LUZIA E RA I YAN MA BE SRAP NI BOCHAN E BA KIREB E BA’ NI GILAY’ I AY. Nap’an ni kab achig e re ppin ney, me yib ba mit e m’ar ngak ni ka nog e poliomyelitis ngay. Re miti m’ar ney e rib mom ni nge af ma ma kirebnag e nguchey u dowey. Nap’an ni gaman 16 e duw rok Luzia, ma bay reb e ppin ni ma maruwel Luzia rok ni gaar ngak, “Re n’ir ni ke m’ay yilen barba’ i em e be gechignagem Got ni bochan e damur fol ko chitinam ma ga ma togopuluw ngak.” Boch e duw nga tomuren, ma ka dawori pag Luzia talin gelngin e kireban’ ni tay u nap’an ni yog e re ppin nem e pi thin ney ngak.

NAP’AN NI NANG DAMARIS NI KE CANCER E MAN’EY ROK, ma aram me fith e chitamangin ngak ni gaar: “Mang e kam rin’ ni ke buch e biney e pa’ rom? Dabisiy ni bay ban’en nrib kireb ni kam rin’. Aram fan ni ke gechignagem Got.” Ri kireban’ Damaris ko pi thin ney ni yog e chitamangin ngak.

Ke yan bokum biyu’ e duw nib mich u wan’ e girdi’ ni m’ar ni ma yib ngodad e aram e gechig ni be pi’ Got ngodad. Bay ba ken e babyor ni be yog ni boor e girdi’ ni ur moyed u nap’an Kristus nib mich u wan’rad ni “ma m’ar be’ ni bochan e denen ni ke rin’, ara bochan boch e ngongol ni ka i rin’, ma re m’ar nem ni ke yib ngak e aram e gechig ni yibe pi’ ngak ko denen ni ke rin’.” (Manners and Customs of Bible Lands) Ku be yog ba ken e babyor nu nap’an e duw ni 500 nge mada’ ko 1500 C.E., “ma immoy boch e girdi’ nib mich u wan’rad ni ma k’aring Got boch e gafgow ni nge yib ko girdi’ ni bochan e nge gechignagrad ko denen rorad.” (Medieval Medicine and the Plague) Ere nap’an ni yim’ bokum milyon e girdi’ u Europe ko fare miti m’ar ni yib u nap’an e bin 14 e chibog, ma gur, aram e be pufthinnag Got e girdi’ ni kireb? Fa gur, re m’ar nem ni yib e ke sum u ba mit e bayking ni bod rogon ni ke pirieg e piin ni yad ma gay murung’agen boch ban’en ni bay rogon ko m’ar nge tafalay? Ku bay boch e girdi’ nrayog ni ngar lemnaged ko rriyul’ ni ma k’aring Got e m’ar ni nge yib ko girdi’ ni bochan e nge gechignagrad ko denen ni yad be rin’, fa danga’. *

MU LEMNAG E RE N’EY: Faanra riyul’ ni ma k’aring Got e m’ar nge gafgow ni nge yib ko girdi’ ni bochan e nge gechignagrad ko kireb ni yad be rin’, me ere mang fan ni i golnag Jesus ni Fak e piin nib m’ar? Faanra rin’ Jesus ban’en ni aray rogon, ma aram e gathi ra yan i aw ni be togopuluw nga rarogon Got ni ir ba Got nib yal’uw mab mat’aw? (Matthew 4:23, 24) Jesus e dabi togopuluw ko pi n’en ni ma rin’ Got. I gaar: “Gubin ngiyal’ ma gu be rin’ e tin nib m’agan’ ngay” ma “Kug rin’ urngin ban’en ni bod rogon ni ke yog ngog.”​—John 8:29; 14:31.

