1-3. Mang toogor e be l’ol’ogdad? Mang fan nra fel’ lanin’dad ni faan gad ra nang e n’en ni be yog e Bible?

AYGUM lemnag ni susun e ga be mil rok be’ ni toogor rom nrib kireb. Ba gel ngom mab papey ngom. Ga manang ndabi runguyem ya kam guy ni ke li’ boch e pi tafager rom kar m’ad. Yugu aram rogon ni ga be athamgil ni ngam palog rok ma ka be chugur i yib ngom. Ke dake dakuriy e n’en ni ngam rin’, machane faan yugum sap ma bay be’ u toobem ni nge ayuwegem. Ba gel e cha’nem ko fare toogor rom, me micheg ngom nra ayuwegem. Rib mudugil nra pagan’um!

² Ga ra lemnag ma rriyul’ ni gad gubin ni bay e toogor rodad ni be l’ol’ogdad. Kad filed ko fa binem e guruy ni be yog e Bible nre toogor nem e yam’. Dariy bagadad nrayog ni nge mil ko yam’ fa pilo’ riy. Boor i gadad e ke guy e re toogor ney ni ke thang e fan rok boch e girdi’ nib t’uf rodad. Machane, Jehovah e kab gel gelngin ko yam’. Ir fare Taayuw ni gad ba t’uf rok ni ke dag nrayog rok ni nge gel ko re toogor nem. Ke  micheg nra chuweg e re toogor nem ni manemus, ni aram e yam’. Be gaar e Bible: “Bin th’abi tomur e toogor ni nge gel ngak e yam’.” (1 Korinth 15:26) Rib fel’ e re thin ney!

³ Som’on e ngad guyed e n’en ni ma rin’ e re toogor nem nga lanin’dad u nap’an nra yim’ be’ nib t’uf rodad. Re n’em e ra ayuwegdad ni ngad nanged fan ban’en nra felfelan’nagdad ni aram e ke micheg Jehovah nra fas e yam’ bayay. (Isaiah 26:19) Ere, piin ni kar m’ad e bay e athap rorad ko fas ko yam’.

4. (a) Mang fan ni gad ra nang rarogon laniyan’ Jehovah ko kireban’ ni tay Jesus u nap’an ni yim’ be’ nib t’uf rok? (b) Chon mini’ e ba fel’ e thin rorad Jesus?

⁴ Bay be’ nib t’uf rom ni ke yim’? Yu ngiyal’ e gad ma lemnag ndabkiyog ni ngad athamgilgad u fithik’ e kireban’. Ra aram rogon lanin’dad ma rib t’uf ni ngad beeged e Bible ya ra baudnag lanin’dad. (Mu beeg e 2 Korinth 1:3, 4.) Ma ayuwegdad e Bible ni ngad nanged rarogon e yam’ u wan’ Jehovah nge Jesus. Gubin ngiyal’ ni i m’ug rarogon e Chitamangin Jesus ko ngongol rok ya bay reb e thin nu Bible ni be weliy gelngin e kireban’ ni tay Jesus u nap’an ni yim’ be’ nib t’uf rok. (John 14:9) Nap’an nra yan Jesus nga Jerusalem, ma ma yan i guy Lazarus nge fagali ppin ni walagen ni Maria nge Martha ni yad ma par u Bethany. Rib fel’ e thin rorad Jesus ya be yog e Bible ni: “Jesus e rib t’uf Martha rok, nge Maria ni walagen Martha, nge Lazarus.” (John 11:5) Machane, kad filed ko fa binem e guruy ni ke yim’ Lazarus.

5, 6. (a) Mang e rin’ Jesus u nap’an ni guy e girdi’ rok Lazarus ni yad be yor? (b) Faan gad ra lemnag e kireban’ ni tay Jesus, ma uw rogon nra pi’ e athamgil nga lanin’dad?

 ⁵ Mang e rin’ Jesus u nap’an ni yim’ e fager rok? Be yog e Bible ni un Jesus ngak girdien Lazarus nge pi fager rok ko kireban’ nib gel ni kar ted. Ya guyrad Jesus “me ri taganan’.” Ku be yog e Bible ni, “yor Jesus.” (John 11:33, 35) Gur, meyor ni tay Jesus e be dag ni dakuriy ban’en ni be athapeg? Danga’, ya manang ni bay ban’en nib fel’ ni bayi buch. (John 11:3, 4) Yugu aram rogon ni manang e re n’em, machane ki thamiy e kireban’ ni bochan e kem’ be’ nib t’uf rok.

