Mang Fan ni Gad Ma Pilibthir Ngaud M’ad?
DE M’AGAN’ Got ngay ni nga i yim’ e girdi’. Gal ga’ rodad ni Adam nge Efa e nni sunmiyrow ni yow ba flont. Ere rayog ni ngar parew ni yow ba fos nge mada’ ko chiney. Ba tamilang e re n’ey ko n’en ni yog Jehovah ngak Adam u murung’agen ba ke gek’iy ni immoy ko fare milay’ nu Eden.
I gaar Got ngak Adam: “Rofen ni ga ra kay [wom’engin fare ke gek’iy] e ga ra yim’.” (Genesis 2:17) Faanra ke sunmiy Got Adam ni bay ba ngiyal’ nra taw ngay me pilibthir nge yim’, me ere dariy rogon ni nge pi’ e biney e motochiyel. Manang Adam ni faanra dabi kay wom’engin e re ke gek’iy nem, ma dabi yim’.
DE M’AGAN’ GOT NGAY NI NGA I YIM’ E GIRDI’
De t’uf ni nge kay Adam nge Efa wom’engin e re ke gek’iy nem ya nge yag nra parew ni yow ba fos, ya boor mit e woldug ko gi milay’ nem nrayog ni ngar kew wom’engin. (Genesis 2:9) Faan gomanga de kay e gal nsom’on e girdi’ wom’engin e re ke gek’iy nem, ma aram e ra m’ug riy ni yow be fol rok e En ke pi’ e yafos ngorow. Ku ra m’ug riy ni yow manang ni Got e ir e bay mat’awun ni nge gagiyegnag e tin ni ngar rin’ew.
FAN NI YIM’ ADAM NGE EFA
Ra ngad nanged fan ni yim’ Adam nge Efa, ma aram e ba t’uf ni ngad weliyed rogon e numon ni yan u thilin e piin ni ur moyed e ngiyal’ nem ni ir e ke par wenegan ke mada’ ngodad e ngiyal’ ney. I yog Satan ni Moonyan’ boch e thin u l’ugun ba porchoyog nrib gel e kireb riy ma de riyul’. Be gaar e Bible: “Ma porchoyog e ir e th’abi llowan’ ko sabanban u fithik’ e gamanman ni Somol ni Got e ke sunumeg. Me fith fare porchoyog ngak fare pin ni gaar, ‘Rriyul’ ni yog Got ngomew ni dab mu koyew wom’engin urngin e gek’iy ni ba’ ko gi woldug ney?’”—Genesis 3:1.
Me fulweg Efa ni gaar: “Demturug e re ke gek’iy ni ba’ ko gi woldug ney ma ra gu wew wom’engin, ma ke mus ni fare ke gek’iy ni bay u lulukngun e re gi woldug ney e dab gu wew wom’engin. I gaar Got e dab gu wew wom’engin e re ke gek’iy nem, ara gu mathgow ngay; ya faan gamow ra rin’, ma gamow ra yim’.” Me gaar fare porchoyog ngak Efa: “De riyul’ e re bugithin nir; ya gathi gimew ra yim’. I yog Got e re bugithin nir ya manang ni gimew ra kay mi gimew bod Got, me tamilangan’mew ngam nangew e n’en nib fel’ nge n’en nib kireb ni bod ir.” Ere ke yog Satan ni Jehovah e ba malulfith l’igin ma bay ban’en nib manigil ni be tel rok Adam nge Efa.—Genesis 3:2-5.
I mich u wan’ Efa e n’en ni rung’ag. I yaliy fare ke gek’iy ma rib fel’ yaan wom’engin! Ere t’ar boch nge kay. Be gaar e Bible: “Ma aram me pi’ boch ngak e pumoon rok me ki kay.”—Genesis 3:6.
I gaar Got ngak Adam: “Rofen ni ga ra kay e ga ra yim’.”—GENESIS 2:17
Dariy e maruwar riy nri kireban’ Jehovah Got u nap’an ni guy gal fak nri yow ba t’uf rok ndar folgow rok ni lem rorow! Ere mang e rin’? I gaar ngak Adam: “[Ga ra] sul . . . ko but’ ni ir e ni ngongliyem ngay. Ni ngongliyem ko but’, ere bay kum ngal’ ni but’ bayay.” (Genesis 3:17-19) Bochan e re n’ey, ma aram fan ni “yim’ [Adam] ni ke gaman 930 e duw rok.” (Genesis 5:5, BT) Nap’an ni yim’ Adam me de yan nga tharmiy ara yan ko giyow ko kan. U m’on ni nge sunmiy Jehovah Adam ko but’ ma da immoy u bang nib fos. Ere nap’an ni yim’, ma aram e dakuriy e yafos rok me sul downgin ngki ngal’ ni but’ bayay. Daki moy Adam. Rib gel e kireban’ riy!
FAN NDAD FLONTGAD
Bochan nde fol Adam nge Efa ni lem rorow, ma aram e da kur parew ni yow ba flont miki mul e athap ko yafos ni manemus u pa’row. I thil rarogon fithik’ i dowrow, ma da kur parew ni yow ba flont mar mangew tadenen. Machane, gathi kemus ni yigoo yow e yib wenegan e re n’ey ngorow, ya ki af e denen rorow ngak pi fakrow ni gubin. Be gaar e Roma 5:12: “Denen e yib nga fayleng u daken taabe’ [ni aram Adam], ma denen ni ngongliy e fek e yam’ i yib. Wenegan ni yib e af e yam’ ngak urngin e girdi’ nu fayleng, ni bochan e urngin e girdi’ ni ngongliy e denen.”
Be yog e Bible ni denen nge yam’ e “bod e manileng ni ke gapopow nga daken gubin e nam.” (Isaiah 25:7, BT) Re n’ey e bod rogon ban’en ni bay e yub riy ni ke wer nga fithik’ e nifeng ndabiyog ni ngan mil riy. Ere riyul’ ni “ma yim’ urngin e girdi’ ni bochan e yad taab girdi’ Adam.” (1 Korinth 15:22) Bochan e re n’ey, ma aram fan ni ke sum fare deer ni fith apostal Paul ni gaar: “Mini’ e ra chuwegeg u pa’ e re dowef ney ni ir e be fekeg i yan ko yam’?” Gur, bay be’ nrayog ni nge rin’ e re n’ey?—Roma 7:24.