TIN riyul’ u murung’agen e mang? Tin riyul’ u boch e deer nib ga’ fan ni ma fith e girdi’. Sana ka am lemnag boch e deer ni bod e pi deer ni baaray:

• Ma lemnagdad Got, fa?

• Ra m’ay e mahl nge gafgow, fa?

• Mang e ma buch rodad u nap’an kad m’ad?

• Bay e athap ko piin kar m’ad, fa?

• Uw rogon ni nggu meybil me rung’ag Got?

• Uw rogon ni nggu pirieg e bin nriyul’ e felfelan’ ko yafas?

Uw e ngam yaliy e fulweg ko pi deer ney riy? Ga ra yan ko yungi n’en ni tafen e babyor ara yungi n’en ni yima pi’ e babyor riy nchuway’, ma sana ga ra pirieg bokum miriay e babyor ni be yog nrayog ni nge pi’ e fulweg ko pi deer ney. Machane, ba ga’ nra reb e pi babyor ney mab togopuluw e thin riy nga reb. Boch e ba puluw nga reb e tayim machane ra n’uw boch nap’an ma ke t’uf ni ngan thilyeg boch e thin riy ara ngan tay boch e babyor nib beech nga lon.

Machane, bay reb e babyor ni bay e fulweg riy nrayog i pagan’uy ngay. Re babyor ney e bay e thin nriyul’ riy. I yog Jesus Kristus ko meybil rok ngak Got ni gaar: “Thin rom e ba riyul’.” (John 17:17, NW) Ngiyal’ ney e gad manang nre Thin nem e aram fare Bible nib Thothup. Tin ni ka bay e page nga m’on ko re babyor ney, e ra ayuwegem ngam guy e fulweg nib tamilang mab riyul’ ni be pi’ e Bible ko fapi deer er nga lang.

FAN NI KE SUM E RE DEER NEY: Gad be par u lan ba fayleng ni ke sug ko kireb nge ngongol nde mat’aw. Boor yurba’ e teliw ni yad ma machibnag nib m’agan’ Got ko gafgow ni ma yib ngodad.

N’EN NI BE FIL E BIBLE: Got e dar ma k’aring e tin nib kireb ban’en. Job 34:10 (NW), e be gaar: “Rib palog ko bin nriyul’ e Got ni nge rin’ e kireb, nge En ni Gubin ma Rayog Rok ni nge rin’ e tin nde mat’aw!” Bay e n’en nib m’agan’ Got ngay ni fan ko girdi’. Arfan ni fil Jesus ngodad ni ngad meybilgad ni nge lungudad: “Chitamangimad ni ga bay u tharmiy, nge . . . yib gil’ilungun ngomad. Min rin’ e tin nib m’agan’um ngay u fayleng, ni bod rogon, u tharmiy.” (Matthew 6:9, 10, NW) Bochan e rib ga’ fadad u wan’ Got ma ke rin’ boor ban’en ni fan e nge mudugil nra lebguy e n’en nib m’agan’ ngay.​—John 3:16.

Kum guy e Genesis 1:26-28; James 1:13; nge 1 Peter 5:6, 7.

FAN NI KE SUM E RE DEER NEY: Ka be ulul i yim’ bokum e girdi’ ni bochan e mahl. Gad gubin ni ke rin’ e gafgow ban’en ko lem rodad.

N’EN NI BE FIL E BIBLE: Ke yog Got nra taw nga ba ngiyal’ ma ra yib e gapas nga ga’ngin e fayleng. Girdi’ e “dab kur fal’eged rogorad bayay ni fan ko mahl” u tan Gil’ilungun Got, ni aram ba am u tharmiy. Ya, bay ra “pirdiiyed e pi sayden rorad ngar ngongliyed talin e maruwel riy ni ma gi’ e but’.” (Isaiah 2:4) Ra chuweg Got e ngongol nde mat’aw nge gafgow. Be micheg e Bible ni gaar: “Bayi n’ag [Got] urngin e lu’ u owcherad. Ma aram e dab ku unim’, ma dab ki i kireban’uy, ma dab ku un yor, ma dab ku un amith. Ya tin kakrom ban’en [nib muun ngay e ngongol nde mat’aw nge gafgow] e ke chuw.”​—Revelation 21:3, 4.