⁶ Kireban’ ni tay Jesus e ma pi’ e athamgil nga lanin’dad. Ya be dag ngodad ni Jesus nge Jehovah ni Chitamangin e ri dubrow e yam’. Machane rayog rok Jehovah ni nge gel ko re toogor nem! Ere, ngad guyed ko uw rogon ni ke pi’ Got gelngin Jesus ni nge rin’ e re n’ey.

7, 8. Mang fan ni dakuriy ban’en ni be athapeg e girdi’ u nap’an ni yibe n’en ni ngan faseg Lazarus ko yam’? Mang e rin’ Jesus?

⁷ Kan chibgiliy Lazarus nga lan ba yiy, ere yog Jesus ni ngan chuweg fare gaf i malang ni kan ning ko re yiy nem. Me yog Martha ni dab ni chuweg, ya ke gaman aningeg e rran ni kan k’eyag ma dabisiy ni ke tabab ni nge kireb. (John 11:39) Ra lemnag e girdi’ ma gowa dakuriy ban’en nrayog ni ngan rin’.

⁸ Machane min chuweg fare gaf i malang, me pong Jesus nib ga’ laman ni gaar: “Lazarus, moy nga wen!” Mang e buch? “Yib fare yam’ nga wen.” (John 11:43, 44) Aygum lemnag gelngin e felfelan’ ni tay e pi  girdi’ nem. Ya yad manang ni ke yim’ Lazarus machane chiney e ke fas ma keb i sak’iy nga fithik’rad. Ur lemnaged ni dabiyog ni nge buch ban’en ni aram rogon. Ere, dabisiy ni boor i yad e yan i gumuchmuch ngak Lazarus u fithik’ e felfelan’. Kan gel ko yam’!

9, 10. (a) Uw rogon ni dag Jesus e gin ni yib gelngin riy nge faseg Lazarus ko yam’? (b) Mang angin nra yib ngodad ni faan gad ra beeg murung’agen e fas ko yam’ u Bible?

⁹ De yog Jesus ni ke rin’ e re maang’ang nem u gelngin. Meybil rok ni tay u m’on ni pining Lazarus ni ngeb nga wen e ba gagiyel riy ni Jehovah e ir e ke faseg e re yam’ nem. (Mu beeg e John 11:41, 42.) Ku boor yay ni fanay Jehovah gelngin ni nge faseg boch e girdi’ ni kar m’ad. Fas ko yam’ ni tay Lazarus e reb ko fa mereb i fas ko yam’ ni bay u Bible. * Gad ra fil murung’agen e pi n’ey ma gad ra felfelan’. Gad ra fil riy ni Got e de laniyan’, ya i faseg e yam’ nib muun ngay e piin fel’ yangaren, nge piin ni pilibthir, nge pumoon nge ppin, nge piin yad piyu Israel, nge piin ni gathi yad yu Israel. Be yog e pi thin nem gelngin e felfelan’ ni yira tay ko pi n’ey. Bod nnap’an ni faseg Jesus bochi pin ko yam’ mi ri gin e gallabthir rok ni ‘ke balyangan’row!’ (Mark 5:42) Kari felfelan’nag Jehovah fagal labthir ma dab ra pagew talin.

¹⁰ Riyul’ ni piin baaram ni fasegrad Jesus ko yam’ e munmun mu kur m’ad. Ere gur, ba m’ay fan ni kan fasegrad ko yam’? Danga’, ya pi thin nu Bible nem e be micheg ngodad boch e machib nib ga’ fan maku be pi’ e athap ngodad.

11. Mang e be micheg e fas ko yam’ ni tay Lazarus u murung’agen fare thin ni bay ko Eklesiastes 9:5?

¹¹ Be yog e Bible ni “piin nib yam’ e dariy ban’en ni yad manang.” (Eklesiastes 9:5, BT) Gathi yad bay u bang ni ka yad ba fas. Fare thin u murung’agen Lazarus e be micheg nriyul’ e re n’ey. Nap’an ni fas Lazarus ko yam’, ma gur, i weliy murung’agen ban’en u tharmiy ngak e girdi’ ara k’aring e marus ngak e girdi’ u murung’agen e nifiy ndabi math biid? Danga’, dariy ban’en ni yog Lazarus ni aram rogon u Bible. Ya nap’an fa aningeg i rran ni immoy nib yam’ ma ‘dariy ban’en ni manang.’ Ya kem’ ni gowa ke mol.​—John 11:11.

