I weliy Pamela ni gaar: “Nap’an ni yibe tafalaynag e cancer rog, mab ga’ nug ma rus. Machane nap’an nug ra meybil ngak Jehovah Got, ma aram me gapas lanin’ug me yag ni nggu lem nib fel’ rogon. Kug ma gafgow ko amith, machane meybil e ma ayuwegeg ni nggu sap nga fel’ngin e n’en ke buch rog. Nap’an nra fith e girdi’ ko ke uw rogon salpeg, ma gu ma gaar, ‘Dawori fel’ rogog, machane gub felfelan’!’”

Riyul’ ni gathi ngad songad nge mada’ ko ngiyal’ ni ke yib ba mit e m’ar ngodad nib ubchiya’, ara ngad mada’naged reb e magawon nib ga’ mfin da meybilgad. Gad gubin ni gad ma mada’nag e magawon ni boch e ba ga’ ma boch e ba achig, mab ga’ nib t’uf ni ngan ayuwegdad ni ngad athamgilgad u fithik’. Ere gur, rayog ni nge ayuwegdad e meybil?

Be gaar e Bible: “Mu pi’ e gilab rom ngak Somol, ma bayi n’ufegem; dariy e ngiyal’ nra pag e piin yul’yul’ ngar meewargad.” (Psalm 55:22, BT) Re thin ney e rayog ni ngari fal’eg lanin’dad! Ere uw rogon nrayog ni nge ayuwegem e meybil? Faan ga ra meybil ngak Got ko bin nib puluw e kanawo’, ma ra pi’ e tin nib t’uf rom ya nge yag nim athamgil u fithik’ e pi magawon rom.​—Mu guy fare kahol ni kenggin e, “ Rogon Nrayog ni Nge Ayuwegem e Meybil.”