Kum guy e Psalm 37:10, 11; 46:9; nge Mikah 4:1-4.

FAN NI KE SUM E RE DEER NEY: Yooren e teliw nu fayleng e yad ma machibnag ni ka bay ban’en ni ma magey nib fos u fithik’ be’ u tomren ni ke yim’. Boch e girdi’ e ke mich u wan’rad nrayog ni nge gafgownag e yam’ e girdi’ ara ma gechignag Got e piin nib kireb ni aram e ma pi’rad nga tafen e gafgow u fithik’ e nifiy mi yad par u rom ndariy n’umngin nap’an.

N’EN NI BE FIL E BIBLE: Ra yim’ be’ ma dakuriy e yafas rok. Be yog ko Eklesiastes 9:5 (NW) ni: “Piin ni kar m’ad . . . e dariy e chi n’en ni yad manang.” Bochan ndabiyog ni nge nang e piin ni ke yim’ ban’en, ara ra thamiyed ban’en, ara rin’ed ban’en, ma dabiyog ni ngar gafgowniged​—ara ra ayuweged—​e piin nib fos.​—Psalm 146:3, 4.

Kum guy e Genesis 3:19 nge Eklesiastes 9:6, 10.

FAN NI KE SUM E RE DEER NEY: Gad baadag ni ngad pired nib fos, maku gad baadag ni ngad felfelan’gad ko yafas u taabang ko piin nib t’uf rodad. Ba puluw ni ngad m’ad ni bochan ni ngad guyed bayay e piin nib t’uf rodad ni kar m’ad.

N’EN NI BE FIL E BIBLE: Yooren e piin ni kar m’ad e yira fasegrad ko yam’. Ke micheg Jesus ni ‘gubin e yam’ ni bay u lan e low e bay ra . . . bad u lan e low rorad nga wuru’.’ (John 5:28, 29) Rogon nib puluw ko n’en nib m’agan’ Got ngay e piin ni yira fasegrad ko yam’ e yad ra par u paradis u fayleng. (Luke 23:43) Re n’ey ni kan micheg ni fan boch nga m’on e ba muun ngay e dowef ni ke fel’ rogon nge yafas ni manemus ni fan ngak e piin nib yul’yul’. Be gaar e Bible: “Piin ni yad mmat’aw e bay ra tafanayed e fayleng, me par ni taferad ni dariy n’umngin nap’an.”​—Psalm 37:29, NW.

Kum guy e Job 14:14, 15; Luke 7:11-17; nge Acts 24:15.

FAN NI KE SUM E RE DEER NEY: Ba dake gubin raba’ e teliw ni ma meybil e girdi’ riy. Machane, boor i yad e ma lemnag ndanir fulweg taban e meybil rorad.

N’EN NI BE FIL E BIBLE: Ke fil Jesus ngodad ndab ud sulod u daken ta’ ban’en ko meybil rodad. I gaar: “Faanra mmeybilgad ma dab um sulod u daken taab bugithin ni pire’ yay.” (Matthew 6:7) Faanra gad baadag ni nge motoyil Got ko meybil rodad, ma thingar da meybilgad u rogon nib m’agan’ ngay. Ra ngad rin’ed ni aram rogon, mab t’uf ni ngad nanged e n’en nib m’agan’ Got ngay ma gad meybil u rogon nib puluw ngay. Bin Taareb e John 5:14 e be gaar: “Mmudugil u wan’dad nra rung’ag [Got] e tin gadad be yog ni faan gadad ra ning ban’en ngak ni ban’en nib m’agan’ ngay.”

Kum guy e Psalm 65:2; John 14:6, 14; nge 1 John 3:22.

