Fare thin nib fel’ ni murung’agen Gil’ilungun Got e yibe machibnag u ga’ngin yang e fayleng ni bod rogon ni yiiynag Jesus. (Matthew 24:14) Fare babyor rok Daniel u Bible e be weliy ngodad nre Gil’ilungun Got nem e aram e am rok Got. Guruy ni 2 ko re ke babyor ney e bay ba yiiy riy ni be weliy murung’agen boch e am ko girdi’ nra ga’ lungun nra chuw reb me yib reb nga lon. Pi am nem e tabab ko am nu Babylon kakrom keb i mada’ ngodad e ngiyal’ ney. Baaray e n’en ni ke yog e verse 44 nra buch boch nga m’on ni be gaar:

“Bayi sunumeg Got nu tharmiy reb e gagiyeg ndariy e rofen nra mus. Ma binem e gagiyeg e dariy be’ nra gel ngay biid, machane bayi thirif u but’ urngin e pi pilung nem nge gagiyeg ni yad be tay me mang fa birok e gagiyeg e i par ndariy n’umngin nap’an.”

Re yiiy ney nge ku boch e yiiy u lan e Bible e be tamilangnag nra yan Gil’ilungun Got nga lon urngin e pi am ko girdi’ me ayuweg e girdi’ nu fayleng ni ngar pared nib fel’ rogon e par rorad ma yad ba yaram. Uw rogon e par u tan e re Am nem? Baaray boch ban’en nrib manigil ni kan micheg ndab ki n’uw nap’an me riyul’.

• RA M’AY E MAHL

  Psalm 46:9: “Be taleg [Got] e pi mahl ni yibe tay u fayleng i yan; be t’ar e gat’ing, ma be kirebnag e sarey, ma be urfiy e pi talin e cham!”

  Am susunnag rogon e par u fayleng ni faan gomanga urngin e salpiy nge salap ni yibe maruwel ngay e ngiyal’ ney ni ngan ngongliy e pi talin e cham ni ngan li’ e girdi’ ngay e yibe fanay nga boch ban’en nra yib angin ko girdi’! Re thin ney ni kan micheg e ra riyul’ u tan Gil’ilungun Got.

• RA CHUW E M’AR

  Isaiah 33:24: “Dariy be’ ni be par u lan e nam rodad ni bay ki yog nib m’ar.”

  Am susunnag rogon e par u ba fayleng ndariy be’ riy ni be yib e m’ar ngak ni bod rogon e m’ar ko gum’ircha’, ara cancer, ara malaria, ara yugu ba mit e m’ar. Faanra aram rogon ma daki t’uf e aspital nge falay. Ra boch nga m’on ma urngin e girdi’ ni yad ra par ni ke fel’ fithik’ i dowrad.

• DABKI LICH E GGAN

  Psalm 72:16: “Me par e nam nib sug ko grain; me sug daken yungi ted ko woldug.”

  Ra yoor e ggan u fayleng nrayog ni ngan gaman riy, maku urngin e girdi’ nrayog ni nge yag e pi ggan nem ngorad. Dakuriy be’ nra i yim’ ko bilig ara m’ar ni mak’iy.

• RA CHUW E AMITH, KIREBAN’, NGE YAM’

  Revelation 21:4: “Bayi n’ag [Got] urngin e lu’ u owcherad. Ma aram e dab ku unim’, ma dab ki i kireban’uy, ma dab ku un yor, ma dab ku un amith. Ya tin kakrom ban’en e ke chuw.”

   Re n’ey e be yip’ fan nra flont e girdi’ mar pared ni manemus u paradis u fayleng! Ireray e n’en ni ke micheg Jehovah Got ni ir e En Ke Sunmiydad ni gad ba t’uf rok.

Ga be lemnag ndabiyog ni nge riyul’ e pi n’ey, fa? Yugu aram rogon ni yooren e girdi’ e yad ra yog ni yad baadag ni nge yag e re yafos ney ni manemus ngorad ni kan micheg ma kan weliy murung’agen u lan e Bible, machane boor fan nib mo’maw’ rok boor e girdi’ ni ngar nanged fan rogon e binem e par. Re n’ey e ban’en ndab ni gin ngay, ya dariy be’ ni ke yag ni nge par ndariy n’umngin nap’an nrayog ni nge yog ngodad rarogon e binem e yafos.

Kari n’uw nap’an ni ke par e girdi’ ni yad e sib ko denen nge yam’, ma yad be par u fithik’ e amith, nge gafgow, nge magawon. Ere boor e girdi’ ni kar mechamgad nga rogon e biney e par ma yad ma lemnag ni ka bang ko yafos rodad. Machane gathi ireray e n’en nib m’agan’ Jehovah Got ngay ni Ir e Ke Sunmiydad.

Baaray e n’en ni ke yog Got u murung’agen e pi n’en ni ma micheg ya nge yag ni ayuwegdad ni ngad nanged nra riyul’ e pi n’en ni ke micheg. Be gaar: ‘Dabiyog ni nge dabi rin’ e tin ni ke m’ay i lemnag rog; ya ra rin’ urngin ban’en ni kug l’og ni nge rin’.’​—Isaiah 55:11.

Be yog e Bible ni Jehovah e ir reb e Got “nder ma ban.” (Titus 1:2) Bochan ni ke micheg urngin e pi n’ey nrib manigil ni fan ngodad boch nga m’on, ma aram fan nib fel’ ni ngad lemnaged e gal deer ni baaray ni be gaar: Rriyul’ nrayog ko girdi’ ni ngar pared ndariy n’umngin nap’an u Paradis u fayleng ni bod rogon ni kan micheg, fa? Mang e thingar da rin’ed me yib angin ngodad e n’en ni ke micheg Got? Bay boch e thin ko tin migid e page ko re ke babyor ney nra pi’ e fulweg ko gal deer ney.