YUGU aram rogon ni ke af e denen nge yam’ ngak urngin e girdi’ ni bochan e de fol e gal ga’ rodad ni aram Adam nge Efa, machane de thil e n’en nib m’agan’ Got ngay ni fan ko girdi’. Boor yay ni ke micheg Got ndawori thil e n’en nib m’agan’ ngay u lan e Thin rok ni aram e Bible.

• “Piin ni yad mmat’aw e bay ra pired u daken e binaw u fithik’ e gapas, me par ni taferad ni dariy n’umngin nap’an.”​—Psalm 37:29.

• “Somol ni Th’abi Tolang e bayi kirebnag gelngin e yam’ ni manemus! Bayi faley e lu’ u owchen gubin e girdi’.” ​—Isaiah 25:8, BT.

• “Bin th’abi tomur e toogor ni nge gel ngak e yam’.”​—1 Korinth 15:26.

• “Dab ku unim’, ma dab ki i kireban’uy, ma dab ku un yor, ma dab ku un amith.”​—Revelation 21:4.

Uw rogon nra “kirebnag” Got gelngin e yam’ ni manemus me “gel” ngay? Kad weliyed faram ni be tamilangnag e Bible ni “piin ni yad mmat’aw e bay ra pired . . . ni dariy n’umngin nap’an.” Machane ku be yog ni “dariy be’ u fayleng ni goo tin nib mat’aw e ma ngongliy ni gubin ngiyal’.” (Eklesiastes 7:20, BT) Ere gur, re n’ey e be yip’ fan ndabi fol Got ko pi motochiyel rok u murung’agen e tin nib fel’ nge tin nib kireb ni bochan e nge yag e yafos ni manemus ngak e pi tadenen? Dabiyog ni nge rin’ Got ban’en ni aray rogon! Ku dariy ba ngiyal’ nra rin’ ban’en ni aray rogon ni bochan e ‘Got e der ma ban.’ (Titus 1:2) Ere mang e ra rin’ Got ya nge yag ni lebug e n’en nib m’agan’ ngay u nap’an ni sunmiy e girdi’?

Bochan e t’ufeg rok Jehovah Got ko girdi’ ma aram me pi’ bbiyul ni nge chuweg e girdi’ ko yam’. Biyul e puluwon ban’en ni ngan pi’ nri taareb rogon ko n’en ni kan kirebnag fa ban’en ni ngan pi’ nthingari yan i aw nga rogon e n’en nib mat’aw ni ngan rin’. Bochan ni gubin e girdi’ ni yad bogi tadenen ni ke mudugil ni ngar m’ad, ma aram fan nib tamilang e n’en ni be yog e Bible ni be gaar: “Girdi’ e dabiyog ni nge biyuliy ir ngak Got, dabiyog ni nge pi’ puluwon e pogofan rok ngak Got, ya puluwon e pogofan rok be’ e yugub pag feni tolang. Ya n’en ni nge pi’ ni puluwon ni fan e nge dab ki yim’ . . . e dabi gaman puluwon rok.”​—Psalm 49:7-9.

Nap’an nra yim’ be’ ndawori flont, ma kemus ni yigoo denen rok e ke pi’ puluwon. Machane dabiyog ni nge biyuliy ir fa biyuliy e denen rok yugu be’. (Roma 6:7) Ba t’uf be’ nib flont ndariy e denen rok ni nge pi’ e yafos rok ni gathi bochan e nge biyuliy e denen rok, ya bochan e nge biyuliy e denen rodad.​—Hebrews 10:1-4.

Ireray e n’en ni yarmiy Got ni nge buch. I pi’ Jesus ni Fak u tharmiy nge yib nga fayleng nib girdi’ nib flont. (1 Peter 2:22) I yog Jesus ni ke yib ni nge “pi’ e pogofan rok nge biyuliy e girdi’ ni pire’ ngay.” (Mark 10:45) I yim’ ni fan e nge gel ko yam’ ni toogor rodad me yag e yafos ngodad.​—John 3:16.

Chiney e gad be par ko ngiyal’ ni ke yiiynag e Bible ni aram e ngiyal’ ni kari “mo’maw’ ni ngan par nrogon e tin riyul’ ni girdien Kristus.” Re n’ey e be micheg ni gad be par ko “tin tomren e rran” ko re m’ag nib kireb ney. (2 Timothy 3:1) Ra mus e tin tomuren e rran ko “chirofen ni bay ni pufthinnag e girdi’ nib kireb nge mu’ min kirebnagrad.” (2 Peter 3:3, 7) Machane piin nib t’uf Got rorad e yad ra magey ni yad ba fos u tomuren e re magothgoth nem min tow’athnagrad ko “yafos ndariy n’umngin nap’an.”​—Matthew 25:46.

Bokum milyon e girdi’ e ku ra mab e kanawo’ ni nge yag e yafos ndariy n’umngin nap’an ngorad u  nap’an ni yira fasegrad ko yam’. I faseg Jesus be’ ko yam’ u nap’an ni yan ko fare mach nu Nain. Immoy be’ nib pin u rom ni ke yim’ figirngin ni ke yim’ e taare pagel ni fak, me faseg Jesus e re pagel nem ni bochan e ke “taganan’ ngak” fare pin. (Luke 7:11-15) Ki gaar apostal Paul: “Taareb rogon e l’agan’ ni gu be tay ngak Got . . . ni aram e . . . bayi faseg urngin e girdi’ ko yam’, ni tin nib fel’ nge tin nib kireb.” Re athap ney nrib mudugil e be m’ug riy rogon e t’ufeg rok Got ko girdi’.​—Acts 24:15.

Bokum bilyon e girdi’ nrayog ni ngar athapeged e yafos ni manemus boch nga m’on. Be gaar e Bible: “Piin ni yad mmat’aw e bay ra pired u daken e binaw u fithik’ e gapas, me par ni taferad ni dariy n’umngin nap’an.” (Psalm 37:29) Ra taw ko ngiyal’ nem ma yad ra guy ni ke riyul’ fapi thin nra fal’eg lanin’uy ni yoloy apostal Paul ni ke yan sogonap’an 2,000 e duw ni faani gaar: “Yam’, ba uw e gel ni kam tay? Yam’, ke yan gelngim ngan ni ga ma amithnigey ngay?” (1 Korinth 15:55) Ra taw ko ngiyal’ nem ma kan gel ko yam’ ni aram e bin th’abi ga’ e toogor ko girdi’!