Mang e Ra Ayuwegdad ni Nge Fel’ e Par Rodad Boch Nga M’on?
Kad filed ko fapi article ni ke yan ni bay e girdi’ ni yad ma guy rogon ni nge fel’ e par rorad boch nga m’on ni aram e ma pagan’rad nga boch ban’en ndabin guy ni be gagiyegnag e n’en nra buch rorad boch nga m’on, nge skul, nge flaab, maku yad ma guy rogon ni nge fel’ e ngongol rorad. Machane faanra ga be fanay e pi n’ey ni ngam guy rogon ni nge fel’ e par rom boch nga m’on, ma bod ni ga be fanay bangi map nib kireb ni nge pow’iyem nga bang ndawor mu un ngay bayay. Ere gur, re n’ey e be yip’ fan ndariy ban’en nrayog ni nge ayuwegdad ni nge fel’ e par rodad boch nga m’on? Danga’!
BAY BAN’EN NI KAB GEL BOCH E FEL’ RIY NRAYOG NI NGE POW’IYDAD
Ra nap’an ni ngad dugliyed boch ban’en, mab ga’ ni gad ma fith laniyan’ be’ nib ilal ngodad ma kab ga’ e gonop rok. Ere ku arrogon ni bay Be’ ni kab gel e ilal rok ngodad ma kab ga’ e gonop rok nrayog ni nge pi’ e fonow ngodad nrayog ni nge pagan’dad ngay u rogon ni nge fel’ e par rodad boch nga m’on. Rayog ni ngad pirieged e fonow rok u lan ba ke babyor nni tabab i yoloy ni ke pag sogonap’an 3,500 e duw ni ke yan. Re ke babyor nem e aram e Bible.
Mang fan nrayog ni nge pagan’um ko Bible? Bochan ni ke yib rok e En th’abi gonop u ga’ngin e palpalth’ib. Be yog e Bible ni ir “faanem ni kab kakrom i yib ni immoy” nde ‘sum ma dariy e rofen nra mus.’ (Daniel 7:9; Psalm 90:2) Ir e “sunumiy lan e lang, i ir e en ni ir e Got! I ir e sunumeg e fayleng.” (Isaiah 45:18) Ke yog ngodad ni fithingan e Jehovah.—Psalm 83:18.
Der yog e Bible ni bay reb e yalen ara ba ulung e girdi’ ni kab fel’ nga yugu reb ni bochan ni Bible e ke yib rok e en ni sunmiy urngin e girdi’. Fonow riy e gubin ngiyal’ ni ma yib angin ngak e girdi’ u gubin e nam. Dariy ba ken e babyor ni bod e re ke babyor ney ni bochan e boor e thin ni kan pilyeg ngay maku boor e girdi’ ni bay rorad. * Ere urngin e girdi’ nrayog ni ngar beeged miki pow’iyrad. Ba puluw e re n’ey ko n’en be yog e Bible ni be gaar:
“Gubin e girdi’ ma taareb rogorad u wan’ Got. En ni ba’ madgun Got u wan’ ma be rin’ e tin nib mat’aw e ra i par nib fel’ u wan’ Got ndemturug ko be’ u kun nam.”—ACTS 10:34, 35.
Jehovah Got ni Chitamangidad ni gad ba t’uf rok e baadag ni nge ayuwegdad u daken e Thin rok ni aram e Bible ni bod e piin gallabthir nib t’uf pi fakrad rorad ma yad baadag ni ngar ayuweged yad. (2 Timothy 3:16) Rayog ni nge pagan’um ko Thin rok ni bochan e ir e ke sunmiydad ma manang e n’en nra yibnag e felfelan’ ngodad.
Mang e ba t’uf ni ngam rin’ ya nge yag ni fel’ e par rom boch nga m’on? Mu guy e bin migid e article.
^ par. 6 Ra ga baadag ni ngkum nang boch ban’en u rogon ni yibe pilyeg e Bible nge rogon ni yibe wereg, mag yan ko www.pr418.com mag yaliy e BIBLE TEACHINGS > HISTORY & THE BIBLE.
^ par. 16 Ra ga baadag ni ngkum nang boch ban’en u murung’agen e re n’ey, mag guy e guruy ni 2 ko fare ke babyor ni Mang e Ri Be Fil e Bible? ko par. 13-17 ni ke ngongliy e Pi Mich Rok Jehovah. Ku bay u online ko www.pr418.com/yap. Mman ko GIN BAY BOCH BAN’EN RIY > YU KEN E BABYOR NGE BROCHURE.
You May Also Like
FARE WULYANG KO DAMIT
Tin Riyul’ u Murung’agen e Par Boch Nga M’on
Mu guy rogon ni ngari l’agan’um ko tin ke yog Got u murung’agen rarogon e fayleng boch nga m’on nge piin yad ra par riy.
FARE WULYANG KO DAMIT
Ba Puluw e Pi Fonow nu Bible Ngodad e Ngiyal’ Ney, Fa?
Mang fan ni ngad paged ba ke babyor ni kan yoloy ni ke chugur i gaman 2000 e duw ni nge pow’iydad ni faanra ke yoor boch ban’en nib beech ni kan ngongliy ni kab fel’ ko pi n’en ni immoy kafram?
FARE WULYANG KO DAMIT
Ra Ayuwegem e Bible ni Nge L’agan’um ko Pi N’en ni Bay Nga M’on
Rayog ni nge ayuwegdad e Thin rok Got ni ngad pithiged boch e magawon ni gad ma mada’nag u lan e re fayleng ney u reb e rran ngu reb. Machane, gathi kemus e n’en nrayog ni nge rin’ e Bible, ya ku rayog ni nge ayuwegdad ni ngad nanged e pi n’en ni bay nga m’on.
