MU SUSUNNAG ni ga be yaliy ba video ni yaan be’ nib pin nib cheg ko musik mab gilbuguwan nri ga baadag e musik rok. Som’on e ni pag yaan ni kab bitir u nap’an ni be fil rogon i chubeg ba mit e talin e musik nge rogon ni i fil ni boor yay ya nge yag ni salap riy. Ngemu’ min pag yaan ni be musik u boch e nam nib thilthil nge rogon ni gilbuguwan u ga’ngin yang e fayleng. Mu tungun fare video e ni pag yaan riy ni ke pilibthir, me tomur riy me yim’.

Re video ney e ban’en nib riyul’ ni murung’agen be’ ni ke yim’. Machane demtrug ko re n’ey e murung’agen be’ nib salap ko musik, ara be’ nib llowan’, ara be’ nib salap u ba mit e gosgos, ara yugu be’ nib gilbuguwan, machane taab n’en e ra buch rorad. Sana boor ban’en ni ke yag rok facha’ ni nge rin’, machane kum lemnag urngin ban’en nrayog ni nge rin’ ni faan gomanga de pilibthir nge yim’.

Gad ra lemnag e re n’ey, ma sana ra k’aring e kireban’ ngodad. Machane ireray e n’en nra buch rodad. (Eklesiastes 9:5) Demtrug urngin ban’en ni gad be guy rogon ni ngad rin’ed, machane ka gad be pilibthir ma ka gad be yim’. Gathi kemus aray, ya ku rayog ni ngad m’ad nib tomgin ni bochan e m’ar ara kad maad’adgad nib gel ma gad yim’. Be yog e Bible ni taareb rogodad nga boch yang i ath ni sum ko garbeb ni kakadbul “ni yib i m’ug ma de n’uw nap’an me m’ay nga bayang.”​—James 4:14.

Bochan ndemtrug e ngiyal’ nrayog ni ngad m’ad, ma aram fan ni bay fare lem ko girdi’ ni ma tay e piin ma lungurad, “mmarod nguud abichgad ma gadad be garbod, ya bayi gabul ma kad m’ad.” (1 Korinth 15:32) Machane, fan ni ma par e girdi’ ni aray rogon e bochan ni yad manang ndemtrug e ngiyal’ nrayog ni ngar m’ad, maku dariy e athap rorad ni fan ko gabul nge langlath. Yugu aram rogon, ma bay ba ngiyal’ nra taw ngay, nib ga’ nu nap’an ni be mada’nag be’ reb e magawon nrib mo’maw’, ma ra lemnag fare deer ni be gaar, ‘Kemus chi rogon e yafos aray, fa?’ Ere uw e rayog ni ngam pirieg e fulweg riy?

Boor e girdi’ e ngiyal’ ney ni yad be athapeg ni nge pirieg e piin llowan’ e fulweg ko re deer ney. Bochan ni ke mon’og e tafalay nge llowan’ ko girdi’, ma aram fan ni ke yag ni ngan pirieg boch ban’en ni nge n’uwnag boch nap’an e yafos ko girdi’. Ku bay boch e girdi’ ni llowan’ ni yad be guy rogon ni ngar rin’ed boch ban’en ni nge n’uwnag nap’an e yafos ko girdi’. Demtrug ko be yib angin e pi n’ey fa danga’, machane ka dawori yag ni ngan pirieg e fulweg ko fa gal deer ni be gaar: Mang fan ni gad ma pilibthir ngaud m’ad? Gur, bay e athap rodad ni ngad gelgad ko yam’ ni aram reb e toogor rodad, fa? Tin migid e article e gad ra weliy e pi n’ey riy nge fulweg ko fare deer ni be gaar, Kemus chi rogon e yafos aray, fa?