FAN NI KE SUM E RE DEER NEY: Boor e girdi’ nib mich u wan’rad ni salpiy, nge gilbuguwan, ara rogon yaarad e ra yibnag e felfelan’ ngorad. Ere, yad ma yognag e pi n’ey​—me ni aw ndakuriy e felfelan’ rorad.

N’EN NI BE FIL E BIBLE: I dag Jesus kanawoen e bin nriyul’ e felfelan’ u nap’an ni gaar: “Nge felan’ e piin nri yad ma lemnag e tin nib t’uf rorad ko tirok Got ban’en.” (Matthew 5:3, NW) Rayog ni ngad pirieged e bin nriyul’ e felfelan’ ni faan gadra rin’ boch ban’en ni fan e ngad yognaged e tin nrib t’uf rodad​—nn’en ni gad be yim’ ni bochan ni aram e ngad nanged e tin nriyul’ u murung’agen Got nge n’en nib m’agan’ ngay ni fan ngodad. Ma re n’em e yira pirieg u lan e Bible. Faan gadra nang e tin nriyul’ ma ra ayuwegdad ni ngad nanged e n’en nib ga’ fan nge n’en nde ga’ fan. Gadra pag e thin nriyul’ nu Bible nge pow’iy e tin ni gad be mel’eg ban’en nge rogon e ngongol rodad ma rayog ni yibnag fan e yafas rodad.​—Luke 11:28.

Kum guy e Proverbs 3:5, 6, 13-18 nge 1 Timothy 6:9, 10.

 Pi n’ey e kemus ni be weliy e fulweg ko Bible u nel’ e deer. Ga baadag ni ngkum nang boch? Faanra gur bagayad e piin “nri yad ma lemnag e tin nib t’uf rorad ko tirok Got ban’en,” ma dabisiy ni arrogon. Sana ga be lemnag e pi deer ni baaray, ni gaar: ‘Faanra ma lemnagdad Got, ma mang fan ni ke pag e kireb nge gafgow ni ka nap’an ni sum e girdi’ keb i mada’ ko chiney? Uw rogon ni nggu fal’eg rogon e yafas ko tabinaw rog?’ Bible e be pi’ e fulweg ko pi deer ney nge ku boch e deer nra fal’eg lanin’uy.

Machane, boor e girdi’ e ngiyal’ ney ni be maruwaran’rad ni ngar sapgad nga Bible. Ya yad ma sap ngay ni ba ke babyor nib ga’ mab mo’maw’ ni ngan nang fan. Ga baadag ni ngan ayuwegem ngam nang e fulweg ko pi deer ney ko Bible? Pi Mich Rok Jehovah e yad be pi’ l’agruw e talin e maruwel nrayog ni nge ayuwegem.

Som’on, e fare babyor ni Mang e Ba T’uf ni Ngad Rin’ed ku Got? e kan ngongliy ni nge ayuweg e girdi’ ni boor pa’ u puluwrad ngar fal’eged i yaliy e fulweg nib tamilang ko pi deer ney nib ga’ fan u lan e Bible. Ma bin migid e talin e maruwel e aram e fol Bible u tabinaw ndariy puluwon. Reb e Pi Mich Rok Jehovah ni ma par nib chugur ko gin ni ga ma par riy nib bung rogon ni nge fil e Bible ko girdi’ e rayog ni ngeb nga tabinaw rom ara gin ni ga baadag u gubin e wik ngam weliyew murung’agen e Bible, ndariy puluwon. Bokum milyon e girdi’ u ga’ngin e fayleng ni keb angin e re n’ey ngorad. Boor i yad e kar gaargad: “Kug pirieg e tin nriyul’!”

Dariy ba machaf ni yira pirieg ntaareb rogon ko biney. Thin nriyul’ ko Bible e ra ayuwegdad ko superstition, yoor laniyan’, nge marus. Ra yibnag e athap nge felfelan’ nge fan e yafas rodad. I gaar Jesus: “Ma bay mu nanged e tin riyul’, ma tin riyul’ e ir e bayi ayuwegmed nge dab kum pired ni gimed e sib.”​—John 8:32.