12. Mang fan nrayog ni nge mich u wun’dad nriyul’ ni fas Lazarus ko yam’?

¹² Fare thin ni murung’agen Lazarus u lan e Bible e be fil ngodad nre fas ko yam’ nem e ba riyul’, gathi ba yat. Nap’an ni faseg Jesus Lazarus ko yam’ ma boor e girdi’ ni guy. Mus ngak e pi tayugang’ ko teliw ni yad ma fanenikay Jesus e rogned nriyul’ e re maang’ang nem. Ya lungurad: “Mang e ngad rin’ed? Ya ke yoor e maang’ang ni ke ngongliy e re moon nem!” (John 11:47) Boor e girdi’ ni ranod ngar guyed Lazarus ni ke fas ko yam’. Ma aram miki yoor i yad e mich Jesus u wan’rad. Kar guyed nre n’em ni ke buch ku Lazarus e aram e mich riy ni Got e ke l’og Jesus. Re n’ey e k’aring boch e pi tayugang’ ko teliw rok piyu Jew ni ngar lemnaged ni ngar lied Jesus nge Lazarus.​—John 11:53; 12:9-11.

13. Mang e mich riy nrayog rok Jehovah ni nge faseg e yam’?

 ¹³ Gur, de puluw ni nge mich u wan’uy ni bay e fas ko yam’? Danga’, ya machibnag Jesus nra taw nga ba ngiyal’ ma “gubin e yam’ ni bay u lan e low” e yira fasegrad. (John 5:28) Jehovah e Ir e Ke Sunmiy urngin e yafas. Ere, gur ba mo’maw’ ni nge mich u wan’uy nrayog ni ngki sunmiy e yafas bayay? Fas ko yam’ e ra yan u rogon e piin ni bay u laniyan’ Jehovah. Rayog ni nge dabi pag Jehovah talin e piin ni kar m’ad ni yad ba t’uf rodad, fa? Boor ni boor e t’uf u lan e lang, machane gubin e pi t’uf nem ni manang Got fithingan! (Isaiah 40:26) Ere, dabi pagtalin e piin nib t’uf rodad ni kar m’ad, ma rayog rok ni nge fasegrad ko yam’.

14, 15. Uw rogon e fas ko yam’ u wan’ Jehovah nrogon ni yog Job?

¹⁴ Ere gur, baadag Jehovah ni nge faseg e yam’? Be yog e Bible nri baadag Jehovah ni nge faseg e yam’. Job ni ir be’ nib yul’yul’ e fith ni gaar: “Faanra yim’ be’, ma gur ku rayog ni ngki fos bayay?” Be weliy Job murung’agen ni nge son u lan e low ko yam’ nge yan i mada’ ko ngiyal’ nra faseg Got ko yam’. I gaar ngak Jehovah: “Ma aram e bay mu pong, mu gu fulweg, ma bay gu fel’ u wan’um, i gag e en ni mu sunmiyeg.”​—Job 14:13-15, BT.

¹⁵ Am lemnag! Ri be sonnag Jehovah e ngiyal’ nra faseg e piin ni kar m’ad. Gathi gad ra felfelan’ ni ngad nanged ni aram rogon e n’en ni be lemnag Jehovah? Machane, uw rogon e fas ko yam’ ni yira tay ko girdi’ boch nga m’on? Mini’ e piin ni yira fasegrad ko yam’, ma uw e yira fasegrad riy?

16. Uw rarogon e fayleng u nap’an ni yira faseg e girdi’ ko yam’?

¹⁶ Thin nu Bible ni murung’agen e piin ni un fasegrad ko yam’ kakrom e boor ban’en ni gad ra fil riy u murung’agen e fas ko yam’ ni yira tay ko girdi’ boch nga m’on. Piin ni fasegrad ko yam’ kakrom e ra mada’gad e piin nib t’uf rorad bayay. Ku arrogon e fas ko yam’ ni yira tay ko girdi’ boch nga m’on. Machane kab gel e fel’ riy ko bin kakrom e fas ko yam’. Kad filed faram ko Guruy ni 3 nib m’agan’ Got ngay ni nge paradis e fayleng ni ga’ngin. Ere, nap’an ni yira faseg e girdi’ ko yam’ ma dakuriy e mahl, nge kireb, nge m’ar u fayleng. Ma aram e rayog ni ngar pared ni manemus u roy u fayleng u fithik’ e gapas nge felfelan’.