Ba tamilang e n’en ni be yog e Bible. Jehovah Got e “mmat’aw” urngin e tin ni ma rin’. (Deuteronomy 32:4) Bod ni, dabi k’aring Got reb e sikoki ni nge pil nge yim’ bokum miriay e girdi’ riy ndawor ra bucheged ban’en ni bochan e baadag ni nge gechignag be’ ni bay ko re sikoki nem! Abraham nreb e tapigpig rok Got nib yul’yul’ e yog ni Got e dabi ‘chagiy e piin ndawor ra ngongliyed e kireb ngak e piin ni kar ngongliyed e kireb nge thang e fan rorad.’ Re n’ey e ba puluw nga rarogon Got ni ir ba Got nib mat’aw. I yog ni ‘dabiyog ni nge rin’ ni aram rogon.’ (Genesis 18:23, 25) Ku be yog e Bible ni Got e “der ma rin’ e kireb.”​—Job 34:10-12, BT.

Gafgow ni ma yib ngodad e gathi gechig ni be pi’ Got ngodad ni bochan reb e denen ni kad rin’ed. Rib tamilang e n’en ni yog Jesus u murung’agen e re n’ey u nap’an nra guyed pi gachalpen be’ nib moon nni gargeleg mab malmit. “Me fith pi gachalpen ngak ni lungurad, ‘Tamachib, cha’nem nni gargeleg ma mmalmit e mini’ e puluwon e denen rok e yodoromnag? Denen rok ara denen ko gallabthir rok?’ Me fulweg Jesus ni  gaar, ‘Malmit ni ke ta’ e dariy rogon ko denen rok ara denen rok e gallabthir rok. Ke malmit ya nge yog ni ngan guy gelngin Got ni nge maruwel u fithik’ i downgin.’”​—John 9:1-3.

Bochan ni boor ban’en nde puluw ni un lemnag u murung’agen e gafgow ni ma yib ko girdi’, ma dabisiy ni aram fan ni gin pi gachalpen Jesus u nap’an ni yog ngorad ni malmit ni ke tay e re moon nem e dariy rogon ko denen rok ara denen rok e gallabthir rok. Gathi kemus ni chuweg Jesus e malmit ko fare moon, ya re n’em ni rin’ e ki ayuweg e girdi’ ni ngar nanged e tin riyul’ u murung’agen e biney e machib ni yima yog ni gafgow ni yima tay e gechig ni keb rok Got. (John 9:6, 7) Ere piin ni yad be gafgow e ngiyal’ ney ni bochan boch e m’ar nib ubchiya’ ni keb ngorad e rayog ni nge fel’ lanin’rad u nap’an ni yad ra nang ni gathi Got tapgin e gafgow ni be yib ngorad.

N’en ni be micheg e Bible ngodad

• “Dariy ban’en nib kireb nrayog rok ni nge yan i guy rogon nge waliy Got nge denen, mi Got e der rin’ ngak be’.” (JAMES 1:13) Arrogon, pi n’en nib “kireb” ni be gafgownag e girdi’ u lan e pi chibog ni ke yan keb i mada’ ko ngiyal’ ney, nib muun ngay e m’ar, nge amith, nge yam’, e dabki n’uw nap’an ma goo bayi chuw.

• I golnag Jesus Kristus “urngin e piin ni yad mm’ar.” (MATTHEW 8:16) Bochan ni i golnag Fak Got urngin e piin ni yad ba m’ar ni ur bad ngak, ma aram me dag e n’en nra rin’ Gil’ilungun Got u ga’ngin yang e fayleng boch nga m’on.

• “Bayi n’ag [Got] urngin e lu’ u owcherad. Ma aram e dab ku unim’, ma dab ki i kireban’uy, ma dab ku un yor, ma dab ku un amith. Ya tin kakrom ban’en e ke chuw.”​—REVELATION 21:3-5.

Ere mang fan ni boor ban’en ni be buch ni be k’aring e gafgow nge amith ko girdi’? Ireray reb e deer ni ke yan bokum e chibog ni ma lemnag e girdi’. Ere, faanra gathi Got tapgin e re n’ey, me ere mini’ tapgin? Fulweg ko gal deer ney e yira weliy ko bin migid e article.