Ngiyal’ Nra Chuw e Fanenikan ni Manemus!
Mus ni faanra rayog ni ngad talgad ndab kud fanenikayed e girdi’, machane dabiyog ni ngad taleged e girdi’ u toobdad ndab kur fanenikayed yugu boch e girdi’. Bay e girdi’ ndawor ra bucheged ban’en ni ka yibe fanenikayrad. Ere mini’ e rayog ni nge chuweg e fanenikan ndariy n’umngin nap’an?
Kemus ni yigoo Jehovah Got e rayog rok ni nge rin’ e re n’ey, ma ireray e n’en be micheg e Bible nra rin’.—Proverbs 20:22.
RA CHUWEG GOT E N’EN MA K’ARING E FANENIKAN
-
1. SATAN NI MOONYAN’. Satan e ir tapgin e fanenikan ni gad be guy e ngiyal’ ney. Ra thang Got Satan nge urngin e piin yad ma fanenikay e girdi’ ni bod ir.—Psalm 37:38; Roma 16:20.
-
2. FAYLENG ROK SATAN NIB SUG KO FANENIKAN. Ra chuweg Got urngin ban’en nib kireb ko re fayleng ney, nib muun ngay girdien e am ni yad ba sasalap nge pi tayugang’ ko teliw ni yad ma tay tanggin e fanenikan u thilin e girdi’. Ra chuweg Got e pi siyobay nib chogow e girdi’ riy, ma yad ba sasalap, ma yad ma bannag e girdi’ ya nge fel’ boch ban’en riy ngorad.—2 Peter 3:13.
-
3. DENEN NI KE AF KO GIRDI’. Be yog e Bible ni gubin e girdi’ nib ga’ ni yad ma lemnag mar rin’ed e pi n’en nib kireb. (Roma 5:12) Reb ko pi n’ey e aram e ngaun fanenikay yugu boch e girdi’ u lanin’uy maku yibe dag ngorad ko ngongol. Ra ayuweg Got e girdi’ ni ngar gelgad ko pi n’ey u rarogorad nib kireb me chuweg e fanenikan ndariy n’umngin nap’an.—Isaiah 54:13.
BE MICHEG E BIBLE NRA PAR E FAYLENG NDAKURIY E FANENIKAN RIY
-
1. RA CHUW E NGONGOL NDE MAT’AW. Gil’ilungun Got e ra gagiyegnag e fayleng ni aram reb e am nib mat’aw gubin ban’en riy ma ra par ndariy n’umngin nap’an. (Daniel 2:44) Ra chuw e laniyan’ nge girdi’ ndubrad daken e piin yad ba thil ngorad. Ra yal’uweg Got urngin e ngongol nde mat’aw ni yibe rin’ ko girdi’ e ngiyal’ ney.—Luke 18:7.
-
2. GUBIN E GIRDI’ NI YAD RA PAR U FITHIK’ E GAPAS. Dakuriy be’ nra gafgow ni bochan e cham ara mahl ni yibe tay. (Psalm 46:9) Gubin e girdi’ ni yad ra par u fayleng e dabi buch ban’en rorad ni bochan e yad gubin ni yad baadag ni nga i par ni bay e gapas.—Psalm 72:7.
-
3. RA PAR E GIRDI’ NI MANEMUS NI KE FEL’ E PAR RORAD. Girdi’ ni yad ra par u fayleng e yad ra dag nriyul’ nib t’uf bagayad rok bagayad. (Matthew 22:39) Dakuriy be’ nra gafgow laniyan’, ma mus ko tin nib kireb ban’en ni ke par u laniyan’ e girdi’ ni goo ra chuw. (Isaiah 65:17) Nap’an nra chuw e fanenikan, ma gubin e girdi’ ni bay “ur pired u fithik’ e gapas ni yad ba felfelan’.”—Psalm 37:11.
Ga baadag ni ngam par u reb e fayleng ni aray rogon, fa? Mus ko chiney ni boor e girdi’ ni yad be fil rogon ndab kur fanenikayed e girdi’ ni aram e yad be fol ko pi kenggin e motochiyel u Bible. (Psalm 37:8) Ireray e n’en be rin’ e Pi Mich Rok Jehovah u ga’ngin yang e fayleng. Yugu aram rogon nib thilthil e yalen rorad nge rarogon e gin kar bad riy, machane ba taareban’rad ma yad ma t’ufeged yad.—Isaiah 2:2-4.
Ba felfelan’ e Pi Mich Rok Jehovah ngay ni ngar filed ngom rogon ni ngam athamgil u fithik’ e ngongol nde mat’aw nge laniyan’ ni yibe tay ngom. N’en ga ra fil e rayog ni nge ayuwegem ni ngam chuweg e fanenikan u gum’irchaem me t’uf e girdi’ rom. Rayog ni ngam fil rogon ni ngaum t’ufeg urngin e girdi’ ni kub muun ngay e piin ndarur pininged e magar ara yad ma fanenikay e girdi’. Angin nra yib riy e ra gel boch e felfelan’ rom e chiney miki fel’ e tha’ u thilmed yugu boch e girdi’. Bin th’abi fel’ riy e ga ra nang e n’en nrayog ni ngam rin’ ya nge yag nim un ko par u tan Gil’ilungun Got u nap’an nra chuw e fanenikan ndariy n’umngin nap’an.—Psalm 37:29.
You May Also Like
FARE WULYANG KO DAMIT
Mang e Ra Rin’ Gil’ilungun Got?
Manang Jesus ni yigoo Gil’ilungun Got e kemus e taare am nrayog ni nge pithig urngin e magawon u fayleng. Mang e ke rin’ Gil’ilungun Got nrayog ni nge pi’ e pagan’ ngodad?
