Faanra dariy, ma sana rayog ni kam guy ni kan rin’ ngak be’. Ba ga’ ni gad ma guy ara gad ma rung’ag murung’agen e girdi’ ni yibe fanenikayrad ni bochan e nam ni kar bad riy, ara ramaen dowrad, ara bochan ni yad e pumoon ni ma un ko pumoon, ara yad e ppin ni ma un ko ppin. Bochan e re n’ey, ma aram fan ni boor e am ni kar ngongliyed e motochiyel ni be yog nrayog ni nge l’ag e thin ngak be’ ni faanra ke rin’ ba pa’ e oloboch ni bochan e be fanenikay ba ulung i girdi’.

Girdi’ ni yima fanenikayrad e ku yad ma fanenikay yugu boch e girdi’. Kub ga’ ni yad ma sulweg taban e fanenikan ni yibe tay ngorad, ma aram fan ndabiyog ni nge chuw e fanenikan.

Sana rayog ni kan laniyan’ ngom, ma yibe moningnagem, ma yibe yog e thin nib kireb ngom, ma yibe k’aring e marus ngom. Machane gathi kemus chi rogon e fanenikan, ya ba ga’ ni ma k’aring e girdi’ ni ngar gafgownaged yugu boch e girdi’, ara ngar kirebnaged boch ban’en, ara ngan li’ be’, ara ngan kol be’ u gelngiy, ara ngan thang e fan.

Ra pi’ e re ke babyor ney e fulweg ko pi deer ni baaray me weliy rogon nrayog ni ngan gel ko fanenikan:

• Mang fan ni ke gel e fanenikan?

• Uw rogon nrayog ni nge tal e fanenikan?

• Bay ba ngiyal’ nra chuw e fanenikan ni manemus, fa?