Gur, de puluw ni ngaud lemgad ni aray rogon? Danga’, ya be yog e Bible ni ke tay Got e biney e lem nga lanin’dad. (Eklesiastes 3:11, NW) Ku be yog e Bible ni “Got e t’ufeg.” (1 John 4:16) Ere gur, ba puluw ni nge sunmiydad ba Got ni ma t’ufegey ni bay e re lem ney rodad ni gad baadag ni ngad pared ni manemus, ngemu’ me n’igin ndabiyog ni ngad pared ni aram n’umngin nap’an?

Ba tamilang ndariy bagadad ni baadag ni nge yim’. Bin riyul’ riy e be yog e Bible ni yam’ e reb e “toogor” rodad. (1 Korinth 15:26) Bay boch e girdi’ ni yad ma yim’ ni ka yad ba pagel, ma boch e ba n’uw nap’an ni yad ma par mfin nra m’ad, machane bin riyul’ riy e, urngin e girdi’ ni yad ra yim’. Boor e girdi’ ni yad ma rus u nap’an ni yad ra lemnag e re n’ey. Ere gur, bay ba ngiyal’ ni yira gel ko re toogor ney, fa? Ma gur, rayog ni nge buch e re n’ey?

Ga ra gin ni faan ga ra nang nde m’agan’ Got ngay ko som’on ni nga i yim’ e girdi’, fa? Fare babyor ko Bible ni Genesis e be dag e mich riy nib m’agan’ Got ngay ni nge par e girdi’ u fayleng ni manemus. I ngongliy Jehovah Got rogon e re fayleng ney nrayog ni nge par e girdi’ riy. Ngemu’ me sunmiy e bin som’on e pumoon ni aram Adam, me tay nga lan ba paradis ni aram fare milay’ nu Eden. Tomuren e re n’ey, “me par Got nge guy urngin e n’en ni ke ngongliy ma rib fel’ u wan’.”​—Genesis 1:26, 31.

Nni sunmiy Adam ni bod yaan Got mab flont. (Deuteronomy 32:4) Efa ni leengin Adam e ku dariy  thibngin, maku ir be’ nib flont. I gaar Jehovah ngorow: “Mu diyengow nge yoor pi fakmew, nge wer e piin ni owchemew nga gubin yang u fayleng ngar pired riy mi yad suwey. Nggu ta’mew ni gimew e ngam suweyew e nig, nge arche’, nge urngin e gamanman ni maloboch, ni tin ni ba ga’ nge tin ni ba achig.”​—Genesis 1:28.

Ba t’uf ba ngiyal’ nib n’uw nap’an mfini yag ni nge sug pi fak Adam nge Efa u fayleng. Thingari diyen Efa, ngemu’ miki diyen pi fak nge taw ko ngiyal’ ni ke sug e fayleng ko girdi’ ni bod rogon ni lemnag Got. (Isaiah 45:18) Ere gur, ba puluw ni ngad lemnaged nra yog Jehovah ban’en ni aray rogon ngak Adam nge Efa ni faanra kemus ni kan sunmiyrow nrayog ni ngar parew ni yow ba fos ngar guyew pi fakrow nge sana pi tungirow ngemu’ mar m’ow ndab ra nangew e n’en nra buch rorad boch nga m’on, fa?

Kum lemnag fare thin nni tay chilen ngorow ni aram e ngar suweyew urngin mit e gamanman. I yog Got ngak Adam ni nge tunguy fithingan e gamanman, ma re n’ey e ba maruwel nib t’uf ni ngan rin’ nib n’uw nap’an. (Genesis 2:19) Machane faanra thingari suwey Adam e pi gamanman nem, ma aram e be yip’ fan nthingari fil murung’agrad miki nang rogon ni nge ayuwegrad. Re n’ey ni ngan rin’ e kab gel boch e n’uw nap’an riy.

Ere n’en ni yog Got ni aram e ngan suguy e fayleng ko girdi’ min suwey e pi gamanman e be dag ni kan sunmiy e gal nsom’on e girdi’ ni ngar parew nib n’uw nap’an. Bin riyul’ riy e, rib n’uw nap’an ni par Adam nib fos.

Be yog e Bible ni immoy ba ngiyal’ ni i par e girdi’ nib fos nib n’uw nap’an ko ngiyal’ ney. Be gaar: “Me yim’ [Adam] ni ke gaman 930 e duw rok.” Ngemu’ miki yog fithingan nel’ e pumoon nra pared ni yad ba fos nge pag 900 e duw! Pi cha’nem e aram Seth, Enosh, Kenan, Jared, Methuselah, nge Noah. Yad gubin ni ur moyed u m’on ni yib fare Ran nge Tharey e Fayleng u nap’an Noah, me Noah e par nge gaman 600 e duw rok u m’on ni yib e re Ran nem. (Genesis 5:5-27, BT; 7:6; 9:29) Uw rogon ni yag ni nge par e pi girdi’ nem ni yad ba fos ni aram n’umngin nap’an?

Pi pumoon nem e de n’uw nap’an nga tomuren e ngiyal’ ni immoy Adam nge Efa ni ka yow ba flont, ma aram min gargelegrad. Ere dabisiy ni aram fan ni yag ni ngar pared ni aram n’umngin nap’an. Machane faanra ba flont be’, ma uw rogon nra rin’ ban’en nga n’umngin nap’an nra par nib fos? Ma uw rogon ni yira gel ko yam’? Ra ngad nanged e fulweg riy, ma som’on e ba t’uf ni ngad nanged fan ni gad ma pilibthir ngaud m’ad.