DER yog e Bible e rofen nni gargeleg Jesus riy. Machane, boor ban’en ni ke micheg nriyul’ ndan gargeleg Jesus ko December.

 Am lemnag rogon e yafang u Bethlehem u nap’an e December. Ra taw ko pul ni ma yog piyu Jew e Chislev ngay (ni aram e November ara December) mab gel e garbeb nge n’uw. Ma bin migid e pul ngay e Tebeth (ni aram e December ara January). Aram e re pul nth’abi gel e garbeb riy, ma yu ngiyal’ e ma aw e ayis u daken e burey. Ngad guyed e n’en be yog e Bible u murung’agen e yafang ko gin’em.

I yog Ezra ni be’ ni yoloy reb e babyor u Bible nnap’an e pul ni Chislev mab gel e garbeb nge n’uw. Tomuren ni weliy murung’agen e girdi’ ni kar muulunggad nga Jerusalem “ko bin mereb e pul [ni Chislev] ko bin reliw’ e rran ko re pul nem” me yog ni yad be “t’on” ni bochan e be aw e n’uw nib gel. I weliy fapi girdi’ ni kar muulunggad murung’agen e yafang ko re ngiyal’ i n’em ni lungurad: “Be aw e n’uw nib gel. Dabkiyog ni nguud sak’iygad u roy u wen ni aray rogon.” (Ezra 10:9, 13, BT; Jeremiah 36:22) Ere, aram fan ni piin ni ma par ko pi nam ni bay u tooben yu Bethlehem e yad ma yan ra ted e gamanman rorad nga tafen e gamanman u m’on ni nge aw e lumor u nap’an e December!

 Machane be yog e Bible ni immoy e pi tachugol saf u wen ni yad be matanagiy e saf rorad ko re nep’ i n’em nni gargeleg Jesus riy. I yog Luke ni be’ ni yoloy reb e babyor u Bible ni ngiyal’ nem e bay e pi tachugol saf “u daken e ted” nib chugur nga Bethlehem ni yad be matanagiy e gamanman rorad. (Luke 2:8-12) Mu tay fanam i yan riy ni bay e pi tachugol saf u wen ni yad be matanagiy e saf rorad. Ere, ga be lemnag ma rayog ni ngan par u wen ko ngiyal’ nib gel e garbeb nge n’uw u Bethlehem ko pul ni December? Ba mudugil ndabiyog. Ere, ireray e mich riy ni dan gargeleg Jesus ko pul ni December.

Boor ban’en ni be yog e Bible u murung’agen e rofen ni yim’ Jesus riy, machane ri buchuuw ban’en ni be weliy u murung’agen e ngiyal’ nni gargeleg riy. Re n’ey e ra yibnag ngan’dad e thin rok Solomon ni Pilung ni gaar: “Ba ngachal nib fel’ e kab fel’ ko gapgep nrib fel’, ma rorran ni yim’ be’ riy e kab fel’ ko rorran nni gargeleg riy.” (Eklesiastes 7:1, NW) Ere, dab da gingad ngay ni boor ban’en ni be weliy e Bible u murung’agen e machib nge yam’ ni tay Jesus, ma buchuuw ban’en ni be weliy u murung’agen e ngiyal’ nni gargeleg riy.