Dabiyog ni ngad pared u fayleng ndariy ramaen e yal’. Yal’ e aram e n’en ma ayuweg e gek’iy ni nge yib yuwan, nge floras riy, nge wom’engin, nge awoch riy. Ku aram e n’en ma ayuweg e gek’iy ni nge fek e ran u fithik’ e but’ nge yan nga lik’ngin, nge yuwan, me yan nga fithik’ e nifeng ni ke ngal’ ni aybeb.

N’uw e aram reb e tow’ath nrib manigil ni ke yib rok Got, ma ir e ma ayuweg e pi woldug u fayleng ni nge pi’ e ggan ni ngad ked. Got e ir e ma pi’ e n’uw nge galwog u ngal’an, ma ir e ma pi’ e ggan ngodad ma ma fal’eg lanin’dad.

Boor e matam ni ma magafan’rad u rogon ni ngar yognaged e ggan nge mad nib gaman ni fan ngak girdien e tabinaw rorad. Am tay fanam i yan ko n’en be yog e Babyor nib Thothup ni be gaar: “A mu guyed e arche’ ni yad be chachangeg: darir yunged awochngin e woldug, fa ra kunuyed e woldug ni ke el ngar tiyed nga naun; ma Chitamangimed nu tharmiy e be ayuwegrad! Gathi ka ba ga’ famed ngak e arche’?”​—Matthew 6:25, 26.

“A mu guyed nga rogon ni be tugul e floras u fithik’ e pan . . . : Machane nggog ngomed, ni mus ngak Solomon [ni Pilung], ni aram feni yoor ban’en rok, ma da immoy e mad rok ni bod feni fel’ yaan reb e pi floras nem. I Got e ir e be pi’ e mad ko pan. . . . Ere gathi mmudugil nra pi’ Got e mad ngomed?”​—Matthew 6:28-30.

Faanra rayog rok Got ni nge pi’ e ggan ni ngad ked nge mad ni nga don’ed, me ere ba mudugil ni ku rayog rok ni nge pi’ e tin nib t’uf ko par rodad. Faan gad ra nameg ni ngad rin’ed e n’en nib m’agan’ Got ngay, ma rayog ni nge tow’athnagdad u nap’an ni gad ra yung boch e woldug ni nge pi’ e ggan ngodad ara ayuwegdad ni ngad pirieged e maruwel nra yag e salpiy riy ngodad ni ngad feked e tin nib t’uf rodad.​—Matthew 6:32, 33.

Ere nap’an ni gad ra lemnag rogon e yal’, nge n’uw, nge pi arche’, nge floras, ma riyul’ ni bay tapgin ni nge t’uf Got rodad. Bin migid e article e be weliy rogon ni i non e En Ke Sunmiydad ko girdi’.