17. Mini’ e piin ni yira fasegrad ko yam’?

¹⁷ Mini’ e piin ni yira fasegrad ko yam’? I yog Jesus ni “gubin e yam’ ni bay u lan e low ni bayi rung’ag laman [Jesus], mi yad yib u lan e low rorad nga wuru’.” (John 5:28, 29) Ku be yog e Revelation 20:13 ni gaar: “Ma aram me pi’ e day e pi yam’ ni ba’ riy. Ma yam’ nge gin ni ma par e piin ni kar m’ad riy e kur piew e yam’ ni ba’ rorow.” (Mu guy fare article ni bay ko Yugu Boch e Thin ni kenggin e “Mang e Sheol nge Hades?”) Urngin e piin ni yad bay u rom e goo yira fasegrad ko yam’. I yog apostal Paul ni gaar: “Be l’agan’mad ngak Got ni bayi faseg urngin e girdi’ ko yam’, ni tin nib fel’ [“mat’aw,” NW] nge tin nib kireb [“de mat’aw,” NW].” (Acts 24:15) Mang fan e re thin nem?

18. Mini’ e piin ni yad ba muun ko tin nib “mat’aw” e girdi’ ni yira fasegrad ko yam’? Mang angin e re athap ney ngom?

¹⁸ Girdi’ ni gad ma beeg murung’agrad u Bible ni ur moyed u m’on ko ngiyal’ ni yib Jesus nga fayleng e yad ba muun ko tin nib “mat’aw” e girdi’. Dabisiy nra  yib ngan’um Noah, Abraham, Sarah, Moses, Ruth, nge Esther nge ku boch e girdi’. Boch e pi girdi’ ney nib gel e michan’ rorad ngak Got e kan weliy murung’agrad ko guruy ni 11 ko Hebrew. Machane, pi tapigpig rok Jehovah ni yad be yim’ e ngiyal’ ney e ku yad ba muun ko tin nib “mat’aw” e girdi’. Ere, dab da rusgad ni gad ra yim’ ya kad nanged murung’agen e athap ko piin kar m’ad.​—Hebrews 2:15.

19. Mini’ e piin ni ka nog e tin “de mat’aw” e girdi’ ngorad? Uw rogon nra ayuweg Jehovah e pi girdi’ ney?

¹⁹ Machane, uw rogon e piin ndar pigpiggad ku Jehovah ara dar folgad rok ni bochan e dar nanged murung’agen? Pi girdi’ nem ni ka nog e tin “de mat’aw” e girdi’ ngorad e dabi pag Got tilrad ya ku yira fasegrad ko yam’ min pi’ e tayim ngorad ni ngar filed murung’agen e bin riyul’ e Got mi yad pigpig ngak. Yira faseg e piin ni kar m’ad u lan bbiyu’ e duw me yag nra uned ngak e piin ni yad ba yul’yul’ ngar pigpiggad ngak Jehovah u fayleng. Rib gel e felfelan’ ni yira tay e ngiyal’ nem. Be yog e Bible e Rran ko Pufthin ko re ngiyal’ i n’em. *

20. Mang e Gehenna? Mini’ e piin nra yan ngaram?

²⁰ Ere gur, be yip’ e re n’ey fan ni gubin e girdi’ ni kar m’ad ma yira fasegrad ko yam’? Danga’, ya be yog e Bible ni boch e girdi’ ni kar m’ad e yad bay u Gehenna, ni kan piliyeg ko ken nu Waab e Bible ni “fithik’ e nifiy.” (Luke 12:5) Gehenna e aram fithingan ba teloor ni immoy u wuru’ e binaw nu Jerusalem kakrom. Aram e gin ni yima n’ag e yam’ nge dow ngay ni  ngan urfeg. Yigoo girdi’ ni ma lemnag piyu Jew ndariy rogon ni ngan k’eyagrad fa ngar fasgad ko yam’ e yima yin’rad ngaram. Ere, Gehenna e be yip’ fan e math mit, ni aram e piin ni yad ra yan e ngaram e dab kun fasegrad ko yam’. Yugu aram rogon nra un Jesus i pufthinnag e piin ni kab fas nge piin ni kar m’ad, machane Jehovah e ir e ra dugliy e piin ni yira faseg nge piin ndab ni faseg. (Acts 10:42) Ya dabi faseg Jehovah e piin ni manang ni yad ba kireb ma dubrad ni ngar thilyeged e ngongol rorad.

