin e meybil ni ma fulweg Got taban. Mang fan ni bay boch e meybil ni ma fulweg Got taban ma boch e danga’?