21, 22. (a) Ku mang reb e fas ko yam’ ni bay? (b) Mini’ e en th’abi som’on nni faseg ko yam’ me yan nga tharmiy nib kan?

²¹ Bay yugu reb e fas ko yam’ ni be weliy e Bible murung’agen, ni aram e piin ni yira fasegrad ko yam’ mar ngal’gad ni kan mi yad yan nga tharmiy. Kemus ni taareb e fas ko yam’ ni aram rogon ni be weliy e Bible murung’agen, ni aram e fas ko yam’ ni tay Jesus Kristus.

²² Tomuren ni yim’ Jesus ni Fak Got nib yul’yul’, ma de pag Jehovah ni nge par u lan e Low ko Yam’. (Psalm 16:10; Acts 13:34, 35) Ya faseg Got ko yam’, machane gathi kab girdi’. I yog apostal Paul nni k’eyag Kristus nib ‘dowef ko girdi’’ machane min faseg nga reb e dowef ‘ni gathi downgin e girdi’.’ (1 Korinth 15:42-50.) Riyul’ nrib maang’ang e re n’em ni kan faseg Jesus ngki mang ba kan nib gel gelngin bayay! (Mu beeg e 1 Korinth 15:3-6) Jesus e ir e som’on nni faseg ko yam’ nge yan nga tharmiy nib kan. Machane, ka bay boch e girdi’ nga tomuren.​—John 3:13.

23, 24. Mini’ e piin ni girdien fa “chi ulung” rok Jesus, ma yad in u gubin?

 ²³ U m’on ni yim’ Jesus me yog ngak pi gachalpen ni yad ba yul’yul’ nra yan nga tharmiy nge “ngongliy tagil’rad.” (John 14:2) Piin ni yad ra yan nga tharmiy e yog Jesus fa “chi ulung” ngorad. (Luke 12:32) Uw urngin e chi ulung i Kristiano nib yul’yul’ nem? Rogon ni yog apostal John u Revelation 14:1 e gaar: “Faan gu sap ma ba’ fare Fak e Saf nib sak’iy nga daken e burey ni Zion; ni yad raay nge aningeg i ragag nge aningeg i biyu’ e girdi’ ni ba’ fithingan rorad nge fithingan e Chitamangin ni kan yoloy nga peri’rad.”

²⁴ Chi ulung i Kristiano ney ni 144,000 urngirad u gubin nib muun e pi apostal rok Jesus ngorad e yira fasegrad ko yam’ nga ranod nga tharmiy ni yad ba kan. Wuin e ke tabab e re fas ko yam’ ney? I yog apostal Paul nra buch e re n’ey ko ngiyal’ ni bay Kristus. (1 Korinth 15:23) Ga ra fil ko guruy ni 9 ni gad bay ko re ngiyal’ i n’em. Ere, tin ni ka bay i girdien e re 144,000 i girdi’ nem e yugu yad ra yim’ ma ka chingiyal’ nem mi yad yan nga tharmiy. (1 Korinth 15:51-55) Machane, tin ni ka bay e girdi’ e yad ra yim’ ma bay e athap rorad ko fas ko yam’ u Paradis u fayleng.

25. Mang e gad ra fil ko bin migid e guruy?

²⁵ Rriyul’ nra chuweg Jehovah e yam’ ni toogor rodad me chuw ndariy n’umngin nap’an! (Mu beeg e Isaiah 25:8.) Machane, sana ga ra fith ni nge lungum, ‘Mang e ra rin’ e piin ni yad ra yan nga tharmiy?’ Yad ra mang bang ko Gagiyeg rok Got ara am rok u tharmiy. Bin migid e guruy e gad ra fil riy murung’agen e re am nem.